Read Karang Mbete Luk 23 Bible Online

Mbete Luk 23 - Karang bible

Mbete Luk 23

¹Nzukri gbam ké ƴo gel-kuŋ salɓay ra ur síɓa mí maŋ Zezu si pol guvener Pilaɗ[85].

²Ku goh Zezu ke ɓay kandɔkay : « Nah ziŋ gun wo̧ro-ay, ke ƴo gbur nzuk sa̧w puh wah ziɓri, ke ƴo gboh púh lampoh hi̧ sezar mbay a luki dara mí ke el ɓahri, a ye gaŋ mí ke ɓa Ŋgermbay, mbay a luki. »

³Mí Pilaɗ vbi ni ɓay ɓahri : « A wo mú-u ɓa mbay ziɓri ra le ? » Zezu ba, yih nzak ye ɓahri : « Nzak wo mí ɓah-aw. »

⁴Pilaɗ si ɓah hi̧ ŋgernzuk fe puhna Ŋgerzahri ke daɓa nzukri-aw ɓahri : « Mi ko suya mbew ké mgba tul ye ya. »

⁵Mí ku ŋgu̧h ɓay woyri ɓahri : « Ke ƴo firma gun Izarayelri láɓ tul kpuhna ké tusiɓa ziɓri-ay gbam, ur ke tusiɓa Galile sa̧ gi ka̧h tusiɓa Zude-ay. »

⁶Pilaɗ lah kaŋ ba, ke vbi niri ɓahri, nzuk-aw ɓa ziɓ a tusiɓa Galile wa ?

⁷Mbay Eroɗ ké ɓa mbay ziɓri ra ƴo Zurusalem ɓay ti̧hmbih-i guy buma[86]. Pilaɗ lah ɓahri se, Zezu ɓa nzuk ké puh lakna Eroɗ le, ke pih ni si hi̧ Eroɗ.

⁸Eroɗ ba, lah nzukri ɗi riŋ Zezu doro-u ɗi-ɗih, mí ɗaka ɓay ko Zezu laɓ ni. Ke ko Zezu bale, law ye rih ni keɗ keɗ. Ke ker ɓahri se, ko ya le, Zezu ɓay laɓ fe saŋ hi̧ ni ké ko.

⁹Ke vbi Zezu ɓayri mah fe, mí Zezu fer ɓay mbew ya.

¹⁰Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ƴo ri pi. Ku goh ni ke ɓay zekre zekre.

¹¹Eroɗ ke soze yeri mgba Zezu ɓa kɔk nzuk. Ku sak ni, ku ndoh ni mah gar mbay a ndu̧yu mgbelek mgbelek, mí ku el pih ni si hi̧ Pilaɗ ra ɓáy.

¹²Ke seh-u-aw mí Eroɗ ke Pilaɗ mgba nzak nzaw el ti̧h ɓa ya̧hri.

¹³Pilaɗ ɗi ŋgernzuk fe puhna Ŋgerzahri ke ŋgernzuk gun Izarayelri ke nzuk puh woiri ziɓri, gbam mbu̧h hani. Ke el ɓah hi̧ niri ɓahri : « I maŋ nzukay gi keni hi̧ mi. I ɓahri se, ke ƴo gbur puh woiri. Í te wuri suk. Ké nun woiri-ay, mi fakla ɓayu, mí-i ziŋ suya mgba tul ye mbew ya. Ɓayu ta kandɔk ké i goh ni ra ya.

¹⁴

¹⁵Eroɗ kara ziŋ suya mbew ya pi. Ɓayu mí ke el pih ni gi hi̧ na. Í lah wuri ɓayay. Nzukay laɓ fe mbew ké mah hul ya.

¹⁶Kaŋ dale mi zór ni dara mí-i póŋ ni ɓáy. »

¹⁷[87]

¹⁸Mí ku vba̧ nzak gɔm ɓahri : « Ɓá ɔr gun wo̧ro-aw hak síɓa, ɓá sel Bar-Abba. »

¹⁹Bar-Abba ra ke na vul mgbal ɓay ŋgermu ké-e ruh gbur keni puh hi̧ ŋgomna. Ke i hul pi.

²⁰Mí Pilaɗ el ɓah ɓay ra ziŋ nzukri-aw, kú poŋ Zezu ɓá tɔr.

²¹Mí ku ur ke ɓay gbaw gbaw : « Ɓar ni ɓar gaŋ, ɓar ni ɓar gaŋ. »

²²Pilaɗ ba, el ɓah a bɔk sayu hi̧ niri : « Ɓá ɓar ni ɓay tul fe le ? Suya fe gaŋ mí ke laɓ le wo ? Mi ko salɓay hul ké mgba tul ye ya. Kaŋ dale mi zór ni dara mí-i póŋ ni ɓáy. »

²³Mí ku ɓer ɓay ke kusol a mgbe-u ɓahri, ɓar ni ɓar gaŋ. Ɓay woyri-aw mba Pilaɗ mba-mba.

²⁴Mí Pilaɗ mbi ɓay woyri kandɔk kú-u ger ɓayu.

²⁵Nzukbaa ŋgomna ké gbur puh, ké i nzukri ra, ke sel ni kandɔk kú-u yih tul ye, mí ke el ndoh Zezu ndɔk sozeri ɓá laɓ ni kandɔk kú-u vbi.

²⁶Kandɔkaw mí sozeri mgba Zezu si ma gel-ɓar ni. Simu ké Siren ur ke kala gi ma Zurusalem. Sozeri to ni, mí hah ni ke suk kpuh vbatay hul Zezu dih keni fal ye.

²⁷Daɓa nzukri ɓa ŋgi̧-u si fal ye. Wu̧yri vba̧ haŋ woyri zaɗ zaɗ vuh rew keni.

²⁸Mí Zezu sɔɓ nun ma tul woyri, ke ɓahri : « Wu̧y Zurusalemri, í vuh ɓay bi ya. Í vuh wuri ɓay mun woiri ke gun woiri ma.

²⁹Ɓay fe le í ko, nam ƴo gina ké nzukri ɓay ɓahri, pol tehna ɓa nzuku a mahtuhri, ɓil a a̧yri ké tu mbuŋna ya, pam a a̧yri ké gun nzo ya.

³⁰Ur ke seh-u-aw mí nzukri ɓay ɓahri : Kasaw, mú dir ku̧ tul wah. Kpar, mú pɔr na[88].

³¹Ɓay fe le aŋay ké kpuh ɓa pa̧wu kú-u laɓ sam fe laɓna-ay, sa̧wseh ké kpuh ho̧k da wa, ɓay na ani ɓáy le ? »

³²Sozeri maŋ nzuk suyari seɗe dɔm tul Zezu si keni ma gel-ɓar niri.

³³Gel ra ku ɗi ɓa Gbogbotul. Ku ka̧h, mí ku ɓar Zezu ké tul kpuh vbatay. Ku ɓar nzuk suya a mbewu ké fál ndɔk lakna Zezu, nzuk a seɗe-u ba, ké fál ndɔk kperu ye.

³⁴[89] Sozeri fa̧h gar ye kehr ku̧ ke gelu gelu, mí ku nda ɓele keni[90].

³⁵Nzukri ƴo, ku ƴo ko kona. Ŋgernzuk woyri gun Izarayelri kara sak ni le, el sak ni ra ɓáy eŋ kɔk nzuk ɓahri, nzuku-ay ya̧ nzukri ya̧. Ŋgerzah mbi ra ni ɓa Ŋgermbay gaŋ le, ké ya̧ mun ye.

³⁶Sozeri kara sak ni sa-sak.

³⁷Ku ndar yim a su̧h-u kan nzak ye, mí ku ɓahri : « A wo-ay, mu ɓa ra mbay ziɓri ɓa ketina gaŋ le, mú ya̧ mun wo. »

³⁸Gbekre kú-u vbeh fe salɓay hul kan ri, ku ɓar fál síɓa tul ye. Salɓayu vbeh kandɔkay : mbay ziɓri mí na-ay.

³⁹Nzuk suya a mbewu kú-u ɓar ni ƴo fah Zezu. Ke ɓahri : « A wo mú-u ɓa Ŋgermbay, kaŋ ya le wo ? Mú ya̧ mun wo, mú ya̧ na pi. »

⁴⁰Mí nzuk a seɗe-u zɔm mbaŋ ye ra ɓahri : « Hȩkme Ŋgerzah ta nun wo ya lo ? A wah le mbɔl hul ké na tul wah, mí nah puh ziŋ ni pi-ay ?

⁴¹Salɓay kú-u kuŋ ké tul wah ɓa ketina, kpaŋndɔk pihna wah mí nah ziŋay. A ye ba, fe laɓna ye mbew ké si gelu ya ra ta-a. »

⁴²Mí ke el ɓah ɓayay hi̧ Zezu ɓahri : « Zezu, seh-u ké mu mbi gel kaɓna wo ɓa Ŋgermbay le, mú yȩkre mi ya. »

⁴³Zezu ɓah hi̧ ni ɓahri : « Ketina mi yȩ́kre mu ya. Mi ƴo ɓah ɓayay hi̧ mu, guri-ay gaŋ mí mu káɓ ziŋ mi ké tusiɓa a suki. »

⁴⁴Seh ƴo tul puh bale, tirima ya̧ gel ké tusiɓa gbam kpu̧ru ka̧h sa̧wseh say bɔklew. Seh zaŋ mba ba, baw gar a yih-u ké kuŋ gel ƴona Ŋgerzah ɓil vul kani gɔh tir ké haŋsekle[91].

⁴⁵

⁴⁶Zezu vba̧ nzak ɓeleŋ, mí ke ɓahri : « Baah, mi poŋ tem bi kan ndɔk wo. » Ké-e ɓah kaŋ ra, ke ɗer haŋ fo̧h mí hi̧ law ye toh.

⁴⁷Kumandah ɓá ko fe ké kal le, ke dim Ŋgerzah ɓahri : « Ɓa munɓay, nzukay ƴo mbew ziŋ Ŋgerzah gaŋ. »

⁴⁸Daɓa nzukri ké mbu̧h ri, kú-u ko feri ké kal, ku el vba̧ haŋ woyri zaɗ zaɗ tɔr keni si puh woyri puh woyri.

⁴⁹Nzukri ké ƴo ziŋ Zezu ba, ku ƴo ɓa ɗih-u ké gel-ɓar ni. Wu̧yri ké ɓaŋ ni ur ke Galile sa̧ ra ƴo ko feri ké kalaw pi.

⁵⁰Nzuk a hani-u mbew ƴo ri. Riŋ ye ɓa Zezeɓ ké Arimate ké tusiɓa Zude, ke ɓa nzuk lawsuki, ke tu Ŋgerzah ɓa záh ye, mí ke ɓaŋ law ye te tul lák mbay Ŋgerzah. A ye ra ke ƴo haŋsekle ŋgernzuk-kuŋ salɓayri, mí ke mbu̧h nzak ye ɓil salɓay hul kú-u kuŋ kan tul Zezu ra ya.

⁵¹

⁵²Ke si ta̧w Pilaɗ, mí ke vbi ni hul Zezu,

⁵³mí ke si ɗer hul Zezu, ke el kuh hulu ke ladara a taŋ fi̧nak fi̧nak. Mí ke si mbek ké ɓil hoh kasaw kú-u fel lewsa̧ ɓay mbek hulri ɓilu. Hoh-u ku mbek ri hul mbew ya ɓáy[92].

⁵⁴Namu-aw ɓa nam a titilu ɓil nam ti̧hmbih-i guy buma. Mí seh na nzȩh ɓay riŋna ɓa titil nam a seɗe-u. Nam a seɗe-u ra ɓa baw nam ɔkna.

⁵⁵Wu̧y Galileri ké ƴo dih fal Zezu, ku yih ɓay ko gel a suŋ mí Zezeɓri ɓay mbek hulu, mí ku si fal woyri ka̧h hoh kasaw-mbek hulri ko.

⁵⁶Ku el si puh, mí ku lek num-nu̧h hul ke sa̧wkpuh ké ba̧ri-u fu̧ buy buy. Kaŋ mí ku ɔk mun woyri ke baw nam ɔkna ti̧hmbih-u kandɔk ké bolkusol Ŋgerzah sɔk.