Read Karang Mbete Za̧h 19 Bible Online

Mbete Za̧h 19 - Karang bible

Mbete Za̧h 19

¹Wara mí Pilaɗ mbi Zezu bale, ku vboŋ ni.

²Mí soze yeri kaŋ ŋgatukru ɓa guɓatul mbay ndoh tul ye. Mah gar ké si̧h ɓa mah gar mbay ku ndoh ni pi dara mí sozeri gbam a ké kal ké pol ye toŋ ɓa vbá̧ ni mbew mbew. Ku ƴo ɓahri : « Soko woiri wo, mbay ziɓri. »

⁴Kandɔkaw mí Pilaɗ el ti̧h kala ra ɓáy, ke ɓah hi̧ ziɓri ɓahri : « Í ko, mi ten ni gi kala ɓay í tu ɓahri, mi ko suya mbew ké mgba tul ye ya. »

⁵Kaŋaw mí Zezu ti̧h ke guɓatul ŋgatukru ké tul ye ke mah gar a si̧h-u kú-u ndoh ni ra. Mí Pilaɗ ɓah : « Í ko wuri nzuk ké ƴo-ay. »

⁶Ŋgernzuk fe puhna Ŋgerzahri ke soze-kɔr vul kani-uri ko ni bale, ku ur ke ɓay gbaw ɓahri : « Ɓar ni ɓar gaŋ. » Pilaɗ ba, ɓah : « A woiri í mgba ni, í ɓar ni. A bi le, mi ko suya ké mgba tul ye ya. »

⁷Mí ŋgernzuk ziɓri yih nzak ye ɓah : « A wah le, bolkusol wah mgba tul ye ke salɓay hul ɓay fe le, ke ɗi mun ye ɓa gun Ŋgerzah. »

⁸Pilaɗ lah kaŋ bale, hȩkme se ni se-se.

⁹Mí ke el rih si ɓil kerpuh, mí ke el vbi Zezu ɓayay ɓahri : « A wo, fál suŋ mú-u ur ké ri le ? » Zezu fer nzak ye ya.

¹⁰Bale Pilaɗ ɓah hi̧ ni ɓah : « Mu fer nzak bi ya ley ? Ŋgerna bi mah sel mu. Ŋgerna bi mah ɓar mu tul kpuh. Mu tu ya lo ? »

¹¹Zezu yih nzak ye ɓah : « Ŋgerna ɓay mba tul bi ta ta̧w wo ya. Ŋgerna ké na ndɔk wo ɓa ŋgerna ké gi ke fál síɓa, mí Ŋgerzah hi̧ mu-aw. Sa̧wu mí nzuk ké ndoh mi ndɔk wo ra, suya ye mba suya wo mba-mba. »

¹²Ur ke seh-u-aw mí Pilaɗ ƴah ful ɓay sel Zezu. Mí ziɓri vba̧ nzak ɓahri : « Mu sel ni le, mu ta ɓa ya̧h mbay a luki ra ya. Nzuk ɗi mun ye ɓa mbay le, ke fah sezar munu. »

¹³Pilaɗ lah kaŋ ba, mí ke ten Zezu ti̧h gi ndiseŋe. Ke el kaɓ arŋgaw-kuŋ salɓay. Riŋ gel-kuŋ salɓay ra ɓa Ɓɔk-kasaw. Ke nzak ebere ɓa Gabata.

¹⁴Namu-aw ɓa nam ti̧hmbih-i guy buma. Nam a titilu ra ziɓri lek fe ɓay nam a seɗe-u ké ɓa baw nam ɔkna ti̧hmbih-u. Seh ƴo tul puh. Mí Pilaɗ ɓah hi̧ ziɓri : « Í ko wuri mbay woiri ké ƴo-ay. »

¹⁵Le ku ur ke ɓay gbaw ɓahri : « Ɔr ni. Ɔr ni. Mú ɓar ni kan tul kpuh vbatay síɓa. » Pilaɗ ɓah : « I yih ɓay mí ɓar mbay woiri tul kpuh vbatay ley ? » Mí ŋgernzuk fe puhna Ŋgerzahri yih nzak ye ɓahri, sezar mí ɓa mbay woyri, mbay a ɓoru ta-a.

¹⁶Wara mí Pilaɗ ndoh Zezu ndɔk soze yeri hi̧ kú si ɓar ni tul kpuh vbatay ɔr kan síɓa.

¹⁷Sozeri mgba Zezu. Zezu ra ku hi̧ ni ke suk kpuh vbatay hul ye si keni ka̧h gel kú-u ɗi ɓa Gbogbotul. Ku ɗi gelu ke nzak ebere ɓa Golgota.

¹⁸Gelaw mí ku ɓar Zezu kan tul kpuh vbatay. Nzuk a ɓoruri seɗe kara ku ɓar ké tul kpuh vbatay pi. Nzuk a mbewu ké fál ndɔk lakna ye, nzuk a seɗe-u ba, ké fál ndɔk kperu ye. A ye Zezu le ku ɓar ni ké haŋsekle woyri[41].

¹⁹Pilaɗ vbeh salɓay ké ta tul Zezu kan gbekre, mí ku ɓar kan fál síɓa tul ye. Salɓayu vbeh kandɔkay : « Zezu ké Nasareɗ, mbay ziɓri. »

²⁰Kaŋaw mí ziɓri ɓa ŋgi̧-u ki̧ ɓayu ɓay fe le, gel kú-u ɓar ri Zezu ɗih ya ke puh. Ku vbeh ɓayu ke nzak ebere ke nzak gerek ke nzak lateŋ pi[42].

²¹Mí ŋgernzuk fe puhna Ŋgerzah ziɓri ƴo ɓah ɓay hi̧ Pilaɗ ɓah : « Fe vbehna “mbay ziɓri-aw” ra, mú vbeh ya. Mú sɔɓ vbehna-u kandɔkay : Nzukay ɗi mun ye ɓa mbay ziɓri. »

²²Pilaɗ ba, yih nzak woyri ɓah, ɓay fe ké a ye ke vbeh dale, ke vbeh da.

²³Nzuk ŋgermuri ɓar Zezu ké tul kpuh vbatay bale, ku fa̧h gar ye kehr hani ɓa gel niŋ. A ge ge le ya̧ nzuku a ye, nzuku a ye. Ku el mbi gar a fál ɓilu kan ɓoɗ. Gar ra ku kaŋ mbew yaŋ.

²⁴Kaŋaw mí sozeri ɓah ké sakra woyri ɓahri : « Náh gɔh wuri garay ya. Náh nda wuri ɓele keni ko, a ge mí ɓay i-u le ? » Fe-u laɓ kandɔk kú-u vbeh ɓayu lewsa̧ ɓil mbete Ŋgerzah. Ɓayu ɓahri : Ku kehr gar biri hani. Gar bi a ɓoru ba, ku el mbi nda keni ɓele[43]. Kandɔkaw mí ɓa fe laɓna nzuk ŋgermuri ké laɓ.

²⁵Ké bɔk kpuh vbatay Zezu ra mah ye ƴo ri ke wu̧y a ɓoru ké ɓa yi̧n mah ye. Mari wu̧y Kelewpas ke Mari ké Makdala ƴo ri pi.

²⁶Zezu ko mah ye ke nzuk-dih fal ye a hani ké-e sa ni, ku ƴo ta̧w hani. Mí ke ɓah hi̧ mah ye ɓahri : « Maah, mú ko gun wo ké ƴo-aw. »

²⁷Ke el ɓah hi̧ nzuk-dih fal ye ra ɓah : « Mú ko mah wo ké ƴo-aw. » Sa seh-aw mí nzuk-dih fal ye-aw titil mgba mah Zezu ɓa mah ye.

²⁸Bol falu bale Zezu tu ɓahri, ɓayri riw kú-u vbeh lewsa̧ ɓil mbete bolkusol Ŋgerzah laɓ ke gelu gelu ɔh da. Toŋ ɓay mbew ɓáy. Kaŋaw mí ɓay hi̧ ɓayu ɓá laɓ le, ke ɓahri : « Kɔkmbih i mi. »

²⁹Yim a su̧h-u mbah gbari ƴɔr gelu-aw. Mí sozeri mbi sifoŋ ŋga̧h ké nzak ka̧wkpuh ɓaŋ ndoh yim a su̧h-u, mí ku ndar si tuŋ nzak ye.

³⁰Ke ƴo̧k yim ra bale, ke ɓahri, feri riw laɓ ɔh da. Mí ke ɗiŋ tul ye, ke ndoh tem ye ndɔk bah ye mí hi̧ law ye toh.

³¹Kandɔk ké nam ti̧hmbih-u ɓa nam a titilu ké ziɓri lek fe ɓay baw nam ɔkna ti̧hmbih-u ra le, ŋgernzuk ziɓri sa ɓay hi̧ nzukri kú-u ɓar niri ɓá na sa tul kpuh vbatay ka̧h nam ɔkna ra ya, ɓayu ké namu ɓa nam ɔkna a luki. Mí ku si vbi Pilaɗ ɓá gur bɔk nzukri kú-u ɓar niri tul kpuh ɓay kú hu ɓa gah-u le, nzukri ɓá ɗer hul woyri.

³²Bale sozeri gi gur bɔk nzuk a mbew. Ku kal si gur bɔk nzuk a ɓoru-aw pi.

³³Ku ka̧h tul Zezu le, ku ko Zezu hu da, mí ku gur bɔk ye ya.

³⁴Wara le soze a hani tuŋ gari ye ke nzaw, mí sem ke mbih ti̧h.

³⁵Nzuk ké ko fe-u ke nun ye mí vbeh tehɓayu hi̧ wuri. Tehɓayu ɓa ketina. Nzuk ké ko fe-u ke nun tu-tu, ke ɓah ketina ɓay hi̧ law woiri ɓá te tul ketina-aw.

³⁶Fe-uri laɓ kandɔk kú-u vbeh ɓayu lewsa̧ ɓil mbete Ŋgerzah ɓahri : Huhru mun ye mbew, ku háw ya[44].

³⁷Ku el vbeh ké gel a ɓoru ɓáy ɓah : Ku ko nzuk kú-u tuŋ ke nzaw[45].

³⁸Bol falu, Zezeɓ ké Arimate, a ye ra ke ɓa nzuk-dih fal Zezu, mí ke sa sɔk mun ye ya ɓay hȩkme mbaŋ ye ziɓri. Ke si vbi Pilaɗ hul Zezu bale, Pilaɗ hi̧ ni ké si ɗer hul Zezu ra. Mí ke ɗer gaŋ ba.

³⁹Nikodem ké si ta̧w Zezu ɓa suŋ lewsa̧ ra ƴo ri pi. Ke suk sa̧wkpuh mir ke sa̧wkpuh aluwe mah kilo bon say.

⁴⁰Mí ku mbi hul Zezu bale, ku kuh ke ladara ke sa̧wkpuh ké ba̧ri-u fu̧ buy buyaw kandɔk ké ɓa fe laɓna ziɓri kú-u laɓ ke hul woyri.

⁴¹Gel-ɓar Zezu ɗih ya ke waka. Ké ɓil waka-aw, hoh kasaw kú-u fel ɓay mbek hulri ɓilu ƴo ri. Hoh kasawaw ra ku mbek ri hul mbew ya ɓáy.

⁴²Seh ɓay riŋna ɓa titil nam a seɗe-u ɓil nam ti̧hmbih-u. Ɓay nam a seɗe-u ké ɓa baw nam ɔkna ke ɓay hoh kasaw-mbek hul ké ɗih ya ke gel-ɓar Zezu pi ra, ku mbek hul Zezu ké ri.