Read Karang Mbete Luk 21 Bible Online

Mbete Luk 21 - Karang bible

Mbete Luk 21

¹Zezu ƴo ko gel ɓil ila vul kani Ŋgerzah. Ke ko nzuk fe ziŋnari ƴo ɓu fe hi̧na woyri ku̧ ɓil ŋgoro fe hi̧na.

²Dale ke ko wu̧y seh mbew ɓa ko̧hko-u gi ɓu gun lari mbew mbew seɗe ku̧ ri.

³Mí ke ɓahri se : « Ketina, mi ƴo ɓah hi̧ wuri ɓahri, fe hi̧na wu̧y seh-ay ŋgi̧ kal tul fe hi̧na nzuk a a̧wri gbam,

⁴ɓayu ké nzuk fe ziŋnari-aw, ku kehr nzak fe ziŋna woyri mí gi ku̧. A ye wu̧y seh-ay ba, ɔh tɔr fe ké-e ƴo keni ɓay so mun ye gaŋ mí ke hi̧-aw. »

⁵Mí nzuk a haniri el ɓah ɓay ndu̧yna kasaw a feluri kú-u mboh vul kani Ŋgerzah ke ɓay gama fe hi̧nari kú-u mbar keni ndɔh kona mbamba[79]. Mí Zezu ɓahri :

⁶« Kasawuri ké i ko ka̧y tul hani, ka̧y tul hani-aw, nam ƴo gina ké nzukri ɓay haw kasawuri riw ku̧ siɓa. Kasaw mbew ké ɓay toŋ síɓa ta-a. »

⁷Mí ku vbi ni ɓay ɓahri : « Metere, ɓeɓna a kaŋaw wa, seh suŋ mí ɓay laɓu le ? Fe sɔkna fe mí ɓay sɔk na nam ké ɓeɓna-aw ɓay ti̧h-u le ? »

⁸Bale Zezu ɓahri : « Í ko-ko rɔkɔ nzuk ɓá hi̧ wuri í reh ful ɓayu ké nzukri ɓa ŋgi̧-u ɓay mbi riŋ ɗina bi ɓahri, a woyri ku ɓa Ŋgermbay. Ku ɓay ɓah kandɔkay : “Sewu ka̧h da.” Dale í si fal woyri ya.

⁹Gelke i lah ɓay ŋgermuri mini ɓay tusiɓa ké nzukri ur ziŋ haniri le, tem mun woiri ɓá ti̧h ya ɓayu ké na ani ani gaŋ kara ŋgermu-uri ɓay laɓ pol dara. Keni-aw kara sew a ɔh tɔr sewri ta ka̧h ke seh-u ya. »

¹⁰Zezu el ɓah ra ɓáy ɓahri : « Sa̧wnzukri ɓay ur ruh ŋgermu ke sa̧wnzuk a ɓoruri. Puh laknari ɓay ruh ŋgermu ke puh lakna a ɓoruri pi.

¹¹Kandɔkaw mí tusiɓa ɓay laŋ yik yik ke gelri ɓoɗ ɓoɗ. Ɗaka bahpihya ɓay lih puh ke gelri ɓoɗ ɓoɗ. Sena a kal haniri ɓay duh nzukri. Fe-se hȩkmeri ke fe saŋ a lukiri ɓay ti̧h ké nunmbam.

¹²Dara fe-uri ɓá ti̧h le, nzukri ɓay mgba wuri. Ku ɓay laɓ wuri koseh. Ku ndóh wuri ndɔk ŋgernzuk vul misoŋri hi̧ ku laɓ ɓay kan tul woiri, ku mbíh wuri ku̧ vul mgbal, ku kɔ́klɔ wuri si pol mbay tusiɓari ke guvener-ri pi ɓayu ké i ƴo tul riŋ bi.

¹³Fe-u ɓay mgbur ful hi̧ wuri, í te-teh ɓay bi hi̧ nzukuri ɓá lah.

¹⁴Kaŋaw le, í mgba tul woiri. Í nzah lakna ɓay ké i ɓah-u ké pol nzukri ra ya.

¹⁵Ɓayu ké a bi mí-i ɓay ndoh ɓay ké i ɓah-u ké nzak woiri, mi hí̧ wuri ru̧na. Nzukbaa woiri ɓay ta mba tul woiri ke ɓay ya, ku ta ma̧y nzak woiri ya pi.

¹⁶Bah woiri ke mah woiri, yi̧n woiri, nzuk in woiri, ya̧h woiri, a woyri ku ɓay te wuri. Ku ɓay i nzuk a haniri ké sakra woiri.

¹⁷Nzukri gbam ɓay fu̧y wuri ɓayu ké i ƴo tul riŋ bi.

¹⁸Mí pirmatul woiri mbew ta zi ya.

¹⁹Kandɔkaw mí su̧hlaw woiri hi̧ wuri i ziŋ fe woiri.

²⁰Gelke i ko nzuk ŋgermuri gi ɗoŋ Zurusalem gbuk dale, í tu ɓahri se, dirna Zurusalem toŋ ɗih ya.

²¹Wara mí nzukri ké puh gun Izarayelri, a woyri ku-u ƴo tusiɓa Zude le, kú ɗuk ma tul kasawri, a woyri ku-u ƴo Zurusalem ɓá ɗuk ma ɓil suy, a woyri ku-u ƴo ɓil suy ɓá rih gi Zurusalem ya.

²²Ɓay fe le namri-aw ɓa nam-kuŋ salɓay. Ɓayuri kú-u vbeh ɓil mbete Ŋgerzah ƴo laɓ ɔh ke gelu.

²³Kúy. Namaw ra mah ɓilri ke mah gun nzak pamri ɓay ko seh mbamba ɓayu ké koseh a luki ɓil namri-aw ɓay toh tusiɓa-ay, vba̧na ɓay toh tul gun Izarayelri ké tusiɓa-ay.

²⁴Ku líh hul ke mahwu̧y. Nzukri ɓay mgba niri, mí ku zikri ké tusiɓa sa̧wnzuk a ɓoruri gbam ɓa mgbal. Zurusalem ba, ɓay na ɓa gel ké sa̧wnzuk a ɓoruri ndakla kpu̧ru si ka̧h sew ké lák mbay sa̧wnzuk a ɓoruri-aw ɓá tuŋ gbu̧h-u.

²⁵Kandɔkaw mí fe saŋri ɓay laɓ ké gunwu̧y nunmbamri pi, ké few pi, ké seh pi. Ké tusiɓa gbam sa̧wnzukri ɓay nuŋ nzak rim woyri ɓay tul mahmbihri ké mgbe girim girim el laŋ baŋlaŋ baŋlaŋ.

²⁶Hȩkme fe saŋri-aw ke kerɓay feri ké ƴo ti̧h tul woyri ɓay ha̧m niri kpɔrsɔ ɓayu ké ŋgerna fe nunmbamri mí laŋ yik yik.

²⁷Wara mí gun nzuk pirmatul ɓay ti̧h nun nzukri, ke ƴo gina ɓil ɗikmambam ke ŋgerna mbay ye ɓil riŋ ɗina a luki.

²⁸Tul fe-uri ti̧h yol dale, í ƴo wuri síɓa kparak, í ɔr tul woiri ɓay fe le, nam selna woiri ké ndɔk tukala ka̧h da. »

²⁹Zezu el ɓah lawɓay ɓahri : « Í hekre kpuh nzu̧y ke kpuh a ɓoruri, í ko.

³⁰Gelke kpuhri tuŋ mí el loŋ gay le, i tu ɓahri, nzak mbam ka̧h da.

³¹Kaŋ pi mí gelke i ko feri-aw ti̧h le, í tu ɓahri se, puh lakna Ŋgerzah ka̧h da.

³²Ɓa ketina, mi ƴo ɓah hi̧ wuri ɓahri, gun tukala-ayri ta kal ya, feri-aw gbam ɓay ti̧h dara ɓáy.

³³Nunmbam ke tusiɓa ɓay ka-kal, mí ɓay biri ba, ɓay na kpatara.

³⁴Í mgba mun woiri rɔkɔ law woiri ɓá ker ɓay nday yim mini ɓay nzo yim mini ɓay su̧ fe tukalari, namu-aw gi ti̧h tul woiri gbus le, ɓay mgba wuri kandɔk ndaw. Namu-aw ra ɓay toh tul nzukri riw ɔh ké tusiɓa gbam.

³⁶Í kaɓ ke nzakbɔk, í goŋ Ŋgerzah mgbiŋriŋ ɓay huhrumun woiri ɓá kpuh hi̧ í ti̧h ke ɓil fe-awri ké ɓay la-laɓ, í goŋ ni huhrumun ɓay hi̧ í ƴo pol gun nzuk pirmatul ra pi. »

³⁷Kandɔkaw mí Zezu ƴo firma nzukri ke namri-aw ɓil ila vul kani Ŋgerzah. Suŋ ba, ke ƴo ti̧h si na tul kasaw kú-u ɗi ɓa kasaw Oliveh.

³⁸Tipele teh le nzukri gbam mbu̧h ma ta̧w ye ɓil ila vul kani Ŋgerzah ƴo lah ɓay ye.