Read Karang Mbete Za̧h 14 Bible Online

Mbete Za̧h 14 - Karang bible

Mbete Za̧h 14

¹Zezu el ɓahri se : « Í hi̧ kerɓay ɓá gbur law woiri ya. Í kan law sa tul Ŋgerzah, í kan law tul bi pi.

²Ké puh bah bi, vulri ŋgi̧-ŋgi̧. Vulri ta-a le, mi ta sɔk wuri ya ɓay fe le, mi si ma mari ɓay lek gel geŋ wuri.

³Mi sí, mi lék gel dale, mi él gi, mi fá̧h wuri ma ta̧w bi le, i káɓ ziŋ mi ɓáy.

⁴Gel sina bi ra, i tu mahful tu-tu. »

⁵Toma ɓah : « Ŋgernzuk, nah tu gel sina wo ya. Ani mí nah mah tu mahfulu le ? »

⁶Zezu ɓah : « A bi mí-i ɓa mahful, mi ɓa ketina, mi ɓa sa̧w ɔkna. Nzuk kal ké ta̧w bi ya le, ke ká̧h ta̧w baah ya.

⁷I tu mi tu le, i ɓay tu baah pi. Guri kara i tu ni da, mí i ko ni ko. »

⁸Filiɓ ɓah : « Ŋgernzuk, mú sɔk na bah wo. Nah ko ni le, mah na da. »

⁹Zezu ba, ɓah : « Filiɓ, mi ƴo ziŋ wuri sew mah fe mú-u tu mi ya ɓáy ley ? Nzuk ko mi le, ke ko baah da. Ani mú-u ɓahri, mí sɔk wuri baah ɓáy le ?

¹⁰Mi ɓahri se, mi ƴo ke baah, baah ƴo ziŋ mi. Law wo mgba ɓayu ya ɓáy le ? Ɓayri ké mi ɓah-aw, mi ɓah ke tul bi ya. Baah ké kaɓ ziŋ mi mí ƴo laɓ fe laɓna ye.

¹¹Í kan law woiri tul bi ɓahri se, a bi mi ƴo ke baah, baah ƴo ziŋ mi. I lah ɓay bi ya le, í kan law tul bi ɓay tul fe laɓnari ké mi laɓ.

¹²Munu, mi ƴo laɓ fe laɓna baah ɓa ketina. Mi ƴo ɓah ɓayay hi̧ wuri, nzuk ké law ye ƴo ziŋ mi le, ke ɓay mbi nzak pihna bi. Mí fe laɓna nzuku ɓay mba fe laɓna biri-aw mba-mba ɓáy. Ɓay fe le mi ƴo tɔrna ma ta̧w baah.

¹³Kandɔkaw mí gelke i vbi ɓay fe ke riŋ bi le, mi láɓ fe-u ɓay hi̧ riŋ ɗina baah ɓá mgbe ké tul gun ye.

¹⁴Gelke i vbi ɓay fe ke riŋ bi le, mi láɓ fe-u.

¹⁵I sa mi le, bolkusol biri mí i ƴó tulu.

¹⁶Kandɔkaw a bi mí-i ɓay vbi baah, mí ke píh ke nzuk-hew wuri a ɓoru ɓay ké ƴo ziŋ wuri ɓa ŋgɔh.

¹⁷Nzuk-hew wuri-aw ra mí ɓa a ye Tem Ketina. Nzuk tukalari mah ya̧ ni ya ɓay fe le, ku ko ni ya, ku tu ni ya. Mí a woiri ba, i tu ni ɓay fe le, ke kaɓ ziŋ wuri, mí ke ƴo mbew ziŋ woiri pi.

¹⁸Mi ta poŋ wuri ɓa gun sehleri ya. Le mi él gi ziŋ wuri ɓáy.

¹⁹Nam ndi̧ ɓáy le, nzuk tukalari ɓay ko mi mba. A woiri ba, i kó mi ɓay fe le, a bi mí-i ɔ-ɔkna. Kandɔkaw mí a woiri kara i ɓay ɔ-ɔkna kaŋ pi.

²⁰Namu-aw dale, i tú ɓahri se, a bi mí-i ƴo ke baah, a woiri i ƴo ziŋ mi, a bi kara mi ƴo ziŋ wuri pi.

²¹Nzuk mgba bolkusol bi ndɔk seɗe, mí ke ƴo tulu le, nzuku sa mi. Nzuk-sa mi ra law sana baah na tul ye. A bi kara mi sá ni, mí-i él hi̧ ni ke kó mi pi. »

²²Zudas a ɓoru, ke ta ɓa Zudas Isikariyoɗ ya, ke ɓah : « Ŋgernzuk, ani mí mu ɓay hi̧ náh ko mu, mí nzuk tukalari ɓay ta ko mu ya le ? »

²³Bale Zezu yih nzak ye ɓahri : « Nzuk sa mi le, ke ƴo tul ɓay bi. Baah kara ɓay sa ni pi. Mí nah gí ta̧w nzuku ɓay kaɓ kaɓna ziŋ ni.

²⁴Nzuk sa mi ya le, ke ƴo poŋ ɓay bi. Ɓay ra ké i lah ke nzak bi ta ɓa ɓay ké ti̧h ke tul bi ya, wara le ɓa ɓay ké baah nzuk-pih mi ɓah.

²⁵Mi ɓah ɓayawri hi̧ wuri ke sewri ké mi ƴo ziŋ wuri.

²⁶Nzuk-hew wuri a ye Tem lawpuki ra, baah ɓay pih ni ke riŋ bi. A ye mí ke fírma wuri feri riw. Kandɔkaw mí ke dúm law woiri ké tul ɓay biri gbam.

²⁷Ɗeŋ, mi poŋ ku̧ tul woiri. Ɗeŋ bi mi hi̧ wuri. Mi hi̧ ɗeŋ kandɔk tukala hi̧ ɗeŋ ya. Kaŋ dale í hi̧ kerɓay ɓá gbur law woiri ya. Law woiri ɓá se wuri hȩkme ya.

²⁸Mi ɓahri se, ké i lah da-ay mi ƴo tɔrna mí-i él gi ziŋ wuri ɓáy. I sa mi le, law woiri ɓá rih wuri ɓay tɔrna bi ma ta̧w bah bi ɓay fe le, baah ra mba mi mba.

²⁹Kandɔkaw mí-i ɓah hi̧ wuri pol dara fe-u ɓá ti̧h ɓáy, ɓay seh ké fe-uri ɓay ti̧h le, i kán law sa tul bi.

³⁰Mi ta ɓah ɓay hi̧ wuri ɓa ŋgi̧-u mba ɓayu ké mbay a tukala a ye mbay záh tukala ƴo gina. A ye ke ta ke ɓay tul bi ya.

³¹Keni-aw kara ur síɓa, náh tɔr wuri si nzɔh nun ye ɓay hi̧ nzuk tukalari ɓá tu ɓahri, mi sa bah bi, mí-i ƴo tul bolkusol ye ɔh. »