Read Karang Mbete Luk 9 Bible Online

Mbete Luk 9 - Karang bible

Mbete Luk 9

¹Zezu ɗi nzuk-dih fal ye a boh falu seɗeri, mí ke hi̧ niri huhrumun, ke hi̧ niri ŋgerna ɓay mba tul záhri, tul senari pi hi̧ kú gah nzukri.

²Mí ke pih niri, kú si ka-kah ɓay lák mbay Ŋgerzah, kú gah senari.

³Ke ɓahri se : « Sina woiri le, í si ndɔk ndikpo. Í si ke ka̧wkpuh sina ya, ɓɔl ɓay goŋ fe ya, fe su̧na ya, lari ya, gar seɗe ya pi.

⁴Kerpuh ké mgba wuri gahru le, í na kerpuh-u ka̧h nam tɔrna woiri. Í ti̧h si ɓil puh-aw ka-kah ɓay lák mbay Ŋgerzah.

⁵Puh a a̧y ké nzukri sa mgba wuri gahru ya le, tɔrna woiri ke puh-aw, í kpoh kasal bɔk woiri sɔk keni tehɓay ɓahri, salɓay suya woyri mgbahla wuri ya. »

⁶Kandɔkaw mí nzuk-dih fal ye a boh falu seɗeri tɔr si ka-kah ɓaysuki lák mbay Ŋgerzah ke puh puh. Ku gah nzuk senari ké gelri gbam.

⁷Mberem ɓay fe saŋri-aw toh suk Eroɗ mbay tusiɓa Galile dale, kerɓay zukru ni ɓay fe le, nzuk a haniri ƴo ɓahri, Za̧h batisi mí ti̧h ke puh záh.

⁸Nzuk a ɓoruri ba, ɓahri, Eli gun nzak pihna Ŋgerzah a lewsa̧ mí ti̧h nun nzukri. Nzuk a ɓoruri ɓáy ɓahri, gun nzak pihna Ŋgerzah a ɓoru mí ti̧h ke záh.

⁹Mbay Eroɗ ɓah ɓay ye ɓahri : « Za̧h ra, mi kuŋ tul ye ba wa, nzuku-aw ɓa a ge ɓáy mí-i lah ɓay fe saŋ yeri-aw le ? » Mí ke ƴah ɓay ko Zezu.

¹⁰Gun nzak pihna Ŋgermbay a boh falu seɗeri el ke gel ka-kah ɓay lák mbay Ŋgerzah gi mbu̧h hani. Ku ki̧ fal fe laɓna woyri gbam ke bamu bamu hi̧ Zezu lah, mí ke fa̧h niri tɔr si fál Beɗsayda puh a hani-u.

¹¹Daɓa nzukri tu tɔrna woyri-aw, mí ku dih doro woyri. Mí Zezu ya̧ niri ndɔk seɗe. Ke ƴo ɓah ɓay lák mbay Ŋgerzah hi̧ niri. Senari ba, ke gah niri.

¹²Seh ƴo vohna. Nzuk-dih fal ye a boh falu seɗeri loh ma ta̧w ye, mí ku ɓahri : « Mú sel daɓa nzukri-ay hi̧ kú tɔr si puhri ké ɗoŋ niri-ay, kú lu ta̧hma, kú su̧ fe ɓay fe le, gelay nah ƴo ɓil suy. »

¹³Dale ke ɓah hi̧ niri ɓahri : « A woiri gaŋ, í hi̧ niri fe su̧na, kú su̧. » Mí ku ɓahri : « Peŋ ɓa ndiɓi, nzuy ba, ɓa seɗe mí na-ay wa. Náh si ra yeh fe su̧na kara ɓay mah gel ɗaka nzukri-ay le wo ? »

¹⁴Ŋgi̧na wo̧rori laɓ sɔɗ sɔɗ boh gel ndiɓi (5.000). Mí Zezu ɓah hi̧ nzuk-dih fal yeri ɓahri : « Í mgba niri, kú kaɓ siɓa zuɓ zuɓ ɓa bon ndiɓi bon ndiɓi. »

¹⁵Kandɔkaw mí nzuk-dih fal yeri hi̧ nzukri kaɓ siɓa zuɓ zuɓ. Bale Zezu ya̧ peŋ ké ndiɓi ke nzuy ké seɗe ra. Ke ɔr nun ma síɓa, mí ke lu mgbɔkɔ ku̧ tulu. Ke gɔh peŋ ra, ke hi̧ nzuk-dih fal yeri wal hi̧ nzukri su̧.

¹⁶

¹⁷Nzukri riw su̧ fe mbah ɓil woyri poŋ tɔru. Ku mbu̧h tɔr fe su̧na ra mbah tɔlɔ ɓa boh falu seɗe.

¹⁸Nam a hani-u, Zezu kaɓ ke hȩk ye ƴo ɓah ɓay ziŋ Ŋgerzah. Nzuk-dih fal yeri ƴo ɗih ya ziŋ ni bale, ke vbi niri ɓayay : « Daɓa nzukri ɗi mi ɓa sam nzuk a suŋ le ? »

¹⁹Ku yih nzak ye ɓahri : « Nzukri ɗi mu ɓa Za̧h batisi. Nzuk a haniri ɗi mu ɓa Eli gun nzak pihna Ŋgerzah a lewsa̧. Nzuk a ɓoruri ba, ɗi mu ɓa gun nzak pihna Ŋgerzah a hani ké ti̧h ke záh. »

²⁰Mí Zezu el vbi niri ɓahri : « A woiri ba, i ɗi mi ɓa sam nzuk a suŋ le ? » Bale Piyer yih nzak ye ɓahri se : « Mu ɓa Ŋgermbay, a ye ké Ŋgerzah mbi ni ɓa Mbay. »

²¹Kandɔkaw mí Zezu hah niri. Ke ɓah ɓa teh-u ɓahri, kú ɓah ɓay riŋ ɗina Ŋgermbay ye ra hi̧ nzukri ya.

²²Ke ɓahri se, na ani ani gaŋ kara a ye gun nzuk pirmatul ɓay ko seh kal ŋgɔŋ. Ŋgernzuk gun Izarayelri, ŋgernzuk fe puhna Ŋgerzahri, nzuk-sɔk mbete bolkusol Ŋgerzahri, ku ɓay ko ni ye ɓa kɔk fe, ke hú hul. Nam a sayu le, ke tí̧h ke puh záh ke pa̧ymun a foyu.

²³Ke ƴo ɓah hi̧ nzukri riw ké ƴo dih fal ye ra ɓahri : « Nzuk yih dih fal bi le, ké poŋ kerɓay tul ye ma fal, ké mbi kpuh vbatay hul ye, ké suk nam ke nam, ké dih keni fal bi,

²⁴ɓayu ké nzuk a a̧y ké yih su̧ tukala le, tul ye ɓay zi-u. Nzuk a suŋ suŋ ké poŋ kerɓay tul ye ɓay tul bi le, ke ɓay ti̧h ke ndɔk hul.

²⁵Gelke nzuk su̧ tukala el kaɓ ɓa suki, mí doro-u, tul ye zi le, ɓa fe ziŋna munu lo ?

²⁶Nzuk a a̧y ké riŋ bi ke ɓay bi ɓa fe su̧hru ké nun ye le, gun nzuk pirmatul ɓay tu nzuku-aw ɓa fe-se su̧hru ké nun ye ke seh gina ye ɓil riŋ ɗina ye, ɓil riŋ ɗina bah ye, ɓil riŋ ɗina tem nzak pihna Ŋgerzahri.

²⁷Mi ƴo ɓah ketina hi̧ wuri, nzuk a haniri ké sakra wah-ay hul ɗi riŋ woyri ya ɓáy, mí ku kó lák mbay Ŋgerzah ke nun woyri. »

²⁸Zezu ɓah ɓay ye, nam a toŋndɔk seɗe-u dale, ke fa̧h Piyer, Za̧h, Zak. Ke si ziŋ niri tul kasaw a hani-u si ɓáh ɓay ke Ŋgerzah.

²⁹Ké-e ƴo ɓah ɓay ke Ŋgerzah ra, nun ye sɔɓ na ɓoɗ, gar ye su nda̧w nda̧w.

³⁰Mí í ko. Nzukri seɗe ti̧h gi ƴo lu mberem ziŋ ni. Ku ɓa Moyiz ke Eli gun nzak pihna Ŋgerzah a lewsa̧ri[38].

³¹Mun woyri ndu̧y ɓa fe gama riŋ ɗina a nunmbam. Mberem kú-u ƴo lu ziŋ ni si tul ɓay ti̧hna ye ke puh mgbal, a a̧w ké ɓay laɓ ɔh ke gelu ké Zurusalem.

³²Piyer ke nzuk-dih fal Zezu a ɓoruri ké seɗe ra ku̧ nam mbeleŋ mbeleŋ. Ku tom bale, ku ko ndu̧yna mun Zezu ɓil riŋ ɗina ye ke ndu̧yna nzuk a seɗe-uri ké ƴo ziŋ ni ra.

³³Nzukri ké seɗe-aw ɓá tɔr poŋ niri le, Piyer ɓah hi̧ Zezu ɓahri : « Mbay, gel ké nah ƴo ri-ay su-su. Nah yih pɔr vulri ɓa say hi̧ wuri, a mbewu ɓa nzuku a wo, a mbewu ɓa nzuku a Moyiz, a mbewu ba, ɓa nzuku a Eli. » Ɓayaw, Piyer ɓah va̧h.

³⁴Ke ƴo ɓah ɓay kɔɓ ɓáy bale, ɗikmambam gi guɓ tul woyri gbukru, mí hȩkme se niri.

³⁵Ku ƴo ké ɓil dikmambamaw bale, ku lah kusol ti̧h ke ɓilu mí mgbe ɓeleŋ ɓahri : « A ye-ay ke ɓa gun bi, a bi mí-i lu ni[39]. Í lah nzak ye. »

³⁶Kusol ɓah ɓay ba, ku el ko ɓa Zezu ke hȩk mí toŋ. Nzuk-dih fal yeri ra tuh nzak woyri. Ku ɓah ɓayu hi̧ nzuk a ɓoru lah ke sewu-aw ya.

³⁷Tipele-u bale, Zezu ɗer ke tul kasaw ra ke nzuk-dih fal yeri ké sayaw. Daɓa nzukri ɓa ŋgi̧-u gi nzɔh nun ye.

³⁸Nzuk a hani-u mbew ti̧h, ke ɗi fe ɓeleŋ ɓahri : « Metere, kɔkrɔya, mú gi ko tul gun bi-ay ge. Ke ɓa gun bi ké mbew yaŋ.

³⁹Mú ko, záh mgba ni ba, ke vba̧ nzak ziriri ziriri ba. Mun ye to kpak kpak, mbihsam ye fur tuka tuka. Záh-aw ƴo pal ni mo̧r mo̧r. Ɓay záh ra ɓá poŋ ni ɗeŋ se-se.

⁴⁰Mi gi vuh ɓa seh hi̧ nzuk-dih fal wori ɓay kú ni̧h záh ra, mí ŋgerna woyri mah ya. »

⁴¹Zezu ba, ɓahri : « Uwa, gun tukala-ayri, nzukri ké i poŋ Ŋgerzah ma fal, nzuk pirmatulri ké kerɓay woiri ra̧-ra̧h, toŋ nam ka̧h ani mí-i ƴó ziŋ wuri ɓáy le ? Toŋ nam ka̧h ani mí-i ík law bi ké tul woiri ɓáy le ? Mú gi ke gun wo ra. »

⁴²Gun ra ƴo gina ba, mí záh-u mbi ni vbu siɓa gbirik, mí ƴo laŋ ni yik yik. Bale Zezu hah záh tukala ra, mí mun gun ra gah. Kaŋ mí Zezu mgba ni el ndoh ndɔk bah ye.

⁴³Bale nzukri riw ké ko ŋgerna Ŋgerzah a luki ra tul woyri fa̧h zikiki zikiki. Law nzukri-aw na niri ɓa saŋ tul feri riw ké Zezu ƴo laɓu, mí Zezu el ɓah hi̧ nzuk-dih fal yeri ra ɓahri se :

⁴⁴« Zah le ku ɓay ndoh ni ye gun nzuk pirmatul ndɔk nzukri dale, í hi̧ ɓayri ké i lah-ay ɓá ɓar sa̧w ké ɓil law woiri. »

⁴⁵Mí ɓayu guh law woyri ya. Sa̧wɓayu mu̧-mu̧h hi̧ ku lah ya. Hȩkme vbí sa̧wɓayu kara se niri pi.

⁴⁶Mí fahɓay ti̧h ké sakra woyri-aw ɓay tu a ge mí ɓa ŋgernzuk ké haŋsekle woyri le.

⁴⁷Zezu ba, tu kerɓay woyri tu-tu, mí ke mbi gun a lele hi̧ ke ƴo ɓel ye, ke ɓahri : « Gelke nzuk mgba gun a kandɔkayri ma law ye ɓay tul riŋ bi le, a bi mí ke mgba mi-aw. Nzuk a suŋ suŋ ké mgba mi ma law ye le, mgba nzuk ké pih mi munu ɓayu ké nzuk ké ɓa gun ké haŋsekle mbaŋ yeri ra a ye mí ke ɓa ŋgernzuk. »

⁴⁸

⁴⁹Za̧h ba, el ke ɓay ɓahri : « Mbay, nah ziŋ nzuk a hani-u ƴo ni̧h záhri ke riŋ wo, mí nah gboh ni ɓay fe le, ke ɓa bɔh sina wah ya. »

⁵⁰Mí Zezu ɓah hi̧ niri ɓahri : « Í gboh ni ya, ɓayu ké-e ɓa nzukbaa woiri ya le, ɓa nzuk fal ŋgaŋ woiri munu. »

⁵¹Nam ɗih ya ɓay ɔr Zezu ma síɓa bale, ke sak tul ye ko kona siŋriŋ ma Zurusalem.

⁵²Mí ke pih gun nzak pihnari si pol ye ɓay lek gel geŋ ni. Ku si ka̧h puh a hani ké tusiɓa nzuk Samariri[40].

⁵³Nzuk puh-uri ba, sa mgba ni gahru ya. Ku ɓahri se, ke ɓa ziɓ mí ke ƴo tul sina ma Zurusalem.

⁵⁴Zak ke Za̧h ko fe-u, mí ku ɓah hi̧ Zezu ɓahri : « Ŋgernzuk, náh hah mbam ɓá gi mgba niri le ? »

⁵⁵Zezu ba, sɔɓ nun ko niri, ke el ɓah ɓay ɓa kpuh-u hi̧ nzuk-dih fal yeri[41].

⁵⁶Mí ku kal ke puh a ɓoru.

⁵⁷Ku ƴo tul ful ma Zurusalem, mí nzuk mbew ɓah hi̧ Zezu ɓahri : « Mi díh fal wo ndeŋ ndeŋ. »

⁵⁸Mí Zezu ɓah hi̧ ni ɓahri : « Nzi̧wri ƴo ke lɔkɔ nam, gundoyri ƴo ke vul nam[42]. Mí gun nzuk pirmatulay ba, gel-eh tul kara ke ta keni ya. »

⁵⁹Mí ke ɓah hi̧ nzuk a ɓoru ɓahri : « Mú dih fal bi-ay. » Nzuku ba, ɓah : « Ŋgernzuk, mú poŋ mi el si puh. Seh hul bah bi le, mí gɔr hulu dara mí dih fal wo ɓáy. »

⁶⁰Bale Zezu ɓah hi̧ ni ɓahri : « Mú poŋ hulri ɓá gɔr hul mbaŋ woyri. A wo ba, mú si ka-kah ɓay lák mbay Ŋgerzah. »

⁶¹Nzuk a ɓoru ɓáy ɓah hi̧ ni ɓahri : « Ŋgernzuk, mi díh fal wo. Mú poŋ mi, mí si vbi nzuk in biri, kú poŋ mi dara mí mi díh fal wo ɓáy. »

⁶²Mí Zezu ɓahri : « Nzukay ké mgba kpa̧h nday ƴo pa-pay, mí ke ko gel ma fal le, ke ti̧h suk hi̧ lák mbay Ŋgerzah ya. »