Read Karang Mbete Luk 5 Bible Online

Mbete Luk 5 - Karang bible

Mbete Luk 5

¹Nam a hani-u, daɓa nzukri gi nzu̧h Zezu nzuturu ƴo lah ɓay Ŋgerzah. Ke ƴo nzak mahmbih Genesareɗ.

²Ke ko kumbon seɗe na ɓel sew. Nzuk-mgba nzuyri kaɓ ɗih ya ke kumbon woyri ƴo wɔk kȩke woyri.

³Dale Zezu hil kaɓ ɓil kumbon nunu a Simu, mí ke vbi Simu, ké loh ke kumbon ra tɔɓ ke ɓel sew hi̧ ni. Ke kaɓ ɓil kumbon ƴo sɔk ɓay lák mbay Ŋgerzah hi̧ daɓa nzukri.

⁴Ke ɔh sɔk ɓayu bale, ke el ɓah hi̧ Simuri ɓahri : « Simu, mú loh ke kumbon ma gel a ɗih-u, í vbu kȩke fa̧hra mbih dale, i mgbá nzuy wara. »

⁵Mí Simu ɓahri : « Ŋgernzuk, ke suŋay nah ta̧h ke fa̧hra mbih kpu̧ru tipele teh na kpoh. Nzuy mbew kari-ay kara nah mgba ya dih. Mí ɓayu ké mu ɓah ra le, nah vbú kȩke ɓay wo. »

⁶Ku vbu kȩke ɓil mbih wara mí ku te nzuyri ɓa ŋgi̧-u mbah kȩke tuɓ tuɓ hi̧ kȩke-u ƴo gɔhna.

⁷Ku el ka ndɔk ɗi bɔh pihna woyri ɓá gi ke kumbon a ɓoru ɓay so niri. Bɔh pihnari ka̧h, mí ku kɔklɔ kȩke ra, ku fa̧h nzu̧y mbah kumbon seɗe mbɔk nzeŋ nzeŋ. Toŋ ndi̧ ɓay hi̧ kumbonri ɓá riŋ mbih.

⁸Simu Piyer ko kaŋ ba, ke el huk pol Zezu ɓahri : « Ŋgernzuk, í loh ké ta̧w bi ɓa ɗih-u ɓay fe le, mi ɓa nzuk a suya-u. »

⁹Piyer goŋ ni kaŋ ɓay nzuyri kú-u mgba ŋgi̧ luki-aw ti̧h tem mun ye pi, bɔh pihna yeri ké ƴo ziŋ ni pi,

¹⁰Zak ke Za̧h gun Zebederi pi, a woyri bɔh pihna-mgba nzuy ziŋ Simuri. Mí Zezu ɓah hi̧ Simu ɓahri : « Mú laɓ hȩkme ya. Ur ke guri-ay, fe mgbana wo le ɓa nzukri. »

¹¹Ku el ke kumbon woyri dah ɓel sew. Mí ku poŋ fe woyri gbam el dih fal Zezu.

¹²Zezu ka̧h puh luki a hani bale, nzuk ndɔɓe mbew ƴo ri. Ndɔɓe ra kum ni gberek gberek. Ke ko Zezu, mí ke si guɓ siɓa ké pol ye. Ke vuh ɓahri : « Kɔkrɔya. Ŋgernzuk, ŋgerna woiri mah gah ndɔɓe bi-ay hi̧ mun bi teh. Le saŋna-si gel kani Ŋgerzah ɓay lu ké tul bi. »

¹³Zezu ndar ndɔk mí za nzuk ndɔɓe ra, ke ɓahri : « Mi yih. Ful-si gel kani Ŋgerzah ɓay dim ni ɓá ƴo ri. Mú teh wara. » Sa gelaw mí ndɔɓe ye gah poŋ ni.

¹⁴Mí Zezu el ɓah hi̧ nzuk ra ɓa teh-u ɓahri, ké ɓah ɓayu hi̧ nzuk ya. Ke ɓahri se : « Mú si gel kani Ŋgerzah sɔk mun wo hi̧ nzuk fe puhna Ŋgerzah ɓá ko. Mú si ke fe puhna ɓay mun tehna wo kandɔk ké Moyiz vbeh ɓil mbete bolkusol Ŋgerzah[26] ɓay hi̧ kú te-teh ɓayu ɓahri, ndɔɓe wo ɔh ɓa ketina. »

¹⁵Mí mberem fe laɓna Zezu ya̧ gel par par. Daɓa nzukri ɓa ŋgi̧-u gi fal hani fal hani ɓay lah ɓay ye pi, ɓay ziŋ mun gahna pi.

¹⁶A ye ba, ke tɔr si gel ké nzukri ta ri ya, mí ke ƴo ɓah ɓay ziŋ Ŋgerzah ke hȩk ye.

¹⁷Ke namri-aw, ke ƴo sɔk ɓay lák mbay Ŋgerzah dale, fariziri ke nzuk-sɔk mbete bolkusol Ŋgerzahri gi kaɓ ɓay lah ɓay ye. Ku ur ke Zurusalem pi, ku ur ke puh a ɓoruri ké tusiɓa Galile ke Zude pi. Ŋgerna Gaŋ tul feri riw ƴo ziŋ ni ɓay gah senari.

¹⁸Bale nzukri suk nzuk sena ke hih nam ye gi keni. Mun nzuk ra hu yɔh. Mí ku ƴah ful ɓay rih vul ɓay ɗer ni kan pol Zezu.

¹⁹Mí ku ziŋ ful kalna ya ɓay tul daɓa nzukri, mí ku hil ke nzuk sena ra si tul vul síɓa. Ku nzohlo tul vul ra, mí ku ɗer nzuk sena ra ke hih nam ye ké sakra nzukri-aw ɓu pol Zezu.

²⁰Zezu ɓá ko law woyri kú-u kan tul ye ra bale, ke ɓah hi̧ nzuk sena-u ɓahri : « Ya̧h, salɓay suya lu ké tul wo lu. »

²¹Wara mí nzuk-sɔk mbete bolkusol Ŋgerzahri ke fariziri su̧h ɓay ɓahri se, nzukaw ra ɓa ge mí ke leh tul ye ke Ŋgerzah le ? Ŋgerzah mbew yaŋ mí mah lu salɓay suya ké tul nzuk. Nzuk a ɓoru ta-a.

²²Zezu ɓá tu fahɓay woyri bale, ke el ke ɓay ɓahri : « Ɓay fe mí fahɓay ƴo law woiri-ay le ?

²³Sakra ɓáh hi̧ nzuk ɓahri, ké ur si sina ke ɓáh hi̧ nzuk ɓahri, salɓay suya ye lu-lu, a suŋ mí kpuh le ?

²⁴Dale ɓay í tu ɓahri se, gun nzuk pirmatul ɓa mbay mí ƴo ke ŋgerna ké tusiɓa ɓay lu salɓay suya ké tul nzukri le ... » Zezu poŋ nzak ɓay ye, ke el sɔɓ nun ma tul nzuk ké mun ye hu yɔh ra, ke ɓahri : « A wo mí-i ƴo ɓah hi̧ mu, mú ur síɓa, mú mbi hih wo, mú tɔr si puh. »

²⁵Sa gelu-aw mí nzuk ra ur ké nun woyri-aw, ke mbi hih nam ye, mí ke el si puh ƴo dim Ŋgerzah hi̧ riŋ ye mgbe.

²⁶Nzukri gbam ké ƴo gelu-aw, tul woyri fa̧h niri zikiki zikiki, mí ku pir riŋ Ŋgerzah. Hȩkme mgba law woyri giriɓ giriɓ, mí ku ɓahri : « Nah ko fe a mba-mba-u guri-ay. »

²⁷Fá-falu Zezu ti̧h tɔr. Sina ye, ke ko kona ma tul nzuk-mbu̧h lampoh a hani mbew. Riŋ ye ɓa Levi. Ke kaɓ gel pihna ye. Mí Zezu ɗi ni : « Mú dih fal bi-ay. »

²⁸Levi sɔɓ fal hi̧ pihna ye gbam. Ke ur ba, mí ke dih fal Zezu.

²⁹Ke mgba Zezu ɓa suki ké puh ye. Ke kar baw fe su̧na ɓay tul Zezu. Daɓa nzuk-mbu̧h lampohri ɓa ŋgi̧-u ke nzuk suya a ɓoruri kaɓ nzak fe su̧na ke Zezuri.

³⁰Fariziri ke nzuk-sɔk mbete bolkusol Ŋgerzahri su̧h ɓay ké tul Zezu. Ku el ɓah hi̧ nzuk-dih fal yeri ɓahri : « Ɓay fe mí i ƴo su̧ fe, i ƴo nzo fe ziŋ nzuk-mbu̧h lampohri ke sam nzuk suya a ɓoruri-aw le ? »

³¹Mí Zezu fer nzak woyri ɓahri : « Nzuk mun gahnari si seh dɔkta ya. Nzuk senari mí si seh dɔkta.

³²Mi gi ɓay nzukri ké ƴo tul mbete bolkusol Ŋgerzah ya. Wara le mi gi ɓay ɗi nzuk suyari ɓay kú mbi law ké tul suya woyri ma fal el kan law tul Ŋgerzah. »

³³Ku el ke vbiɓay a ɓoru ɓáy ɓahri : « Nzuk-dih fal Za̧hri ke nzuk-dih fal fariziri toŋ saŋ mbih, ku ƴo tul goŋ Ŋgerzah kpatara. Mí nzuk-dih fal wori ba, toŋ su̧ fe, toŋ nzo fe mgbum ley ? »

³⁴Bale Zezu ɓah hi̧ niri ɓahri : « Nzukri ké gi gel ti̧hmbih nzuk-ya̧ wu̧y a foyu ɓay saŋ fe su̧na ani lo ?

³⁵Mí nam ƴo gina ɓay hi̧ nzuk-ya̧ wu̧y a foyu ra ɓá ta-a. Namuri-aw dara ku sáŋ mbih ɓáy. »

³⁶Dale ke el ɓah ɓay ra ke lawɓay ɓahri : « Nzuk ké ɓay mbi nzak gar a foyu sa̧h keni nun ta̧w gar ta-a rɔkɔ gar a foyu-aw ɓá el gɔh ta̧w gar ra tir ma pol. Gar a foyu si ke gar a ta̧wu ya.

³⁷Nzuk ta aŋ yim a pa̧wu ku̧ ta̧w ɓɔl ho̧ko ya. Yimu yi̧ŋ le, ta̧w ɓɔl ra ɓay fur kpum, yim a pa̧wu ɓay ku̧ kpah. Ta̧w ɓɔlu kara ɓay ɓe-ɓeɓ pi.

³⁸Kaŋ dale ku aŋ yim a pa̧wu ku̧ ɓil ɓɔl ho̧ko a foyu ma.

³⁹Mí nzuk tih ke ta̧w yim sa nzo yim a pa̧wu ya. Ke ɓahri se, ta̧w yim ra mí rih mbamba. »