Read Karang Mbete Za̧h 11 Bible Online

Mbete Za̧h 11 - Karang bible

Mbete Za̧h 11

¹Nzuk a hani-u riŋ ye ɓa Lazar na sena. Puh ye ɓa Beɗtani ké tusiɓa Zude, puh Mari ke yi̧n ye Marta pi.

²Mari ra ɓa wu̧y ké fer num ké ba̧ri-u fu̧ buy buy ku̧ bɔk Gaŋ tul feri riw el nu̧h ri ke pirmatul ye[28]. Ke ɓa manah Lazar ké na sena ra.

³Manah yeri seɗe mbɔkaw pih nzak pihna si ta̧w Zezu ɓahri, ŋgernzuk ɓá lah le, mun ya̧h ye se-se.

⁴Zezu lah kaŋ bale, ke ɓahri : « Sena Lazar ra ɓa sena-ziŋ hul ya. Sena-u laɓ ɓay hi̧ riŋ gun Ŋgerzah ɓá mgbe keni ɓay tul riŋ ɗina Ŋgerzah. »

⁵Zezu sa Marta ke yi̧n ye Mari ke Lazar sa.

⁶Ke lah ɓay sena Lazar kaŋ ba, ke kaɓ falu nam seɗe ɓáy.

⁷Bol falu ke ɓah hi̧ nzuk-dih fal yeri : « Náh el wuri si tusiɓa Zude ɓáy. »

⁸Nzuk-dih fal yeri ɓah : « Rabbi, laɓ nam ŋgi̧ ya ɓáy, ku yih ɓay vbuk mu ke kasaw ɓay i mu wa, mu yih ɓay náh el si Zude ra ɓáy le ? »

⁹Ke yih nzak woyri ɓahri : « Seh ti̧h, ɓa se-seh, kaŋ ya le ? Nzuk si sina ke se-seh le, ke ta ɓe fe ya ɓay fe le, gel tehna ƴo teh gel hi̧ nzuku.

¹⁰Mí nzuk si sina ke suŋ le, ke ɓe fe ɓay fe le, gel tehna teh ké pol ye ya. »

¹¹Ke ɓah kaŋ, mí ke el ɓahri : « Ya̧h wahri Lazar na nam. Mi si ri ɓay tom ni. »

¹²Nzuk-dih fal yeri ɓahri : « Ŋgernzuk, ke na nam le, ke zíŋ mun gahna ɓáy. »

¹³Zezu ɓah ɓay hul Lazar, mí a woyri ku ker ɓahri, ke ɓah ɓay nam ké-e na.

¹⁴Bale ke ɓah ɓa teh-u ɓahri : « Lazar hu-hu.

¹⁵Law bi mí rih mi ɓay tul woiri. Í kan law tul bi ɓay fe le, mi ta gelaw ya. Náh tɔr wuri si ta̧w ye. »

¹⁶Toma kú-u ɗi ni ɓa gun hore ra ɓah hi̧ mbaŋ yeri nzuk-dih fal Zezuri ɓahri, kú si hu ziŋ ni.

¹⁷Ku ka̧h Beɗtani bale, Zezu lah ɓahri, ku gɔr Lazar laɓ nam niŋ da.

¹⁸Ur ke Beɗtani ɓay si Zurusalem ra mah salful say yaŋ.

¹⁹Daɓa ziɓri gi kaɓ ziŋ Mari ke Marta ɓay hul manah woyri.

²⁰Marta lah ɓay gina Zezu, mí ke ur si nzɔ́h nun ye. Mari ba, kaɓ sa vul.

²¹Marta ka̧h ta̧w Zezu, mí ke ɓahri : « Ŋgernzuk, mu ƴo ra gelay le, manah bi ta hu ya.

²²Aŋay kara mi tu ɓahri, fe a suŋ suŋ ké mu goŋ Ŋgerzah le, ke ɓay hi̧ mu. »

²³Bale Zezu ɓah : « Manah wo ɓay el ke puh záh gi. »

²⁴Marta ɓah : « Mi tu ɓahri, sew a ɔh tɔru, sew ké záhri ɓay ti̧h ke puh záh ke pa̧ymun a foyu, a ye kara ke él kaɓ ke pa̧ymun a foyu pi. »

²⁵Dale Zezu ɓah hi̧ ni ɓahri : « A bi mí-i ɓa nzuk sa̧w ɔkna. Mi ɓa nzuk-hi̧ záhri ti̧h ke puh záh ke pa̧ymun a foyu. Nzuk kan law sa tul bi, mí hul i ni kara, ke él kaɓ ke pa̧ymun a foyu ɓáy.

²⁶Nzukri ké ƴo ke ɔkna, a woyri gbam ku ɓa nzukri ké kan law sa tul bi. Nzukuri ta hu mba wu̧m gaŋ. Marta, mu ya̧ ɓayay ya̧-ya̧ gaŋ le ? »

²⁷Marta ɓah, ke ya̧-ya̧ gaŋ. Ke ɓahri se : « Ŋgermbay, law bi te tul wo gaŋ. A wo mú-u ɓa Ŋgermbay ké nah ƴo geŋu, gun Ŋgerzah ké ɓay gi tukala. »

²⁸Marta ɓah kaŋ, mí ke sɔɓ mun el si ɗi yi̧n ye Mari. Ke ɗakla ni ɓahri : « Metere gi ƴo ma gelay. Ke ƴo ɗi mu. »

²⁹Mari ba, ur ɓa gah-u si ta̧w Zezu.

³⁰Zezu rih ɓil Beɗtani ya. Ke ƴo sa gel ké Marta ziŋ ni ra kɔɓ ɓáy.

³¹Ziɓri ké kaɓ vul ké ta̧w Mari ɓay hul manah ye ra ba, ko ni ké-e ur ɓa gah-u ti̧h-aw, mí ku ur dih bol ye. Ku ker ɓahri, ke si ma tupal ɓay vuh rew sa̧.

³²Mí Mari si ta̧w Zezu. Ke ko ni, mí ke lih siɓa ké pol ye ɓahri se : « Ŋgernzuk, mu ƴo ra gelay le, gun mah bi ɓay ta hu ya. »

³³Zezu ko Mari ƴo vuh rew, ke ko ziɓri ké dih fal ye ƴo vuh rew pi bale, law ye se ni, kerɓay gbur law ye.

³⁴Mí ke ɓahri : « Gel suŋ mí i gɔr ni ké ri le ? » Ku ɓah : « Ŋgernzuk, mú gi ko. »

³⁵Mbihnun mbaŋ law Zezu.

³⁶Ziɓri ko, mí ku ƴo ɓahri : « A ye-ay ke yih Lazar mbamba. »

³⁷Mí ziɓ a haniri ba, ɓahri : « A ye ké-e mgbur nun ra̧wri ra wa, ke ta ke ŋgerna ɓay gboh hul ɓá i Lazar ya le ? »

³⁸Law Zezu el se ni ra ɓáy, mí ke si ka̧h tupal. Tupal ra ɓa hoh kasaw. Ku mbek hulu ké ri. Ku mbih nzaku ke baw kasaw.

³⁹Mí Zezu ɓah : « Í sɔkrɔ kasaway ma fal. » Marta manah hul ra ɓah : « Ŋgernzuk, ku mbek hulu laɓ nam niŋ da. Ɓay fu̧-fu̧ wara. »

⁴⁰Zezu ba, ɓah : « Ani mí-i ɓah hi̧ mu le ? Mu kan law tul bi le, mu kó riŋ ɗina Ŋgerzah. »

⁴¹Mí ku sɔkrɔ kasaw ra. Zezu ɔr nun ye ma síɓa mí ke ɓahri : « Baah, mi el ke tumbɔl hi̧ mu ɓay fe le, mu lah mi lah.

⁴²A bi mi tu ɓahri, mu ƴo lah mi kpatara. Mí nzukri ké ɗoŋ mi-ay mi ɓah ɓay tul woyri ɓay hi̧ kú lah, kú ya̧ ɓayu ɓahri, a wo mú-u pih mi gi ɓa ketina. »

⁴³Mí ke el ɗi ni ɓeleŋ : « Lazar, mú ti̧h. »

⁴⁴Mí hul ra ti̧h dukuku. Gar kú-u kahra keni ndɔk ye ke bɔk ye, ke gar-kuh nun ye kara sel ya ɓáy. Zezu ɓah : « Sel wuri ni, í poŋ ni, ké tɔr si puh. »

⁴⁵Daɓa ziɓri ké gi kaɓ ziŋ Mari ra ko fe laɓna Zezu-aw dale, ku kan law sa tul ye.

⁴⁶Ziɓ a ɓoruri ba, tɔr si sɔk fariziri fe ké Zezu laɓ ra.

⁴⁷Bale ŋgernzuk fe puhna Ŋgerzahri ke fariziri ɗi maŋna ŋgernzuk-kuŋ salɓayri. Ku ƴo ɓahri : « A fe mí nah laɓ wuri le ? Fe saŋri ɓa ŋgi̧-u mí gun wo̧ro-aw ƴo laɓu.

⁴⁸Ko ya mí nah poŋ ni, mí ke laɓ fe-aw ma pol pol le, ziɓri riw ɓay kan law tul ye. Dale rɔmri ɓay gi ɓéɓ vul kani wah pi, ɓay duh sa̧w wah pi. »

⁴⁹Ŋgernzuk fe puhna Ŋgerzah ke sewu-aw ɓa Kayif mí ƴo haŋsekle woyri. A ye ba, ke ɓahri : « A woiri-ay ra, tul woiri ta-a lo ?

⁵⁰I ko ya le ? Su-su ɓay nzuk mbew ɓá hu ɓay tul wah sa̧w nzuk Ŋgerzahri rɔkɔ mi̧hri sa̧wu ɓá duh. »

⁵¹Ɓay ɓahna ké ŋgernzuk fe puhna Ŋgerzah ɓah-aw ti̧h ke tul ye ya. Kandɔk ké-e ɓa ŋgernzuk fe puhna Ŋgerzah ke sewu mí Tempuki ndoh ɓayu ké nzak ye hi̧ ni ke ɓah, Zezu ɓay hu ɓay tul sa̧w ziɓri.

⁵²Mí ke hú ɓay sa̧w ziɓri kaŋto ya, wara le ke hú ɓay gun Ŋgerzahri ké zikri ké tusiɓari gbam ɓay kú mbu̧h hani mbew ɓa sa̧w ye[29].

⁵³Ur ke seh maŋna-aw bale ŋgernzuk ziɓri-aw lek nzak woyri ɓay i ni.

⁵⁴Kaŋ mí Zezu si ha̧rma ké gel daɓa ké tusiɓa Zude mba. Mí ke loh si Efarayim puh a hani ké ɗih ya ke lawkɔr, mí ke kaɓ ri ke nzuk-dih fal yeri.

⁵⁵Ti̧hmbih-i guy buma ziɓri toŋ ɗih mba ɓay hi̧ ɓá laɓ. Wara mí ziɓri ɓa ŋgi̧-u ur ke puh woyri ɓoɗ ɓoɗ hil si ka̧h Zurusalem dara ti̧hmbih-u ɓá laɓ ɓáy. Ku yih lek mun woyri ɓay si ke fe puhna-aw ma vul kani Ŋgerzah.

⁵⁶Mí ku ƴo ƴah Zezu. Ku ƴo ɓil ila vul kani Ŋgerzah, ku ɓah ké sakra haniri ɓah : « I ker wuri ani le ? Ke ta gi gel ti̧hmbih-ay ya mini ani le ? »

⁵⁷Ŋgernzuk fe puhnari ke fariziri pih bolkusol hi̧ nzukri ɓahri se, nzuk ko gel ƴona Zezu le, ɓá sɔk niri gelu ɓay kú mgba ni.