Read Karang Mbete Luk 16 Bible Online

Mbete Luk 16 - Karang bible

Mbete Luk 16

¹Zezu ɓah hi̧ nzuk-dih fal yeri kara pi. Ke ƴo ɓahri : « Nzuk fe ziŋna mbew hi̧ nzuk ye a hani pihna-ko fal fe ziŋna ye. Ɓay kó fal fe ziŋna ye ra toh suk ye. Nzukri ɓahri, nzuku ƴo ɓeɓ fe ziŋna bahgaŋ ye.

²Dale bahgaŋ ye ɗi ni mí ɓahri : “Ɓay fe mí-i lah ké tul wo-ay le ? Mú el ke mbete-ki̧ fal feri hi̧ mi. Pihna wo ɓay ko fal fe ziŋna biri kuŋ da.”

³Nzuk-ko fal fe ziŋna ba, ɓah ma law ye ɓahri : “A a̧w wa, mi láɓ ani ɓáy le ? Ŋgerna pa-pay bi ta-a. Rah ndɔk-goŋ fe kara ɓa su̧hru pi.”

⁴Ke el ker ɓay ɓahri se : “Aah. Mi tu fe ké mi laɓu da. Dara bɔk bi ɓá nda siɓa le, mi hí̧ nzukri ɓá mgba mi ma ta̧w woyri.”

⁵Bale nzuk-ko fal fe ziŋna ra ɗi nzukri ké mbɔl bahgaŋ ye vbeh ɓil mbete ra mbew mbew gbam. Ke vbi nzuk a titilu ɓahri : “Mbɔl bahgaŋ bi ka̧h ani mí ké tul wo le ?”

⁶Nzuku ɓah : “Mbɔlu ɓa num litere bon say bon say gel sɔɗ (3.000)[61].” Nzuk-ko fal fe ziŋna ra ɓahri : “Mbete fe hahna wo mí na-ay. Kaɓ siɓa. Mú vbeh ɓa gah-u ɓahri, mbɔlu ɓa num litere bon say bon say gel bon ndiɓi (1.500).”

⁷Nzuk-ko fal fe ziŋna ra ɗi nzuk a ɓoru vbi ni ɓahri : “A wo, mbɔl wo ka̧h ani le ?” Nzuku ɓah : “Mbɔlu ɓa ɓɔl naŋ sɔɗ sɔɗ seɗe ke bon ndiɓi (250)[62].” Nzuk-ko fal fe ziŋna ɓahri : “Mbete fe hahna wo mí na-ay. Mú vbeh mbɔlu ɓa ɓɔl naŋ sɔɗ sɔɗ seɗe.”

⁸Bahgaŋ ɓá ko fe laɓna nzuk-laɓ ni suya ra le, ke pir ni ɓay kerlaw ye. Ɓayay sɔk ɓahri se, nzuk tukalari ru̧ mba gun gel tehnari ke kerlaw. Ku tu hi̧ nzuk mbaŋ woyri gun tukalari ɓá mgba niri.

⁹A woiri ba, mi ƴo ɓah hi̧ wuri ɓahri se, í mbi fe ziŋna tukala mgba ya̧h keni. Sew ké fe ziŋna tukala ɓay ɔh dale, ku mgbá wuri ndɔk seɗe ké hɔndalri ké na ɓa ŋgɔh ké ta̧w Ŋgerzah.

¹⁰Nzuk tu mgba sa̧w fe a ndi̧ le, ke tu mgba sa̧w fe a luki pi. Nzuk su̧ fe nzuk a ɓoru ndi̧ ma ɓil le, ke gahla fe a luki hu̧m hu̧m pi.

¹¹Kandɔkaw mí mu ƴo tul kó fal fe ziŋna tukala-ay ke gelu ya le, a ge ɓay ku̧ fe a kpakpaŋuri ndɔk wo ɓáy lo ?

¹²Mu mgba sa̧w fe nzuk ya le, nzuku ɓay wal fe ziŋna hi̧ mu ɓa fe wo ɓáy lo ?

¹³Mgbal ké hi̧ tul ye hi̧ bahgaŋ seɗe ta-a. Mgbal ra ɓay fu̧y nzuk a mbewu, ke él sa nzuk a ɓoru. Ke ɓay ƴo ke nzuk a mbewu ke law mbew, bahgaŋ a ɓoru ba, ke él kpȩhr ni. Kandɔkaw mí mahful ɓay mú mbu̧h fe ziŋna tukala ke Ŋgerzah ta-a. »

¹⁴Fariziri ƴo ri pi. Ku ɓa nzuk ɗaka lari, mí ku ko Zezu ɓa kɔk nzuk.

¹⁵Zezu ɓah hi̧ niri ɓahri : « A woiri i ƴo sɔk mun woiri hi̧ nzukri ko wuri ɓa nzukri ké ƴo tul bolkusol Ŋgerzah, mí Ŋgerzah ko law woiri ko. Ɓay fe ké nzukri ko ɓa fe a kpakpaŋu le, fa̧h mun Ŋgerzah zir zir ɓa fe ra̧m.

¹⁶Ur ke sew Moyiz ke sew gun nzak pihna Ŋgerzah a ɓoruri si ka̧h sew Za̧h batisi, ku ka-kah ɓaysuki lák mbay Ŋgerzah. Mí a ge ge le ƴo ŋgu̧h lɔkɔkɔ ɓay rih ɓil lák mbayu[63].

¹⁷Ɓay hi̧ nunmbam ke tusiɓa ɓá kal le, se ya. Mí se-se ɓay hi̧ gun fe vbehna a ndi̧ kú-u zel ɓil mbete bolkusol Ŋgerzah ɓá zi.

¹⁸Nzuk a suŋ suŋ gbam ké ni̧h wu̧y ye mí el ya̧ wu̧y a ɓoru soh gelu le, salɓay nunpuki ta tul nzuku. Nzuk a a̧y ké ya̧ wu̧y ké wah ye ni̧h ni ba, salɓay-mbi wu̧y wo̧ro ta tul nzuku.

¹⁹Nzuk fe ziŋna mbew, ke ndoh gar lari ké ndu̧y mgbelek mgbelek. Namri gbam ɓa yi̧hna ké puh ye.

²⁰Ko̧hko a hani mbew ƴo ri, riŋ ye ɓa Lazar. Ku poŋ ni ɓu polkɔkɔ nzuk fe ziŋna ra. No̧kori kum mun ye gberek gberek.

²¹Ɗaka-dam bukma fe su̧na ké ga̧y ku̧ huh tabele nzuk fe ziŋna laɓ ni. Wara mí gayri ké kɔr kerpuh ba, gi sahla no̧ko ye.

²²Nzuk ko̧hko-aw hu dale, tem nzak pihna Ŋgerzahri gi maŋ ni si záh. Ke kaɓ ta̧w Abaraham ké nunmbam. Nzuk fe ziŋna kara hu pi, mí nzukri mbek hul ye.

²³Wara mí nzuk fe ziŋna ra kaɓ ɓa záh ɓil hɔrɔ. Koseh kal tul ye, mí ke ɔr nun bale, ke ko Abaraham ké kaɓ sa̧-aw, ke ko Lazar kaɓ ɓel Abaraham pi.

²⁴Mí ke vba̧ nzak ɓeleŋ ɓahri : “Bah Abaraham, mú mgba in ziŋ mi ge. Mú pih Lazar ɓay ké laɓ mbih ke gun ndɔk ye gi pa̧rma kusol bi ɓay fe le, koseh hɔrɔ-ay kal ŋgɔŋ.”

²⁵Bale Abaraham ɓahri : “Gun bi, mú ker ɓay sew ké mu kaɓ tukala ra mu ƴo su̧ fe suki wori. Lazar ba, kaɓ ɓil koseh. Aŋay le, law ye voh da. A wo ba, koseh ké kal ŋgɔŋaw ƴo laɓ mu mo̧r mo̧r wara.

²⁶Keni-aw kara baw hereŋ kehr na ke haniri keh-kehr. Nzuk yih ɓay ɗer si ta̧w woiri le, sina-aw ta-a. Mahful ké nzuk ɓay ur ké ta̧w woiri gi ta̧w wah-ay ta-a pi.”

²⁷Bale nzuk fe ziŋna ɓahri : “Mí kaŋ le bah Abaraham, mi goŋ mu, mú pih Lazar ɓá si kerpuh bah bi.

²⁸Ké si te-teh ɓayu ɓa teh-u hi̧ yi̧n biri ké ndiɓi-aw rɔkɔ a woyri kara kú ɗer gi gel koseh bi-ay.”

²⁹Mí Abaraham ɓahri : “Ku ƴo ke mbete bolkusol Ŋgerzah ké Moyiz vbeh ke mbete gun nzak pihna Ŋgerzah a ɓoruri pi. Kú lah nzak woyri.”

³⁰Nzuk fe ziŋna el ɓahri : “Kaŋ ya. Bah Abaraham, se-se ɓay kú lah nzak woyri. Wara le nzuk ti̧h ke záh mí ti̧h nun woyri le, ku mbí law woyri ké tul tukala ma fal, ku él kan law woyri tul Ŋgerzah.”

³¹Abaraham ba, ɓahri : “Ku sa lah nzak Moyiz ke nzak gun nzak pihna Ŋgerzahri ya le[64], nzuk ti̧h ke puh záh kara ku ta ya̧ ɓay ye ya pi.” »