Read Karang Mbete Za̧h 2 Bible Online

Mbete Za̧h 2 - Karang bible

Mbete Za̧h 2

¹Nam a sayu dale, ti̧hmbih-ya̧ hani laɓ ké Kana ké tusiɓa Galile. Mah Zezu ƴo ri.

²Ku ɗi Zezu ke nzuk-dih fal yeri, mí ku si ri pi.

³Yim gi poh nzukri dale, mah Zezu si dakla ɓayu ké suk ye ɓahri, yim poh nzukri poh.

⁴Zezu ba, ɓah : « Wu̧y, ɓayu ko na wuri le ? Sa̧wseh bi ka̧h ya ɓáy. »

⁵Mah Zezu si ɓah hi̧ gun-laɓ pihnari ɓahri : « Í si, í laɓ feri gbam ké-e ɓah hi̧ wuri. »

⁶Ké gelu ra dȩh[7] ɓa tɔtɔklɔ mí ku̧ ri. Dȩh mbew le, ɓilu ah mah aŋ mbih litere sɔɗ dara mí mbah ri ɓáy. Mbih-u ba, ɓa mbih ké ziɓri wɔk mun woyri keni dara ku si pol Ŋgerzah ɓáy.

⁷Bale gun-laɓ pihna-awri si ta̧w Zezu, mí ke ɓah, kú ku̧ mbih mbah dȩhri-aw. Ku ku̧ mbih mbah ri gaŋ ba.

⁸Mí Zezu el ɓah : « Aŋay, í kah wuri mbih-aw si keni hi̧ ŋgernzuk ti̧hmbih ɓá nzo. » Mí ku kah si keni hi̧ ŋgernzuk ra.

⁹Ŋgernzuku ɓá nzo le, rim ye leh ɓa yim. Ke tu gel ké yimu ur keni ya. Mí a woyri gun-laɓ pihnari ké kah mbih-aw ba, ku tu-tu. Ŋgernzuk ra ɗi nzuk-ya̧ wu̧y.

¹⁰Mí ke ɓah : « Nzuk a ɓoruri gbam, ku ƴo hi̧ nzukri yim a suki kú nzo pol. Mun nzukri rih niri dara ku hi̧ nzukri ɗɔkna yim ɓáy wa. A wo ba, mu poŋ yim a suki ka̧h aŋay ɓáy le ? »

¹¹Kandɔkaw mí fe saŋ ké Zezu laɓ ké Kana ké tusiɓa Galile ra ɓa ŋger fe sɔkna sakra fe saŋ a ɓoruri. Riŋ ɗina ye ten mun keni, nzuk-dih fal yeri kara kan law tul ye pi.

¹²Bol falu a ye ke mah ye ke yi̧n yeri ke nzuk-dih fal yeri ku ɗer si Kapernayum. Ku kaɓ ri nam ndi̧.

¹³Toŋ ɗih ya ɓay nam ti̧hmbih-i guy buma ziɓri ɓá ka̧h dale[8], Zezu hil si Zurusalem.

¹⁴Ke si ɓil ila vul kani Ŋgerzah, mí ke ziŋ ɓa gel nzuk-yeh ndayri, samiri, ndoy mbɔreri. Ke ziŋ ɓa gel nzuk-kom lari ŋgomna ke lari misoŋri.

¹⁵Zezu bal sal ɓa ndeh bale, ke ni̧h niri riw ti̧h kala. Ke ni̧h nzuk-yeh sami ke ndayri. Ke el fer lari nzuk-kom lariri tɔh ku̧ kpah. Tabele woyri, ke sɔkrɔ mgborvboŋ mgborvboŋ ku̧ siɓa.

¹⁶Ke ni̧h nzuk-yeh mbɔreri ɓahri se : « Í fa̧h fe woiri riw ma kala. Í laɓ vul bah bi ɓa lumu ya. »

¹⁷Law nzuk-dih fal yeri-aw ker ɓay si tul ɓay Ŋgermbay ɓil mbete Ŋgerzah. Ɓayu ɓahri se : Law bi nzek ɓay vul wo[9].

¹⁸Bale ziɓ Zuderi vbi ni ɓahri : « Fe saŋ fe mú-u sɔ́k hi̧ na, náh tu keni ŋgerna tul wo ké mu laɓ feri-ay le ? »

¹⁹Zezu yih nzak woyri ɓahri : « Háw wuri vul kani-ay. Ɓil nam say mí-i él mboh ƴo gelu. »

²⁰Bale ziɓ Zuderi ɓahri : « Vul kani-ay ra laɓ mbihmbam bon niŋ falu tɔtɔklɔ dara mí vulu mboh ɔh wa, a wo mu él mboh ƴo gelu ɓil nam say ley ? »

²¹Ɓay mbóh vul kani-aw ra Zezu ɓah ɓay tul mun ye.

²²Law nzuk-dih fal yeri-aw ker si tul ɓay ké-e ɓah ra, mí ku kan law woyri tul ɓay ké vbeh ɓil mbete Ŋgerzah-aw pi, ku kan law woyri tul ɓay ké Zezu ɓah-aw pi.

²³Ke seh ti̧hmbih-i guy buma ké Zezu ƴo Zurusalemaw daɓa nzukri kan law tul ye ɓay fe saŋ ké Zezu laɓ kú-u ko.

²⁴Zezu ba, kan law ye tul woyri ya. Ke tu nzukri gbam.

²⁵Ke ta ke ɗaka ɓay hi̧ nzuk ɓá ten tehɓay ké tul nzuk pirmatul hi̧ ni ya, ɓayu ké-e tu nzukri gbam tu. Ke tu ɓay ké mu̧h ɓil law nzukri tu.