Read Karang Mbete Luk 24 Bible Online

Mbete Luk 24 - Karang bible

Mbete Luk 24

¹Nam a sayu ɓil nam ti̧hmbih-i guy buma, namu ɓa nam a titilu ɓil dimasi, mí wu̧yri-aw ti̧h ke gel pele ɗeŋ ɗeŋ. Ku si ke sa̧wkpuh kú-u lek ra ka̧h keni tupal.

²Mí ku ko kasaw ké mbih nzak hoh ra na fál mbew poŋ nzaku na ŋgah.

³Ku rih si ɓil hoh kasaw-mbek hul ra, mí ku ziŋ hul Zezu a ye Gaŋ tul feri riw ya bale, gelɓay zi niri. Mí nzukri seɗe ti̧h nun woyri yelu ke mah gar a ndu̧yu kandɔk ndu̧yna gunwu̧y nunmbamri kaŋ.

⁴

⁵Hȩkme se niri mbamba, ku mu̧h nun woyri el ko kona ma siɓa, mí nzukri ra ɓah hi̧ wu̧yri-aw ɓahri : « Ɓay fe mí i ƴah nzuk ké sakra hulri le ?

⁶Ke ta gelay ya wara le, ke ti̧h ke puh záh ke pa̧ymun a foyu. Í ker ɓay fe ké-e ɓah hi̧ wuri ke sina woiri ma Galile ra, ke ɓahri, ɓa ra fe fe gaŋ kara, ku póŋ gun nzuk pirmatul ndoh ndɔk nzuk suyari, ku ɓár ni ké tul kpuh vbatay ɓay i-u. Nam a sayu le, ke tí̧h ke puh záh ke pa̧ymun a foyu. »

⁷

⁸Mí law woyri ɓá ker si tul ɓayri ké Zezu ɓah ra.

⁹Ku tɔr ke tupal el si ɓah hi̧ nzuk-dih fal ye a boh falu mbewri ke tɔr nzuk-dih fal ye a ɓoruri hi̧ ku lah.

¹⁰Wu̧yuri ra ɓa Mari ké Makdala, Zani, Mari ké ɓa mah Zak ba, wu̧y a ɓoruri ké ƴo ziŋ niri pi. Ku ƴo ɓah ɓayuri hi̧ gun nzak pihna Ŋgermbayri.

¹¹Mí ɓayuri na nzuk-dih fal yeri ɓa kɔk ɓay. Ku ya̧ ɓay wu̧yuri ya.

¹²Piyer ba, kpa̧h ɗukna si ka̧h hoh kasaw-mbek hul ra. Ke ɗiŋ tul peŋ gel ma ɓil hoh ra. Ke ko ɓa ladara yaŋ. Mí ke el si puh. Gosoɓay zi ni zi-zi pi.

¹³Nzuk-dih fal Zezu a ɓoruri seɗe ba, mbi mahful si ma puh a hani ke namu-aw. Riŋ puh-u ɓa Emayus. Salful ur ke Zurusalem si ma Emayus ɗih mah salful boh falu mbew.

¹⁴Ku ƴo lu mberem tul feri gbam ké kal ɓil namri-aw, mí ku si keni sina.

¹⁵Ku ƴo fakla sa̧wɓayu bale, Zezu gi mbu̧h sina ziŋ niri.

¹⁶Mí nun woyri na nduŋ, ku tu ni ya.

¹⁷Mí ke ɓah hi̧ niri ɓahri : « Tul mberem fe mí i lu mí i fah keni ɓayay le ? » Ku ta̧h ƴo ko kona ke law sa̧hna.

¹⁸Mí Kelewpas, nzuk a mbewu-aw, yih nzak ye ɓahri : « A wo mbew yaŋ ké Zurusalemay mí mu tu fe ké kal ɓil namri-ay ya ley ? »

¹⁹Mí Zezu ɓahri : « A fe mí kal le ? » Ku ɓahri : « Fe ké kal tul Zezu ké Nasareɗ munu. A ye mí nzukri ké puh gun Izarayelri gbam tu ni ɓa gun nzak pihna Ŋgerzah. Ŋgerzah pih ni ke huhrumun ɓil fe laɓna pi ɓil ɓay ɓahna pi.

²⁰Mí ŋgernzuk fe puhna Ŋgerzahri ke ŋgernzuk wahri mgba ni el ndoh ni ndɔk nzuk Rɔmri hi̧ ku kuŋ salɓay hul kan tul ye mí el ɓar ni ké tul kpuh vbatay.

²¹A wah ba, nah ɓaŋ law te tul ye ɓahri se, ɓa a ye mí ke ɓay ten gun Izarayelri ké ɓil mgbal Rɔmri. Ɓayu ɔh ya pi. Wara le ɓay a ɓoru gi ziŋ na ɓáy. Guri-ay mí ɓa nam a sayu.

²²Mí wu̧y a hani-uri ké sakra wah gi zukru kerɓay wah ke ɓay a foyu-ay. Ké gel pele ɗeŋ ɗeŋ mí ku si tupal.

²³Hulu ba, ta-a, mí ku gi ɓahri se, ku ko tem nzak pihnari seɗe ti̧h nun woyri mí sɔk niri ɓahri, Zezu ra ƴo ɔ-ɔkna ke pa̧ymun a foyu da.

²⁴Nzuk a ɓoruri ké sakra wah ba, si tupal, mí ku ko gelu na kandɔk ké wu̧yri ɓah ra. Hulu ma, mí ku ziŋ ya. »

²⁵Mí Zezu ɓah hi̧ niri ɓahri : « Uwa, kerɓay woiri na kpo̧k, law woiri kpu-kpuh. Yá̧ ɓay ké gun nzak pihna Ŋgerzah a lewsa̧ri vbeh se wuri se.

²⁶Fe vbehna-awri ɓahri, ɓa ra fe fe gaŋ kara Ŋgermbay ɓay ko seh dara mí ke káɓ ɓil riŋ ɗina mbay ye ɓáy, kaŋ ya le wo ? »

²⁷Kandɔkaw mí ke ndazi ɓayuri ɓil mbete Ŋgerzah ur ke tul mbete vbehna Moyiz si ka̧h mbete vbehna gun nzak pihna Ŋgerzah a lewsa̧ri. Ke ndazi ɓayri ké si tul Ŋgermbay ɓil fe vbehna-awri gbam hi̧ niri ku lah.

²⁸Ku gi ka̧h ɗih ya ke ka̧w puh Emayus. A ye ke laɓ mun ye kandɔk ke ɓay kal ma pol.

²⁹Mí ku gboh ni ɓahri, ké kaɓ ziŋ niri ɓay fe le, bɔklew ka̧h da. Zah le suŋ ɓay sih wara. Kandɔkaw mí ke si kaɓ ziŋ niri.

³⁰Ku kaɓ nzak fe su̧na bale, ke mbi peŋ, ke el ke tumbɔl hi̧ Ŋgerzah. Ke gɔh mí ke wal niri.

³¹Bale nun woyri mgbur, mí ku tu ni ɓa a ye. A ye ba, ke zi rik rik.

³²Mí ku ɓah hi̧ hani ɓahri : « Fe vbehnari ké ɓil mbete Ŋgerzah ké-e ndazi ɓayu hi̧ na ké mahful gina wah-aw laŋ law wah laŋ gaŋ ya le ? »

³³Ké seh-u-aw gaŋ, mí nzukri ké seɗe ra el ke fal woyri nzek si Zurusalem. Ku ziŋ nzuk-dih fal Zezu a boh falu mbewri ke tɔr nzuk-dih fal ye a ɓoruri ké gel kú-u mbu̧h hani. Nzuk-dih fal yeri ƴo ɓah ɓay tul ye Gaŋ tul feri riw ɓahri, ke ti̧h ke puh záh ke pa̧ymun a foyu ti̧h gaŋ. Ku ɓahri, Simu kara ko ni pi.

³⁴

³⁵Nzuk a seɗe-uri kara ki̧ fal feri ké kal ké mahful sina woyri ma Emayus dara mí ɓay peŋ ké-e gɔh wal niri, mí ku el tu ni.

³⁶Ku ƴo ɓah ɓay kɔɓ ɓáy bale, Zezu ti̧h tul woyri mbu̧y. Mí ke ɓahri : « Mi vah wuri ke ɗeŋ. »

³⁷Tem mun woyri ti̧h kereŋ, tul woyri fa̧h zikiki zikiki. Ku ɓahri se, záh mí ti̧h nun woyri.

³⁸Mí ke el ɓahri : « Ani mí law woiri lu gba̧y gba̧y le ? Ɓay fe mí law woiri nzah ɓay ma gini ma sa̧ le ?

³⁹Í ko wuri ndɔk bi ke bɔk bi-ay. A bi munu. Í gi za, í ko ɓay fe le, záh ta ke mun hay ke huhru kandɔk ké i ko mi-ay ya. »

⁴⁰Kaŋ mí ke sɔk niri ndɔk ye ke bɔk ye.

⁴¹Law woyri rih niri mbamba hi̧ niri ku ya̧ ɓay ye ya. Gosoɓay zi niri pi, mí Zezu el ɓahri : « Fe su̧na ta-a le ? »

⁴²Mí ku hi̧ ni nzuy a tɔku.

⁴³Ke ya̧ su̧ ké nun woyri.

⁴⁴Ke el ɓahri : « Sew ké mi ƴo ha̧rma ziŋ wuri, mi sɔk wuri ɓayri ké ɓil mbete vbehna Moyiz ke mbete vbehna gun nzak pihna Ŋgerzahri ke Mbete Siŋ ɓahri, ɓayuri sɔk ɓay tul bi sɔ-sɔk. Mi ɓahri se, ɓa ra fe fe gaŋ kara ɓayuri ɓay laɓ ɔh ke gelu gbam. »

⁴⁵Wara mí ke mgbur nun woyri hi̧ ɓayuri-aw guh law woyri.

⁴⁶Ke ɓahri se : « Fe vbehna mbete Ŋgerzahri kú-u vbeh lewsa̧ si tul ɓay koseh ké ɓay laɓ Ŋgermbay, ɓay ti̧hna ye ke puh záh ke pa̧ymun a foyu ké nam a sayu.

⁴⁷Ku vbeh ɓay si tul ka-kah ɓay kú-u ɓay kah-u ur ke Zurusalem si ka̧h tusiɓa sa̧wnzuk a ɓoruri gbam ɓahri, kú mbi law woyri ké tul suya ma fal el kan law tul ye Ŋgermbay hi̧ ké lu salɓay hul ké tul woyri.

⁴⁸A woiri mí i ɓa nzuk-te-teh ɓay feri ké i ko ra.

⁴⁹A bi le mi pih Tempuki ké Bah bi wahɓay hi̧ wuri[93]. Mí í kaɓ sa Zurusalemay[94] geŋ nam ké ŋgerna Tem ye ké deɓ ye ta-a gi ku̧ tul woiri. »

⁵⁰Zezu maŋ niri si Beɗtani. Ke ɔr ndɔk kan tul woyri, mí ke lu mgbɔkɔ ku̧ tul woyri.

⁵¹Ke ƴo lu mgbɔkɔ ku̧ tul woyri bale, ke loh mun ye ké ta̧w woyri, mí ke tɔr ma nunmbam.

⁵²Nzuk-dih fal yeri huk siɓa dim ni mí ku el si Zurusalem ke law rihna a luki.

⁵³Ku si ɓil ila vul kani Ŋgerzah le, el si ra ɓáy ƴo dim ni kpatara.