Read Karang Mbete Za̧h 1 Bible Online

Mbete Za̧h 1 - Karang bible

Mbete Za̧h 1

¹Titilu dara feri riw ɓá laɓ le, a ye Ɓay, ke ƴo ri. Ke ƴo ta̧w Ŋgerzah. Ŋgerzah mí ɓa Ɓay ra.

²A ye ke ƴo ke titilu ké ta̧w Ŋgerzah.

³Ŋgerzah laɓ feri riw ke ndɔk Ɓay[1]. Fe mbew ké Ŋgerzah laɓ dan Ɓay ta-a.

⁴Ɓayu ɓa sa̧w ɔkna feri riw. Sa̧w ɔkna ra ba, ɓa gel tehna nzukri[2].

⁵Gel tehna ra teh ké ɓil tirima. Tirima ba, pɔr ni ya.

⁶Ŋgerzah pih gun nzak pihna a hani mbew gi. Riŋ ye ɓa Za̧h.

⁷Ke gi ɓa nzuk-teh ɓay gel tehna dale, nzukri gbam ɓá kan law tul gel tehna ɓay tehɓay ye.

⁸A ye ra, ke ɓa gel tehna-aw ya. Wara le ke gi ɓay te-teh ɓay gel tehna.

⁹Gel tehna ra ɓa gel tehna a kpakpaŋu ké gi rih tukala mí ƴo hi̧ nun nzukri riw ko kona ɓa teh-u.

¹⁰Gel tehna-u teh gel ké tusiɓa. Nunmbam ke tusiɓa laɓ ke ndɔk gel tehna, mí nzukri tu ni ya.

¹¹Gel tehna gi sakra nzuk yeri. Nzuk yeri ba, ya̧ ni ma ta̧w woyri ya.

¹²Mí nzuk a a̧yri ké ya̧ ni ma law woyri hi̧ law woyri te sa tul ye dale, ke hi̧ niri ŋgerna, ku na ɓa gun Ŋgerzahri.

¹³Nzukuri, sa̧w mbuŋna woyri ta ɓa mbuŋna sem nzuk pirmatul ya, ta ɓa law sana haymun ya, ta ɓa fe ké law nzuk laɓ ya pi. Ŋgerzah mí ɓa sa̧w mbuŋna woyri.

¹⁴Ɓay ra ba, ti̧h ɓa nzuk pirmatul a sa̧w som siɓa. Ke ɗeh puh ké haŋsekle wah. Nah ko riŋ ɗina ye ke nun wah gbak gbak. Riŋ ɗina-u ɓa riŋ ɗina gun Ŋgerzah mbew yaŋ. Lawsuki ke ketina ya̧ mun ye gbam.

¹⁵Za̧h te-teh ɓay gun Ŋgerzah. Ke ka-kah ɓahri, Nzuku ɓa a ye. Za̧h ɓah ɓay tul ye ɓahri se, nzuku ƴo gina fal ye, mí nzuku mba tul ye Za̧h mba-mba ɓay fe le, nzuku ƴo pol dara ku mbuŋ ni ɓáy.

¹⁶Sɔk ɓahri se, a wah gbam nah ya̧ lawsuki le, nah el ya̧ ra ɓáy. Sa̧w lawsuki-u ra ɓa mun ye gbam.

¹⁷Ɓay fe le mbete bolkusol Ŋgerzah ké vbeh pol sa̧ ra, ndɔk Moyiz mí vbeh. Lawsuki ke ketina ra ba, laɓ ke mun Ŋgermbay Zezu.

¹⁸Nzuk a hani ké ko Ŋgerzah ko ta-a. A ye ké-e ɓa gun Ŋgerzah mbew yaŋ, ké-e ɓa mun Ŋgerzah mí ke hi̧ na, nah tu Ŋgerzah te-teh.

¹⁹Za̧h te-teh ɓay ra bale, ziɓri ké Zurusalem pih nzuk fe puhna Ŋgerzahri ke Levi a ɓoruri ké so pihna vul kani Ŋgerzah si ta̧w ye. Mí ku vbi ni ɓay ɓahri : « A wo mu ɓa ge le ? » Za̧h ɓah ketina ye. Ke mu̧h niri ɓay ya. Nzak ye ɓah ketina ɓahri se : « A bi le, mi ɓa Ŋgermbay ra ya. »

²⁰

²¹Ku el vbi ni ɓahri : « Mí le, mu ɓa Eli gun nzak pihna Ŋgerzah a lewsa̧ ra le[3] ? » Ke ɓah : « A bi ta-a. » Ku el vbi ra ɓáy : « Mu ɓa gun nzak pihna Ŋgerzah ké eŋ Moyiz ra le[4] ? » Mí ke yih nzak woyri ɓahri : « Mi ɓa a ye ya pi. »

²²Bale ku el vbi ni ra ɓáy ɓahri : « Mu ɓa ge le ? Nah si sɔ́k nzukri ké pih na gi ra ani le ? A wo ke mun wo ba, mu ɓah ani le ? »

²³Mí Za̧h mbi ɓay Ezay gun nzak pihna Ŋgerzah a lewsa̧ yih nzak woyri keni ɓahri se : A bi mi ɓa nzuk ké kusol ye ƴo mgbe ɓil lawkɔr ɓahri, í ndar wuri mahful kparak kparak geŋ Miƴori[5].

²⁴Ké haŋsekle nzukri kú-u pih niri-aw fariziri ƴo ri pi.

²⁵Ku vbi Za̧h ɓay ɓahri : « Mí-aw ba, mu ɓa Ŋgermbay ya, mu ɓa Eli ya, mu ɓa gun nzak pihna Ŋgerzah ya pi-aw wa, ɓay fe mú-u ƴo hi̧ nzukri ti̧h ɓil batem a mbih le ? »

²⁶Za̧h yih nzak woyri ɓahri : « A bi mi hi̧ nzukri ti̧h ɓil batem a mbih. Mí nzuk a ɓoru ƴo ri ké sakra woiri-ay. Nzuku, i tu ni ya.

²⁷A ye ke ƴo gina fal bi. Ɗíŋ tul ɓay sel sal sabɔk ye kara mi mah ya. »

²⁸Feri-aw laɓ ké Beɗtani kala mahmbih Zurdeŋ, mbih ké Za̧h soh ri nzukri batem.

²⁹Tipele-u Za̧h ko Zezu ƴo gina ma ta̧w ye bale, ke ɓahri : « Í ko gun sami Ŋgerzah ké gi-aw, a ye ké-e lú salɓay suya ké tul nzuk tukalari.

³⁰Ɓay tul ye ra, mi ɓahri se, fal bi le, nzuk ƴo gina. Ke mba tul bi mba-mba ɓay fe le, ke ƴo pol dara ku mbuŋ mi ɓáy.

³¹A bi kara mi tu ni pol ya. Mí ɓay hi̧ ké ti̧h nun gun Izarayelri mí-i gi hi̧ nzukri ti̧h ɓil batem a mbih ɓayu. »

³²Za̧h el te-teh ɓay ra ɓáy ɓahri se : « Wara mí-i ko Tempuki ko ɗer ke nunmbam kandɔk mbɔre gi kaɓ tul ye. Mi tu ni pol ya. Mí Ŋgerzah ké pih mi gi hi̧ nzukri ti̧h ɓil batem a mbih ra, a ye ke sɔk mi nzuku. Ke ɓahri se, nzuk a a̧y ké mi ko Tempuki ɗer kaɓ tul ye le, a ye mí ke ɓa nzuk-ndoh nzukri ti̧h ɓil batem a Tempuki.

³³

³⁴Kandɔkaw mí-i ko fe-u laɓ ké nun bi gaŋ, mí-i el te-teh ɓayu ɓahri se, a ye gun Ŋgerzah ra munu. »

³⁵Tipele a ɓoru Za̧h ƴo gel batem ra ɓáy. Andere ke nzuk-dih fal Za̧h a ɓoru ƴo ri-aw pi.

³⁶Za̧h ko kona zi̧h ma tul Zezu ké ƴo kalna dale, ke ɓah : « Í ko wuri gun sami Ŋgerzah ké si-aw. »

³⁷Nzuk-dih fal Za̧hri ké seɗe ra lah nzak ye, mí ku si dih fal Zezu.

³⁸Zezu sɔɓ nun mí ko kona ma tul woyri kú-u ƴo dih fal ye bale, ke ɓah : « A fe mí i ƴah le ? » Ku ɓahri : « Rabbi, gel nam wo na suŋ le ? » (Rabbi yih sɔk ɓahri, metere.)

³⁹Ke ɓah : « Í gi, í ko. » Kaŋ mí ku ɓaŋ ni si ka̧h gel nam ye, mí ku ko. Ku kaɓ ziŋ ni ke namu-aw. Sa̧wseh-u ra ɗih ya ke sa̧wseh niŋ a bɔklew.

⁴⁰Andere nzuk-dih fal Za̧h a mbewu-aw, ke lah nzak Za̧h ké-e dih fal Zezu ra, ke ɓa yi̧n Simu Piyer.

⁴¹Ke si ɓa gah-u ziŋ gun bah ye Simu. Ke ɓah : « Nah ziŋ Mesi da. » (Mesi yih ɓahri, Ŋgermbay.)

⁴²Andere maŋ yi̧nu ra si ta̧w Zezu. Zezu ko ni zi̧h, mí ke ɓah hi̧ ni ɓahri : « Mu ɓa Simu gun Za̧h. Ku tú mu ɓa Sefas. » (Riŋ Sefas sɔk ɓahri, Piyer. Piyer ba, yih ɓahri, kasaw.)

⁴³Tipele-u Zezu tɔr. Ke yih ɓay si ma tusiɓa Galile. Ke ziŋ Filiɓ, mí ke ɓah hi̧ ni ɓahri : « Mú dih fal bi-ay. »

⁴⁴Filiɓ ra ɓa nzuk Beɗsayda. Puh woyri mbew ke Andere ke Piyer.

⁴⁵Mí Filiɓ si ziŋ Nataniyel, mí ke ɓah : « Nah ziŋ nzuk ké mbete bolkusol Ŋgerzah ɓah ɓayu ɓil mbete vbehna Moyiz ke mbete vbehna gun nzak pihna Ŋgerzah a lewsa̧ri ra da. Nzuku ɓa Zezu gun Zezeɓ ké Nasareɗ. »

⁴⁶Mí Nataniyel ɓah hi̧ ni ɓahri : « Suki fe mí ɓay ti̧h ké Nasareɗ le ? » Filiɓ ba, ɓah : « Mú gi, mú ko. » Mí ku tɔr.

⁴⁷Zezu ko Nataniyel ƴo gina, mí ke ɓahri : « Í ko gun Izarayel a kpakpaŋu ké rɔkna ta ta̧w ye ya ké gi-aw. »

⁴⁸Nataniyel ba, ɓah : « Mu tu mi fál suŋ le ? » Dale Zezu yih nzak ye, mí ke ɓahri : « Dara Filiɓ ɓá ɗi mu le, mi ko mu, mu kaɓ sa̧w kpuh nzu̧y. »

⁴⁹Bale Nataniyel yih nzak ye ɓahri : « Rabbi, a wo mú-u ɓa gun Ŋgerzah. Mu ɓa Ŋgermbay wah gun Izarayelri gaŋ. »

⁵⁰Mí Zezu ɓah ɓay hi̧ ni ɓahri : « Ɓayu ké mi ɓah hi̧ mu ɓahri, mi ko mu ké sa̧w kpuh nzu̧y kaŋto mú-u el kan law tul bi wa ? Mu ɓay ko fe a mbamba-uri ké kal tul fe a a̧y ka-kal ɓáy. »

⁵¹Zezu el ɓahri se : « Gelu munu, ɓa ketina. Mí-i ƴo ɓah ɓayay hi̧ mu, mahful ké nunmbam ɓay na ŋgah ké nun wo dale, mu kó tem nzak pihna Ŋgerzahri ƴo hil ma síɓa, ƴo ɗer ma siɓa ké tul gun nzuk pirmatul kandɔk ɗiki kaŋ[6]. »