Read Karang Mbete Za̧h 6 Bible Online

Mbete Za̧h 6 - Karang bible

Mbete Za̧h 6

¹Fá-falu Zezu tɔr si kala mahmbih Galile kú-u ɗi ɓa mahmbih Tiberiyaɗ.

²Daɓa nzukri ɓa ŋgi̧-u dih fal ye wuh wuh ɓay fe le, ku ko fe saŋri ké-e laɓ gah nzuk senari.

³Mí Zezu hil ke nzuk-dih fal yeri si kaɓ tul kasaw.

⁴Nam ti̧hmbih ziɓri ké ɓa ti̧hmbih-i guy buma toŋ ɗih mba.

⁵Zezu duh tul mí ko daɓa nzukri ƴo gina ma ta̧w ye bale, ke ɓah : « Filiɓ, ké gel suŋ mí nah ɓay yeh ri fe su̧na ɓay mgba keni daɓa nzukri-ay le ? »

⁶Ke ɓah ɓayaw ƴo leh keni law Filiɓ. Zezu ra tu fe ké-e laɓu da.

⁷Filiɓ yih nzak ye ɓahri : « Nah si ra yeh peŋ mah nun sak sɔɗ seɗe mí wal niri ndi̧ ndi̧ kara ta mah niri ya. »

⁸Nzuk-dih fal ye a ɓoru, Andere yi̧n Simu Piyer ba, ɓah :

⁹« Gun seke-ay ƴo ke peŋ ndiɓi ke nzuy seɗe mí na-ay wa, ɓay mah gel ɗaka daɓa nzukri-ay gaŋ le ? »

¹⁰Bale Zezu ɓahri : « Í hi̧ nzukri ɓá kaɓ siɓa. » Ké gelaw suy loŋ ri mbula su kaɓna. Ŋgi̧na wo̧rori laɓ sɔɗ sɔɗ boh gel ndiɓi (5.000) mí kaɓ ri.

¹¹Dale Zezu mbi peŋ ra, ke el ke tumbɔl hi̧ Ŋgerzah, mí ke wal hi̧ nzukri su̧. Ke el laɓ kaŋ ke nzuy ké seɗe-aw pi. A ge ge le su̧ fe mah ɓil ye ɓil ye.

¹²Ɓil nzukri mbah, ku poŋ tɔru, mí ke ɓah hi̧ nzuk-dih fal yeri : « Í mbu̧h wuri tɔr fe su̧na ra. Ndi̧ kara ɓá zi ya. »

¹³Mí peŋ ndiɓi ké nzukri su̧ ra ku mbu̧h tɔru mbah tɔlɔ ɓa boh falu seɗe.

¹⁴Nzukri ko fe saŋ ké Zezu laɓ kaŋ bale, ku ƴo ɓahri : « Nzukay ɓa gun nzak pihna Ŋgerzah eŋ Moyiz gaŋ wa[16] ? »

¹⁵Zezu tu ɓahri, nzukuri-aw ɓay gi mgba ni ɓa mbay ke ŋgere, mí ke el tɔr sɔɗ si kaɓ tul kasaw ke hȩk ye.

¹⁶Seh na nzȩh bale, nzuk-dih fal Zezuri tɔr si nzak mahmbih.

¹⁷Ku hil kumbon mí mbi sina ma kala mahmbih ma Kapernayum. Seh riŋ mo̧r. Zezu ka̧h ta̧w woyri ya ɓáy.

¹⁸Ku ƴo hehre kumbon, mí baw kuna gi ku bivbiɗ bivbiɗ hi̧ mahmbih laŋ baŋlaŋ baŋlaŋ.

¹⁹Ku hehre kumbon mah salful ndiɓi mini tɔtɔklɔ ma haŋsekle mahmbih bale, ku ko Zezu si sina tul mbih. Ke ka̧h ké ta̧w woyri, mí hȩkme laɓ niri.

²⁰Zezu ba, ɓah ɓay hi̧ niri ɓahri : « A bi munu. Í laɓ hȩkme ya. »

²¹Kandɔkaw mí ku hi̧ ni hil kaɓ ɓil kumbon. Kaɓna ye ba, ɓa kumbon ké ka̧h ɓel sew fál sa̧ ba.

²²Tipele-u nzukri ké toŋ kala mahmbih fál gini ko kumbon a mbew yaŋ mí dah. Ku ko nzuk-dih fal yeri tɔr keni ke hȩk woyri. Zezu ba, kaɓ ɓilu ziŋ nzuk-dih fal yeri ya.

²³Kumbon a ɓoruri ba, ur ke Tiberiyaɗ gi dah ɗih ya ke gel ké nzukri su̧ peŋ fal ké Zezu el ke tumbɔl hi̧ Gaŋ tul feri riw ra.

²⁴Mí nzukuri ko Zezu ke nzuk-dih fal yeri ta ri ya ra bale, ku rih ɓil kumbonri-aw, mí ku tɔr keni ma Kapernayum si ƴah niri.

²⁵Ku ziŋ Zezu ké kala mahmbih a ɓoru, mí ku vbi ni ɓahri : « Rabbi, seh suŋ mí mu ka̧h gelay le ? »

²⁶Zezu yih nzak woyri, ke ɓahri : « Munu, ɓa ketina. Mí-i ƴo ɓah ɓayay hi̧ wuri, i ƴah mi ɓay tu sa̧w fe saŋri ké mi laɓ ra ya. Wara le i ƴah mi ɓay fe le, i su̧ fe mbah ɓil woiri tuɓ tuɓ.

²⁷Í laɓ wuri pihna fe su̧na a ké zi-zi ra ya. Í laɓ pihna fe su̧na ké mah kaɓ ke ɔkna sew ke sew ɓa ŋgɔh. Fe su̧na-u gun nzuk pirmatul ɓay hi̧ wuri. Ɓayu ké baah Ŋgerzah mí ŋga̧h ɓayu kaŋ. »

²⁸Ku vbi ni ɓahri : « Nah láɓ ani dara ɓay náh laɓ pihna Ŋgerzah ra le ? »

²⁹Zezu yih nzak woyri ɓahri : « Pihna Ŋgerzah ɓa kán law tul nzukay ké Ŋgerzah pih ni gi. »

³⁰Mí ku vbi ni ɓahri : « Fe saŋ fe mí mu láɓ hi̧ na, náh tu mu keni, mí náh kan law tul wo le ? A fe mí mu laɓu le ?

³¹Ziihri lak man ké ɓil lawkɔr kandɔk kú-u vbeh ɓayu ɓil mbete bolkusol Ŋgerzah lewsa̧ ɓahri, huru ké ur ke nunmbam mí ke hi̧ niri[17], ku lak. »

³²Zezu ba, ɓah ɓay hi̧ niri ɓahri : « Munu, ku lak man ɓil lawkɔr ɓa ketina. Mí-i ƴo ɓah ɓayay hi̧ wuri, ta ɓa Moyiz mí hi̧ wuri huru ké ur ke nunmbam ra ya. Le bah bi mí ƴo hi̧ wuri huru ké ur ke nunmbam ké ɓa huru a ketina-ay.

³³Huru ké Ŋgerzah pih keni-ay ra ɓa a a̧y ké ɗer ke nunmbam gi mí ƴo hi̧ ɔkna hi̧ nunmbam ke tusiɓa. »

³⁴Mí ku ɓahri : « Ŋgernzuk, mú hi̧ na huru ra kpatara. »

³⁵Zezu ɓah hi̧ niri ɓahri : « A bi mí-i ɓa huru-hi̧ ɔkna ra. Nzuk ké gi ta̧w bi le, ɗaka ta i ni mba. Nzuku kan law tul bi le, kɔkmbih kara ta i ni mba pi.

³⁶Mí-i ɓahri se, i ko ke nun woiri ko, mí i kan law tul bi ya dih.

³⁷Feri gbam ké ƴo ri-ay, baah ndoh ndɔk bi. Nzuk gi ta̧w bi le, mi ta ni̧h ni ya

³⁸ɓay fe le, mi ur ke nunmbam gi ɓay laɓ fe ké law bi yih ya, wara le ɓay laɓ fe ké law nzuk-pih mi yih.

³⁹Fe ké law nzuk-pih mi yih mí na-ay : nunmbam ke tusiɓa ke feri riw ké-e ndoh ndɔk bi ra ta zi mbew ya. Le nam a ɔh tɔru le, mi hí̧ nzukuri ɓay el kaɓ ke pa̧ymun a foyu.

⁴⁰Kandɔkaw mí ɓa fe ké law baah yih. Nzukri riw ké ko gunu, mí ku kan law tul ye le, ku ƴo ke ɔkna ɓa ŋgɔh. Nam a ɔh tɔru ra mi hí̧ niri ku él kaɓ ke pa̧ymun a foyu kaŋ pi. »

⁴¹Dale ziɓri ŋgu̧hru ɓay ké tul Zezu ɓay fe le, ke ɓahri, a ye ke ɓa huru ké ur ke nunmbam gi.

⁴²Ku ƴo ɓahri : « A ye-ay ra ke ɓa gun Zezeɓ ya le ? Mah ye ke bah ye ra, nah tu niri tu, ya lo ? Ani dara mí ke ɓahri se, ke ur ke nunmbam le ? »

⁴³Zezu yih nzak woyri, ke ɓahri : « Í poŋ wuri su̧hɓay.

⁴⁴Nzuk mbew ta gi ta̧w bi ke tul ye ya. Le baah ké pih mi, mí kɔklɔ nzuku gi ta̧w bi-aw. A bi ba, mi hí̧ ni ke él kaɓ ke pa̧ymun a foyu ke nam a ɔh tɔru-aw pi.

⁴⁵Mbete vbehna gun nzak pihna Ŋgerzah a lewsa̧ri ɓahri, Ŋgerzah ɓay firma niri riw[18]. Nzukri gbam ké ƴo lah nzak bah bi, mí ku tih keni le, ku gi ta̧w bi.

⁴⁶Baah ra nzuk a hani ké ko ni ta-a, sa ɓa nzuk a a̧y ké ur ké ta̧w Ŋgerzah. A ye mí ke ko baah.

⁴⁷Gelu munu, ɓa ketina. Mi ƴo ɓah ɓayay hi̧ wuri, nzuk ké kan law tul ye le, nzuku ƴo ke ɔkna ɓa ŋgɔh.

⁴⁸A bi mí-i ɓa huru-hi̧ ɔkna ra.

⁴⁹Lewsa̧ ziihri ƴo lak huru man ké ɓil lawkɔr, mí ku toŋ hu mgbum.

⁵⁰Huru a a̧y ba, ur ke nunmbam mí gi ɓay hi̧ nzukri ɓá lak dale, hul ta ɗi riŋ nzukuri ya.

⁵¹A bi mí-i ɓa huru a sa̧w ɔkna ké ur ke nunmbam gi. Nzuk lak huru-ay le, ɓay ɔ-ɔkna ɓa ŋgɔh. Huru ké mi ɓay hi̧-u-aw ɓa mun bi ɓay tul ɔkna nunmbam ke tusiɓa. »

⁵²Mí ziɓri ur ke ɓala, ku ɓah ké sakra hani ɓahri : « Ke ŋgerna fe mí nzukay ɓay hi̧ na haymun ye náh su̧ le ? »

⁵³Dale Zezu sɔk niri ɓahri : « Munu, ɓa ketina. Mi ƴo ɓah ɓayay hi̧ wuri, i su̧ haymun gun nzuk pirmatul ya, i nzo sem ye ya le, ɔkna-u ta ta̧w woiri ya.

⁵⁴Nzukay ké ƴo su̧ haymun bi, ké ƴo nzo sem bi le, nzuku ƴo ke ɔkna ɓa ŋgɔh. A bi ba, mi hí̧ ni ke él kaɓ ke pa̧ymun a foyu ke nam a ɔh tɔru,

⁵⁵ɓayu ké haymun bi mí ɓa fe su̧na a kpakpaŋu, sem mun bi kara ɓa mbih nzona a kpakpaŋu pi.

⁵⁶Nzukay ké ƴo su̧ haymun bi, ké ƴo nzo sem bi ra, nzuku kaɓ ziŋ mi, a bi kara mi kaɓ ziŋ ni pi.

⁵⁷Kandɔk baah, a ye Ŋgɔhnzuk ké pih mi, mí-i ɔ-ɔkna ɓay tul ye, mí nzuk ké ƴo su̧ haymun bi ra, ɓay ɔ-ɔkna ɓay tul bi kaŋ pi.

⁵⁸Kandɔkaw mí huru a a̧y ké ur ke nunmbam mí gi. Huru ra ta na kandɔk huru ké ziihri lak lewsa̧ kú-u toŋ hu mgbum ra ya. Nzuk ké ƴo lak huru-ay, ɓay ƴo ke ɔkna sew ke sew ɓa ŋgɔh. »

⁵⁹Zezu ɓah ɓayaw ké ɓil vul misoŋ woyri ƴo firma nzukri ɓay Ŋgerzah ké Kapernayum.

⁶⁰Nzuk-dih fal Zezuri ɓa ŋgi̧-u lah ɓay ɓahna ye kaŋ bale, ku ɓahri : « Ɓayaw kpuh mbamba. Suk ge mí mah lah-u le ? »

⁶¹Zezu tu ɓay kú-u ƴo ŋgu̧hru-u, mí ke ɓahri : « Ɓayaw ra zi̧rma law woiri ké tul bi le ?

⁶²Nam ké i kó gun nzuk pirmatul el si kaɓ ma sa̧w gel ye le, i láɓ ani ɓáy le ?

⁶³Tempuki mí ƴo hi̧ nzuk ɔ-ɔkna. Mun nzuk pirmatul a som siɓa ba, ti̧h nzuku suk ya. Ɓayri ké mi ɓah hi̧ wuri ɓa ɓay Tempuki, mí ɓa ɔkna pi.

⁶⁴Keni-aw kara nzuk a haniri ké haŋsekle woiri-ay kan law woyri tul ɓay bi ya. » Zezu ɓah kaŋ ɓayu ké-e tu nzuk a a̧yri ké to suyɓay ye ma fal tu. Ke tu nzuk ké ɓay te ni pi.

⁶⁵Mí Zezu el ɓah : « Sa̧wu mí-i ɓah hi̧ wuri ɓahri se, nzuk mbew ta gi ta̧w bi ke tul ye ya. Le baah ɓá hi̧ nzuku ŋgerna gi ta̧w bi dara ɓáy. »

⁶⁶Kandɔkaw mí ŋgi̧na nzuk-dih fal yeri el ke mun woyri ma fal poŋ ni. Ku mgba bɔh sina ziŋ ni mba.

⁶⁷Zezu ra el ɓah hi̧ nzuk-dih fal yeri a boh falu seɗe ra ɓahri : « A woiri kara i yih ɓay poŋ mi pi le ? »

⁶⁸Mí Simu Piyer yih nzak ye, ke ɓahri : « Ŋgernzuk, nah ɓay si ma fál suŋ le ? Mu ƴo ke ɓayri ké hi̧ ɔkna ɓa ŋgɔh.

⁶⁹Nah kan law wah sa tul wo. Nah tu mu ɓa nzuk lawpuki ké Ŋgerzah mbi mu ɓa nzuku a ye. »

⁷⁰Zezu ba, el yih nzak ye ɓahri : « A bi mí-i lu wuri ɓa boh falu seɗe-aw, kaŋ ya le ? Mí nzuk mbew ké sakra woiri ɓa nzukbaa ke mbay záh tukala. »

⁷¹Zezu ƴo ɓah ɓay tul Zudas gun Simu ké Isikariyoɗ. Ke ƴo sakra nzuk-dih fal yeri a boh falu seɗe-aw pi. A ye mí ke ɓay te Zezu.