Read Karang Mbete Luk 4 Bible Online

Mbete Luk 4 - Karang bible

Mbete Luk 4

¹Mí Tempuki ƴo ziŋ Zezu. Ti̧hna ye ke mahmbih Zurdeŋ dale, Tempuki maŋ ni si laɓ nam bon niŋ ɓil lawkɔr. Nam bon niŋaw diyabolo a ye mbay záh tukala ƴo ndoh law Zezu ke ɓay. Zezu su̧ fe ya ɓil namuri-aw, mí ɗaka i ni i-i.

³Bale mbay záh tukala ɓah hi̧ ni ɓahri : « Ké mu ɓa gun Ŋgerzah ra, mú ɓah hi̧ kasaway ɓá ti̧h ɓa fe su̧na hi̧ mu, mú su̧. »

⁴Zezu fer nzak ye ɓahri : « Mbete Ŋgerzah ɓahri, ɔkna nzuk na ɓay fe su̧na kaŋto ya[15]. »

⁵Mbay záh tukala maŋ ni si ƴo tul kasaw a gaŋu hi̧ ni ke ko tul puh laknari riw pol mbew.

⁶Mí ke el ɓah hi̧ ni ɓahri : « Puh laknari ke fe riŋ ɗina woyri gbam ku̧ ndɔk bi. A bi ba, mi él ku̧ ndɔk nzuk a a̧y ké mi yih.

⁷Dale mú huk siɓa ké pol bi-ay le, mi él ndoh ndɔk wo, mú lak ɓa mbay tulu gbam. »

⁸Mí Zezu el ke ɓay ɓahri : « Mbete Ŋgerzah ɓahri, Miƴori mí ɓa Ŋgerzah wo. A ye mbew yaŋ mú-u húk siɓa ké pol ye, mu dím ni mbew yaŋ[16]. »

⁹Bale mbay záh tukala maŋ ni si Zurusalem. Ke hi̧ ni ke ƴo ti̧w gel a gaŋu zeŋleŋleŋ ké tul vul kani Ŋgerzah, mí ke ɓahri : « Ké mu ɓa gun Ŋgerzah ra, mú zo vbu siɓa.

¹⁰Mbete ye ɓahri se, ke ɓay pih tem nzak pihna yeri hi̧ kú kɔr mu.

¹¹Mbete-u ɓah ra ɓáy ɓahri se, ku héh mu rɔkɔ bɔk wo ɓá ɓe kasaw[17]. »

¹²Mí Zezu el ke ɓay ɓahri : « Ŋgerzah ɓahri se, Miƴori mí ɓa Ŋgerzah wo, mu fáh ni ya[18]. »

¹³Mbay záh tukala leh law Zezu mah ni, mí ke poŋ Zezu, ke tɔr si mu̧h kpɔl.

¹⁴Kandɔkaw mí Zezu ti̧h ke ɓil lawkɔr ké tusiɓa Zude el si tusiɓa Galile, mí ŋgerna Tempuki ŋger ni. Riŋ ye ya̧ gelri riw ké tusiɓa-aw.

¹⁵Ke ƴo sɔk ɓay lák mbay Ŋgerzah ɓil vul misoŋ woyri hi̧ nzukri lah, riŋ ye el mgbe ké nzak woyri.

¹⁶Ke si ka̧h Nasareɗ, puh ké-e hu̧h ké ri. Nam ɔkna, ke si vul misoŋ woyri kandɔk ké ɓa fe laɓna ye. Ku hi̧ ni ke ur síɓa ɓay ki̧ mbete.

¹⁷Ku ndar mbete Ezay gun nzak pihna Ŋgerzah a lewsa̧ hi̧ ni. Mí ke mgbur mbete-u, ke ziŋ gel ki̧na a hani mbew. Ke ki̧ ɓayay :

¹⁸Tem Miƴori gi rih tul bi, ke mbi mi ɓa mbay-ɓah ɓaysuki lák mbay ye hi̧ ko̧hkori. Ke pih mi ɓa mbay ka-kah ɓay ti̧hna mgbalri ke ɓil mgbal pi, ɓay mgburna nun ra̧wri pi [19]. Ke pih mi ɓa mbay-sel nzukri ké tukala ŋga̧h niri.

¹⁹Le mí ka-kah ɓay sew a a̧y ké law sana Miƴori ƴo ku̧ tul nzukri [20].

²⁰Zezu ki̧ ɔh, ke tuh mbete-u el ndar hi̧ nzuk-mgba sa̧wu, ke el kaɓ ɓay sɔk ɓayu[21]. Nzukri riw ké kaɓ vul misoŋ ra ko ni yi̧m dale,

²¹ke ɓahri : « Guri, fe vbehna Ezayay laɓ ɔh ke gelu ké nun woiri da. »

²²Mí nzukri gbam ɓal riŋ ye[22]. Gelɓay lawsuki ké-e ɓah ra zi niri. Ku ɓahri : « Gunwo̧ro-ay ɓa gun Zezeɓ ya wa ? »

²³Mí Zezu ɓah hi̧ niri ɓahri : « I ɓay mbi gamɓayay ɓah hi̧ mi keni ɓahri, “dokta, mú gah mun wo.” I él ɓah hi̧ mi ɓahri, fe saŋri ké i lah ɓayu ra, mí laɓ hi̧ nzuk puh biri-ay kandɔk ké mi laɓ ké fál Kapernayumaw.

²⁴Mí gamɓayaw ra, mi el keni hi̧ wuri ɓahri se, nzukri ké puh gun nzak pihna Ŋgerzah sa ɓay ye ya.

²⁵Dale mi el ɓah ketina-ay hi̧ wuri, sew Eli gun nzak pihna Ŋgerzah a lewsa̧ ra wu̧y sehri ɓa ŋgi̧-u ƴo tusiɓa Izarayelay. Sew Eli ra mbam to ya mbihmbam say ke few tɔtɔklɔ, mí ɗaka bahpihya lih tusiɓa ke gelu gbam.

²⁶Ŋgerzah pih Eli si ta̧w wu̧y seh mbew ké tusiɓa gun Izarayelri ya. Mí ke pih ni si Sareɓta ké tusiɓa Sidoŋ ta̧w wu̧y seh a hani[23].

²⁷Kaŋ pi mí sew Elizeh gun nzak pihna Ŋgerzah a lewsa̧, nzuk ndɔɓeri ɓa ŋgi̧-u ƴo tusiɓa Izarayelay. Bolkusol Ŋgerzah hah niri sí gel fe puhna ye ɓay sena-aw, mí ke hi̧ Elizeh teh mun nzuk ndɔɓeri ké tusiɓa gun Izarayelri ya. Mí ke hi̧ Elizeh lu sena ndɔɓe ké mun nzukbaa woyri Naman nzuk tusiɓa Siri[24]. »

²⁸Law nzukri gbam ké kaɓ vul misoŋ ra nzek ké tul ɓay ye.

²⁹Ku ur síɓa yiw, mí ku ten ni ti̧h kala puh. Ku si ziŋ ni ka̧h nzak hereŋ ké fal puh ɓay sɔkrɔ ni vbu ɓilu.

³⁰Mí ke ti̧h ké sakra woyri tɔr.

³¹Ke ɗer si Kapernayum ké tusiɓa Galile. Nam ɔknari, ke ƴo firma nzukri ɓay Ŋgerzah ké vul misoŋ.

³²Gosoɓay zi nzukri ɓay tul fe firma ye ɓay fe le, ke ɓah kandɔk a ye mí ke ɓa mbay bolkusolu.

³³Ké vul misoŋaw, nzuk a hani ƴo ri. Záh tukala ƴo tul ye.

³⁴Ke vba̧ nzak ɓeleŋ ɓahri : « Hȩh, Zezu ké Nasareɗ, a fe mí ƴo sakra wah le ? Mu gi ɓay ɓeɓ na wa ? Mi tu mu tu-tu. Mu ɓa nzuk lawpuki Ŋgerzah. »

³⁵Mí Zezu hah záh ra ɓahri : « Poŋ nzak wo-aw. Mú ti̧h ke tul nzukay. » Záh ra mbi nzukaw vbu siɓa gbirik ké sakra nzukri, ke ti̧h ke tul nzuku mí poŋ ni dan láɓ fe hani ziŋ ni gaŋ ba.

³⁶Hȩkme laɓ nzukri riw. Fe-u na niri ɓa saŋ, mí ku el ɓah ɓay ke haniri ƴo ɓahri : « Sam ɓay fe mí kari-ay le ? Ɓay fe le ke hah záh tukalari ke kusol mbay ke huhrumun hi̧ ku ti̧h tɔr. »

³⁷Kandɔkaw mí mberem Zezu ya̧ gel ya̧h ya̧h ké tusiɓa-aw.

³⁸Zezuri ti̧h ke vul misoŋ dale, ku si kerpuh Simu. Sena mun zaŋna zaŋ mahfay Simu mbamba, mí ku ɓah ɓayu hi̧ Zezu.

³⁹Ke si, ke ɗiŋ tul ko mahfay Simu. Ke hah sena mun zaŋna ra, mí sena-aw el poŋ ni. Sa gelu-aw mí mahfay Simu ur mgba niri gahru.

⁴⁰Seh na nzȩh ɓay riŋna, mí nzuk a suŋ suŋ le suk sena ye sena ye gi ku̧ niri ké ta̧w Zezu. Bale Zezu ɓaŋ ndɔk ye kan tul nzuk senari mbew mbew gbam gah niri.

⁴¹Záhri kara ti̧h ke tul nzuk senari ɓa ŋgi̧-u pi. Záhri-aw ƴo vba̧ nzak ɓeleŋ ɓeleŋ ɓahri : « A wo mú-u ɓa gun Ŋgerzah[25]. » Mí ke hah niri ɓáh ɓay kaŋ ɓay fe le, ku tu ni ɓa Ŋgermbay tu-tu.

⁴²Gel pele Zezu ti̧h tɔr si gel ké nzukri ta ri ya. Mí daɓa nzukri ƴah ni fál síɓa ke fál siɓa, ku ziŋ ni. Ku sa poŋ ni ké tɔr ya.

⁴³Bale ke ɓah hi̧ niri ɓahri : « Mi sí ma puh a ɓoruri, mi ká-kah ɓaysuki lák mbay Ŋgerzah ɓay fe le, Ŋgerzah pih mi ɓayu. »

⁴⁴Kandɔkaw mí ke si ke vul misoŋ vul misoŋ ké tusiɓa ziɓri, ke ƴo ka-kah ɓay lák mbay Ŋgerzah.