Read Karang Mbete Luk 7 Bible Online

Mbete Luk 7 - Karang bible

Mbete Luk 7

¹Kandɔkaw Zezu ɓah ɓay ye ɔh hi̧ nzukri ké ƴo dih fal ye, mí ke tɔr si Kapernayum.

²Kumandah a hani mbew kaɓ puh-aw, sa̧w ye ɓa gun Izarayel ya. Ke ɓa mbay tul sozeri ké sɔɗ. Mgbal ye na nun hul. Mgbal ra law kumandah na sa tul ye.

³Ɓay Zezu toh suk kumandah dale, ke pih ŋgernzuk puh woyri ziɓri ɓá si goŋ Zezu, ké gi ko mgbal ye ɓay gah ni.

⁴Ku ka̧h ta̧w Zezu, mí ku vbi ni ke kɔkrɔya ɓahri se : « Ŋgernzuku-aw yih ɓay sa̧w wah gun Izarayelri mbamba. Ke mboh vul misoŋ hi̧ na. Kaŋ dale ke mah ɓay mú lah goŋna ye. »

⁵

⁶Mí Zezu si ziŋ niri. Ke ɗih ya tɔɓ ke kerpuh kumandah ra bale, kumandah pih ya̧h yeri si ɓah hi̧ Zezu kandɔkay : « Ŋgernzuk, í yɔklɔ mun woiri ya. Mi mah ɓay í rih ɓil kerpuh bi-ay ya.

⁷Sa̧wu mí-i si ta̧w woiri ke mun bi ya. Í ɓah ɓay dale, mun mgbal bi ra ɓay gah-u.

⁸A bi kara mi ƴo lah nzak ŋgernzuk biri pi. Mi ɓa mbay tul sozeri pi. Gelke mi ɗi soze ɓahri, ké gi le, ke gi gaŋ ba. Mi ɓah hi̧ soze a ɓoru ɓahri, ké tɔr le, ke tɔr gaŋ ba. Mi ɓah hi̧ mgbal bi ɓahri, ké laɓ fe-ay le, ke laɓ fe-u laɓ gaŋ ba. »

⁹Zezu ɓá lah nzak pihna kumandah bale, fe-u na ni yer. Ke el sɔɓ nun ye ma ta̧w daɓa nzukri ké ƴo dih fal ye, mí ke ɓahri se : « Ɓay ké kumandah ɓah-ay ɓa ketina. Mi ƴo ɓah hi̧ wuri. Gun Izarayel mbew ké kan law ye sa tul bi mah ke nzukay ké sa̧w ye na ɓoɗay, mi ko ya. »

¹⁰Gun nzak pihna kumandahri el rih kerpuh, mí ziŋ mgbal ra ke mun gahna ɓa suki.

¹¹Bol falu Zezu tɔr si puh a ɓoru ké riŋu ɓa Nayin. Nzuk-dih fal yeri ke daɓa nzuk a ɓoruri ɓa ŋgi̧-u ƴo si ziŋ ni.

¹²Ku ɗih ya ɓay ka̧h nzakful mahol ké ɗoŋ Nayin bale, nzukri suk hul ke dakan. Daɓa nzukri ɓaŋ niri ƴo ti̧h ke ɓil puh-aw ma gel-gɔr hul. Hulu ɓa gun seke wu̧y kaŋpele, gun ye ké mbew yaŋ. Nzukri ro mah fe ké mgba wu̧y seh si keni.

¹³Ŋgermbay ko wu̧yaw, mí law ye sa̧h. Ke el ɓah hi̧ ni ɓahri : « Mú vuh rew ya. »

¹⁴Ke loh si ke za dakan, mí nzuk-suk hulri el ƴo. Zezu ɓah hi̧ hul ra ɓahri : « Seke, mi ƴo ɓah hi̧ mu, mú el gi, mú ur síɓa. »

¹⁵Seke ra el gi, ke kaɓ síɓa, mí ke el ɓah ɓay. Zezu mgba ni ndoh ndɔk mah ye.

¹⁶Bale hȩkme se nzukri riw. Ku ƴo dim Ŋgerzah ɓahri se : « Gun nzak pihna Ŋgerzah a luki mí ti̧h sakra wah-ay ɓay fe le, Ŋgerzah ɗer gi ko sa̧w nzuk yeri. »

¹⁷Mberem fe laɓna Zezu seh ɔh puh a lukiri ke puh a ɓil suyri riw ké tusiɓa Zude.

¹⁸Nzuk-dih fal Za̧hri ndazi ɓayu hi̧ Za̧h, mí ke ɗi nzuk-dih fal yeri seɗe.

¹⁹Ke pih niri si ta̧w Gaŋ tul feri riw ke nzak pihna-ay : « A wo mú-u ɓa Ŋgermbay ké Ŋgerzah wahɓay pih ni hi̧ na ziɓri ra, ké ɓay gi lák mbay tusiɓa gbam mini nah geŋ nzuk a ɓoru le[29] ? »

²⁰Ku ka̧h ta̧w Zezu, mí ku ɓahri se : « Za̧h batisi pih na náh ɓah, a wo mú-u ɓa Ŋgermbay ké Ŋgerzah wahɓay pih ni hi̧ na ziɓri ra mini nah geŋ nzuk a ɓoru le ? »

²¹Ke sa̧wseh-u-aw Zezu ƴo gah nzukri ɓa ŋgi̧-u. Ke gah nzuk senari ke nzukri ké sena woyri ŋger mbamba pi. Ke ni̧h záhri ké tul nzukri. Ke hi̧ daɓa ra̧wri ko gel.

²²Mí ke yih nzak nzuk-dih fal Za̧hri-aw ɓahri : « Í si ɓah hi̧ Za̧h ɓá lah ɓay feri-ay ké i ko ke nun woiri, ké i lah ke suk woiri ɓahri se, ra̧wri ko gel, kpereri si sina, mun nzuk ndɔɓeri teh mí saŋna-si gel kani Ŋgerzah lu ké tul woyri, mbikiri lah ɓay, hulri el kaɓ ke nun, ko̧hkori lah ɓaysuki ma law woyri.

²³Pol tehna teh tul nzuk ké riŋ bi ti̧h ɓa ndaw lihna ye ya. »

²⁴Nzuk-dih fal Za̧hri tɔr ba, mí Zezu el ɓah ɓay tul Za̧h hi̧ daɓa nzukri ɓahri : « Sina woiri ɓil lawkɔraw, i si ɓay ko fe le ? I si ɓay ko sihri ké kuna laŋ mgba̧ya mgba̧ya lo ?

²⁵Uwa. I si ɓay ko fe le ? I si ɓay ko nzuk ké ndoh gar lari a ndu̧yu mgbelek mgbelek le wo ? Nzukri ké ndoh gar riŋ ɗina a ndu̧yu le kaɓ kerpuh mbayri.

²⁶Uwa. I si ɓay ko fe le ? I si ɓay ko gun nzak pihna Ŋgerzah le wo ? I si ɓay ko gun nzak pihna Ŋgerzah gaŋ. Mí-i ƴo ɓah hi̧ wuri ɓahri se, Za̧h ra ke mba tul gun nzak pihna Ŋgerzah a ɓoruri mba-mba.

²⁷Za̧h ra Ŋgerzah vbeh ɓay tul ye lewsa̧ hi̧ zih woiri ɓahri : í ko, mi pih gun nzak pihna bi ƴo pol woiri[30] ɓay lek ful geŋ ni[31]. »

²⁸Zezu el ɓahri se : « Mi ƴo sɔk wuri ɓahri, ké sakra nzuk pirmatulri kú-u mbuŋ niri ké tusiɓa gbam, nzuk mbew ké mba tul Za̧h ta-a. Mí gun a mah gelu ké ɓa gun puh lakna Ŋgerzah mí mba ni.

²⁹Nzuk-mbu̧h lampoh ke nzuk a garuri riw kú-u lah ɓay Za̧h mí ku hi̧ ni soh niri mbih batem ra fe laɓna woyri teh ɓay Ŋgerzah.

³⁰Fariziri ke nzuk goso fe tuna mbete bolkusol Ŋgerzahri ba, poŋ kerɓay Ŋgerzah ké-e lek ɓay tul woyri ma fal, ku sa hi̧ Za̧h ɓá soh niri mbih batem ya.

³¹A a̧w ba, sam nzuk a suŋri mí-i mgba tuh ke gun tukala-ayri le ? Ku na ani le ?

³²Ku eŋ gunri ké kaɓ ndiseŋe ƴo yi̧-yi̧hna. Ku ɗi haniri ɓahri : “Nah ul ti̧w, mí i sa nda nday ya. Nah ɗi siŋ rew, mí i sa vuh rew ya.”

³³Kaŋaw mí Za̧h batisi gi, ke lak huru ya, ke nzo yim ya, mí i ɓahri, eh ɗuk ni.

³⁴Gun nzuk pirmatul ba, gi. Ke su̧ fe, ke nzo fe le, i ɓahri, bahu̧hmi mí na-aw, ke ɓa nzuk-ta yim. Ke mgba ya̧h ziŋ nzuk-mbu̧h lampohri ke nzuk suya a ɓoruri pi.

³⁵Kandɔkaw mí gun sa̧w ru̧nari teh ɓay ketina sa̧w ru̧na Ŋgerzah. »

³⁶Mí farizi mbew, riŋ ye ɓa Simu. Ke ɗi Zezu, ké si su̧ fe ziŋ ni. Zezu si rih kerpuh ye, mí ku kaɓ nzak fe su̧na.

³⁷Wu̧y-laɓ suya a hani ƴo puh-aw. Ke ɓa wu̧y nunpuki. Ke lah ɓahri, Zezu ƴo su̧ fe ké kerpuh farizi ra dale, ke mbi kuh num ba̧ri a suki ké lari-u ŋger mbamba[32].

³⁸Ke gi ka̧h ɓel bɔk Zezu. Ke ƴo vuh rew ke mbihnun ye mgbɔk mgbɔk hi̧ mbihnun ye zuh ku̧ bɔk Zezu, mí ke tak ke pirmatul ye le, ke el tak ɓáy. Ke mgba bɔk Zezu ma haŋ ye, mí ke el nu̧h ri num ba̧ri ra.

³⁹Farizi ké ɗi Zezu su̧ fe ziŋ ni ra ko fe laɓna wu̧yaw, mí ke ɓah ké law ye ɓahri, nzukay ɓa ra gun nzak pihna Ŋgerzah ketina le, ke tú wu̧y ké ƴo za ni-aw ra ɓa wu̧y a suya-u.

⁴⁰Zezu tu kerɓay farizi ra, ke el ke ɓayu ɓahri : « Simu, mi ƴo ke mberem a hani-u ɓay lu ziŋ mu. » Simu ɓahri : « Ŋgernzuk, mú ɓah ge. »

⁴¹Zezu ɓahri : « Nzukri seɗe ta lari. Mbɔl ké tul nzuk a mbewu mah ke lari pihna mbihmbam seɗe[33]. Mbɔl ké tul nzuk a ɓoru ba, mah ke lari pihna few seɗe[34].

⁴²Seɗe mbɔk woyri ku ziŋ ŋgerna púh mbɔlu ya. Wara mí nzuk ké hi̧ niri lari ra lu mbɔlu ké tul woyri. Kaŋaw ba, ké sakra nzukri ké seɗe-aw wa, a ge mí ɓay sa nzuk ké lu mbɔl ra mbamba le ? »

⁴³Simu yih nzak ye ɓahri : « Mi ko ɓa nzuk ké mbɔl a ŋgi̧-u lu ké tul ye mí ɓay sa ni mbamba. » Mí Zezu ɓahri : « Simu, kerɓay wo ƴo gelu. »

⁴⁴Ke sɔɓ nun ma tul wu̧y ra, mí ke ɓah hi̧ Simu ɓáy ɓahri : « Mu ko wu̧yay ko le ? Mi rih kerpuh wo, mí mu hi̧ mi mbih ɓay wɔk bɔk bi ya[35]. A ye ba, ke wɔk bɔk bi ke mbihnun ye, ke el tak ke pirmatul ye.

⁴⁵Mu ul suk bi ya. Wu̧yay ba, ke gina bi, ke mgba bɔk bi ma haŋ ye giri giri.

⁴⁶Mu suh num ku̧ tul bi ya. A ye ba, ke fer num lari ké ba̧ri-u fu̧ ɓa suki ku̧ bɔk bi.

⁴⁷Sa̧wu mí-i ƴo ɓah hi̧ mu ɓahri, salɓay a suyari ké ŋgi̧ mbamba ra lu ké tul ye lu-lu ɓay fe le, ke sa nzuk ké lu ɓayu ŋgi̧ mbamba. Mí nzuk a a̧y ké salɓay ye a ndi̧-u lu ké tul ye le, ke sa nzuk ké lu ɓayu ndi̧ kaŋto. »

⁴⁸Bale ke el ɓah hi̧ wu̧yu ɓahri : « Salɓay a suyari lu ké tul wo lu-lu. »

⁴⁹Gahru a ɓoruri ké kaɓ nzak fe su̧na ziŋ ni su̧h ɓay ziŋ haniri ɓahri se : « Nzukay wa ɓa ge mí lu salɓay suya ké tul nzuk le ? »

⁵⁰Zezu el ɓah hi̧ wu̧y ra ɓahri : « Mú si ke ɗeŋ. Law wo ké te sa tul bi ten mu ke ndɔk hul te-ten. »