Read Karang Mbete Luk 20 Bible Online

Mbete Luk 20 - Karang bible

Mbete Luk 20

¹Nam a titilu, ke ƴo firma ɓay lák mbay Ŋgerzah hi̧ nzukri ɓil ila vul kani Ŋgerzah. Ke ka-kah ɓaysuki Ŋgerzah bale, ŋgernzuk fe puhna Ŋgerzahri, nzuk-sɔk mbete bolkusol Ŋgerzahri gi ke ŋgernzuk puh woyri gun Izarayelri ké ta̧w ye.

²Ku ɓahri : « Mú sɔk na, náh lah, ke bolkusol ge mú-u laɓ keni pihna wo-ayri le ? A ge mí hi̧ mu ŋgerna-u le ? »

³Zezu ba, yih nzak woyri ɓahri : « A bi kara mi vbi wuri ɓay mbew. Í yih vbiɓayu hi̧ mi, mí lah.

⁴Batem ké Za̧h soh nzukri ra wa, sa̧wu ɓa nunmbam mini ɓa nzuk pirmatul le ? »

⁵Mí ŋgernzukri ra fah ɓay ké sakra woyri ɓahri : « Nah ɓah ra ri se, sa̧wu ɓa nunmbam le, ke él vbi na ɓay fe mí nah sa ya̧ ɓay ké Za̧h ɓah ra ya.

⁶Mí náh ɓahri, sa̧wu ɓa nzuk pirmatul le, nzukayri riw ɓay vbuk na ke kasaw ɓay i na. Ku mgba ɓahri se, Za̧h ɓa gun nzak pihna Ŋgerzah. »

⁷Mí ku yih nzak Zezu ɓahri : « Nah tu sa̧wu ya. »

⁸Zezu el ɓah hi̧ niri ɓahri : « A bi kara mi ta sɔk wuri ke bolkusol ge mí-i laɓ keni pihna-ayri ya pi. »

⁹Wara mí Zezu ɓah lawɓayay hi̧ gun Izarayelri : « Nzuk a hani-u mbew laɓ waka kpuh viyȩh[74]. Ke ndoh waka ra hi̧ nzuk-laɓ pihna-uri, mí ke tɔr si gahru few mah fe.

¹⁰Few-hal lehna kpuh ka̧h dale, nzuk waka pih gun nzak pihna ye mbew si ta̧w nzuk-laɓ pihna wakari ɓá fa̧h lehna kpuh-u gi keni hi̧ ni. Bale nzuk-laɓ pihna wakari ra mgba ni, ku vboŋ ni, mí ku el ni̧h ni ndɔk ndikpo.

¹¹Nzuk waka pih gun nzak pihna ye a ɓoru si. Mí nzuk-laɓ pihna wakari ra vboŋ ni. Ku laɓ ni se su̧hru, mí ku ni̧h ni el ndɔk ndikpo.

¹²Nzuk waka pih gun nzak pihna ye a sayu. Mí ku ɗur ni mí ku vbu ni ɓu kala waka.

¹³Bale nzuk waka ɓahri se : “Mi láɓ ani ɓáy le ? Mi píh gun sana bi ɓá si. Kaŋaw le, ku hȩ́k ni.”

¹⁴Nzuk-laɓ pihna wakari ɓá ko gun nzuk waka ƴo gina bale, ku lek ɓay mbew ɓahri : “A ye ké gi-aw ra, ke ɓa gun-ya̧ fe bah ye munu. Náh i wuri ni dale, waka-ay ɓay ti̧h ɓa fe wahri.”

¹⁵Gun ra ka̧h ba, mí nzuk-laɓ pihna wakari mgba ni, kɔklɔ ni si fal kpaŋ, mí ku i ni. » Zezu el ɓahri : « Kaŋaw ba, nzuk waka-aw ɓay laɓ ani mí ziŋ nzukawri ɓáy le ?

¹⁶Nzuk waka-u ɓay ur, ke si-u, ke í nzuk-laɓ pihna wakari-aw, mí ke él ndoh waka ra hi̧ nzuk a ɓoruri. » Ŋgernzukri ra ɓá lah lawɓayu ké Zezu ɓah, mí ku ɓahri se : « Kay, fe-u ɓá laɓ ya. »

¹⁷Zezu ko niri zi̧h, mí ke ɓahri se : « Kaŋaw wa, ani mí mbete Ŋgerzah ɓahri, kasaw ké nzuk-mboh vul kani Ŋgerzahri poŋ kan kpah ra, kasawu mí el ti̧h ɓa mah kasaw-mboh diŋ vulu[75] ?

¹⁸Nzuk a suŋ suŋ gbam ké ɓe kasaway mí lih le, ɓay gur mun ye rukruk. Nzuk a a̧y ké kasaway toh tul ye le, ɓay naŋ nzuku ɓa som ri̧nini. »

¹⁹Kandɔkaw mí nzuk-sɔk mbete bolkusol Ŋgerzahri ke ŋgernzuk fe puhna Ŋgerzahri ƴah ful ɓay mgba ni ke seh-u, mí hȩkme nzukri laɓ niri. Ku tu ɓahri se, Zezu ɓah lawɓayaw si tul woyri.

²⁰Kandɔkaw mí ŋgernzukri ra ko Zezu yi̧m, ku pih nzukri rih haŋsekle nzuk yeri, ku laɓ mun woyri ɓa nzukri ké ƴo mbew ziŋ Ŋgerzah. Ku pih nzukri-aw ɓay kú mgba ni ke ɓay le, ku ndoh ni ndɔk guvener nzuk ndiseŋe a luki.

²¹Mí nzukri ra gi vbi ni ɓay ɓahri : « Metere, nah tu ɓahri, ɓay ké i ɓah na gelu, ketina mí i ƴo firma nzukri. I lu nun nzuk ya. Wara le i ƴo firma nzukri sí siŋ sina a ketina Ŋgerzah.

²²Bolkusol Ŋgerzah hi̧ na gun Izarayelri ful ɓay puh lampoh hi̧ ŋgermbay sa̧wnzuk a ɓoruri kandɔk sezar mini ani le[76] ? »

²³Zezu tu kerlaw woyri tu, mí ke ɓah hi̧ niri ɓahri :

²⁴« Í ten lari ké nzukri puh keni lampoh ra hi̧ mí ko. » Ku ten lari ba, ke el vbi niri ɓahri : « Tem nzuk a suŋ mí ku vbeh kan ri-ay le ? Riŋ nzuk a suŋ mí ku vbeh ri-ay le ? » Mí ku ɓahri : « Temu ɓa tem sezar. Riŋu kara pi. »

²⁵Bale ke el ɓahri : « Kaŋ dale fe sezar le, í hi̧ sezar. A wo nzuk pirmatul ké Ŋgerzah laɓ mu ɓa fe tem ye le, mú hi̧ Ŋgerzah gaŋ ba[77]. »

²⁶Kandɔkaw mí mgbá ni ke ɓay ké gel daɓa ké nun gun Izarayelri mba ŋgernzukri-aw mba-mba. Gosoɓay zi niri zi-zi, mí ku el kaɓ silili.

²⁷Mí sadusi a hani-uri gi ta̧w Zezu. (A woyri-aw, ku ɓahri, nzuk hu le, záh ye ta-a. Ke ta ziŋ pa̧ymun a foyu ya pi.) Mí ku vbi ni ɓay ɓahri : « Metere, Moyiz vbeh ɓil mbete bolkusol Ŋgerzah ɓahri, gelke nzuk ya̧ wu̧y mí ke hu dan mbuŋ gun le, yi̧n ye ɓá ya̧ wu̧y kaŋpele ra, ké mbuŋ keni gun ɓa mi̧hri yi̧n ye ké hu-aw.

²⁸

²⁹Kandɔkaw mí nzuk ɓil mahri ɓa toŋndɔk say ƴo ri. Ŋgernzuk ya̧ wu̧y, mí ke hu dan mbuŋ keni gun.

³⁰Toŋnafal el ya̧ wu̧y kaŋpele ra, ke hu dan mbuŋ keni gun.

³¹Nzuk a sayu ya̧ wu̧y ra, ke hu dan mbuŋ keni gun pi. Kaŋ mí nzukri ké toŋndɔk sayaw, ku ya̧ wu̧y ra ke gel woyri mbew mbew gbam, mí ku hu dan mbuŋ gun ɓa mi̧hri yi̧n woyri.

³²Ɔh tɔru bale, wu̧y ra hu pi.

³³Kaŋaw ba, seh ké záhri ɓay ziŋ pa̧ymun a foyu ra wa, wu̧y ra ɓay na ɓa wu̧y nzuk a suŋ le wo ? Ɓayu ké nzukri ké toŋndɔk sayaw ya̧ ni ke gel woyri mbew mbew gbam. »

³⁴Mí Zezu ɓah hi̧ niri ɓahri : « Gun tukala-ayri ƴo ya̧ hani, ku ƴo hi̧ gun woyri ya̧ hani pi.

³⁵Nzukri ké Ŋgerzah ki̧ riŋ woyri ké sakra gunri a sew ké nunmbam ke tusiɓa laɓ ɓa foyu kú-u ziŋ pa̧ymun a foyu ra, ku ta ya̧ hani ya, ku hi̧ gun woyri ya̧ hani ya pi ɓayu ké hul ta ɗi riŋ woyri ya. Ku káɓ mah ke tem nzak pihnari kaŋ. Ku na ɓa gun Ŋgerzah kandɔk kú-u ɓa gunri ké ti̧h ke puh záh mí el kaɓ ke pa̧ymun a foyu.

³⁶

³⁷Sɔk ɓahri se, záhri ɓay ti̧h ke pa̧ymun a foyu. Moyiz ten ɓayu te-teh ɓil mbete Ŋgerzah. Gel ki̧na a a̧y ké Ŋgerzah ti̧h nun ye ké ɓil rim hɔrɔ ké gay kpuh, mí hɔrɔ-u se gay kpuh ra ya, Moyiz ɗi Miƴori ɓahri se : “A wo Ŋgerzah, záh ziih Abaraham, Isak, Zakoɓ.”

³⁸Kaŋ dale ziihri ƴo ri. Ŋgerzah ta ɓa záh nzuk a huluri ya, wara le ke ɓa záh nzuk a ƴo ke ɔknari ɓayu ké gbam woyri ku kaɓ ke pa̧ymun a foyu ɓay ye. »

³⁹Nzuk-sɔk mbete bolkusol Ŋgerzah a haniri yih tul Zezu ɓahri : « Metere, mu yih nzak woyri-aw su mbamba. »

⁴⁰Kandɔkaw nzuk ké hi̧ tul ye ɓay vbi Zezu ɓay a ɓoru ta mba.

⁴¹Zezu ba, el ke ɓay a ɓoru ɓahri : « Ŋgermbay kú-u mbuŋ ni ɓa gun zih ŋgermbay Daviɗ ra wa, laɓ ani dara mí ke ɓa ŋgermbay tul zih ye ɓáy le ?

⁴²A ye ŋgermbay Daviɗ gaŋ mí ke ten siŋ vbeh kan ɓil Mbete Siŋ kandɔkay : Miƴori ɓah hi̧ Ŋgermbay bi ɓahri, mú kaɓ ɓel bi ɓa ndɔk lakna bi,

⁴³mi ƴo ɔh ŋgerna nzukbaa wori hi̧ kú ti̧h ɓa gel-ku̧ bɔk wo[78].

⁴⁴A a̧w ké ŋgermbay Daviɗ ɗi gun zih ye ɓa “Ŋgermbay” ye ra ba wa, ani mí Ŋgermbay ɓa mi̧hri ye ɓáy le ? »

⁴⁵Ɓay ké Zezu ɓah, ke ɓah ké suk gun Izarayelri gbam wara mí ke el ɓah hi̧ nzuk-dih fal yeri ɓahri :

⁴⁶« Í ko tul woiri ger rɔkɔ í mbi siŋ sina nzuk-sɔk mbete bolkusol Ŋgerzahri. Ku yih ɓay ndoh mah gar a peh-u tul tul ha̧rma keni. Ku yih ɓay hi̧ nzukri ɓá vah niri ndɔk seɗe seɗe ké gel daɓa. Ké ɓil vul misoŋ, ku yih kaɓ gel kaɓna ŋgernzukri. Ku yih kaɓ gel kaɓna riŋ ɗina ké gel ti̧hmbih pi.

⁴⁷Ku ƴo su̧ fe wu̧y sehri wuruk wuruk. Ku ƴo goŋ Ŋgerzah ɓa peh-u sɔk keni mun woyri. A woyri ra salɓay suya woyri ŋgi̧ kal ŋgoŋ. »