Read Karang Mbete Za̧h 5 Bible Online

Mbete Za̧h 5 - Karang bible

Mbete Za̧h 5

¹Bol falu ti̧hmbih ziɓri laɓ ké Zurusalem, mí Zezu hil si ri.

²Ké Zurusalem ra, nzakful a hani-u ƴo ri. Riŋ nzakful ra ku ɗi ɓa Fulsamiri. Mbih na ɓelu. Riŋ mbih-u ke nzak ebere ɓa Beɗzata. Ké nzak mbih-aw ku pɔr ri tem ɓa gel ndiɓi.

³Nzuk senari ɓa ŋgi̧-u na ri. Ra̧wri, kpereri, nzuk a a̧yri ké mun woyri hu yɔh kara na ri pi.

⁴Ku geŋ ɓay hi̧ nam a hani-u, tem nzak pihna Ŋgerzah ɓá gi laŋ mbih ra gbuksu gbuksu. Dale nzuk sena a suŋ suŋ ké ɗer si ɓil mbih ké laŋ ra pol le, sena ye poŋ ni, ké gah kew kew[13].

⁵Nzuk sena a hani mbew na ri. Ke na ɓa sena mbihmbam bon say falu toŋndɔk seɗe.

⁶Zezu ko nzukaw gel nam ye, mí ke tu ɓahri, nzukaw na sena mbihmbam ro-ro bale, ke ɓah : « Mu yih ɓay hi̧ mun wo ɓá gah le ? »

⁷Nzuk sena ra yih nzak ye ɓahri : « Ŋgernzuk, gelke mbih laŋ le, nzuk ké ɓay mbi mi ɓu ɓil mbih-u ta-a. Mi ƴo ɗer ma mari dale, nzuk a ɓoru kal ɗer poŋ mi. »

⁸Mí Zezu ɓah : « Mú ur síɓa. Mú mbi hih nam wo. Mú si sina. »

⁹Sa gelu-aw mí mun nzuk ra gah. Ke mbi hih nam ye, mí ke tɔr. Namu-aw ɓa nam ɔkna.

¹⁰Kaŋ mí ziɓ Zuderi ɓah hi̧ nzuk ké mun ye gah ra ɓahri : « Guri-ay ɓa nam ɔkna. Bolkusol wah hah súk hih wo. »

¹¹Nzuk ra yih nzak woyri ɓahri : « Nzuk ké gah mi ra ɓahri se, mí mbi hih bi, mí si. »

¹²Mí ku vbi ni ɓay ɓahri : « A ge mí ɓah hi̧ mu, mú mbi hih wo, mú si sina-aw le ? »

¹³Nzuk ké ziŋ mun gahna ra tu nzuk ké gah ni ya ɓayu ké Zezu lɔm mun rih haŋsekle daɓa nzukri.

¹⁴Bol falu bale, Zezu ziŋ ni ɓil ila vul kani Ŋgerzah, mí ke ɓah hi̧ nzuk ra ɓahri : « Mú lah, mun wo gah da. Mú poŋ laɓ suya rɔkɔ fe a mbamba-u ɓá laɓ mu ɓáy. »

¹⁵Nzuk ra el si sɔk ŋgernzuk ziɓri ɓahri se, Zezu mí gah ni.

¹⁶Sa̧wu mí ŋgernzuk ziɓri faŋ bol Zezu ƴo laɓ ni koseh ɓay fe le, ke gah nzuk sena ke nam ɔkna.

¹⁷Mí Zezu el ke ɓay hi̧ niri ɓahri : « Bah bi ƴo tul pihna ye ka̧h guri-ay, kaŋ pi mí a bi kara mi ƴo tul pihna-u. »

¹⁸Sa̧wu mí law ŋgernzuk ziɓri nzek ɓay i ni ɓay fe le, ke poŋ bolkusol nam ɔkna woyri kaŋto ya wara le, ke leh tul ye ke Ŋgerzah ɓahri, Ŋgerzah ɓa bah ye.

¹⁹Zezu el ɓah ra ɓáy ɓahri se : « Munu, ɓa ketina Ŋgerzah ɓa bah bi, mí-i ƴo sɔk wuri ɓayay, gun ta laɓ fe ke tul ye ya. Fe ké-e ko bah ye ƴo laɓu, mí ke laɓ, ɓayu ké fe laɓna bah ye mí gun ƴo ndɔlu.

²⁰Ɓayu ké bah gun sa gun ye, mí ke ƴo sɔk gunu feri ké-e ƴo laɓu. Ke ɓay sɔk gun ye fe laɓna a mbamba-uri ɓáy. I káɓ yer.

²¹Kandɔk bah ye ké hi̧ záhri ti̧h ke puh záh, ku ɔ-ɔkna ke pa̧ymun a foyu[14], gun ye ƴo hi̧ nzuk a suŋ suŋ ké-e yih, ku ɔ-ɔkna kaŋ pi,

²²ɓayu ké bah gun kuŋ salɓay hul kan tul nzuk ya. Le ke ndoh ŋgerna-kuŋ salɓay hul kan tul nzukri ké ndɔk gun ye,

²³ɓay hi̧ nzukri gbam ɓá hȩk gunu kandɔk kú-u hȩk bah ye pi. Nzuk a a̧y ké hȩk gun ké bah-u pih ra ya le, hȩk bah ye ya pi.

²⁴Munu, ɓa ketina. Mi ƴo ɓah hi̧ wuri ɓahri se, nzukay ké ƴo lah nzak bi, ké kan law tul nzuk ké pih mi le, nzuku ƴo ke ɔkna ɓa ŋgɔh. Salɓay hul ta tul ye ya. Ke ti̧h ke ndɔk hul gi ziŋ ɔkna da.

²⁵Munu, nzuku ɔ-ɔkna ɓa ketina. Mi ƴo ɓah hi̧ wuri ɓahri se, namu ƴo gina wara le ka̧h da hulri ɓay lah kusol gun Ŋgerzah, ku ɔ́-ɔkna.

²⁶Kandɔk bah gun ké ɓa sa̧w ɔkna, kandɔkaw pi mí ke hi̧ sa̧w ɔkna ra hi̧ gun ye.

²⁷Ke ndoh ŋgerna-kuŋ salɓay hul kan tul nzukri ké ndɔk gun ye ɓay fe le, gunu ɓa gun nzuk pirmatul.

²⁸Í hi̧ law woiri ɓá na wuri yer ya ɓay fe le, nam ƴo gina ké záhri ké puh záh ku láh kusol gun ra, mí ku él ti̧h ke tupal woyri riw.

²⁹Nzuk-laɓ sukiri, ku tí̧h ke puh záh ke pa̧ymun a foyu ke ɔkna. Nzukri ké mbi mun woyri ndoh ɓil suya ba, ku ti̧h-u ke salɓay hul ké tul woyri[15].

³⁰Kandɔkaw mí a bi mi mah ɓay laɓ fe ke tul bi ya. Mi ƴo kuŋ salɓay kandɔk ké mi lah ke nzak baah. Mí salɓay ké mi kuŋ ra ƴo gelu ɓay fe le, mi taw tul bi ya wara le, kerɓay a ye ké-e pih mi gi.

³¹Mi lu ra lakna ɓay bi ke tul bi le, lakna bi ra ɓa kuŋɓay.

³²Nzuk a ɓoru ƴo ri mí ƴo lu lakna ɓay bi. Mí-i tu ɓahri, tehɓay ye ké-e ten ké tul bi ɓa ketina.

³³A woiri i pih nzukri si ta̧w Za̧h, mí ke te-teh ɓay bi hi̧ wuri.

³⁴A bi ba, mi ta ke ɗaka ɓay hi̧ nzuk ɓá lu lakna ɓay bi ya. Le mi ƴo ɓah hi̧ wuri kaŋ ɓay í ti̧h ke ndɔk hul.

³⁵Za̧h ra ɓa lampe ké teh gel, mí law woiri rih wuri ɓay i zay mun woiri ɓil gel tehna ye ke sa̧wseh ndi̧ kaŋto.

³⁶Mí fe-teh ɓay bi a ɓoru ƴo ri. Tehɓayu ŋger kal tehɓay Za̧h ké-e teh tul bi. Pihna ké bah bi hi̧ mi ɓay mí ɔh laɓu ra te-teh ɓay bi sɔk ɓahri se, bah bi mí pih mi gi.

³⁷Baah ké pih mi a ye ra ke te-teh ɓay bi teh. Kusol ye le, i lah bɔk mbew ya. Nun ye kara i ko ya pi.

³⁸Ɓay ye na law woiri ya ɓay fe le, a ye ké-e pih ni gi ra i kan law tul ye ya.

³⁹I ƴo faŋ ɓa ɗih-u ɓil mbete bolkusol Ŋgerzah ɓay fe le, i ɓahri se, i ƴó ke ɔkna ɓa ŋgɔh ɓilu. Mí fe vbehna-uri te-teh ɓay bi.

⁴⁰Mí i sa gi ta̧w bi ɓay ƴo ke ɔkna ra ya.

⁴¹A bi mi ta ke ɗaka ɓay hi̧ nzukri ɓá loŋ riŋ bi ya.

⁴²Mi tu ɓahri, law sana Ŋgerzah ta ta̧w woiri ya.

⁴³Mi gi ke riŋ bah bi, mí i sa ya̧ mi ya. Gelke nzuk a ɓoru mí gi ke tul ye le, i ya̧ nzukaw.

⁴⁴Kandɔk ké i yih ɓay hi̧ nzukri ɓá loŋ riŋ woiri, mí ɓay riŋ ɗina ké Ŋgerzah a mbew yaŋaw kan tul nzukri, i taw ya ra wa, i láɓ ani dara ɓay í kan law tul ye ɓáy le ?

⁴⁵Í lu kerɓay ké ɓil law woiri ɓahri, a bi mí-i sék wuri hi̧ bah bi. Moyiz mí ɓa nzuk-sek wuri, a ye ké i ɓaŋ law kan tul ye.

⁴⁶Moyiz vbeh ɓay tul bi ɓil mbete vbehna bolkusolaw. I lah ra nzak Moyiz dale, i kan law tul ɓay bi da.

⁴⁷I sa lah ɓayri ké na ɓil mbete fe vbehna-u ya ra wa, i láɓ ani dara mí i láh ɓay biri ɓáy le wo ? »