Read Karang Mbete Luk 17 Bible Online

Mbete Luk 17 - Karang bible

Mbete Luk 17

¹Zezu el ɓah hi̧ nzuk-dih fal yeri ɓahri : « Se-se ɓay gboh nzuk hɔ́l ndaw lihna hi̧ nzuk a ɓoruri ɓá saŋ riŋ bi. Mí keni-aw kara koseh ɓa a ye nzuk-hɔl ndawaw.

²Ɓay koseh-u ɓá se ni ya le, ŋgá̧h baw kasaw ké sol ye mbi ni vbu ɓil mahmbih su mba poŋ ni ké mgba gun a mah gelu ɓá saŋ riŋ bi.

³Í mgba tul woiri ɓa suki. Gelke yi̧n wo laɓ suya le, mú ɓah ɓa teh-u hi̧ ni, ké lah. Ke mbi law ye ké tul suya ma fal le, mú sel ni ɓayu.

⁴Gelke-e laɓ mu suya bɔk toŋndɔk say ɓil nam mbew, mí ke gi ta̧w wo bɔk toŋndɔk say ɓahri, law ye se ni ɓayu le, mú sel ni ɓayu kaŋ kaŋ bɔk toŋndɔk say. »

⁵Kaŋ mí gun nzak pihna Ŋgermbayri ba, ɓah hi̧ ni a ye Gaŋ tul feri riw ɓahri : « Mú hi̧ kanlaw wah ɓá ŋger ma pol. »

⁶Mí Gaŋ tul feri riw ɓahri : « Gelke law woiri ƴo mbew ke law Ŋgerzah mí eŋ ti̧hri ŋgahla, mí i ɓah hi̧ kpuh ké ƴo-aw ɓahri : “Mú lu ke sa̧w wo si ɓar sa̧w ké ɓil mahmbih-aw” le, kpuh-aw ɓay lah nzak woiri gaŋ ba.

⁷Gelke gun-laɓ pihna wo ur ke gel-pay nday mini gel-kɔr sami le, a ge ké sakra woiri ɓay ɓah hi̧ ni ɓahri : “Gun bi, mú gi gah, nah su̧ fe,” le ?

⁸Uwa, mu ta ɓah kaŋ ya. Wara le mu ɓay ɓah hi̧ gun-laɓ pihna wo ɓahri : “Mú kar fe su̧na. Mú lek mun wo, mú gi ke fe su̧na-aw hi̧ mí su̧, mí nzo. Falu dara mú su̧, mú nzo nzuku a wo ɓáy.”

⁹Bahgaŋ ɓay el ke tumbɔl hi̧ gun-laɓ pihna ye le wo ? Ke ta el ke tumbɔl ya ɓay fe le, pihna gunu ɓa láh nzak bahgaŋ ye.

¹⁰Kandɔkaw pi mí a woiri i ɓa gun-laɓ pihna. Nam ké i mbi ra bolkusol Ŋgerzah laɓ ɔh riw le, í ɓahri se : “Nah ɓa gun-laɓ pihna. Pihna ké nah laɓaw ɓa mbɔl ké tul wah.” »

¹¹Sina Zezu ma Zurusalem bale, ke kal ke mahful sekle tusiɓa Samari ke tusiɓa Galile.

¹²Ke ti̧h puh a hani, mí nzuk ndɔɓeri boh nzɔh nun ye. Ku ƴo ɓa ɗih-u tɔɓ.

¹³Mí ku ƴo vba̧ nzak ɓahri : « Gaŋ wah Zezu wo, mú laɓ law in ziŋ na ge. »

¹⁴Zezu ko niri, mí ke ɓahri : « Í si wuri ma ta̧w nzuk fe puhna Ŋgerzahri hi̧ niri, kú ko mun woiri. » Mí ku tɔr. Sina woyri bale, ndɔɓe nzom poŋ mun woyri teh peɗeɗe, saŋna-si gel fe puhna Ŋgerzah lu ké tul woyri.

¹⁵Nzuk ndɔɓe a hani-u mbew ɓá ko mun ye ké teh le, ke ta̧h el ke fal ye. Ke pir Ŋgerzah ke kusol a mgbe-u ɓeleŋ ɓeleŋ mí guɓ siɓa ké bɔk Zezu. Ke ƴo el ke tumbɔl hi̧ ni. Sa̧w tusiɓa nzuku ɓa tusiɓa Samari.

¹⁷Mí Zezu ɓahri : « Tul nzuk ndɔɓeri ké saŋna-si gel fe puhna Ŋgerzah lu ké tul woyri ɓa boh, ya le ? A tɔr nzuk a toŋndɔk mbewri-aw ba ?

¹⁸Él gi ɓay pir riŋ Ŋgerzah ko niri ya le ? Nzuk ké sa̧w ye ɓoɗay ke hȩk ye mí gi el ke tumbɔl le ? »

¹⁹Mí ke el ɓah hi̧ nzuk Samari ra ɓahri : « Ur síɓa. Mú si ɓa suki. Kanlaw wo ké tul bi ya̧ mu ke ndɔk hul ya̧-ya̧. »

²⁰Fariziri vbi Zezu ɓay seh suŋ mí lák mbay Ŋgerzah ɓay ya̧ gel le ? Ke yih nzak woyri ɓahri : « Lák mbay Ŋgerzah ra, nzuk ta so nun dara mí ko keni ya.

²¹Nzuk ké ɓay ɓahri : “Í ko puh lakna Ŋgerzah mí na-ay,” ta-a. Nzuk kara ta ɓahri : “Í ko puh lakna ye ké ƴo sa̧-aw,” ta-a pi. Lák mbay Ŋgerzah gi rih haŋsekle woiri-ay da. »

²²Zezu el ɓah hi̧ nzuk-dih fal yeri ɓahri : « Namri-aw ƴo gina ké i ƴó ke ɗaka ɓay ko nam mbew ké ɓil sew gun nzuk pirmatul, mí i ɓay ko ke nun ya.

²³Gelke nzuk ɓah hi̧ wuri ɓahri se : “Í ko, ke ti̧h ƴo fál sa̧-aw,” mini nzuk ɓah : “Í ko, ke ti̧h ƴo falay,” le, í si wuri ya. Í ɗuk fal woyri ya.

²⁴Ɓayu ké ti̧hna gun nzuk pirmatul ké nun nzukri ra ɓay na kandɔk mbam. Mbam sak yela teh gel riw hi̧ nzukri ko.

²⁵Mí gun nzuk pirmatul ɓá ko seh dara ɓáy. Gun tukala-ayri ɓá saŋ ni ɓá ko ni ɓa kɔk fe dara ɓáy.

²⁶Fe ké laɓ ke sew Nuwe ba, ɓay ti̧h ke sew gun nzuk pirmatul kaŋ pi.

²⁷Nzukri toŋ su̧ fe, toŋ nzo fe, wo̧rori ƴo ya̧ wu̧y, bah gunri ƴo hi̧ gun woyri ya̧ wo̧ro, mí fe-u laɓ kaŋ kaŋ si ka̧h nam ké Nuwe rih vul tul mbih bale, mbih ya̧ tusiɓa ya̧h ya̧h, mí nzukri riw zi.

²⁸Ke sew Loɗ kara laɓ kaŋ pi. Nzukri toŋ su̧ fe, toŋ nzo fe, ku toŋ yeh fe ke haniri, ku toŋ pah wakari, ku toŋ mboh vulri.

²⁹Namu ké Loɗ ti̧h ke puh Sɔdɔm bale, hɔrɔ ke kasaw-lu hɔrɔ ké nunmbam ga̧y nde tul nzuk puh-uri, mí nzukri riw zi.

³⁰Mí nam ké gun nzuk pirmatul ɓay ten mun hi̧ nzukri ko ɓay na kaŋ pi.

³¹Namu-aw ra nzukay ké ƴo tul vul le, ɓá ɗuk fe ye kiriŋ. Ké lu kerɓay-fa̧h fe yeri ké ɓil vul. Nzuk ké ƴo waka ba, ɓá el gi puh ya.

³²Í ker ɓay tul fe ké laɓ wu̧y Loɗ.

³³Gelke nzuk tasa̧y kaɓ tukala le, ke ɓay zi-u. Nzuk a a̧y ké poŋ kerɓay-kaɓ tukala ma fal le, ɓay ɔ-ɔkna.

³⁴Mi ƴo ɓah ɓayay hi̧ wuri, ké suŋu-aw, nzukri seɗe ɓay na hih mbew, ku mbí nzuk a mbewu, poŋ nzuk a mbewu.

³⁵Wu̧yri seɗe ɓay ƴo gel-naŋ fe. Ku mbí wu̧y a mbewu ba, poŋ wu̧y a mbewu ba. »

³⁷Bale nzukri ké dih fal Zezu ra ɓahri : « Ŋgernzuk, fál suŋ mí fe-u ɓay laɓ le ? » Mí ke ɓahri : « Gel ké hul ɓu ri, sa gelaw mí tamiri mbu̧h ri hani. »