Read Karang Mbete Za̧h 10 Bible Online

Mbete Za̧h 10 - Karang bible

Mbete Za̧h 10

¹Zezu el ɓah hi̧ niri ra ɓáy ɓahri : « Munu. Mi gi ɓayu ɓa ketina. Mi ƴo ɓah ɓayay hi̧ wuri, gelke nzuk rih ɓil kpaŋ fe hɔlnari ke nzakful ya, mí ke zo ke tul kpaŋ le, ke ɓa riɓa ke ɓa nzukbaa.

²Nzuk rih ɓil kpaŋ ke nzakful le, a ye mí ke ɓa nzuk-hɔl sami.

³Nzuk-kɔr kpaŋ ƴo mgbur ful hi̧ ni. Samiri kara ƴo lah kusol ye. Sami yeri ra ke ɗi ke riŋu riŋu. Ke fa̧h niri ti̧h keni kala.

⁴Bale ke rah niri. Samiri ba, dih fal ye ɓay fe le, sami yeri tu kusol ye tu.

⁵Sami yeri ta dih fal nzuk a ɓoru ya. Nzuk a ɓoru-aw samiri ɗuk ni ɗu-ɗuk ɓay fe le, sami yeri tu kusol nzuk a ɓoru ya. »

⁶Zezu ɓah ɓayaw ɓa lawɓay, mí ku tu sa̧wu ya.

⁷Kaŋ mí Zezu el ɓah kandɔkay ɓáy : « Munu, i lah ya ɓa ketina, mi ɓahri se, a bi mí-i ɓa ful kpaŋ samiri.

⁸Nzuk a ɓoruri gbam, ku ɓa riɓari, ku ɓa nzukbaari, mí sami-uri lah kusol nzukawri-aw ya.

⁹A bi mí-i ɓa ful kpaŋ samiri. Nzuk ké rih ke nzakfulay le, salɓay suya ɓay nzom ké tul ye. Ke ɓay rih ɓil kpaŋ ɗeŋ, ke tí̧h keni ɗeŋ ƴah keni lakna.

¹⁰Riɓa si kpaŋ le, ke si ɓay rih sami-uri, ɓay i-u, ɓay zi niri ndikpo. Mí a bi mi gi bale, sami-uri ɔ-ɔkna mí ɔkna woyri ra nzɔk gbɔh gbɔh.

¹¹A bi mí-i ɓa nzuk-hɔl sami a suki-u. Nzuk-hɔl sami a suki poŋ mun ye hi̧ hul ɓay tul sami yeri.

¹²Nzuk ké kɔr sami kɔr ɓa pihna lari. Samiri ra ɓa nzuku a ye ya. Ke ko gaykoyri gi le, ke ɗuk poŋ samiri ke tul mun. Gaykoyri mgba a hani-uri. Tɔruri ba, gbakra hani kparki kparki.

¹³Kerɓay nzuk-kɔr sami na tul samiri ya. Ke kɔr sami ɓay fe le, ɓa pihna lari ye kaŋto.

¹⁴A bi mí-i ɓa nzuk-hɔl sami a suki-u. Mi tu sami biri tu, sami biri kara ku tu mi pi, kandɔk baah ké tu mi, a bi kara mi tu baah pi. Mi poŋ mun bi hi̧ hul ɓay tul sami biri.

¹⁶Sami bi a ɓoruri ƴo ri. Tul samiri-aw ki̧ ɓil kpaŋ samiri-ay ya ɓáy. Laɓ ani gaŋ kara mi si fá̧h niri gi keni. Ku ɓay lah kusol bi. Ku ɓay mbu̧h haniri ɓa fe hɔlna ké mbew yaŋ. Nzuk-hɔl niri kara mbew yaŋ pi.

¹⁷Sa̧wu mí baah sa mi ɓay fe le, mi poŋ mun bi hi̧ hul ɓay mí el kaɓ ke nun ɓáy.

¹⁸Hul ta i mi ya. Wara le a bi mí-i poŋ mun bi hi̧ hul. Mi ɓa mbay tul ɔkna bi ɓay mí lu hi̧ hul. Mi ɓa mbay tul ɔkna bi ɓay mí el ɔk pi. Kandɔkaw mí ɓa bolkusol ké baah pih mi keni ɓay mí laɓ. »

¹⁹Ziɓri el kehr haniri ɓáy, ɓay tul ɓay ké Zezu ɓah-aw.

²⁰Nzuk a haniri ɓa ŋgi̧-u ƴo ɓahri : « Záh ƴo tul ye. Ke ɓa dahdi̧hze. Ɓay fe mí i lah ni le ? »

²¹Nzuk a ɓoruri ba, ƴo ɓahri : « Ɓayri ké-e ɓah-aw ta ɓa kusol záh ya. Záh mgbur nun ra̧wri lo ? »

²²Ti̧hmbih-lek gel fe puhna ɓa foyu ɓil vul kani Ŋgerzah laɓ ké Zurusalem. Few ti̧hmbih-aw ɓa few gel tel.

²³Zezu ƴo ha̧rma ɓil ila vul kani Ŋgerzah ké huh tem a hani-u. Riŋ huh tem ra ɓa huh tem Salomoŋ mbay a luki.

²⁴Dale ziɓri gi ɗoŋ tul ye gbuk, mí ku vbi ni ɓahri : « Seh suŋ gaŋ mí mu hi̧ kerɓay wah ɓá na ɗeŋ le ? Mu ɓa Ŋgermbay ra le, mú ɓah hi̧ na ɓa teh-u. »

²⁵Zezu yih nzak woyri ɓahri : « Mi ɓah da, mí i sa ya̧ ɓay bi ya. Fe laɓnari ké mi laɓ ke riŋ bah bi ten tehɓay tul bi.

²⁶Mí i sa lah nzak bi ya ɓay fe le, i ɓa sami biri ya.

²⁷Sami biri ƴo lah kusol bi. A bi, mi tu niri tu, mí ku dih fal bi.

²⁸Mí mi hi̧ niri ɔkna ɓa ŋgɔh. Ku ta zi ya, mí ku ƴo ri sew ke sew ɓa ŋgɔh. Ŋgerna fe mbew ké ɓay nah niri ké ndɔk bi ta-a.

²⁹Bah bi ké hi̧ mi sami-uri ra, ke mba tul feri riw. Ŋgerna fe mbew ké mah nah niri ké ndɔk baah kara ta-a pi.

³⁰A bi ke baah, nah ɓa mbew yaŋ. »

³¹Ŋgernzuk ziɓri el fa̧h kasawri ra ɓáy, ɓay i keni Zezu.

³²Mí Zezu ɓah ɓay ɓahri : « Mi laɓ fe sukiri ke bolkusol bah bi ɓa ŋgi̧-u, mí i ko-aw. Ɓay tul fe laɓna a suŋ mí i yih ɓay vbuk mí ke kasaw le ? »

³³Ziɓri yih nzak ye ɓahri : « Ɓay tul fe laɓna a suki, nah ɓay i mu ke kasaw ya. Le mu mbi riŋ Ŋgerzah ɓah keni suya, mí nah í mu. A wo ké mu ɓa nzuk pirmatul yaŋ le, mu ɗi mun wo ɓa Ŋgerzah le ? »

³⁴Zezu ba, ɓah ɓay ɓahri : « A ké Ŋgerzah pih bolnzak ye hi̧ ziihri lewsa̧ ɓahri se, a woiri nzukri, i ɓa ŋgerzahri[27] ? Mí ku vbeh ɓayu kan ɓil mbete bolkusol ye bale, bolnzak ye ta ɓeɓ ya, mí ke ɗi niri ɓa ŋgerzahri ra wa,

³⁶ani dara mí nzuk ké Ŋgerzah pih ni gi ɓa nzuku a ye ɓáy le ? Ɓay fe mí i ɓah hi̧ mi ɓahri, mi mbi riŋ Ŋgerzah ɓah keni suya, ɓay fe le mi ɓahri, mi ɓa gun Ŋgerzah le ?

³⁷Mi laɓ ra fe laɓna bah bi ya le, í mgba ɓay bi ya pi.

³⁸Mí mi ƴo laɓ fe laɓna bah bi, mí i mgba ɓay bi ya kara, í kan law woiri tul fe laɓna-uri ɓay i tu, baah ɓa mbew ziŋ mi. A bi kara mi ɓa mbew ziŋ baah pi. »

³⁹Ku el ƴah ful ɓáy, ɓay mgba ni, mí ke ti̧h ke ndɔk woyri tɔr.

⁴⁰Zezu el si kala mbih Zurdeŋ, gel ké Za̧h soh ziɓri mbih batem a titilu, mí ke kaɓ ri.

⁴¹Daɓa nzukri si ta̧w ye. Ku ƴo ɓahri se, Za̧h laɓ fe saŋ mbew ya, mí ɓayri ké-e ɓah ké tul Zezu gbam ɓa ɓay a ketina.

⁴²Kandɔkaw mí daɓa nzukri kan law tul Zezu ké gelaw.