Read Karang Mbete Luk 6 Bible Online

Mbete Luk 6 - Karang bible

Mbete Luk 6

¹Nam ɔkna bale, Zezu sak sina ɓil waka fe pay ke nzuk-dih fal yeri, mí nzuk-dih fal yeri ƴo haw tul fe pay o̧kro su̧[27].

²Farizi a haniri ba, ɓah ɓay ɓahri : « Bolkusol Ŋgerzah hah láɓ pihna ke nam ɔkna wa, ani mí i ƴo laɓu le ? »

³Mí Zezu yih nzak woyri ɓahri : « I ki̧ ɓay fe laɓna Daviɗ a lewsa̧ ki̧, kaŋ ya le[28] ? Ɗaka i ni ke bɔh sina yeri.

⁴Ke si vul Ŋgerzah. Peŋ ké nzuk fe puhnari puh hi̧ Ŋgerzah, mí a ye ke su̧, ke el wal hi̧ bɔh sina yeri su̧ pi-aw ba, mí bolkusol Ŋgerzah hah nzuk a garuri sú̧-u. Nzuk fe puhnari kaŋto mí ƴo ke ful ɓay su̧-u, kaŋ ya le ? »

⁵Zezu ƴo ɓahri se, mbay ké ko tul nam ɔkna mí ɓa gun nzuk pirmatul.

⁶Nam ɔkna a ɓoru bale, Zezu si vul misoŋ. Ke ƴo firma niri ɓay lák mbay Ŋgerzah. Nzuk mbew ké ndɔk ye a fál lakna hu yɔh kaɓ ri.

⁷Nzuk-sɔk mbete bolkusol Ŋgerzahri ke fariziri ƴo ri pi. Mí ku ko kona yi̧m ma tul Zezu ɓay ko-u. Ke gáh nzuk ke nam ɔkna dale, ku láɓ ɓay kan tul ye.

⁸Zezu ba, tu kerɓay woyri tu, mí ke ɓah hi̧ nzuk ké ndɔk ye hu yɔh ra ɓahri : « Ur síɓa. Mú ƴo. » Nzuku ur síɓa ƴo.

⁹Bale Zezu el ɓah hi̧ ŋgernzuk woyri-aw ɓahri : « Mi ƴo vbi wuri ɓayay : Bolkusol Ŋgerzah hi̧ nzukri ful ɓay laɓ suki mini ɓay laɓ suya ke nam ɔkna le ? Ɓay ya̧ nzuk mini ɓay i nzuk le ? »

¹⁰Zezu ko gel ma tul nzukri ɗoŋ gbuk, mí ke ɓah hi̧ nzuk ké ndɔk ye hu yɔh ra ɓahri : « Mú ndar ndɔk wo. » Nzuk ra ndar ndɔk bale, ndɔk ye el kpuh kpaŋ ƴo gelu.

¹¹Kaŋ mí law ŋgernzukri-aw fa̧h tuh tuh. Ku el lek ɓay ke haniri ƴah ful ɓay laɓ Zezu.

¹²Ɓil namri-aw bale Zezu tɔr si tul kpar si ɓah ɓay ziŋ Ŋgerzah. Ke ƴo ɓah ɓay ziŋ ni ke suŋ kpu̧ru ka̧h tipele.

¹³Tipele teh ni, mí ke el ɗi nzuk-dih fal yeri gi, ke lu gun nzak pihnari ɓa boh falu seɗe ké sakra-aw.

¹⁴Riŋ gun nzak pihna-uri mí na-ay : Simu ké Zezu tu riŋ ye ɓa Piyer, yi̧n ye Andere, Zak, Za̧h, Filiɓ, Bartelemi,

¹⁵Matiye, Toma, Zak gun Alfe, Simu kú-u ɗi ni ɓa nzuk-ri̧h si̧w ɓay tul sa̧wnzuk woyri ziɓri,

¹⁶Zudas ké ɓa gun Zak, Zudas Isikariyoɗ a ye ké-e ti̧h ɓa nzuk-te Zezu ra pi.

¹⁷Mí Zezu ɗer ke tul kpar ziŋ niri ta̧h ƴo bɔk kparu. Daɓa nzuk-dih fal yeri ɓa ŋgi̧-u ƴo ri. Daɓa gun Izarayel a ɓoruri ɓa ŋgi̧-u, a ur ke tusiɓa Zude, a ur Zurusalem mbu̧h ri pi, nzukri a ur ke ɓel mahmbih Medeterani ké fál puh a lukiri Tir ke Sidoŋ kara pi.

¹⁸Ku gi ta̧w ye ɓay lah ɓay ye, ɓay ké gah sena woyri pi, mí nzukri ké záh tukalari ƴo tul woyri ziŋ mun gahna.

¹⁹Gbam woyri ku yih ɓay za ni ɓay fe le, ŋgerna ké ƴo ti̧h ke mun ye mí gah nzukri.

²⁰A ye ba, ke ko kona ma tul nzuk-dih fal yeri ra, mí ke ɓah hi̧ niri ɓahri : « A woiri ko̧hkori i ɓa gun pol tehnari ɓay fe le, lák mbay Ŋgerzah na ɓay woiri.

²¹A woiri ké ɗaka i wuri guri, i ɓa gun pol tehnari ɓay fe le, i ɓay su̧ fe mah gel ɗaka woiri. A woiri ké rew ƴo mbaŋ law woiri guri, i ɓa gun pol tehnari ɓay fe le, i ɓay sak sakna.

²²Pol tehna Ŋgerzah teh tul woiri gelke nzukri fu̧y wuri, gelku-u ni̧h wuri, ku ɓal riŋ woiri, ku sɔɓ riŋ woiri ti̧h ɓa riŋ a pipiri-u ɓayu ké i ƴo wuri ke gun nzuk pirmatulay.

²³Namu-aw, í laɓ wuri law rihna, í zo zakra zakra. Í ko, kpaŋndɔk woiri a ŋgeru ƴo nunmbam. Suya kú-u laɓ wuri-aw mah hani bin ke suya ké zih woyri laɓ gun nzak pihna Ŋgerzah a lewsa̧ri.

²⁴Kúy, koseh a luki ɓa nzuku a woiri nzuk va̧nari ɓay fe le, i ƴo kaɓ ɓil bela woiri.

²⁵Koseh a luki ɓa nzuku a woiri nzukri ké i su̧ tukala guri ɓay fe le, i ɓay kaɓ ɓil ɗaka. Koseh a luki ɓa nzuku a woiri nzukri ké i sak sakna guri ɓay fe le, rew ɓay kal law woiri, i ɓay vba̧ haŋ zaɗ zaɗ.

²⁶Koseh ɓa nzuku a woiri gelke nzukri gbam pir riŋ woiri. Zih woyri pir riŋ gun nzak pihna Ŋgerzah a fohri lewsa̧ kaŋ pi.

²⁷A woiri nzukri ké i ƴo ke suk ké lah ɓay bi, mi ƴo ɓah ɓayay hi̧ wuri : í sa nzukbaa woiri. Í laɓ suki hi̧ nzukri ké fu̧y wuri.

²⁸Í lu mgbɔkɔ ku̧ tul nzukri ké mgba nazi ku̧ tul woiri. Í goŋ Ŋgerzah ɓá laɓ suki hi̧ nzukri ké mgba wuri ɓu law woyri.

²⁹Nzuk vba̧ gam wo le, mú sɔɓ fál a ɓoru hi̧ ni, ké vba̧ pi. Nzuk nah mah gar wo le, mú gboh ni nah gar a ɓilu ya pi.

³⁰Nzuk a suŋ suŋ goŋ mu fe le, mú hi̧ ni. Ke nah fe wo le, mú sor nzuku ya.

³¹Kandɔkaw mí lawsuki ké i yih ɓay hi̧ nzuk a ɓoruri ɓá laɓ ziŋ wuri ra, í laɓ lawsuki-u ziŋ niri.

³²I sa nzukri ké sa wuri kaŋto ra wa, tumbɔl fe í-i ziŋu le ? Nzuk-laɓ suyari sa nzuk suya mbaŋ woyri.

³³Gelke i laɓ suki hi̧ nzuk ké laɓ wuri suki ra wa, tumbɔl fe mí-i ziŋu le ? Nzuk-laɓ suyari mí ƴo laɓ kaŋ.

³⁴Gelke i ta lari ziŋ nzukri ké mah el ke lari ra wa, tumbɔl fe mí-i ziŋu le ? Nzuk-laɓ suyari mí ƴo ta lari ziŋ nzuk suya mbaŋ woyri ɓay kú el ke lari-u kaŋto.

³⁵Kaŋ dale í sa nzukbaa woiri, í laɓ niri suki. Nzuk ta wuri lari le, í lu kerɓay ya̧ mbɔlu. Kpaŋndɔk a ŋgeru ƴo geŋ wuri. I ɓay na ɓa gun Ŋgerzah ké deɓ ye ta-a ɓay fe le, a ye ke ƴo laɓ suki hi̧ nzukri ké tu suki ya pi, nzuk law a pipiri-uri pi.

³⁶Í laɓ law in ziŋ nzukri kandɔk Bah woiri Ŋgerzah ké ɓa nzuk-laɓ law in ziŋ nzukri.

³⁷Í kehr nzukri ɓa nzuk a sukiri, ɓa nzuk a suya-uri ya rɔkɔ kehrna-u ké i kehr nzukri ɓá el mbu̧h wuri ɓa nzuk a suya-uri. Í laɓ ɓay kan tul nzuk ya, le salɓay suya ta mgba tul woiri ya. Í sel nzuk ké laɓ wuri suya, le salɓay suya ɓay lu ké tul woiri pi.

³⁸Kandɔkaw, suki ké i laɓ hi̧ nzukri, suki-u ɓay el ziŋ wuri pi. Sam ŋgoro fe ké i mbi leh keni fe hi̧ nzukri ra, ŋgoro-u ɓay el tikri fe laɓna-u yik yik mí mbah zɔk gbɔh gbɔh ku̧ tul woiri pi. »

³⁹Zezu el ɓah lawɓay hi̧ nzuk-lah ɓay yeri ɓahri : « Ra̧w mgba ka̧w ra̧w mbaŋ ye ani le ? Seɗe mbɔk woyri ku líh ɓil lɔkɔ kavbaw ya le wo ?

⁴⁰Gun likɔl mba tul metere ye ya. Gunu tu pihna ye tu-tu dale, ke ɓay mah ke metere ye ɓáy.

⁴¹Le ɓay fe mú-u ko suy ké na nun mbaŋ wo mí baw kpuh ké tik sa̧w nun wo mú-u ko ya lo ?

⁴²Ani mú-u ɓahri : “Ya̧h, mú hi̧ mi mí lu suy ké ɓu nun wo ?” Mí baw kpuh ké tik sa̧w nun wo, mu ko ya le ? Nzuk-mu̧h ketina, mú ten kpuh ké tik sa̧w nun wo dara mú-u kó gel ɓa teh-u ɓay el lu suy ké nun mbaŋ wo ɓáy.

⁴³Ɓayu ké kpuh a suki leh lehna a suya-u ya, kpuh a suya-u kara leh lehna a suki ya pi.

⁴⁴Kandɔkaw mí i tu kpuh a suŋ suŋ ɓay lehna ye lehna ye. Nzuk ta hal nzu̧y ké tul kpuh ŋgatukru ya, nzuk hal lehna vo̧ko ké tul ŋgatukru gun gay ya.

⁴⁵Nzuk lawsuki ƴo hi̧ suki ké-e mbek ku̧ ɓil law ye ƴo ti̧h kala. Nzuk law a pipiri-u ba, ƴo hi̧ fe a pipiri-u ké-e mbek ku̧ ɓil law ye ƴo ti̧h kala. Fe mbekna ké nzuku mbek ku̧ ɓil law ye ƴo ur dukuku mí ti̧h ke nzak ye.

⁴⁶Uwa. Ɓay fe í-i ɗi mi “ŋgernzuk, ŋgernzuk” ba, mí láh ɓay bi ta-a le wo ?

⁴⁷Nzuk a suŋ suŋ gbam ké gi ta̧w bi mí ke ƴo tul ɓay biri ké-e lah le, nzuku na ani munu le ? Mi ƴo sɔk wuri.

⁴⁸Nzuk ra ɓa nzuk ké mboh diŋ vul ye ké gel ké kasaw na diŋu. Ke ɗeh kpu̧ru si ka̧h fihri-u dara mí ke mboh diŋ vul ye kan ri ɓáy. Mbih uh mí vba̧ vulu paw paw mí ziŋ ŋgerna haw vulu ya ɓayu ké nzuku mboh vulu ké gel ké kasaw na diŋu.

⁴⁹Nzukay ké lah ɓay ké mi ɓah mí ke poŋ ma fal bale, ke ɓa nzuk ké mboh vul ye tul siɓa gel garu dan kerɓay tul diŋu. Mbih uh vba̧ vul ra paw paw mí haw vulu wuruk vba̧ siɓa. Ɓeɓna vul ra ti̧h ɓa baw ɓeɓna. »