Read Karang Mbete Za̧h 17 Bible Online

Mbete Za̧h 17 - Karang bible

Mbete Za̧h 17

¹Zezu ɓah ɓayawri hi̧ nzuk-dih fal yeri. Kandɔkaw ke ɔr nun ye ma síɓa, mí ke ɓahri se : « Baah, sa̧wseh ka̧h da. Mú hi̧ riŋ ɗina gun wo ɓá mgbe ɓay hi̧ gun wo ɓá hi̧ riŋ ɗina wo mgbe. Mú hi̧ riŋ ɗina gunu ɓá mgbe kandɔk ké mu hi̧ ni ke lak mbay tul nzukri riw ɓay hi̧ nzukri gbam ké mu hi̧ ni, kú ƴo ke ɔkna ɓa ŋgɔh.

³Ɔkna ɓa ŋgɔh-aw ra ɓa tú mu, a wo Ŋgerzah ké mu ɓa Ŋgerzah ketina mbew yaŋ. Ɔkna ɓa ŋgɔh-u ɓa tú nzuk ké mu pih ni, a ye Ŋgermbay Zezu.

⁴A bi mi hi̧ riŋ ɗina wo mgbe ké tusiɓa, mí-i laɓ pihna ké mu hi̧ mi ɔh ke gelu riw.

⁵Aŋay dale baah, mú hi̧ riŋ ɗina bi mgbe ke riŋ ɗina ké mi ƴo keni ziŋ mu pol dara tusiɓa laɓ ɓáy.

⁶Nzukri ké mu lu ké haŋsekle nzuk tukalari hi̧ mi ra, mi hi̧ niri ku tu mu. Ku ɓa nunu a wo, mí mu hi̧ mi niri, mí ku ƴo tul ɓay wo.

⁷Wara mí ku tu ɓahri, feri riw ké mu hi̧ mi ra ur ké ta̧w wo.

⁸Ku tu ɓahri, ɓayri ké mi ɓah ɓa ɓay ké mu ɓah, mí-i el ɓah hi̧ niri, mí ku ya̧ ɓayuri ya̧-ya̧. Ku tu ɓahri se, mi ur ké ta̧w wo ɓa ketina. Mí ku kan law tulu ɓahri, a wo mú-u pih mi.

⁹Mberem bi ké mi ƴo lu ziŋ mu-ay, mi vbi ɓay tul woyri. Mi vbi mu ɓay tul nzuk tukalari ya. Uwa, mi vbi mu ɓay tul woyri ɓay fe le, ku ɓa nunu a wo.

¹⁰Fe bi gbam ɓa fe wo. Fe wo kara ɓa fe bi pi, kandɔkaw mí riŋ ɗina bi mgbe ké sakra nzukuri-aw.

¹¹Mí mi ɓay poŋ tukala. A woyri ba, ku ɓay kaɓ tukala ɓáy. A bi le, mi si ma ta̧w wo. Baah nzuk lawpuki, mú kɔr tul woyri hi̧ kú ƴo ziŋ mu ke riŋ wo, riŋ wo ké mu hi̧ mi ɓa riŋ bi[38] ɓay kú ɓa nzuk ké mbew kandɔk a wah ké nah ɓa nzuk ké mbew kaŋ pi.

¹²Sewri ké mi ƴo ziŋ niri, a bi mí-i kɔr tul woyri ke riŋ wo ké mu hi̧ ɓa riŋ bi ra. Mí mi mgba sa̧w woyri. Nzuk mbew zi ya, sa ɓa Zudas mí zi ke tul ye hi̧ ɓay kú-u vbeh lewsa̧ ra laɓ ɔh ƴo gelu kaŋ[39].

¹³Aŋay dale mi ƴo si ma ta̧w wo. Kandɔk ké mi ƴo tusiɓa ɓáy ra mí-i ɓah ɓayawri ɓay hi̧ law rihna bi ɓá rih law woyri ɔh keɗ keɗ.

¹⁴Nzukri ké mu hi̧ mi ra, mi hi̧ niri, ku lah ɓay wo. Nzuk tukalari ba, fu̧y niri ɓay fe le, ku ɓa nzuk tukala mba kandɔk a bi ké mi ɓa nzuk tukala ya ra.

¹⁵Mi vbi mu ɓay mú fa̧h niri, ku el si ta̧w wo ya. Wara le mi vbi mu ɓay mú kɔr tul woyri ke ndɔk nzuk law a pipiri-u a ye mbay záh tukala.

¹⁶Ku ɓa nzuk tukala ya, kandɔk a bi ké mi ɓa nzuk tukala ya.

¹⁷Mú hi̧ law woyri pu ɓa nzuku a wo hi̧ kú kaɓ ɓil ketina. Ɓay wo ɓa Ketina.

¹⁸Kandɔk ké mu pih mi gi tukala, a bi kara mi pih niri ma ta̧w nzuk tukalari pi.

¹⁹Ɓay tul nzuk biri ra, mi hi̧ law bi pu ɓa nunu a wo ɓay kú na ɓa nzuk lawpukiri kú kaɓ ɓil ketina.

²⁰Mberem bi ké mi lu ra, mi vbi ɓay tul nzuk a a̧yri kaŋto ya. Mi vbi mu ɓay tul nzuk a ɓoruri ké ɓay lah ɓay woyri, mí ku kán law tul bi keni pi.

²¹Mi vbi mu ɓay tul woyri gbam, kú ɓa nzuk ké mbew kandɔk a wo baah ké mu ɓa mbew ziŋ mi. A bi kara mi ɓa mbew ziŋ mu bale, kú ɓa mbew ziŋ na pi, mi nzuk tukalari ɓá ya̧ ɓayay ɓahri, a wo mú-u pih mi.

²²Riŋ ɗina ké mu kan tul bi, a bi wara mí-i kan tul woyri ɓay kú ɓa mbew ziŋ na kandɔk a wah ké nah ɓa nzuk ké mbew ra kaŋ.

²³A bi mi ƴo mbew ziŋ niri, a wo mu ƴo mbew ziŋ mi pi. Riŋ ɗina-aw mi kan tul woyri ɓay kú ŋger ɔh ɓa nzuk ké mbew yaŋ, mí nzuk tukalari ɓá tu keni, a wo mú-u pih mi. Kú tu keni, mu sa nzuk biri mah ke law sana ké mu sa mi kaŋ.

²⁴Baah, nzukri ké mu hi̧ mi ra, gel ké mi ƴo ri-aw, mi yih ɓay kú kaɓ ziŋ mi ké ri pi, ɓay kú tu riŋ ɗina bi ké mu kan tul bi ɓay fe le, law sana wo mu sa mi keni dara tusiɓa laɓ ɓáy.

²⁵Baah, a wo ké mu ŋga̧h sal in, nzuk tukalari tu mu ya. A bi le mi tu mu. Nzuk biri kara tu ɓahri, a wo mú-u pih mi.

²⁶Mi hi̧ niri ku tu mu. Mi ɓay hi̧ niri, ku tú law sana wo ké mu sa mi keni ra, mí hi̧ law sana-u ɓá ƴo haŋsekle woyri. Kandɔkaw mí a bi mi ƴo haŋsekle woyri. »