Read Karang Mbete Luk 8 Bible Online

Mbete Luk 8 - Karang bible

Mbete Luk 8

¹Zezu ti̧h ke puh Simu bale, ke si ke puh puh, puh a lukiri ke gun puhri pi. Ke ka-kah ɓaysuki lák mbay Ŋgerzah hi̧ nzukri lah. Nzuk-dih fal ye a boh falu seɗeri si ziŋ ni.

²Wu̧y a haniri si ziŋ niri pi. Ku ɓa wu̧yri ké Zezu ni̧h záhri ké tul woyri. A ɓoruri ɓa wu̧yri ké-e gah sena woyri. Riŋ wu̧yuri mí na-ay : Mari ké Makdala, a ye ra Zezu ni̧h záhri toŋndɔk say ké tul ye.

³Zohana wu̧y Kuza ké ɓa ŋgernzuk-ko fal kerpuh mbay Eroɗ Antipa. Suzana ke daɓa wu̧y a ɓoruri pi, mí wu̧yuri ƴo so niri ke ŋgerna woyri.

⁴Daɓa nzukri ɓa ŋgi̧-u ur ke puhri ɓoɗ ɓoɗ gi mbu̧h hani ké ta̧w Zezu, mí ke ƴo ɓah hi̧ niri ke lawɓayri.

⁵Ke ɓahri : « Nzuk mbew ti̧h si waka ɓay mi̧h mi̧hri. Ke ƴo mi̧h mi̧hri bale, mi̧hri a haniri ku̧ mahful, mí nzukri ndakla, gundoyri gi te mi̧hri-u ɔh riw pi.

⁶Mi̧hri a haniri ku̧ gel ké siɓa ŋgi̧ ya ɓay kasaw ké na diŋu. Mi̧hri fe pay ra ti̧h mí hu̧h mí el ho̧k wɔh ɓay siɓa-aw ké voh ya.

⁷Mi̧hri a haniri ku̧ gel ké ŋgatukru na ri. Fe pay ke ŋgatukru ti̧h ke haniri mbɔk, mí ŋgatukru kaŋ tul fe pay ra kiɗik kiɗik fu̧h fe payaw.

⁸Mi̧hri a ɓoruri ba, ku̧ siɓa a suki, mí fe pay ra ti̧h el hu̧h mí leh mah sɔɗ. » Zezu ɓah le, el ɓah ɓa mgbe-u ɓáy kandɔkay : « Nzuk ké ƴo ke suk ɓay lah ɓay le, ké lah. »

⁹Nzuk-dih fal yeri ba, ƴo vbi ni ɓay ké ten sa̧w lawɓayaw. Mí ke ɓahri : « A woiri le Ŋgerzah ten sa̧wɓay lák mbay ye ké mu̧-mu̧h hi̧ wuri i lah. Nzuk a ɓoruri ba, lah ɓa lawɓay. Ku ko ke nun woyri, mí ku ko da̧h, ku lah ke suk, mí guh law woyri ya[36].

¹⁰

¹¹Sa̧w lawɓay mi̧hri ra mí na-ay : Mi̧hri-u mí ɓa ɓay Ŋgerzah.

¹²Mahful ké mi̧hri ra ku̧ ri ɓa nzukri ké lah ɓayu. Bol falu mbay záh tukala gi lu ɓayu ké law woyri rɔkɔ kú kan law woyri tulu le, salɓay suya ɓá lu ké tul woyri.

¹³Gel ké siɓa ŋgi̧ ya ɓay kasaw ké na diŋu ra ɓa nzukri ké lah ɓay Ŋgerzah. Gelku-u lah le, ku mgba ɓayu, mí ɓayu ɓar sa̧w ya. Ku kan law woyri tulu, mí doro-u, fe-leh law gi ziŋ niri bale, ku lu mun woyri ke ɓil ɓayu ma fal.

¹⁴Gel ŋgatukru ké mi̧hri ku̧ ri ra ɓa nzukri ké lah ɓay Ŋgerzah, mí kerɓay tukala ke fe ziŋna ke sa̧y fe tukala ri̧h law woyri. Fe-uri kaŋ tul nzukuri-aw kiɗik kiɗik bale, ku ŋgu̧-ŋgu̧h, mí lehna-u ti̧h suk ya.

¹⁵Siɓa a suki ké mi̧hri ku̧ ri ra ɓa nzukri ké lah ɓay lák mbay Ŋgerzah, mí ku mgba giri giri ma law ɓa suki bale, ku su̧h law mí hi̧ ɓayu leh lehna kandɔk fe pay ké leh lehna ndekle ndekle.

¹⁶Nzuk ké oh hɔrɔ ta lampe mí el mbi mbɔhrɔ guɓ ri ta-a. Ke ta mbi lampe mu̧h huh ŋgasaka ya pi. Wara le nzuk oh hɔrɔ ta lampe ɓay mbi kan síɓa hi̧ nzukri ké rih le, ku ko gel tehna-u.

¹⁷Ɓayu ké fe a mu̧h-u ké duh gel ɓay ti̧h ké nun nzukri hi̧ ku ko, sa̧w fe-u ɓay ti̧h kala hi̧ nzukri ko.

¹⁸Kaŋaw dale í ko wuri ger ke sam lah ɓay woiri, ɓayu ké nzuk a suŋ suŋ ké ƴo ke suk ké lah ɓay le, ke ɓay lah ɓay a mbaŋu ɓáy. Nzuk a a̧y ké ta ke suk-lah ɓay ya ba, nzuku ker ɓahri, ke la-lah kara ɓay a ndi̧ ké-e lah ra ɓay zi wu̧m. »

¹⁹Mah Zezu ke yi̧n yeri gi ma ta̧w ye pi, mí ful ɓay ka̧h ta̧w ye ta-a ɓay daɓa nzukri ké nzu̧h ké ta̧w ye nzuturu.

²⁰Mí ku ɓah hi̧ ni ɓahri : « Mah wo ke yi̧n wori ƴo kala. Ku yih ɓay ko mu. »

²¹Bale Zezu yih nzak nzukri-aw kandɔkay : « Mah bi ke yi̧n bi mí ɓa nzuk a a̧yri ké ƴo lah ɓay Ŋgerzah, mí ku ƴo tulu. »

²²Nam mbew ɓil namri-aw mí Zezu rih kaɓ ɓil kumbon ke nzuk-dih fal yeri. Ke ɓahri se : « Náh tɔr wuri si kala mahmbih fál sa̧[37]. » Mí ku tɔr si. Kumbon ƴo tul sina, mí Zezu kal nam yek bale, kuna a bawu ur bivbiɗ bivbiɗ fa̧h mbih mbah ɓil kumbon ɓay riŋna-u. Kerɓay káɓ tukala zi nzuk-dih fal yeri zi-zi.

²³

²⁴Mí ku tom ni, ku ɓahri : « Mbay Mbay, nah ɓay hu wuri wo. » Zezu ur bale, ke hah kuna, ke hah mbih ké laŋ gbɔksɔ gbɔksɔ, mí kuna ke mbih tuk kelek hi̧ gel na ɗeŋ gaŋ ba.

²⁵Ke el ɓah hi̧ nzuk-dih fal yeri ɓahri : « I kan law woiri tul fe le ? » Hȩkme se niri le el tokro tem mun woyri. Ku ɓah ke haniri ɓahri se : « Nzukay gaŋ ba wa, na ani mí ke hah kuna ke mbih mí fe-uri lah nzak ye-ay le ? »

²⁶Mí ku si ka̧h tusiɓa nzuk Geraziri. Gerazi ra na kala mahmbih Galile.

²⁷Zezu ɗer ke kumbon bale, nzuk Gerazi a hani gi nzɔh nun ye. Nzuku, záhri ƴo tul ye. Ke si mun ndikpo lewsa̧ kaŋ. Ke na vul ya wara le, gel nam ye ɓa gel-gɔr hulri.

²⁸Nzuku ɓá ko Zezu le, ke vba̧ nzak ɓeleŋ, mí ke huk pol ye. Kusol nzuku ahla rew ɓahri se : « Zezu gun Ŋgerzah ké deɓ ye ta-a, ɓay wo ɓa fe mí ziŋ mi le ? Mi vuh hi̧ mu, mú laɓ mi koseh ya. » Záh tukala-aw ɓah kaŋ ɓayu ké Zezu ƴo ɓah hi̧ ni ɓahri se, ké ti̧h ke tul nzuk ra, ɓayu ké doro-u ɗi-ɗih ké záh ra ƴo tul nzuku-aw. Nzukri ƴo ŋga̧h ndɔk ye ke sal lari. Bɔk ba, ku ƴo mgba ke ɗah, ku ƴo kɔr ni kaŋ, mí ke ƴo ɗɔr sal lari, ke ƴo nduk ɗah haw le, ke el ɗuk si ɓil suy ɓáy.

²⁹

³⁰Mí Zezu vbi záh ra riŋ ye. Záh ba, ɓahri : « Riŋ bi ɓa Ŋgi̧ŋgi̧ ɓay fe le, nah sɔɗ sɔɗ boh gel ŋgi̧-ŋgi̧ mí ƴo tul ye. »

³¹Záhri ƴo vuh hi̧ Zezu ɓá ni̧h niri ku̧ ɓil lɔkɔ ké ɗih sa̧rara ra ya.

³²Ké ɓel woyri-aw daɓa kɔsɔŋri mah fe ƴo ƴah ri lakna ké haŋ kasaw. Mí záhri vuh hi̧ Zezu ɓá hi̧ niri, kú si rih tul kɔsɔŋri-aw. Kaŋ mí Zezu poŋ ful hi̧ niri,

³³mí záhri ra ti̧h ke tul nzuku si rih tul kɔsɔŋri. Mí kɔsɔŋri riw kpa̧h ke ɗukna si ka̧h nzak hereŋ lih ku̧ mahmbih kirim kirim, mí mbih kal niri ndu̧y.

³⁴Nzuk-kɔr kɔsɔŋri ɓá ko fe ké kal bale, ku su ɗukna si puh, mí ku si ndazi ɓay feri ké kal hi̧ ɓayu ya̧ puh a luki ke gun puh a ɓeluri.

³⁵Bale nzukri ti̧h yir ɓay ko fe ké kal. Ku gi ka̧h ta̧w Zezu, mí ku ziŋ nzuk ké záhri ti̧h ke tul ye ra kaɓ ɗeŋ ké ta̧w Zezu. Nzuku ndoh gar ɓa suki. Kerɓay ye na ɓa suki. Mí hȩkme el se niri.

³⁶Nzuk-kɔr kɔsɔŋri ki̧ fal fe kú-u ko ke nun woyri hi̧ nzukri lah ani mí záhri ti̧h ke tul nzuk ra, mí ke el kaɓ ɓa suki.

³⁷Nzuk Geraziri ba, goŋ Zezu ɓá tɔr poŋ niri ɓay fe le, baw hȩkme se niri se-se. Kandɔkaw mí Zezu hil kumbon ɓay tɔrna,

³⁸mí nzuk ké záhri ti̧h ke tul ye vuh hi̧ ni ɓay si ziŋ ni. Mí Zezu sa-a.

³⁹Ke ɓahri : « Mú el si puh ké ta̧w nzuk wori. Mú ki̧ fal fe sukiri riw ké Ŋgerzah laɓ ziŋ mu hi̧ kú lah. » Kaŋaw mí nzuk ra tɔr si ka-kah ɓayu hi̧ nzukri puh ke puh. Ke ka-kah ɓay sukiri gbam ké Zezu laɓ ziŋ ni.

⁴⁰Zezu el si tusiɓa Galile. Ka̧hna ye, daɓa nzukri ya̧ ni ke law rihna. Riw woyri ku kaɓ keh geŋ ni.

⁴¹Nzuk a hani mbew ƴo ri pi. Riŋ ye ɓa Zayrus. Ke ɓa ŋgernzuk vul misoŋ ziɓri, ke gi huk siɓa pol Zezu gburuk. Ke vuh hi̧ Zezu ɓay ké si puh ye.

⁴²Gun ɓil ye ké mbew yaŋ ɓa tikla za̧ri na nun hul. Mbihmbam gunu laɓ boh falu seɗe. Ku mbi ful si ma kerpuh Zayrus. Daɓa nzukri si ziŋ ni wuh wuh.

⁴³Ké sakra daɓa nzukri-aw, wu̧y a hani mbew ƴo ri. Sem ƴo ti̧h ke ɓil ye laɓ mbihmbam boh falu seɗe kari da. Ke duklu ndɔk ye ké ta̧w dɔktari. Ke ziŋ mun gahna ya dih.

⁴⁴Mí ke si ke fal Zezu. Ke za nzak gar Zezu ba, sem ra kuŋ nzeɗ ba.

⁴⁵Mí Zezu ɓahri : « A ge mí za mi le ? » Nzukri gbam ma̧-ma̧y. Piyer mbi ɓay ɓahri : « Mbay, nzukri ɓa ŋgi̧-u mí ɗoŋ mu-ay. Ku ƴo voŋ mu. »

⁴⁶Mí Zezu el ɓah ra ɓáy ɓahri se : « Nzuk a hani za mi gaŋ. Mi tu-tu, ŋgerna ti̧h ke mun bi. »

⁴⁷Wu̧y ra ko ɓahri, mahful mú̧h mun ye ta-a. Mun ye to kpak kpak. Ke ti̧h gi huk pol Zezu bale, ke ɓah ketina ye hi̧ daɓa nzukri lah fe ké hi̧ ni ke za nzak gar ra ba, ke ziŋ mun gahna ba.

⁴⁸Bale Zezu ɓah hi̧ ni ɓahri : « Gun bi, law wo ké te sa tul bi-ay ya̧ mu ke ndɔk hul ya̧-ya̧. Mú si ke ɗeŋ. »

⁴⁹Zezu ƴo ɓah ɓay kɔɓ ɓáy bale, nzuk mbew gi sɔk Zayrus ŋgernzuk vul misoŋ ra ɓahri, gun ye hu da. Ké zɔklɔ metere ra mba.

⁵⁰Ɓay ra ɓá toh suk Zezu bale, ke ɓah hi̧ Zayrus ɓahri : « Law wo ɓá lu ya. Law wo ɓá ƴo mbew ɓa kpuh-u. Gun wo ɓay ti̧h ke ndɔk hul ɓa suki. »

⁵¹Ku ka̧h kerpuh Zayrus, mí Zezu gboh nzuk a ɓoruri rih vul hul ziŋ ni. Sa ɓa Piyer, Za̧h, Zak, mah gun, bah gun mí ku rih vulu ziŋ ni.

⁵²Nzukri riw ƴo vuh rew ɗik ɗik, ku ƴo laɓ mun ɓa seh. Mí Zezu ɓahri : « Í ɔk wuri. Gun ra hu ya. Wara le ke na nam kaŋto. »

⁵³Nzukri sak ni gbaw. Ku tu ɓahri se, gun ra hu-hu gaŋ.

⁵⁴Zezu rih vul, ke mgba ndɔk hul bale, ke ɗi fe : « Gun, mú el gi, mú ur síɓa. »

⁵⁵Tem gun ra el gi gaŋ ba, mí ke ur síɓa. Zezu ɓah hi̧ nzukri, kú hi̧ gunu fe su̧na, ké su̧.

⁵⁶Nzak-ɓah ɓay zi mah gun ke bah gun sel. Mí Zezu el ɓah hi̧ niri ɓa teh-u ɓahri, kú ɓah ɓayu hi̧ nzuk mbew ɓá lah ya.