Read Karang Mbete Luk 22 Bible Online

Mbete Luk 22 - Karang bible

Mbete Luk 22

¹Ti̧hmbih-tɔk peŋ dan is, ti̧hmbih-u ku ɗi ɓa ti̧hmbih-i guy buma, namu toŋ ɗih ya ɓay laɓu.

²Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ƴah ful ɓay i Zezu ɓayu kú-u laɓ hȩkme nzuk woyri ziɓri ké ƴo dih fal ye.

³Mbay záh tukala ba, gi rih tul Zudas nzuk Isikariyoɗ. A ye ra ke ƴo sakra nzuk-dih fal Zezu a boh falu seɗeri.

⁴Mí ke ti̧h si lu mberem ziŋ ŋgernzuk fe puhna Ŋgerzahri ke soze-kɔr vul kani Ŋgerzahri ɓay ndoh Zezu ndɔk woyri.

⁵Mí law ŋgernzukri ra rih niri. Ku lek suy lari ɓay te Zezu ziŋ ni.

⁶Zudas ba, yi-yih. Ke mu̧h kpɔl ɓay poŋ Zezu ndoh ndɔk woyri mí ƴo geŋ sa̧wseh a a̧y ké nzukri ɓá tu ya.

⁷Nam a titilu ɓil nam ti̧hmbih-su̧ peŋ dan is ɓa nam kú-u vbeh guy buma.

⁸Mí Zezu pih Piyer ke Za̧h ɓahri, kú si lek gel fe su̧na ti̧hmbih woyri geŋ niri.

⁹Ku ɓahri, fál suŋ mí Zezu yih ɓay kú lek gel fe su̧na ti̧hmbih-i guy buma woyri ké ri le ?

¹⁰Mí ke ɓahri : « Í ko. Sina woiri, i ƴo rih ɓil puh-u dale, i ɓay ko nzuk ké suk mbih kal keni, í dih fal ye si ka̧h kerpuh ye, í ɓah hi̧ nzuk puh-u ɓahri, metere ɓahri, vul a suŋ mí a ye ke nzuk-dih fal yeri ku sú̧ fe su̧na ti̧hmbih-i guy buma ké ri le ?

¹¹

¹²Le nzuk puh ra ɓay sɔk wuri vul a fál síɓa ké ɓa bawu. Fe kaɓnari ku̧ ri da. Ké gelaw mí í lek ri fe su̧na ti̧hmbih wahri. »

¹³Kandɔkaw mí ku tɔr, ku ziŋ fe-uri ke gelu gelu kandɔk ké-e ɓah. Mí ku lek fe su̧na ti̧hmbih-i guy buma ra.

¹⁴Sa̧wseh-u ka̧h bale, Zezu kaɓ nzak fe su̧na ke gun nzak pihna yeri.

¹⁵Ke ɓah hi̧ niri ɓahri : « Law bi tasa̧y ɓay kaɓ nzak fe su̧na ti̧hmbih-ay ziŋ wuri dara koseh hul ɓá ziŋ mi ɓáy.

¹⁶Mi ƴo ɓah hi̧ wuri ɓahri se, mi ta su̧ fe su̧na sam ti̧hmbih a a̧y ziŋ wuri mba. Seh ké sa̧w ti̧hmbih-u ɓay laɓ ɔh ke gelu ɓil puh lakna Ŋgerzah dara mi sú̧ fe su̧na ti̧hmbih-u ziŋ wuri ɓáy. »

¹⁷Ke mbi koɓ yim ti̧hmbih a mbewu. Ke el ke tumbɔl hi̧ Ŋgerzah, mí ke ɓahri : « Í ya̧ wuri yimay, í nzo wuri poŋ hi̧ hani hani.

¹⁸Mi ƴo ɓah hi̧ wuri ɓahri se, mi ta nzo mbih lehna kpuh viyȩh ti̧hmbih-ay mba ur ke guri-ay. Namu ké puh lakna Ŋgerzah gi ten mun dara mi nzó mbih lehna kpuh viyȩh-ay ziŋ wuri ɓáy. »

¹⁹Ke mbi peŋ, ke el ke tumbɔl hi̧ Ŋgerzah, mí ke gɔh, ke wal hi̧ niri ɓahri : « Peŋay ɓa mun bi ké mi poŋ hi̧ hul ɓay tul woiri. Í ƴo tul laɓ fe laɓna bi-ay mbu̧h ziŋ mi ɓilu. »

²⁰Kaŋ pi mí koɓ yim ti̧hmbih a fá-fal fe su̧na ke mbi, ke ɓahri : « Yimay ɓa sem bi ké Ŋgerzah ŋga̧h sal in a foyu keni, mí semu fer ku̧ siɓa ɓay tul woiri.

²¹Keni-aw kara í ko, nzuk ké ndoh mi ndɔk nzukri kaɓ nzak fe su̧na-ay ziŋ mi pi.

²²Ɓay fe le hul gun nzuk pirmatul ɓá laɓ mah ke hul ye ké lek lewsa̧. Mí-aw kara koseh ƴo geŋ nzuk ké mbi pihna-aw ndoh mi ndɔk nzukri-aw. »

²³Wara mí gun nzak pihnari fakla ɓayu. Ku vbi haniri ɓay, a ge gaŋ mí ké sakra woyri-ay ɓay laɓ fe kaŋaw le ?

²⁴Bale fáh hani ur ké sakra woyri ɓay tu a ge mí ɓa ŋgernzuk ké haŋsekle woyri.

²⁵Mí Zezu ɓah hi̧ niri ɓahri : « Mbay tusiɓari ƴo lak mbay tul nzuk woyri. Nzuk-sɔk huhrumunri, nzuk a garuri ɗi niri ɓa balak nzuk.

²⁶Mí a woiri le, i na kandɔk nzuk riŋ ɗinari-aw ya. Wara le ŋgernzuk ké sakra woiri ɓá laɓ mun ye ɓa gun ké ta̧w mbaŋ yeri. Nzuk-nda pol ɓá laɓ mun ye ɓa gun-laɓ pihna hi̧ mbaŋ yeri ma.

²⁷Ké sakra nzukri, nzuk a suŋ mí ɓa ŋgernzuk le ? Ŋgernzuk ɓa nzuk ké kaɓ ɗeŋ geŋ fe su̧na mini ɓa gun ké ƴo laɓ pihna le ? Nzukri ƴo ɓahri, ŋgernzuk ɓa nzuk ké kaɓ ɗeŋ geŋ fe su̧na, kaŋ ya le ? Mí a bi ba, ké mi ƴo sakra woiri-ay, mi laɓ mun ɓa gun-laɓ pihna.

²⁸A woiri i ƴo fal ŋgaŋ bi ɓil koseh biri.

²⁹Mi póŋ puh lakna bah bi ndoh ndɔk woiri hi̧ í su̧ fe, í nzo fe ké nzak fe su̧na ziŋ mi ké puh lakna bi kandɔk bah bi ké poŋ puh lakna ndoh ndɔk bi. I káɓ tul arŋgaw ké boh falu seɗe ɓa nzuk-nda pol hi̧ sa̧w gun Izarayelri ké vba ɓa boh falu seɗe ra[80].

³⁰

³¹Simu, Simu wo, mú ko. Mbay záh tukala sor mbɔl tul woiri, ke ƴah mahful ɓay tah wuri kandɔk ŋgahla kaŋ.

³²A bi ba, mi leh seh ké pol Ŋgerzah rɔkɔ sal kanlaw wo ɓá ɗɔr. Bol falu ké mu el tu kanlaw wo ra mú hi̧ law mbaŋ wori ɓá ƴo ɓa kpuh-u ɓil kanlaw woyri. »

³³Mí Piyer ɓahri : « Ŋgernzuk, mi ƴo ziŋ mu. Mi ƴo tul kerɓay bi. Ɓa ra mgbal, mi si-u. Ɓa ra hul kara mi hu-u pi. »

³⁴Mí Zezu ɓahri : « Piyer, mi ƴo ɓah hi̧ mu, guri guri gaŋ dara tuhndoy mgbal ɓá ka-kah le, mu má̧y ɓay tul bi bɔk say ɓahri, mu tu mi ya. »

³⁵Ke el ɓah hi̧ nzuk-dih fal yeri ɓahri : « Seh ké mi pih wuri dan ɓɔl lari, dan ɓɔl gahru, dan sabɔk a ɓoru ra wa, fe mbew poh wuri le ? » Ku ɓahri : « Ta-a. »

³⁶Mí ke ɓahri : « Aŋay ba, nzuk ké ƴo ke ɓɔl lari le, ké mbi. Nzuk ké ƴo ke ɓɔl gahru kara ké mbi. Mahwu̧y ta-a le, ké ɗam mah gar ye el lari-u yeh keni mahwu̧y[81].

³⁷Mi ƴo ɓah hi̧ wuri ɓahri se, ɓay kú-u vbeh lewsa̧ ɓil mbete Ŋgerzah ké si tul bi ra ɓá laɓ ɔh. Ɓay ra ɓahri, ku mbu̧h ni ke nzukbaa ŋgomnari[82]. Ɓayu ra mgba tul bi ɓay tuŋ gbu̧h-u wara. »

³⁸Mí ku ɓahri : « Ŋgermbay, mahwu̧y seɗe mí na-ay. » Ke ɓahri : « Mah seeh. »

³⁹Zezu ti̧h. Ke tɔr si tul kasaw Oliveh. Ɓa fe laɓna ye lewsa̧. Nzuk-dih fal yeri kara si fal ye pi.

⁴⁰Ka̧hna woyri, ke ɓah hi̧ niri ɓahri : « Í goŋ wuri Ŋgerzah rɔkɔ fe-leh law ɓá ndih wuri. »

⁴¹Ke loh ké ta̧w woyri ɓa ɗih-u tɔɓ. Ke huk siɓa, mí ke goŋ Ŋgerzah ɓahri :

⁴²« Baah, lekɓay a ɓoru ƴo ra ri ɓay hi̧ koɓ haŋ fa̧hna wo ké tul suya nzukri ɓá kal le, mú loh ma fal hi̧ mí nzo ya[83]. Keni-aw kara mú laɓ fe ké law bi yih ya. Mú laɓ fe ké mu yih ma. »

⁴³Tem nzak pihna ké nunmbam ti̧h nun ye mí hi̧ ni ŋgerna. Law ye mgba ni giriɓ, mí ke toŋ ri̧h si̧w ke goŋna ye. Rona ti̧h puk puk ké mun ye ku̧ siɓa kandɔk sem ké ƴo ndi-ndiŋ kaŋ.

⁴⁴

⁴⁵Ke ur ke gel-goŋ Ŋgerzah ye el si ta̧w nzuk-dih fal yeri, mí ke ziŋ niri ké tul nam ɓay law woyri ké ƴo sa̧hna.

⁴⁶Mí ke ɓahri : « Í na wuri nam ley ? Í ur wuri, í goŋ Ŋgerzah rɔkɔ fe-leh law ɓá ziŋ wuri le, í el ke mun woiri ma fal. »

⁴⁷Zezu ƴo ɓah ɓay kɔɓ ɓáy bale, daɓa nzukri ti̧h tul ye. Zudas ké ƴo sakra nzuk-dih fal ye a boh falu seɗeri ra nda pol nzukri-aw. Ke ka̧h ta̧w Zezu ɓay hu̧hru ni ɓa ya̧h, mí Zezu ɓahri :

⁴⁸« Zudas, ke vahna a ya̧hri mú-u te gun nzuk pirmatul le wo ? »

⁴⁹Nzuk-dih fal yeri ba, ko fe ké ƴo kalna, mí ku ɓahri : « Ŋgernzuk, nah te niri ke mahwu̧yay le ? »

⁵⁰Nzuk a hani ké sakra woyri lu mahwu̧y, mí ke te gaysuk gun-laɓ pihna ŋgernzuk fe puhna a fál lakna fekeɗ kuŋ.

⁵¹Zezu ba, el ke ɓay ɓahri : « Í poŋ niri wo ! » Mí ke el za suk gunwo̧ro ra mí el mbɔhlɔ kan gelu.

⁵²Ke el ɓah hi̧ ŋgernzuk fe puhna Ŋgerzahri ke soze-kɔr vul kani Ŋgerzahri ke ŋgernzuk gun Izarayelri kú-u gi mgbá ni ɓahri : « I gi wuri ke mahwu̧yri ke kpuhri ɓay mgba mi keni wa, mi ɓa nzukbaa le wo ?

⁵³Nam ke nam, mi ƴo ziŋ wuri ɓil ila vul kani Ŋgerzah, mí i mgba mi ya. Wara le sa̧wseh woiri ke mbay sa̧w pihna tirima mí gi da-ay. »

⁵⁴Kú-u mgba ni, ku maŋ ni si kerpuh ŋgernzuk fe puhna Ŋgerzah. Piyer ba, mbehle sina fal woyri.

⁵⁵Nzuk kerpuh-uri nzuh hɔrɔ kaɓ nzaku ƴo nu̧h-u. Piyer si kaɓ sakra woyri.

⁵⁶Gun kaɓna a wu̧yu mbew ko kona zi̧h ma tul Piyer ké kaɓ nzak hɔrɔ, mí ke ɓahri : « Gun wo̧ro-ay ƴo ziŋ ni pi. »

⁵⁷Mí Piyer ma̧y ɓay ɓahri : « Wu̧y, mi tu ni ya. »

⁵⁸Falu ndi̧, nzuk a ɓoru ko ni mí ɓahri : « A wo-ay, mu ƴo sakra nzuk yeri gaŋ. » Piyer ba, ɓah nzak ye ɓahri : « Kaŋ ya, a bi ta-a. »

⁵⁹Sa̧wseh mbew kal, mí nzuk a ɓoru ɓáy ŋgu̧h tul ɓayaw ɓahri : « Ketina gaŋ, gun wo̧ro-ay ƴo ziŋ ni ɓayu ké-e ɓa ziɓ a tusiɓa Galile. »

⁶⁰Mí Piyer ɓahri : « Mi tu sam ɓay ké mu ɓah-ay ya. » Piyer ɓah kaŋ ba, tuhndoy mgbal kah koŋroŋ ba.

⁶¹Gaŋ tul feri riw sɔɓ nun le, ke ko Piyer zi̧h. Mí Piyer ker si tul ɓay ké Gaŋ tul feri riw ɓahri, dara tuhndoy mgbal ɓá kah le, a ye ke má̧y ɓay tul Zezu bɔk say ɓahri, ke tu ni ya.

⁶²Piyer ti̧h kala nduh mahrew, ke vuh ke mbihnun vɔh vɔh.

⁶³Nzukri ké kɔr Zezu ɓa mgbal ƴo ɗur ni el sak ni sa-sak.

⁶⁴Ku ŋga̧h nun ye, mí ku ƴo vbi ni ɓay ɓahri : « Gun nzak pihna Ŋgerzah, Ŋgerzah ɓá ndoh riŋ nzukri ké ƴo vba̧ mu-ay ké nzak wo, mú ten hi̧ na. »

⁶⁵Ɓay a ɓoruri ɓa ŋgi̧-u mí ku mbi riŋ ye sak ni keni.

⁶⁶Gel pele bale ŋgernzuk gun Izarayelri ke ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ku mbu̧h hani ké gel-kuŋ salɓay, mí ku hi̧ Zezu si ri.

⁶⁷Ku ɓahri : « A wo mú-u ɓa Ŋgermbay le, mú hi̧ nzak wo ɓah. » Mí ke ɓahri : « Mi ɓah hi̧ wuri kara i ta ya̧ ɓayu ya.

⁶⁸Mi vbi wuri ɓay kara i sa yih nzak bi ya pi.

⁶⁹Ur ke aŋay gun nzuk pirmatul kaɓ ɓel Ŋgerzah nzuk huhrumun a luki ɓa ndɔk lakna ye[84]. »

⁷⁰Gbam woyri, ŋgernzuk-kuŋ salɓayri ur ɓahri : « Kaŋ le mu ɓa gun Ŋgerzah ra ma ? » Mí ke el ɓahri : « Nzak woiri mí ɓah, mi ƴo ri. »

⁷¹Kandɔkaw mí ku ɓahri : « Nah zɔklɔ mun wahri tul ɓay a lah-u ɓáy le ? Nah lah nzak ye da. »