Read Karang Mbete Luk 18 Bible Online

Mbete Luk 18 - Karang bible

Mbete Luk 18

¹Zezu el ɓah lawɓay a ɓoru hi̧ nzuk-dih fal yeri ɓay kú ta̧h ké tul goŋ Ŋgerzah ya, kú goŋ ni kpatara.

²Ke ɓah : « Nzuk-kuŋ salɓay mbew ƴo puh a hani. Ke ɗuk Ŋgerzah ya, su̧hru ké nun nzukri kara se ni ya pi.

³Wu̧y seh a hani ƴo puh-aw pi. Wu̧y ra toŋ gi ta̧w nzuk-kuŋ salɓay ra ƴo law ye ke ɓay ɓahri : “Nzukbaa bi ƴo laɓ mi suya, í dal baa bi ge.”

⁴Nzuk-kuŋ salɓay kaɓ gak sa lah ɓay ye ya lewsa̧ kaŋ. Falu bale, ke el ɓah ma law ye ɓahri : “Mi ɗuk Ŋgerzah ya, su̧hru ké nun nzukri kara se mi ya pi.

⁵Mí ɓay tul wu̧y seh-aw ké ƴo tul bi ke ɓay ra, mi dál baa ye hi̧ ni rɔkɔ ke ɔh ziŋ mi ndikpo.” »

⁶Gaŋ tul feri riw el ɓahri se : « Í lah wuri ɓay ké nzuk-kuŋ salɓay a suya-u ɓah ra.

⁷Ŋgerzah ba, nzukri ké-e lu niri ɓa sa̧w ye kú-u ƴo vuh hi̧ ni suŋ ke seh wa, ke ta dal baa woyri ya ley[66] ? Koseh woyri ƴo law ye.

⁸Mi ƴo ɓah hi̧ wuri ɓahri, ke úr wuɗ ɓay dal baa woyri. Keni-aw kara nam elna gun nzuk pirmatul le, ke zíŋ nzukri ké law woyri te sa tul Ŋgerzah gaŋ munu le ? »

⁹Zezu el ɓah lawɓay a ɓoru hi̧ nzuk a ɓoruri ɓáy ɓay fe le, ku ko mun woyri ɓa nzukri ké ƴo mbew ziŋ Ŋgerzah, ku el kpȩhr nzuk a ɓoruri ɓa kɔk fe.

¹⁰Ke ɓah : « Ke sa̧wseh-goŋ Ŋgerzah, nzukri seɗe hil si rih ɓil ila vul kani ye. Nzuk a mbewu ɓa farizi, nzuk a seɗe-u ba, ɓa nzuk-mbu̧h lampoh.

¹¹Farizi loh ma pol ƴo ke ndarna ye kparak. Kaŋ mí ke ah haw ye ɓahri : “Ŋgerzah mi el ke tumbɔl hi̧ mu ɓay fe le, mi na kandɔk tɔr nzuk a a̧wri-aw ya. Mi rih riɓa ya, mi poŋ bolkusol wo ya, mi laɓ nunpuki ya. Mi na kandɔk nzuk-mbu̧h lampoh a a̧y kara ya pi.

¹²Mi ƴo saŋ mbih nam seɗe seɗe ɓil dimasi mbew mbew. Fe ziŋna biri gbam mi mgba ɓa gel boh boh mí-i el lu tulu mbew mbew hi̧ mu.”

¹³Nzuk-mbu̧h lampoh ba, ke ƴo fá-fal ɓa ɗih-u. Ke ko kona ki̧riri ma siɓa. Mí ke vba̧ haŋ ye zaɗ zaɗ ɓahri : “Ey Ŋgerzah, mú sel nzak pol wo ké tul bi, a bi ké mi ɓa suya-ay.”

¹⁴Kaŋaw mí-i ƴo ɓah ɓayay hi̧ wuri, nzuk-mbu̧h lampoh ra ɗer si puh ye ɓa nzuk ké Ŋgerzah ŋga̧h sal in ziŋ ni poŋ nzuk a ɓoru-aw ɓay fe le, nzuk a suŋ suŋ gbam ké ɔr tul ma síɓa le, tul ye ɓay ik ma siɓa. Nzuk a a̧y ké ɗiŋ tul ye ba, tul ye ɓay ɔr ma síɓa. »

¹⁵Nzukri ƴo gi ke gun a na ndɔkri ma ta̧w Zezu ɓay ké lu mgbɔkɔ ku̧ tul gunuri[67]. Nzuk-dih fal yeri ko mí hah gina woyri.

¹⁶Zezu ba, ɗi nzukri-aw gi ke gunri ké na ndɔk woyri. Ke el ɓah hi̧ nzuk-dih fal yeri kandɔkay : « Í poŋ gunri ɓá gi ta̧w bi. Í gboh niri ya ɓayu ké lák mbay Ŋgerzah na ɓay sam gun a kandɔkayri.

¹⁷Gelu munu. Mi ƴo ɓah ɓayay hi̧ wuri, nzuk a suŋ suŋ ké ya̧ lák mbay Ŋgerzah ma law ye kandɔk gun ya le, ke ta rih ɓilu ya gaŋ. »

¹⁸Mí ŋgernzuk a hani vbi Zezu ɓay : « Metere, nzuk a suki, a fe mí-i láɓ ɓay ya̧ puh a a̧y ɓay mí kaɓ ké ri sew ke sew ɓa ŋgɔh le ? »

¹⁹Mí Zezu ɓahri : « Ani mú-u ɗi mi ɓa nzuk a suki le ? Nzuk pirmatul a suki mbew ta-a. Ŋgerzah mbew yaŋ mí ɓa nzuk a suki.

²⁰Mu tu ɓayri ké na ɓil bolkusol Ŋgerzah tu pi. Mú mbi wu̧y nzuk mbaŋ wo ya, mú i hul ya, mú ri-riɓa ya, mú kuŋ ɓay ku̧ nzak nzuk ya, mú hȩk bah wo ke mah wo[68]. »

²¹Mí ŋgernzuk ɓahri : « Mi ƴo tul ɓayawri gbam ke seke bi ka̧h guri-ay. »

²²Zezu ɓá lah ɓayaw bale, ke el ɓahri : « Ɓay mbew mí toŋ mu ɓáy. Mú si fa̧h fe ziŋna wori yeh riw. Mú wal lari-u hi̧ ko̧hkori. Mu ɓay ziŋ suki a nunmbam ŋgi̧ mbamba. Fal walu dale, mú el gi dih fal bi-ay. »

²³Ke lah ɓay ké Zezu ɓah ba, law sena mbaŋ law ye ɓayu ké fe ziŋna ye ŋgi̧ mbamba.

²⁴Zezu ko ni kaŋ, mí ke ɓahri : « Kpuh mbamba ɓay nzukri ké ƴo ke fe ziŋna ɓá hi̧ Ŋgerzah lak mbay ké tul woyri.

²⁵Ɓay hi̧ zɔŋzɔŋ ɓá rih lɔkɔ bahtal ti̧h ra, gelu kpuh ya. Mí ɓay nzuk va̧na ɓá hi̧ Ŋgerzah lak mbay ké tul ye, gelu kpuh mbamba. »

²⁶Nzukri ké ƴo lah ɓay ké Zezu ɓah ra ku ɓahri : « Mí-aw ba, nzuk a suŋ mí mah kaɓ ke ɔkna ɓa ŋgɔh le ? »

²⁷Mí Zezu ɓahri : « Káɓ ke ɔkna le, mba nzuk pirmatul. Ŋgerzah mí mah ɓay hi̧ nzuk ya̧ gel kaɓna ké na ɓa ŋgɔh. »

²⁸Mí Piyer ɓahri : « Mú ko. A wah ba, nah poŋ fe wah riw, mí nah dih fal wo-ay. »

²⁹Zezu ba, ɓah hi̧ niri ɓahri : « Ɓa ketina. Mi ƴo ɓah hi̧ wuri ɓahri, nzuk a suŋ suŋ gbam ké poŋ sa̧w ye, wu̧y ye, yi̧n yeri, bah ye ke mah ye, gun yeri ɓay tul lák mbay Ŋgerzah le,

³⁰suki ké-e ɓay ziŋu ɓay ŋgi̧ kal tul fe ké-e poŋaw. Ke ɓay ziŋu ké-e kaɓ ke ɔkna a ké na ɓa ŋgɔh sew a tukala-ay pi, sew a ké ƴo gi-u ɓa ŋgɔh pi. »

³¹Zezu mbu̧h nzuk-dih fal yeri a boh falu seɗe ra dale, ke ɓah hi̧ niri ɓahri : « Í lah. Nah ƴo hil wuri ma Zurusalem. Mí fe vbehnari riw ké gun nzak pihna Ŋgerzah a lewsa̧ri vbeh si tul gun nzuk pirmatulay ɓay laɓ ɔh wara.

³²Ku ɓay ndoh ni ndɔk sa̧wnzuk a ɓoruri. Nzukawri-aw ɓay sak ni. Ku láɓ ni fe-se su̧hru. Ku sá-sam ku̧ tul ye.

³³Ku vbóŋ ni ke ndehdɔŋ dara mí ku í ni. Nam a sayu le, ke tí̧h ke puh záh ke pa̧ymun a foyu. »

³⁴Mí ɓayu guh law woyri ya. Sa̧wɓayu mu̧h niri mu̧h hi̧ ku lah ya.

³⁵Sina Zezu ma Zurusalem bale, ku ka̧h Zeriko ɗih ya, mí ra̧w a hani-u kaɓ ɓel mahful ƴo rah ndɔk goŋ fe.

³⁶Ke lah tiri daɓa nzukri ké ƴo kalna, mí ke el vbi nzukri, a fe ? A fe le wo ?

³⁷Ku ɓah hi̧ ni ɓahri, Zezu ké Nasareɗ mí ƴo kalna.

³⁸Mí ke vba̧ nzak ɓeleŋ ɓahri : « Zezu gun zih ŋgermbay Daviɗ, mú laɓ law in ziŋ mi ge. »

³⁹Nzukri ké si pol pom ni ɓay ké tuh nzak ye. Mí ke toŋ vba̧ nzak ɓa mgbe-u ma síɓa síɓa ɓahri : « Gun zih ŋgermbay Daviɗ, mú laɓ law in ziŋ mi ge. »

⁴⁰Mí Zezu ta̧h ƴo. Ke pih si gi ziŋ ni.

⁴¹Ra̧w ka̧h bale, Zezu nzah nzak ye ɓahri : « A fe mú-u yih ɓay mí laɓ hi̧ mu le ? » Mí ra̧w ɓahri : « Ŋgermbay, mi yih ɓay ko gel. »

⁴²Kandɔkaw mí Zezu ɓahri : « Mú ko gel. Law wo ké te tul bi hi̧ salɓay suya lu ké tul wo lu-lu. »

⁴³Sa gelu-aw mí nun ye teh, ke ko gel. Mí ke dih fal Zezu, ke ƴo pir riŋ Ŋgerzah. Nzukri gbam ké ko fe-u, ku loŋ riŋ Ŋgerzah pi.