Read Karang Mbete Luk 19 Bible Online

Mbete Luk 19 - Karang bible

Mbete Luk 19

¹Zezu rih ɓil Zeriko. Ke sak sina kparak ke ful ɓil ka̧w puh.

²Nzuk a hani mbew ƴo ri. Riŋ ye ɓa Zase. Ke ɓa ŋgernzuk nzuk-mbu̧h lampohri. Fe ziŋna ye ƴo ri.

³Ke taw ɓay ko a ge mí ɓa Zezu ra le ? Ɓay daɓa nzukri mí kó Zezu mba ni ɓay fe le, ke ɓa gɔzi.

⁴Dale ke ɗuk kal pol si hil sam kpuh nzu̧y ké ɓa sikomor kaɓ ri geŋ ɓay ko ni. Ke ɓahri se, Zezu ɓay kal ke fulay.

⁵Zezu ɓá ka̧h bɔk kpuh ra le, ke ɔr nun ye ko ni síɓa, mí ke ɓahri : « Zase, mú ɗer ɓa gah-u. Guri gaŋ, mi na puh wo na-na. »

⁶Zase ɗer ɓa gah-u gaŋ ba. Ke mgba Zezu gahru ndɔk seɗe ke law rihna.

⁷Nzukri ko. Mí gbam woyri ku ŋgu̧hru ɓay ɓahri se : « Ké puh suya nzuk mí ke lu ta̧hma ye le ? »

⁸Mí Zase ur síɓa ƴo nzak fe su̧na, ke el ɓah hi̧ Gaŋ tul feri riw ɓahri : « Ŋgernzuk, í ko. Fe ziŋna biri mi kéhr gel seɗe. Kehrna gel a mbewu mi hí̧ ko̧hkori. Mi gɔɓrɔ ra fe nzuk le, mi él keni hi̧ ni soh ri gel niŋ. »

⁹Zezu ba, ɓah hi̧ ni ɓahri : « Guri gaŋ, nzuk kerpuh-ayri ti̧h ke ndɔk hul. Ɓay fe le a ye-ay kara ke ɓa gun zih Abaraham pi.

¹⁰Sa̧wu mí gun nzuk pirmatul gi. Ke ƴo ƴah nzukri ké zi-zi ɓay ya̧ niri ke ndɔk hul. »

¹¹Nzukri ƴo lah ɓayri ké Zezu ɓah, mí ke el ɓah ɓay a ɓoru ke lawɓay ɓay fe le, ke ɗih ya ɓay ka̧h Zurusalem, mí nzukri-aw ker ɓahri, zah le, puh lakna Ŋgerzah ɓay ti̧h wara. A ye bale ke ɓahri : « Nzuk a hani mbew, sa̧w ye ɓa sa̧w mbay. Ke ti̧h si puh a ɗih-u ɓay ndoh gay mbay dara ké el gi puh ɓáy.

¹²

¹³Tɔrna ye dale, ke ɗi gun-laɓ pihna yeri ɓa boh. Ke wal niri lari ké mah ke lari pihna few niŋ niŋ[69]. Ke ɓahri : “Í ya̧ wuri lari-ay, í sɔɓ nunu geŋ elna bi.”

¹⁴Nzuk sa̧w puh yeri fu̧y ni fu̧y, mí ku pih ŋgernzukri fal ye si ɓah, a woyri-aw, ku sa ɓay ké lak mbay tul woyri ya.

¹⁵Bol fal ndóh gay mbay ye bale, ke el gi puh, mí ke ɗi gun-laɓ pihna yeri ké-e ndoh lari ndɔk woyri mbew mbew gbam kú gi, kú ki̧ mbihlari-u, ké ko.

¹⁶Mí gun-laɓ pihna a titilu ɓah : “Mbay, lari ké i hi̧ mi ra, mi ziŋ a mbaŋu ɓa boh dɔm tulu mí na-ay.”

¹⁷Mbay pir ni ɓahri : “Su-su, mu ɓa gun-laɓ pihna a suki ɓay fe le, mu mgba sa̧w fe bi a ndi̧ ɓa suki. Mú ya̧ puhri boh, mú lak mbay tulu.”

¹⁸Gun-laɓ pihna a seɗe-u gi ɓahri : “Mbay, lari ké i hi̧ mi ra, mi ɗam ziŋ a mbaŋu ɓa ndiɓi dɔm tulu mí na-ay.”

¹⁹Mbay ba, pir ni ɓahri : “A wo bale mú lak mbay tul puhri ndiɓi.”

²⁰Mí gun-laɓ pihna a ɓoru gi ɓahri : “Mbay, í ko lari woiri mí na-ay. Mi ŋga̧h na nzak garay mí-i mbek.

²¹Mi ɗuk hȩkme woiri ɓahri se, mbayay da kpuh mbamba. Gel ké-e laɓ fe hani ya kara ke ziŋ fe ké ri. Waka ké-e ruh fe ya kara ke ziŋ fe pay.”

²²Mbay ɓah hi̧ ni ɓahri : “A wo-ay, ke nzak wo gaŋ mí mi ko mu ɓa gun-laɓ pihna law a pipiri-u. Mu tu mi ɓa nzuk ké kpuh mbamba. Gel ké mi laɓ fe hani ya kara mi ziŋ ri fe. Waka ké mi ruh ya kara mi ziŋ ri fe pay ra wa,

²³ɓay fe mú-u poŋ lari bi-ay hi̧ nzuk-ɗa̧m lari sɔɓ nunu ya le wo ? Mu poŋ ra lari hi̧ nzukaw le, elna bi-ay, mi zíŋ mbihlari dɔm tulu ɓáy.”

²⁴Ke el ɓah hi̧ gun-laɓ pihnari ké ƴo ɓel ye ɓahri se : “Í nah wuri lari ra ke ndɔk ye, í el hi̧ nzuk a a̧y ké ƴo ke lari ɓa boh-aw.”

²⁵Mí ku vbi ni ɓahri : “Gaŋ wah, nzukay ƴo ke lari ɓa boh wa, ani le ?”

²⁶Kandɔkaw mí Zezu ɓah keni ɓay : “Mi ƴo ɓah hi̧ wuri ɓahri se, nzuk a suŋ suŋ gbam ké ko fal fe ké mbay ndoh ndɔk ye ɓa suki le, mbay ɓay hi̧ ni a ɓoru dɔm ri ɓáy. Mí nzuk a a̧y ké hi̧ fe mbay ti̧h suk ya le, fe a ndi̧ ké na ndɔk ye ra ku ɓay nah kpɔɗ.

²⁷Aŋay wara mí ɓay nzukbaa biri ké sa ɓay mí lak mbay tul woyri ya-aw, í si mgba niri gi keni, í i niri ké pol bi-ay.” »

²⁸Ɓay ké Zezu ɓah-aw ke ƴo tul sina ƴo hil ma Zurusalem.

²⁹Zezu ka̧h Beɗfaze ke Beɗtani. Puh-uri na fál kasaw kú-u ɗi ɓa kasaw Oliveh. Dale ke pih nzuk-dih fal yeri seɗe si pol.

³⁰Ke ɓahri se : « Í si puh ké na pol woiri sa̧-aw. Ka̧hna woiri le, i ɓay ko gun bamnde kú-u ŋga̧h ƴo. Nzuk kaɓ tulu bɔk mbew ya ɓáy. Í sel gi keni hi̧ mi.

³¹Nzuk vbi wuri ɓay fe mí i sel gun bamnde le, í ɓahri, gaŋ bamnde-u mí yih ɓayu. »

³²Kandɔkaw mí gun nzak pihnari tɔr. Ku ka̧h, ku ko gun bamnde-u kandɔk ké-e ɓah ra.

³³Ku sel ba, mí nzuk bamnde-u vbi ɓahri : « Ɓay fe mí i sel bamnde-ay le ? »

³⁴Ku ɓahri, gaŋ bamnde-u mí yih ɓayu.

³⁵Mí ku el keni gi ta̧w Zezu. Ku mbala gar woyri ku̧ tul bamnde ra, mí ku mbi Zezu kaɓ ri[70].

³⁶Ku si ma Zurusalem dale, nzuk-dih fal yeri fih gar woyri ku̧ ke ful ful[71]. Ke ka̧h tul ful ké ɗer ke kasaw Oliveh ɓay si ma Zurusalem ba, daɓa nzuk-dih fal yeri ɓa ŋgi̧-u laɓ mun rihna. Ku ƴo loŋ riŋ Ŋgerzah ke kusol a mgbe-u ɓay fe saŋri gbam kú-u ko.

³⁷

³⁸Ku ɓahri : Mgbɔkɔ Gaŋ tul feri riw ku̧ tul Ŋgermbay ké gi ke riŋ ɗina Gaŋ tul feri riw. Ɗeŋ na nunmbam. Riŋ ɗina ye mgbe si ka̧h nunmbam a síɓa sa̧[72].

³⁹Farizi a haniri ƴo sakra daɓa nzukri-aw, mí ku ɓah hi̧ Zezu ɓahri : « Metere, mú hah gun likɔl wori ra. »

⁴⁰Zezu fer nzak woyri ɓahri : « Mi ƴo ɓah ɓayay hi̧ wuri, ku ɔk ra nzak woyri le, kasawri-ay ɓay vba̧ nzak soh bol woyri. »

⁴¹Zezu ɓá duh tul ko tul puh-u bale, ke vuh rew tulu ɓahri :

⁴²« Zurusalem, Zurusalem wo, mu tu ra namay tu-tu le, a wo mú-u tú fe a a̧yri ké ƴo hi̧ ɗeŋ gi ta̧w wo, mí fe-uri mu̧h nun wo wara.

⁴³Nam wori ka̧h, mí nzukbaa wori ɓay laɓ ŋgalaŋ ɗoŋ tul wo gbuk. Ku nzú̧h gun wori.

⁴⁴Ku ndíh mu ke gun wori ké kaɓ puh wo. Kasawri ké ka̧y tul hani ké vul fe puhna Ŋgerzah, nzukri ɓay haw kasawuri riw ku̧ siɓa ɓay fe le, mu sa tu nam ké nzuk-ko tul wo gi ra ya. »

⁴⁵Zezu ka̧h Zurusalem, ke si rih ɓil ila vul kani Ŋgerzah, wara mí ke ni̧h nzuk-yeh fe puhnari.

⁴⁶Ke ɓahri se : « Ŋgerzah ɓah ɓil mbete ye ɓahri, vul ye ɓa vul-ɓah ɓay ziŋ ni[73]. A woiri ba, i sɔɓ gelu ɓa hoh nam riɓari. »

⁴⁷Ke namuri-aw, Zezu ƴo ɓil ila vul kani Ŋgerzah ƴo firma ɓay lák mbay Ŋgerzah hi̧ gun Izarayelri lah. Ŋgernzuk woyri ke ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ba, ƴah ful ɓay i ni.

⁴⁸Mí ku ziŋ ful ya, ɓayu ké gun Izarayelri gbam ƴo ɗekeke te suk woyri ƴo lah ɓay ye.