Read Karang Mbete Luk 15 Bible Online

Mbete Luk 15 - Karang bible

Mbete Luk 15

¹Nzuk-mbu̧h lampohri ke nzuk suya a ɓoruri gi ta̧w Zezu ƴo lah ni.

²Fariziri ke nzuk-sɔk mbete bolkusol Ŋgerzahri ba, ku su̧h ɓay ké sakra haniri ɓahri se : « Gunwo̧ro-ay mgba nzuk suyari ndɔk seɗe. Ke ƴo su̧ fe ziŋ niri. »

³Bale Zezu ɓah lawɓayay hi̧ niri :

⁴« Ké sakra woiri-ay a ge mí ƴo ke sami ɓa sɔɗ mí mbew zi dale, ke ta ƴah sami a zi-u ra ya le ? Nzuk sami ɓay poŋ sami a bon toŋndɔk mbew falu toŋndɔk mbew ké gel-ƴah lakna, ke tɔ́r si ƴah a a̧y ké zi ra kpu̧ru kpu̧ru ke ziŋu.

⁵Ke ziŋ sami ra dale, ke mbi suk ké bɔk sol ye ke mun rihna.

⁶Gelke mu ka̧h puh dale, mu ɗí ya̧h wori ke bɔh puh wori ɓah : “Í gi wuri laɓ mun rihna ziŋ mi ɓay fe le, sami bi ké zi ra mi zi-ziŋ.”

⁷Mi ƴo ɓah hi̧ wuri ɓahri se, nzuk suya mbi law ye ké tul suya ma fal el kan law ye tul Ŋgerzah le, záy mun ké nunmbam ɓay la-laɓ ɓay tul nzuk a mbewu-aw kaŋ pi. Mun rihna ɓay ƴo tul nzuk a mbewu-aw poŋ nzukri a bon toŋndɔk mbew falu toŋndɔk mbew kú-u ƴo mbi bolkusol Ŋgerzah laɓ keni pihna mí ɗaka mbí law woyri ké tul suya ma fal el si ta̧w Ŋgerzah ta ta̧w woyri ya.

⁸Kaŋaw pi mí wu̧y a suŋ mí ƴo ke lari ɓa boh mí zi mbew dale, ke ta gbah gel ke nzaku nzaku, ya le ? Ke ɓay ɓaŋ hɔrɔ ta lampe, ke tak ɓil vul kpu̧ru kpu̧ru ke ziŋu gaŋ.

⁹Gelke mu ziŋ dale, mu ɗí ya̧h wori ke bɔh puh wori ɓahri : “Í gi wuri laɓ mun rihna ziŋ mi ɓay fe le, lari bi ké mi zi ra mi zi-ziŋ.”

¹⁰Mi ƴo ɓah hi̧ wuri ɓahri se, nzuk suya mbi law ye ké tul suya ma fal mí el kan law ye tul Ŋgerzah le, tem nzak pihna Ŋgerzahri ƴo zay mun ɓay tul nzuk a mbewu-aw ra kaŋ pi. »

¹¹Zezu el ɓahri se : « Nzuk a hani mbew ƴo ke gun wo̧rori ɓa seɗe.

¹²Toŋnafal ɓah hi̧ bah ye ɓahri : “Baah, mú kehr fe kaŋpele ké mi ɓay ya̧-u hi̧ mi wara.” Bah woyri kehr fe ye hi̧ niri seɗe mbɔk.

¹³Nam kal ndi̧ bale, toŋnafal ra fa̧h fe kaŋpele yeri-aw riw, mí ke tɔr keni si puh sa̧wnzuk a ɓoruri. Ké gelaw mí ke ɓeɓ fe yeri va̧h.

¹⁴Lari ye ɔh riw riw. Ɗaka bahpihya lih gbiɓ ké tusiɓa-aw dale, a ye kara ɗaka titil i ni wara.

¹⁵Mí ke si mbɔhlɔ mun ye ké ta̧w nzuk puh a hani ɓa mgbal nzuku. Bahgaŋ ye ba, pih ni si kɔr kɔsɔŋri[60].

¹⁶Ɗaka ɓay su̧ fe su̧na kɔsɔŋri i ni. Fe su̧na kɔsɔŋri, ke mah su̧-u kara ku hi̧ ni ya.

¹⁷Wara mí law ye gi guh ni. Ke ɓahri se : “Gun-laɓ pihna bah biri su̧ fe ɓa suki mbah ɓil woyri tuɓ tuɓ poŋ tɔru. Mí a bi bale mi kaɓ ɓay hu ɗaka mgbumay.

¹⁸Mi úr, mi él si ta̧w bah bi. Mi ɓáh hi̧ ni ɓahri : Baah, mi laɓ Ŋgerzah suya, mi laɓ suya ké nun woiri pi.

¹⁹Tú mi ɓa gun woiri ra mi mah ya. Í mbi mi ɓa gun-laɓ pihna woiri kandɔk nzuk a ɓoruri ké i mbi ɓa gun-laɓ pihna woiri kaŋ.”

²⁰Ke ur mí tɔr gaŋ ba. Ke mbi ful ma ta̧w bah ye. Ke ƴo mahful ɓa ɗih-u ke puh ƴo gina bale, bah ye ko ni. Law bah ye sa̧h ɓay tul gun ye ra, mí ke kpa̧h ɗukna si mgba ni giriɓ hu̧hru ni ma haŋ ye mí ul suk ye.

²¹Gun ye ba, ah nzak ye ɓahri : “Baah, mi laɓ Ŋgerzah suya, mi laɓ suya ké nun woiri pi. Tú mi ɓa gun woiri ra mi mah ya.”

²²Bah ye ba, ɓah hi̧ gun-laɓ pihna yeri ɓahri : “Í si gah, í mbi mah gar a suki gi ndoh ni. Í ɓaŋ ɓarmandɔk ndoh ndɔk ye, í fa̧h sabɔk ndoh bɔk ye pi.

²³Í si mgba gun nday a numu, í vbeh, náh su̧, náh zay wuri mun ɓay fe le,

²⁴gun bi hu hul buma ké kehr mi ziŋ ni-ay, mí ke el gi kaɓ ziŋ mi. Ke zi-zi mí-i ziŋ ni da.” Wara mí ku gi zay mun ke law rihna.

²⁵Ŋgergun ba, ƴo waka. Ke ƴo el ma puh, ke ƴo ɗih ya bale, ke lah siŋri kú-u ɗi, ndayri kú-u nda mgbe goɗi goɗi.

²⁶Ke ɗi gun a hani, mí ke vbi ni ɓay sa̧w fe ké ƴo kalna ra.

²⁷Gun ra ɓahri : “Toŋnafal woiri gi-gi, mí bah woiri vbeh gun nday a numu ɓahri se, ke ziŋ gun ye ɓa suki.”

²⁸Kaŋaw mí ŋgergun ɗi here mgbiŋriŋ. Ke saŋ kerpuh. Bah ye ba, ti̧h si ɓay gɔl ni.

²⁹Mí ŋgergun ɓah ɓay hi̧ bah ye ɓahri : “Mú lah. Mbihmbam ŋgi̧-ŋgi̧ mí-i ta̧h ké tul wo ɓa mgbal. Bɔk mbew bi gel-mba nzak wo ya. Mí gun guy mbew ɓay mí laɓ mun rihna ziŋ ya̧h biri, mi ziŋ ya dih.

³⁰Gun wo-aw a ye ké su̧ ŋgerna wo ké tul wu̧y nunpukiri mí el gi le, mu vbeh gun nday a numu hi̧ ni ley ?”

³¹Mí bah ye ɓahri : “Gun bi, kpatara mu ƴo ziŋ mi. Fe bi gbam ɓa fe wo.

³²Záy mun ke law rihna su-su ɓay fe le, hul buma ké kehr yi̧n wo ziŋ mi, i da, mí ke el gi kaɓ ziŋ mi. Ke zi-zi mí-i ziŋ ni da.” »