Read Karang Mbete Za̧h 18 Bible Online

Mbete Za̧h 18 - Karang bible

Mbete Za̧h 18

¹Fal ɓayawri ké Zezu ɓah ra, ke ur ke nzak fe su̧na ke nzuk-dih fal yeri. Ku tɔr si gaw kala nduh Sederoŋ. Waka ƴo gelaw, mí Zezu ke nzuk-dih fal yeri si ri.

²Zudas nzuk-te ni kara tu waka-aw pi ɓay fe le, ku ƴo mbu̧h hani ké ri.

³Zudas ra fa̧h daɓa soze rɔmri ke soze-kɔr vul kani Ŋgerzahri, mí ke nda pol woyri ƴo gina. Ku mgba fe remri gbiri gbiri. Ku suk hɔrɔ mbakari ke hɔrɔ a ɓoruri, mí ku ti̧h keni ɓil waka. Ŋgernzuk fe puhna Ŋgerzahri ke fariziri mí pih niri.

⁴Zezu tu fe ké ɓay kal ké tul ye tu bale, ke si nzɔh nun woyri, mí ke vbi niri ɓahri : « I ƴah ge le ? »

⁵Ku yih nzak ye ɓah : « Nah ƴah Zezu, nzuk Nasareɗ. » Zezu ɓah : « Mi ƴo ri. » Zezu ɓahri, ke ƴo ri bale, ku ndur mun woyri tuɗ tuɗ lih guɓ siɓa. Zudas, nzuk-te ni ra ƴo ziŋ niri pi.

⁷Zezu el vbi niri ra ɓáy ɓahri : « I ƴah ge le ? » Ku ɓahri : « Zezu nzuk Nasareɗ. »

⁸Zezu el ɓahri : « Mi ɓahri se, mi ƴo ri. » Mí ke el ɓahri, ku ƴah ni le, kú poŋ nzuk yeri ɓá tɔr.

⁹Ke ɓah kaŋ ɓay hi̧ ɓay ké-e ɓah pol ra ɓá ƴo gelu. Ke ɓahri se, nzukri ké baah hi̧ ni ye, ke zi nzuk mbew ya.

¹⁰Simu Piyer ba, lu mahwu̧y pevbȩɗ, mí ke te gaysuk gun-laɓ pihna ŋgernzuk fe puhna Ŋgerzah a fál lakna fekeɗ kuŋ. Riŋ gun-laɓ pihna-aw ɓa Malkus.

¹¹Zezu ba, ɓah hi̧ Piyer ɓahri : « El ke mahwu̧y wo ndoh vulu. » Ke el ɓahri se : « Koɓ ti̧hmbih-ay, ké baah hi̧ mi ra wa, mi ta nzo-u ya lo ? »

¹²Ŋgernzuk kumandah ke soze yeri ke soze-kɔr vul kaniri mgba Zezu, ku ŋga̧h ni,

¹³ku kɔklɔ ni si pol Anasi kandɔk ké-e ɓa fay Kayif. Lewsa̧, ke ɓa ŋgernzuk fe puhna Ŋgerzah dara mí Kayif soh ri ke sewu-aw ɓáy.

¹⁴Kayif ɓa nzuk ké hew ŋgernzuk ziɓri pol sa̧ ɓahri se, su-su ɓay nzuk mbew ɓá hu ɓay tul sa̧w nzuk Ŋgerzahri[40].

¹⁵Simu Piyer ra a ye ke nzuk-dih fal Zezu a hani-u mbew, ku mbehle sina si fal Zezu. Nzuk-dih fal ye a mbewu-aw ra, ŋgernzuk fe puhna Ŋgerzahri tu ni tu. Kandɔkaw mí ke ziŋ ful rih si fal Zezu ké ɓil kerpuh ŋgernzuk fe puhna Ŋgerzahri-aw.

¹⁶Piyer ba, ta̧h ƴo polkɔkɔ ké kala bale, nzuk-dih fal Zezu a mbew ké ŋgernzuk fe puhna tu ni ra el gi ɓah ziŋ wu̧y ké kɔr nzakful, mí ke poŋ Piyer rih ɓil kerpuh pi.

¹⁷Bale wu̧y ra vbi Piyer ɓay ɓahri : « A wo mu ɓa nzuk-dih fal gun wo̧ro-aw, ra ma ? » Mí Piyer ɓah : « A bi ta-a. »

¹⁸Tel voh mbamba. Gun-laɓ pihnari ke soze-kɔr vul kaniri kaɓ nzak hɔrɔ ƴo nu̧h. Piyer kara ƴo nu̧h ziŋ niri pi.

¹⁹Anasi, ŋgernzuk fe puhna Ŋgerzah ra, vbi Zezu ɓay nzuk-dih fal yeri ke ɓay fe firma ké-e firma nzukri pi.

²⁰Zezu ba, yih nzak ye ɓahri : « Mi ɓah ɓa teh-u ké pol daɓa nzukri. Mi ƴo ɓah kpatara ké ɓil vul misoŋ pi, ké ɓil ila vul kani Ŋgerzah pi. Gelawri, ziɓri gbam mbu̧h ri. Mi ɓah ɓay ké duh gel ya.

²¹Ɓay fe mú-u vbi mi ɓayu le ? » Ke el ɓahri se, ŋgernzuk fe puhna ɓá vbi nzukri ké ƴo-ay. Nzukuri lah ɓay ɓahna ye te-teh.

²²Zezu ɓah kaŋ, mí soze-kɔr vul kani a hani ké ƴo ta̧w ye vba̧ ni kpay. Ke ɓahri, ku yih nzak ŋgernzuk fe puhna Ŋgerzah kaŋ le wo ?

²³Mí Zezu el ɓah hi̧ ni ɓahri, ɓay ye ƴo gelu ya le, soze ɓá ten suya-u ɓa teh-u. Ɓay ɓahna ye ƴo gelu ba wa, ani mí soze vba̧ ni ye mgbum le wo ?

²⁴Bale Anasi ŋga̧h Zezu pih ni si pol Kayif ŋgernzuk fe puhna Ŋgerzah a sewu-aw ra.

²⁵Simu Piyer le ƴo nu̧h hɔrɔ ziŋ gun-laɓ pihnari ra. Bale ku ɓahri : « A wo mu ƴo sakra nzuk-dih fal yeri, ra ma ? » Mí Piyer el ma̧y ɓay ra ɓahri : « A bi ta-a. »

²⁶Mí gun-laɓ pihna ŋgernzuk fe puhna Ŋgerzah, nzuku ɓa yi̧n nzuk ké Piyer te suk ye ra, ke ɓah : « Mi ko mu ké waka-aw, ya le ? »

²⁷Piyer ma̧y ɓay ra ɓáy ba, tuhndoy mgbal kah koŋroŋ ba.

²⁸Tipele teh. Ŋgernzuk ziɓri ten Zezu ke kerpuh Kayif bale, ku maŋ ni si ka̧h kerpuh guvener Pilaɗ. Ŋgernzukri ra sa rih ɓil kerpuh Pilaɗ ya rɔkɔ suya sa̧w ye ɓá rȩhke niri. Wara le mun woyri lek ɓay su̧ fe su̧na ti̧hmbih-i guy buma.

²⁹Mí Pilaɗ ti̧h si ta̧w woyri, ke ɓahri : « Suya fe mí i sek ni keni le ? »

³⁰Ku yih nzak ye ɓahri : « Ke ɓa nzuk-laɓ suya ya le, nah ta ndoh ni ndɔk wo ya. »

³¹Mí Pilaɗ ɓahri : « A woiri í mgba ni, í kuŋ salɓay kan tul ye ke bolkusol woiri. » Ŋgernzuk ziɓri ba, ɓahri : « Bolkusol rɔmri hah na kúŋ salɓay hul kan tul nzuk. »

³²Fe-u laɓ mah hani ke ɓay ké Zezu ɓah pol. Ke sɔk ɓay sam hul a ani-u ke hu-u keni.

³³Bale Pilaɗ el rih ɓil kerpuh. Ke ɗi Zezu gi. Ke vbi ni ɓay ɓahri : « A wo mú-u ɓa mbay ziɓri ra le ? »

³⁴Zezu yih nzak ye ɓahri : « Vbiɓayay ur ké ta̧w wo mini nzuk a ɓoruri mí sɔk mu ɓay bi le ? »

³⁵Pilaɗ yih nzak ye ɓahri : « A bi mi ɓa ziɓ lo ? Nzuk wori ke ŋgernzuk fe puhna wori mí mgba mu ndoh ndɔk bi. Suya fe mú-u laɓ le ? »

³⁶Zezu ba, ɓahri : « Sa̧w lák mbay bi ta tukala ya. Lák mbay bi ƴo ra tukala le, nzuk biri ɓay ruh ɓay tul bi ɓay rɔkɔ mí toh ɓil ndɔk ziɓri. Wara mí sa̧w lák mbay bi le ta tukala ya. »

³⁷Bale Pilaɗ ɓahri : « Mí le, mu ɓa mbay, ra wa ? » Mí Zezu yih nzak ye ɓahri : « Nzak wo mí ɓah-aw. Sa̧wɓay mbuŋna bi-aw munu. A bi mi gi tukala ɓay ten tehɓay ketina-aw. Nzuk ketinari riw lah nzak bi. »

³⁸Mí Pilaɗ ɓah, ketina ɓa fe le ? Kaŋaw ke el ti̧h kala ziŋ ziɓri, mí ke ɓahri : « A bi le mi ko suya mbew ké mgba tul ye ya.

³⁹Mí ɓay fe laɓna bi ke nam ti̧hmbih-i guy buma woiri le, mi sél mgbal mbew. Mí sel mbay ziɓri ra le ? »

⁴⁰Mí ku vba̧ nzak goɗoɗo ɓahri : « A ye ya. Bar-Abba ma. » A ye Bar-Abba ra ke ɓa nzukbaa ŋgomna.