Read Karang Mbete Za̧h 16 Bible Online

Mbete Za̧h 16 - Karang bible

Mbete Za̧h 16

¹« Mi ɓah ɓayawri hi̧ wuri rɔkɔ law woiri ɓá lu ké tul bi ma fal.

²Nzuk tukalari ɓay ni̧h wuri ke ɓil vul misoŋ. Ketina, ke seh-u le, nzukri ɓay i wuri-aw, ku kér ɓahri se, Ŋgerzah ya̧ fe laɓna-i wuri-aw ɓa fe dimna woyri kaŋ.

³Mí fe laɓna woyri-aw na kaŋ ɓay fe le, ku tu baah ya, ku tu mi ya pi.

⁴Mi ɓah ɓayawri hi̧ wuri ɓay hi̧ seh ké fe-uri ƴo laɓu le, law woiri ɓá dum ɓahri, a bi mi ɓah ɓayu ɓah. Mi ɓah hi̧ wuri ke titilu ya ɓay fe le, mi ƴo ziŋ wuri-ay.

⁵Aŋay dale, mi él ma ta̧w nzuk-pih mi. Mí nzuk mbew ké sakra woiri vbi mi fál suŋ mí-i sí ma mari ya. Wara le rew mgbaŋ law woiri ɓay biri-ay ké mi ɓah hi̧ wuri.

⁷Mí-i ɓah hi̧ wuri ɓa ketina. Tɔrna bi-ay su ɓay woiri. Mi tɔr ra ya le, nzuk-hew wuri ra ta gi ta̧w woiri ya. Sina bi dale, mi píh ni gi ɓay ké ƴo ziŋ wuri.

⁸Gina ye le, ke túŋ nzuk tukalari ke ɓay, ɓay tul su ya woyri, ɓay tul sal in kú-u sel poŋ Ŋgerzah, ɓay tul salɓay suya ké ta tul woyri.

⁹Ke túŋ niri ɓay tul suya woyri ɓay fe le, ku kan law tul bi ya.

¹⁰Ke túŋ niri ɓay tul sal in kú-u sel ɓay fe le, mi el si ta̧w baah, mí i ko mun bi mba.

¹¹Ke túŋ niri ɓay tul salɓay suya ké ta tul woyri ɓay fe le, salɓay suya ra kuŋ ku̧ tul mbay záh tukala ku-kuŋ[37].

¹²Mi ƴo ke ɓay ɓa ŋgi-u ɓay ɓah hi̧ wuri ɓáy, mí i mah lah ɓayu guri ya.

¹³Gina nzuk-hew wuri a ye Tem Ketina ra le ke téh gel ké pol woiri maŋ wuri si ɓil ketina gbam. A ye ra ke ɓáh ɓay ke tul ye ya, wara le ɓay a suŋ suŋ ké-e lah ké ta̧w bi mí ke ɓáh hi̧ wuri, mí ke sɔ́k ɓay feri ké ɓay ti̧h-u pi.

¹⁴Ke ɓay hi̧ riŋ ɗina bi ɓá mgbe ɓay fe le, ke lah ɓayri-aw ké ta̧w bi, mí ke el sɔk hi̧ wuri-aw.

¹⁵Ɓay a suŋ suŋ gbam ké ɓa fe baah ɓa fe bi pi. Sa̧wu mí-i ɓahri, Tempuki ɓay lah ɓayri-aw ké ta̧w bi, mí ke él sɔk hi̧ wuri-aw.

¹⁶Kandɔkaw, zah dale, i ta ko mi mba. Bol falu ndi̧ le, i él ko mi ɓáy. »

¹⁷Nzuk-dih fal ye a haniri ba, vbi ɓay ké sakra haniri ɓahri, Zezu ra ke ɓah ani munu le, ké-e ɓahri, zah dale a woyri ku ko ni mba, bol falu ndi̧ le, ku él ko ni ɓáy dara mí ku vbi ɓay ɓahri, ɓay Zezu ké-e ɓahri, ke él ma ta̧w bah ye-aw pi.

¹⁸Ku ƴo ɓahri : « Zah ra wa, ke ɓah ani munu le ? Nah tu sa̧wu ya. »

¹⁹Zezu tu vbiɓay ké zaŋ niri, mí ke ɓahri se : « I vbi haniri munɓay ké mi ɓah ra le, zah dale i ta ko mi mba. Bol falu ndi̧ le, i él ko mi ɓáy ra wa ?

²⁰Munu, i kó mi ya. Bol falu ndi̧ dale, i él ko mi ɓáy ɓa ketina. Mi ƴo ɓah hi̧ wuri ɓahri se, i ɓay vba̧ mun, i ɓay vuh rew ke mbihnun. Tukala ba, ɓay zay mun. I káɓ ke law sena, mí law sena woiri ɓay voh el ti̧h ɓa law rihna.

²¹Gelke wu̧ynzuk kaɓ peŋe le, law ye se ɓay koseh ké ƴo gaw ni ke sa̧wseh-u. Ke mbuŋ dale, ke yȩkre koseh ye ɓay tul law rihna ye ɓay fe le, ke mbuŋ gun.

²²A woiri kara i ƴo kaɓ ke law sena wara, mí mi él gi ko wuri ɓáy. Law woiri ɓay rih wuri, mí nzuk mbew ta gboh law rihna woiri ya.

²³Namu le, i ta vbi mi ɓay mbew mba. Munu, i vbi mi mba, ɓayu ɓa ketina. Mi ƴo ɓah ɓayay hi̧ wuri, i vbí baah ɓay fe a suŋ suŋ ke riŋ bi dale, ke ɓay laɓ fe-u hi̧ wuri.

²⁴Ka̧h guri-ay i vbi ɓay mbew ke riŋ bi ya ɓáy. I vbi ni le, i ya̧-u ɓay ɓo law woiri ɓá rih keɗ keɗ.

²⁵Mi ɓah ɓayawri hi̧ wuri ke lawɓay. Seh a ɓoru mi ɓáh ke lawɓay hi̧ wuri mba wara le, mi ɓáh ɓay tul bah bi ɓa teh-u hi̧ wuri í lah.

²⁶Namu-aw mi ta vbi baah ɓay tul woiri mba. A woiri mí i vbí baah fe ke riŋ bi.

²⁷Ɓayu ké law baah na tul woiri ɓay fe le, law woiri na tul bi. I kan law tul bi ɓahri se, mi ur ké ta̧w Ŋgerzah.

²⁸Kandɔk ké mi ur ké ta̧w baah mí-i gi kaɓ tukala ra, mi póŋ tukala ɓay el si ta̧w baah ɓáy. »

²⁹Nzuk-dih fal yeri ɓah : « A ha̧h, aŋay mu ƴo ɓah ɓay a teh-u wara, lawɓay ta mba.

³⁰Aŋay nah tu ɓahri, mu tu feri riw da. Ɗaka-vbi ɓay kara ta mba. Kaŋ mí nah kan law tul ɓayu ɓahri, mu ur ké ta̧w Ŋgerzah. »

³¹Zezu ba, yih nzak woyri ɓah : « I kan law tul bi ley ?

³²Í lah, sa̧wseh ƴo gina, mí ka̧h da ɓay hi̧ í zikri ke gelri ɓoɗ ɓoɗ ɓay poŋ mi ke hȩk bi. Mí mi ƴó ke hȩk bi ya ɓay fe le, baah ƴo ziŋ mi.

³³Mi ɓah ɓayawri hi̧ wuri ɓay mbu̧hna woiri ké tul bi le, í ƴo ke ɗeŋ. Ké tukala ba, koseh ƴo ziŋ wuri, mí í ko kona ke nun nzena dan hȩkme ma. A bi mi haw ŋgermu ké tukala ha-haw. »