Read Karang Mbete Za̧h 21 Bible Online

Mbete Za̧h 21 - Karang bible

Mbete Za̧h 21

¹Bol falu-aw Zezu el sɔk mun ye hi̧ nzuk-dih fal yeri ké nzak mahmbih Tiberiyaɗ. Sɔ́k mun ye-u kal kandɔkay :

²Simu Piyer, Toma kú-u ɗi ni ɓa gun hore, Nataniyel ké Kana tusiɓa Galile, gun Zebederi, nzuk-dih fal Zezu a ɓoruri seɗe ƴo ke haniri.

³Dale Simu Piyer ɓah, a ye ke tɔ́r si fa̧hra mbih. Mí ku yih nzak ye ɓahri, a woyri ku sí ziŋ ni pi. Kandɔkaw mí ku tɔr. Ku si hil kumbon, ku hehre. Ku fa̧hra mbih ke suŋu-aw kpu̧ru, mí nzuy mbew kara ku mgba ya.

⁴Tipele za̧y mí Zezu ƴo nzak mbih. Nzuk-dih fal yeri ra tu ɓa a ye Zezu ya.

⁵Bale Zezu ɓah hi̧ niri : « Gunayri, i ziŋ hay lakna ya le ? » Ku yih nzak ye ɓahri : « Ta-a. »

⁶Mí Zezu el ɓah hi̧ niri ɓahri : « Í vbu kȩke woiri ma fál ndɔk lakna ké ɓel kumbonaw, i zíŋu. » Ku vbu kȩke ra ba, mí ku te nzuyri mbah ɓilu. Ŋgerna ɔ́r kȩke ma síɓa kara mba niri.

⁷Kaŋaw mí nzuk-dih fal ye ké Zezu sa ni ra ɓah hi̧ Piyer ɓahri, Gaŋ tul feri riw munu. Simu Piyer lah ɓa a ye bale, ke ndoh gar ɓay mun ye ké na ndikpo, mí ke zo vbu mbih suh ma ta̧w ye.

⁸Tɔr nzuk-dih fal Zezuri ké toŋ ɓil kumbon ba, hehre kumbon kɔklɔ kȩke ɓay ti̧h keni. Ɓel sew ɗih ya, mah tulndɔk sɔɗ kaŋ.

⁹Ku ka̧h ɓel sew. Ti̧hna woyri ke kumbon bale, ku ko nzuy ku̧ tul hɔrɔ ke peŋ kara pi.

¹⁰Mí Zezu ɓahri : « Í gi wuri ke nzuy a haniri ké i mgba ra wara. »

¹¹Kaŋ mí Simu Piyer hil kumbon, ke el kɔklɔ kȩke ké nzuy mbah ri nzuturu ti̧h keni kala. Ku ki̧ nzuy a bawu bawuri ɓa sɔɗ ke bon ndiɓi falu say. Nzuyri kú-u mgba ŋgi̧-aw, kȩke gɔh ndi̧ kari ya.

¹²Mí Zezu el ɓahri : « Í gi wuri su̧ fe. » Ké sakra nzuk-dih fal yeri-aw, nzuk mbew kara mbi tul ɓay vbi ni, ke ɓa ge, ra ya ɓay fe le, ku tu ɓahri, ke ɓa Gaŋ tul feri riw ra gaŋ.

¹³Zezu fa̧h peŋ ke wal niri. Ke wal nzuy kara kandɔkaw pi.

¹⁴Kandɔkaw mí Zezu sɔk mun ye hi̧ nzuk-dih fal yeri ko ni fal ti̧hna ye ke puh záh ke pa̧ymun a foyu ɓa bɔk a sayu mí na-ay.

¹⁵Ku su̧ fe bale, Zezu ɓah hi̧ Simu Piyer : « Simu gun Za̧h, mu sa mi ŋgi̧ kal tul a a̧yri le ? » Piyer ɓah : « Gaŋ bi, mu tu ɓahri, mi yih mu. » Zezu el ɓah : « Mú hɔl gun sami biri. »

¹⁶Zezu ɓah ra ɓáy ɓa bɔk a seɗe-u : « Simu gun Za̧h, mu sa mi le ? » Piyer ɓah : « Gaŋ bi, mu tu ɓahri se, mi yih mu yih. » Zezu el ɓah ra : « Mú mgba sa̧w sami biri. »

¹⁷Zezu ɓah ra ɓáy nderi a bɔk sayu : « Simu gun Za̧h, mu yih mi le ? » Law Piyer rih ni mba ɓay fe le, Zezu vbi ni ɓa a bɔk sayu ɓahri, ke sa ni ra le. Mí ke yih nzak ye ɓahri : « Gaŋ bi, feri riw mu tu-tu. Mu tu ɓahri, mi yih mu yi-yih. » Zezu ɓahri : « Mú hɔl sami biri. »

¹⁸Bale ke el ɓahri : « Gelu munu, ɓa ketina, mu yih ɓay bi gaŋ, mi ƴo ɓah ɓayay hi̧ mu, ke seke wo le, mu ƴo ŋga̧h tul si̧h wo ke mun. Mu ha̧rma kandɔk ké law wo yih. Mu kpɔ́krɔ dale, mu ɓay ndar ndɔk wo. Nzuk a ɓoru mí ɓay ŋga̧h tul si̧h wo, ku ɓay kɔklɔ mu ma gel ké mu sa si ri ya. »

¹⁹Zezu sɔk keni sam hul ké Piyer ɓay hu-u, mí ke ɓay hi̧ riŋ Ŋgerzah ɓá mgbe keni. Bale ke el ɓah hi̧ Piyer ɓahri : « Mú gi fal bi. »

²⁰Piyer sɔɓ nun ma fal. Ke ko nzuk-dih fal ye ké Zezu sa ni ƴo dih bol woyri. A ye ra ke ɓa nzuk ké ndoh nzak ye vbi Zezu ké nzak fe su̧na ɓahri : « Ŋgernzuk, mu ɓah ra si tul ge le ».

²¹Piyer ɓá ko ni kaŋ le, ke vbi Zezu ɓahri : « Gaŋ bi, a ye-ay ba ? »

²²Mí Zezu ɓah : « Mi yih ɓay ké kaɓ kpu̧ru ka̧h elna bi kara, ɓay wo ƴo ri le ? A wo le, mú gi fal bi. »

²³Kaŋaw mí ɓayu ya̧ gel ké sakra nzuk yi̧nri ɓil Ŋgermbay. Ku ɓahri, nzuk-dih fal Zezu ra ta hu ya. Mí Zezu ɓah kaŋ ya. Ke ɓahri se : « Mi yih ɓay ké kaɓ kpu̧ru ka̧h elna bi kara. » Ke ɓah kaŋ.

²⁴Nzuk-dih fal Zezu ra, mí ke ɓa a ye-ay mí ke te-teh ɓayri-ay. Mí ke vbeh ɓayuri ku̧ ɓil mbete-ay. A wah nah tu tehɓay ye ɓa ketina.

²⁵Zezu laɓ sam fe a ɓoruri ɓa ŋgi̧-u pi. Ku vbeh ra ɓayuri mbew mbew gbam ku̧ ɓil mbete le, mi ko ɓahri, gel-ku̧ mbete-uri ké tusiɓa ɓay mah ya.