Read Karang Mbete Za̧h 20 Bible Online

Mbete Za̧h 20 - Karang bible

Mbete Za̧h 20

¹Nam a sayu ɓil nam ti̧hmbih-i guy buma, namu ɓa nam a titilu ɓil dimasi. Mari ké Makdala ti̧h ke gel pele si ka̧h tupal Zezu. Ké gelaw ke ko kasaw ké mbih nzak hoh kasaw-mbek hul ra na fál mbew.

²Bale ke kpa̧h ke ɗukna si ziŋ Simu Piyer ke nzuk-dih fal Zezu a ɓoru ké Zezu sa ni. Ke ɓah hi̧ niri ɓah : « Ku ten hul ŋgernzuk wahri ke ɓil hoh kasaw-mbek hul. Gel kú-u ɓaŋ hulu kan ri nah ko ya pi. »

³Piyer ke nzuk-dih fal Zezu a ɓoru ra ba, ku ur ti̧h si gel-mbek hul Zezu ra ɓay ko-u.

⁴Seɗe mbɔk woyri ku ur ɗukna. Nzuk-dih fal ye a ɓoru ra ɗuk mba Piyer mí si ka̧h gel hoh kasaw-mbek hul pol.

⁵Ke ɗiŋ tul peŋ gel ma ɓil hoh ra. Ke ko ɓa ladara-kuh hul Zezu ku̧ ri. Mí a ye ma, ke rih si ɓil hoh-aw ya.

⁶Simu Piyer ba, ka̧h ké fal mí kal si rih ɓil hoh kasaw-mbek hul. Ke ko ɓa ladara-kuh hul ra mí ku̧.

⁷Mindil ké pɔr tul hul gim kan ɓoɗ poŋ ladara ɓoɗ ba, fe-u lek na ke gelu.

⁸Wara mí nzuk-dih fal Zezu a ɓoru ké ɗuk ka̧h hoh kasaw-mbek hul pol ra gi rih ɓil hoh kasaw mí si ko pi dale, ɓay Ŋgerzah kú-u vbeh lewsa̧ guh law ye. Ɓayu ɓahri se, ɓa ra fe fe gaŋ kara Ŋgermbay ɓay ti̧h ke puh záh ke pa̧ymun a foyu ti̧h. Mí ke kan law tul ɓayu.

¹⁰Nzuk-dih fal yeri ké seɗe ra el si puh.

¹¹Mari ba, ƴo nzak hoh kasaw-mbek hul ra ƴo vuh rew. Ke el ɗiŋ tul peŋ gel ma ɓil hoh kasaw ra bale,

¹²ke ko tem nzak pihna seɗe. Gar woyri pu rak rak. Ku kaɓ gel-kan hul. Nzuk a mbewu kaɓ fál gel-kan tul ye. Nzuk a ɓoru ba, kaɓ fál gel-kan tabɔk ye.

¹³Mí ku ɓah hi̧ Mari ɓahri : « Wu̧y, ɓay fe mú-u vuh rew le ? » Ke ɓah hi̧ niri ɓahri : « Ɓay fe le ku mbi hul ŋgernzuk, mí-i tu gel kú-u ɓaŋ kan ri ya. »

¹⁴Ke ƴo ɓah kaŋ bale, ke sɔɓ nun ye ma fal. Ke el ko nzuk ƴo, mí ke tu ɓa Zezu ya.

¹⁵Zezu ɓah hi̧ ni ɓahri : « Wu̧y, ɓay fe mú-u vuh rew le ? A ge mú-u ƴah le ? » Mari ker ɓahri, ɓa nzuk-kɔr waka-aw munu, mí ke ɓah : « Ŋgernzuk, a wo mú-u mbi hulu le, mú sɔk mi gelu ɓay mí si mbi. »

¹⁶Zezu ba, ɓah : « Mari. » A ye ba, sɔɓ nun ye, ke ɓah ke nzak ebere ɓahri : « Raboni. » Raboni yih ɓahri, metere bi.

¹⁷Mí Zezu ɓah hi̧ ni : « Mú mgba mi ya. Mi hil si ta̧w baah ya ɓáy. Mú si ta̧w yi̧n biri, mú ɓah hi̧ niri ɓahri, mi híl ma ta̧w bah bi. Ke ɓa bah woiri pi. Ke ɓa Ŋgerzah bi. Ke ɓa Ŋgerzah woiri pi. »

¹⁸Mí Mari ké Makdala tɔr si ɓah nzak pihna-u hi̧ nzuk-dih fal yeri hi̧ ku lah ɓahri, ke ko Gaŋ tul feri riw ke nun ye ko. Kaŋ mí ke ɓah ɓayu hi̧ niri.

¹⁹Nzaklew dimasi-u mí nzuk-dih fal Zezuri mbu̧h hani ké vul. Ku dar ful kan tul woyri ɓayu kú-u laɓ hȩkme ŋgernzuk ziɓri. Bale Zezu ti̧h tul woyri ké ɓil vulaw mbu̧y ɓahri : « Mi vah wuri ke ɗeŋ[46]. »

²⁰Mí ke sɔk niri ndɔk ye ke gari ye. Nzuk-dih fal yeri ko Ŋgermbay woyri bale, law woyri rih niri keɗ keɗ.

²¹Mí ke el ɓah ra ɓáy ɓahri : « Ɗeŋ ƴo ziŋ wuri. Kandɔk ké baah pih mi, a bi kara mi pih wuri pi. »

²²Mí ke el ul ɔkna ku̧ tul woyri ɓahri : « Í ya̧ wuri Tempuki. Salɓay ké i lú ké tul nzukri le, Ŋgerzah lu ɓayu pol da.

²³Salɓay ké i lú ké tul nzukri ya le, ɓayu mgba niri kɔɓ ɓáy. »

²⁴Toma ba, seh ké Zezu ti̧h tul nzuk-dih fal yeri-aw, ke ta-a. A ye ra ke ƴo sakra nzuk-dih fal yeri a boh falu seɗe. Ku ɗi ni ɓa gun hore.

²⁵Mí nzuk-dih fal yeri sɔk ni ɓahri, ku ko Gaŋ tul feri riw ke nun woyri da. Bale Toma ɓah hi̧ niri ɓay ɓahri se, a ye ke ko no̧ko kú-u ɓar ndɔk ye ke no̧ko a gari ye, mí ke za ke ndɔk ye ya le, ke ta ya̧ ɓay woyri ya.

²⁶Nam toŋndɔk seɗe kal. Nzuk-dih fal yeri el mbu̧h hani ké ɓil vul ra ɓáy. Toma kara kaɓ ziŋ niri pi. Ku dar ful kan tul woyri, mí Zezu ti̧h tul woyri mbu̧y. Ke ɓahri : « Mi vah wuri ke ɗeŋ. »

²⁷Bale ke el ɓah hi̧ Toma ɓahri : « Mú ndar ndɔk wo, mú za ndɔk bi-ay. Mú ndar ndɔk wo, mú za gari bi, mú ko ɓo mú poŋ fahɓay. Mú kan law wo tul ti̧hna bi ke puh záh ke pa̧ymun a foyu. »

²⁸Toma yih nzak ye ɓahri : « Gaŋ bi, Ŋgerzah bi. »

²⁹Mí Zezu el ɓah hi̧ ni : « Ɓayu ké mu ko mi, mú-u kan law wo tul bi-ay le ? Pol tehna ƴo tul nzukri ké ko mi ke nun ya, mí ku kan law tul ti̧hna bi ke puh záh ke pa̧ymun a foyu. »

³⁰Kandɔkaw mí Zezu laɓ fe saŋ ɓa ŋgi̧-u ké nun nzuk-dih fal yeri. Fe saŋawri riw vbeh ɓil mbete-ay ya. A a̧yri ké vbeh ku̧ ɓil mbete-ay, mi vbeh ɓay í kan law tul ye keni ɓahri, Zezu ɓa Ŋgermbay gun Ŋgerzah[47]. Le tem woiri ɓay ƴo ke ɔkna ké i ziŋu ɓay tul ye.