Read Karang Mbete Za̧h 4 Bible Online

Mbete Za̧h 4 - Karang bible

Mbete Za̧h 4

¹Zezu tu ɓay ké toh suk fariziri. Ku lah ɓahri se, Zezu ƴo soh nzukri mbih batem ŋgi̧ kal ŋgi̧na nzukri ké Za̧h soh niri mbih batem.

²Ketina le, a ye ke soh nzukri mbih batem ya. Nzuk-dih fal yeri mí soh nzukri mbih batemu.

³Zezu tu ɓay ra tu bale, ke ur, ke tɔr ke tusiɓa Zude si tusiɓa Galile.

⁴Mahfulu kal ké tusiɓa Samari.

⁵Mí ke si ti̧h ké Sikar ké tusiɓa Samari. Puh-u ɗih ya ke kaŋpele Zakoɓ. Gel ra Zakoɓ poŋ hi̧ gun ye Zezeɓ lewsa̧.

⁶Lɔkɔ mbih Zakoɓ kara na ri pi. Zezu ta̧h ke sina, ke el kaɓ nzak lɔkɔ mbih ra. Seh zaŋ keleŋ.

⁷Nzuk-dih fal yeri ra kal si ɓil puh ɓay yeh fe su̧na. Mí wu̧y Samari a hani mbew gi ɓay ɗuh mbih. Dale Zezu ɓah : « Mú hi̧ mi mbih mí nzo. »

⁸

⁹Wu̧y Samari ɓah : « A wo ké mu ɓa ziɓ ba, mu goŋ mi mbih, a bi ké mi ɓa wu̧y Samari le ? » Ke ɓah kaŋ ɓayu ké ziɓri ke samariri lah hani ya.

¹⁰Mí Zezu yih nzak ye ɓahri : « Mu tu suki ké Ŋgerzah ƴo hi̧ nzukri mú-u tu nzuk ge ƴo goŋ mu mbih nzona-ay le, a wo mú-u él goŋ ni mbih nzona. Ke hí̧ mu mbih ɔkna ké lu ɓuɗ ɓuɗ. »

¹¹Wu̧y ra ba, ɓah : « Ŋgernzuk, lɔkɔ mbih-ay ɗi-ɗih. Mu ta ke fe-ɗuh mbih ya pi wa, mu láɓ ani dara mú-u zíŋ mbih ɔkna ra le ?

¹²Zih wah Zakoɓ mí poŋ lɔkɔ mbih-ay hi̧ na. A ye ke nzo mbih-ay pi. Gun yeri ke fe hɔlna yeri nzo pi. A wo ba, mu ɓa nzuk a luki mba Zakoɓ mba le ? »

¹³Zezu yih nzak ye, ke ɓahri : « Nzukri gbam ké ƴo nzo mbih-ay ra kɔkmbih ɓay el i niri ɓáy.

¹⁴Mí nzuk a a̧y ké nzo mbih ké mi hí̧ ni ra le, kɔkmbih ta i ni mba wu̧m. Mbih ké mi hí̧ ni ra ɓay lu ɓuɗ ɓuɗ. Mbih-u ɓay ti̧h ɓa mbihlaw ké lu ke ɔkna ké ta̧w ye ɓa ŋgɔh. »

¹⁵Mí wu̧y ra ɓah hi̧ ni ɓahri : « Ŋgernzuk, mú hi̧ mi mbih ra mí nzo ɓay hi̧ kɔkmbih ɓá i mi ya. Le mi él gi ɗuh mbih mba pi. »

¹⁶Bale Zezu el ɓah ɓayay hi̧ ni : « Mú si ɗi wah wo, í gi. »

¹⁷Wu̧y ra yih nzak ye, ke ɓahri : « Mi ta ke wo̧ro ya. » Mí Zezu ɓah : « Ɓay wo ƴo gelu ké mu ɓahri, mu ta ke wo̧ro ya.

¹⁸Lewsa̧ mu ya̧ wo̧ro ɓa gel ndiɓi. Wo̧ro a aŋay ba, ta ɓa wah wo ya. Ɓay wo ɓa ketina. »

¹⁹Wu̧y ra ba, el ɓahri : « Ŋgernzuk, mi ko da. Mu ɓa gun nzak pihna Ŋgerzah gaŋ.

²⁰Zih wah samariri dim Ŋgerzah ké tul kasawaw[12]. A woiri ziɓri ba, i ɓahri Zurusalem mí ɓa gel-dim Ŋgerzah mbew yaŋ. »

²¹Mí Zezu ɓah : « Wu̧y, mú lah ɓay bi-ay, nam ƴo gina ké i ta dim baah ké tul kasawaw mba, ké Zurusalem ya pi.

²²A woiri i ƴo dim baah dan tu fe-u. A wah ziɓri ba, nah ƴo dim baah ke fe tuna ɓay fe le, ti̧hna nzukri ke ndɔk hul, sa̧wu ur ké ta̧w ziɓri.

²³Wara le nam-dim baah ra ƴo gina mí ka̧h da. Nzuk-dim Ŋgerzah a ketinari ɓay dim baah ke Tempuki pi, ke ketina pi. Sam nzuk a kandɔkawri ra baah taw niri.

²⁴Ŋgerzah ɓa tem. Nzukri ké dim ni le, ku dím ni ke Tempuki pi ke ketina pi. »

²⁵Mí wu̧y ra ɓah : « Mi tu ɓahri, Mesi ƴo gina ku ɗi ɓa Ŋgermbay. Gina ye le, ke tén sa̧w feri riw hi̧ na. »

²⁶Mí Zezu ɓah : « Nzuk ké ƴo ɓah ɓay ziŋ mu-ay ra ɓa a ye munu. »

²⁷Ké gelaw mí nzuk-dih fal yeri el gi. Ku ƴo yer ɓay fe le, ke ƴo ɓah ɓay ziŋ wu̧ynzuk. Mí vbí ni ɓay ɓahri, a fe mí ke taw le ? Mini vbí ɓay ɓahri, ɓay fe mí ke ƴo ɓah ziŋ wu̧yaw le ? A̧w ra ku sa vbi-u ya.

²⁸Wara mí wu̧yu poŋ iri-ɗuh mbih ye sa gelu mí el si puh. Ke ƴo ɓah hi̧ nzukri ɓahri : « Í gi ko nzukay ké ten ɓay fe laɓna biri riway. Ko ya le, ɓa Ŋgermbay. »

²⁹

³⁰Nzukri ur ti̧h ke ɓil puh yir gi ma ta̧w Zezu.

³¹Ku ƴo tul ful ƴo gina, mí nzuk-dih fal yeri ƴo ɓah hi̧ ni ɓahri : « Rabbi, fe su̧na mí na-ay, mú su̧. »

³²Zezu ba, ɓahri : « Fe su̧na bi na ri, mí i tu wuri ya. »

³³Bale nzuk-dih fal yeri ƴo vbi hani ɓayri ɓahri : « Nzuk a hani gi ke fe su̧na hi̧ ni ké fal wah-ay, ke su̧ le ? »

³⁴Mí Zezu ɓah : « Fe su̧na bi ɓa ríh law nzuk-pih mi, ɓa ɔ́h láɓ pihna ké-e hi̧ mi.

³⁵A woiri i ƴo ɓahri, toŋ few niŋ dara mí few-vbeh naŋ ɓá ka̧h ɓáy. Ɔ́r nun woiri ma síɓa. Í ko waka-awri ɓay fe le, naŋ mah vbehna da.

³⁶Nzuk-vbeh naŋu ɓay ziŋ kpaŋndɔk ye. Ke ƴo mbu̧h fe payu ɓay ɔkna ké na ɓa ŋgɔh ɓay hi̧ nzuk-ruh naŋu ke nzuk-vbeh-u kara ku zay ke hani.

³⁷Ɓay ra laɓ kandɔk kú-u ɓah : Nzuk mbew ruh fe ba, nzuk a ɓoru vbeh fe-u ba.

³⁸A bi mí-i pih wuri si vbéh naŋ ké a woiri i ruh ya. Nzuk a ɓoru ruh fe pay ba, mí a woiri i gi rih ɓil pihna waka-u. »

³⁹Wu̧y ra si puh-aw, mí nzuk samariri ɓa ŋgi̧-u kan law sa tul Zezu ɓay tul ka-kah ɓay ye-aw ra ɓahri, Zezu ten ɓay fe laɓna yeri riw hi̧ ni.

⁴⁰Ku gi ka̧h ta̧w Zezu bale, ku goŋ ni, ké kaɓ ziŋ niri. Kandɔkaw mí Zezu laɓ nam seɗe ké puh-aw.

⁴¹Ke ɓah ɓay hi̧ niri, ku lah, mí nzuk a ɓoruri ɓa ŋgi̧-u kan law tul ye ɓáy.

⁴²Ku ƴo ɓah hi̧ wu̧y ra ɓahri se : « Aŋay nah kan law wah tul ye ɓay tehɓay wo kaŋto ya. Wara le nah kan law wah tul ye ɓayu ké nah lah ɓayu ti̧h ke nzak ye pi, mí nah tu ɓahri, ke ɓa nzuk-ya̧ tusiɓa ke nunmbam ɓa ketina. »

⁴³Bol fal nam seɗe-aw bale, Zezu tɔr si tusiɓa Galile,

⁴⁴ɓayu ké Zezu ra ten tehɓay nzuk puh yeri ɓahri se, gun nzak pihna Ŋgerzah ziŋ hȩkna ké puh ye ya.

⁴⁵Ke ka̧h tusiɓa Galile, mí nzuk puh-uri ké ko feri gbam ké-e laɓ ké Zurusalem sa̧ ké gel ti̧hmbih-i guy buma ra, ku ya̧ ni ke law rihna. A woyri kara ku ƴo gel ti̧hmbih ra pi.

⁴⁶Zezu el si Kana puh ké-e sɔɓ mbih ti̧h yim. Nzuk mbay Eroɗ a hani ƴo Kapernayum. Gun ye a wo̧ro-u na sena.

⁴⁷Ke lah ɓahri, Zezu ur ke tusiɓa Zude gi ka̧h tusiɓa Galile, mí ke si ta̧w ye. Ke goŋ ni, ké ɗer si Kapernayum ɓay gah gun ye. Gun ra na nun hul.

⁴⁸Bale Zezu ɓah ɓay hi̧ ni ɓahri : « A woiri nzukri, i ko fe saŋri ke fe sɔknari ké ur ke nunmbam ya le, i ta kan law tul bi ya. »

⁴⁹Nzuk mbay Eroɗ ra ɓah : « Ŋgernzuk, mú gi rɔkɔ gun bi ɓá hu. »

⁵⁰Mí Zezu ɓah : « Mú tɔr si puh. Mun gun wo gah da. » Nzuk ra ya̧ ɓay ké Zezu ɓah, mí ke tɔr.

⁵¹Ke ƴo tul mahful kɔɓ ɓáy, gun-laɓ pihna yeri gi nzɔh nun ye ɓahri se, mun gun ye gah da.

⁵²Mí ke vbi niri sa̧wseh a suŋ mí gunu ziŋ mun gahna le. Mí ku ɓahri : « Kelew ke sa̧wseh mbew mí mun ye voh. »

⁵³Bah gun ra tu ɓahri se, sa̧wseh-u-aw mí Zezu ɓah hi̧ ni ɓahri : « Mun gun wo gah da. » Kandɔkaw mí a ye ke nzuk kerpuh yeri, ku kan law woyri tul Zezu.

⁵⁴Fe-aw mí ɓa fe saŋ a seɗe-u ké Zezu laɓ ké tusiɓa Galile fal elna ye ke tusiɓa Zude.