Read Karang Mbete Za̧h 13 Bible Online

Mbete Za̧h 13 - Karang bible

Mbete Za̧h 13

¹Toŋ nam mbew ɓay hi̧ nam ti̧hmbih-i guy buma ɓá ka̧h, mí Zezu tu ɓahri, nam ye toŋ ɗih ya. Zah le ke póŋ tukala ɓay tɔr si ta̧w bah ye. Kandɔk ké Zezu sa nzuk yeri ké tukala, mí ke sa niri ke law sana ye puluk si ka̧h sa̧wseh hul ye.

²Zezu ke nzuk-dih fal yeri kaɓ nzak fe su̧na. Ke seh-aw da, mbay záh tukala ɓaŋ ɓay ndoh law Zudas, gun Simu ké Isikariyoɗ, ɓay ké te Zezu.

³Zezu tu ɓahri, baah poŋ feri riw ku̧ ndɔk ye, mí ke tu ɓahri, ke ur ké ta̧w Ŋgerzah, mí ke él ma ta̧w Ŋgerzah.

⁴Kandɔkaw Zezu ur ke nzak fe su̧na, ke lu mah gar ye, ke el mbi gar-tak mun, mí ke ŋga̧h keni si̧h ye.

⁵Dale ke kah mbih ku̧ ɓil ko̧no, mí ke titil wɔk keni bɔk nzuk-dih fal yeri. Ke el mgba nzak gar ké-e ŋga̧h keni tak ye ra, mí ke tak keni bɔk woyri.

⁶Ke ka̧h tul Simu Piyer bale, Piyer ɓah hi̧ ni ɓahri : « Ŋgernzuk, a wo mú-u wɔk bɔk bi ley ? »

⁷Zezu yih nzak ye ɓahri : « Fe ké mi ƴo laɓu-ay mu tu sa̧wu ya. Falu dara mú-u tú ɓáy. »

⁸Piyer ba, ɓah : « Mgbaŋ bi, mú wɔk bɔk bi ya. » Mí Zezu yih nzak ye ɓahri : « Mi wɔk bɔk wo ya le, mu ƴo ziŋ mi ya. »

⁹Simu Piyer ɓah : « Ŋgernzuk, mú wɔk bɔk bi kaŋto ya. Wara le mú wɔk ndɔk bi ke tul bi pi. »

¹⁰Zezu ɓah : « Nzuk soh mbih dale, wɔk bɔk ye wara. A woiri i te-teh, mí nzuk a hani ké sakra woiri-ay teh ya. »

¹¹Zezu tu nzuk ké ɓay te ni tu. Sa̧wu mí ke ɓahri, ku te-teh, mí nzuk a hani ké sakra woyri-aw teh ya.

¹²Zezu wɔk bɔk woyri ɔh riw bale, ke ndoh mah gar ye, ke el kaɓ nzak fe su̧na ra, mí ke ɓah hi̧ niri ɓahri se : « I tu sa̧w fe ké mi laɓaw tu-tu gaŋ le ?

¹³A woiri i ɗi mi ɓa “metere”. I ɗi mi ɓa “ŋgernzuk” pi. I ɗi gelu.

¹⁴A bi ké mi ɓa ŋgernzuk, ké mi ɓa metere mí-i wɔk bɔk woiri kandɔk mgbal ké wɔk bɔk nzukri kaŋ ra wa, a woiri ba, í mbi pihna mgbalu hi̧ haniri ɓa mbɔl ké na tul woiri[33],

¹⁵ɓayu ké pihna-u mí-i sɔk wuri ɓay í ndɔl fe laɓna bi-aw.

¹⁶Munu, mi laɓ pihna mgbal ɓa ketina. Mi ƴo ɓah ɓayay hi̧ wuri, mgbal mba tul bahgaŋ ye ya. Gun nzak pihna kara mba tul nzuk-pih ni ya pi.

¹⁷I tu fe-uri tu le, pol tehna ƴo ziŋ wuri, gelke i ƴo ndɔl fe laɓna ŋgernzuk woiri-ay.

¹⁸Mí pol tehna-ay ɓah ɓay tul woiri riw ya. A bi ké mi ɗi wuri, mi tu wuri tu. Le ɓay ké vbeh ɓil mbete Ŋgerzah lewsa̧ ra ƴo laɓ ɔh ke gelu. Ɓay ra ɓahri, nzuk ké ndoh ndɔk fe su̧na mbew ziŋ mi ra, ik tul bi siɓa ke bɔk ye[34].

¹⁹Mí guri-ay mi ƴo ɓah ɓayu hi̧ wuri ɓay seh ké fe-u ɓá ti̧h le, i kán law tul bi ɓahri, mi ƴo ri ɓa a ye.

²⁰Munu, ɓay pol tehna-aw ɓa ketina. Mi ƴo ɓah ɓayay hi̧ wuri, nzuk ké ya̧ gun nzak pihna bi le, ke ya̧ mi munu. Nzuk ké ya̧ mi le, ke ya̧ nzuk-pih mi munu. »

²¹Zezu ɓah ɓay kaŋ, mí law ye lu ni hi̧ ke te-teh ɓay Ŋgerzah ra ɓahri : « Munu, ɓay ké vbeh lewsa̧-aw ɓa ketina. Mi ƴo ɓah hi̧ wuri ɓahri se, nzuk mbew ké sakra woiri-ay ɓay te mi. »

²²Nzuk-dih fal yeri ko kona ma nun haniri. Gosoɓay zi niri. Ku tu ɓay tul ge mí Zezu ƴo ɓah-u ya.

²³Gun sana ye ké ɓa nzuk-dih fal ye a hani kaɓ ɓel ye.

²⁴Bale Simu Piyer te ta̧y nun hi̧ ni, ké vbi Zezu ɓahri, ɓayaw ra ke ɓah si tul ge le ?

²⁵Mí nzuk-dih fal ye ra ndoh nzak ye vbi Zezu ɓah : « Ŋgernzuk, ɓay ké mu ɓah ra si tul ge le ? »

²⁶Zezu yih nzak ye : « Mi duk peŋ ké gahay mí-i ndoh hi̧ nzuk dale, a ye munu. » Bale ke gɔh peŋ, mí ke duk ké gahay hi̧ nzuk-dih fal yeri titilu ke tul Zudas gun Simu ké Isikariyoɗ[35].

²⁷Zudas ɓá ya̧ peŋ bale, mbay záh tukala gi rih tul ye. Mí Zezu ɓah hi̧ ni ɓahri : « Mú laɓ fe ké mu laɓu wara. »

²⁸Nzuk-dih fal yeri kú-u kaɓ nzak fe su̧na ziŋ ni, mbew tu ɓay ké Zezu ɓah ke Zudas ya.

²⁹Nzuk a haniri ker ɓahri, Zezu pih Zudas si yéh fe ti̧hmbih a hani ké toŋ kandɔk ké Zudas ɓa nzuk-mbek lari woyri mini ke pih ni si hi̧ fe hi̧ nzuk sehri.

³⁰Zudas ya̧ peŋ ra bale, ke ti̧h ɓa gah-u. Gel si-sih ɓa suŋ.

³¹Zudas ti̧h tɔr bale, Zezu ɓahri se : « Aŋay riŋ ɗina gun nzuk pirmatul mgbe da. Riŋ ɗina Ŋgerzah kara mgbe ké tul gunu da pi.

³²Ŋgerzah ɓay hi̧ riŋ ɗina gun nzuk pirmatul ɓá mgbe. A ye kara ke ɓay hi̧ riŋ ɗina ye-aw ɓay mgbe wara.

³³Gun biri, mi káɓ ziŋ wuri zah ɓáy. I ƴáh mi, mí ɓay ké mi ɓah hi̧ ŋgernzuk ziɓri-aw, guri mi ƴo ɓah hi̧ wuri, i mah si gel ké mi él si ma mari ya.

³⁴Bolkusol a foyu mí-i poŋ hi̧ wuri-ay : Í sa haniri. Law sana ké mi sa woiri ra, í sa haniri kaŋ pi.

³⁵Gelke i sa hani le, nzukri riw ɓay tu ɓahri, i ɓa nzuk-dih fal biri ɓay law sana-aw. »

³⁶Simu Piyer ba, ɓah : « Ŋgernzuk, fál suŋ mú-u si ma mari le ? » Zezu yih nzak ye : « Gel sina bi ra mu mah si ziŋ mi aŋay ya. Seh a ɓoru dara mú-u si fal bi ɓáy. »

³⁷Piyer ɓahri : « Ŋgernzuk, ɓay fe mí-i mah si guri ya le ? Mi póŋ mun bi hi̧ hul ɓay tul wo. »

³⁸Zezu yih nzak ye ɓahri : « Mu póŋ mun wo hi̧ hul ɓay tul bi ley ? Mu mah si ziŋ mi ya ɓa ketina. Mi ƴo ɓah ɓayay hi̧ mu. Dara tuhndoy mgbal ɓá kah le, mu má̧y ɓay tul bi bɔk say ɓahri, mu tu mi ya. »