Read Karang Mbete Za̧h 7 Bible Online

Mbete Za̧h 7 - Karang bible

Mbete Za̧h 7

¹Bol falu Zezu ha̧rma ké tusiɓa Galile ɓayu ké-e sa ha̧rma tusiɓa Zude ya ɓay fe le, ŋgernzuk ziɓri ké Zude ƴah ful ɓay i ni.

²Nam ti̧hmbih-pɔr vulri[19] toŋ ɗih mba dale,

³yi̧n Zezuri ɓah hi̧ ni ɓahri : « Mú tɔr si Zude ɓay hi̧ nzuk-dih fal wori kara ɓá ko fe laɓna wori ké ri pi.

⁴Nzuk ké taw ɓay hi̧ riŋ ye ɓá mgbe le, laɓ fe ké duh gel ya. Kandɔk ké mu ƴo laɓ fe wori, mú si sɔk mun wo ma gel daɓa hi̧ nzukri riw ɓá ko. »

⁵Yi̧n yeri ɓah kaŋ ɓayu ké ku kan law tul ye ya.

⁶Zezu ba, ɓah : « Nam bi ka̧h ya ɓáy. A woiri ba, namri riway ɓa nam woiri.

⁷Nzuk tukalari ta fu̧y wuri ya. A bi le ku fu̧y mi fu̧y ɓay fe le, mi ten tehɓay fe laɓna a pipiri-u woyri.

⁸Í tɔr wuri hil si gel ti̧hmbih-pɔr vulri ra. A bi ba, mi si gel ti̧hmbih-aw ya ɓay fe le, nam bi ka̧h ya ɓáy. »

⁹Ké-e ɓah kaŋaw bale, ke kaɓ sa Galile.

¹⁰Yi̧n Zezuri tɔr, ku hil si gel ti̧hmbih-pɔr vulri ra bale, Zezu ur hil si fá-fal woyri, mí ke sɔk mun ye ya.

¹¹Ziɓ Zuderi ba, ƴo ƴah ni ké gel ti̧hmbih-aw ra ɓahri se, ke ƴo suŋ le ?

¹²Ɓay riŋ ye, ŋgi̧na nzukri fah ɓayu yi̧m yi̧m. Nzuk a haniri ɓahri, ke ɓa nzuk a suki. Nzuk a ɓoruri ba, ɓahri se, ke ɓa nzuk a suya-u. Ke ƴo rah nzukri ɓay vbol ful[20].

¹³Kusol ziɓ mbew ɓah ɓay Zezu ɓa teh-u ya ɓay hȩkme ŋgernzuk woyri se niri.

¹⁴Namri ké dimasi ti̧hmbih-pɔr vul ra kal ka̧h nam a haŋsekle-u bale, Zezu rih ɓil ila vul kani Ŋgerzah ƴo sɔk ziɓri ɓay Ŋgerzah.

¹⁵Sɔkɓay Ŋgerzah ye na niri yer. Ku ɓahri : « A ye-ay, ke firma fe ké ta̧w nzuk goso mbete Ŋgerzahri ya wa, fál suŋ mí ke tih ke fe vbehna bolkusol Ŋgerzah-uri le ? »

¹⁶Mí Zezu yih nzak woyri, ke ɓahri se : « Bolkusol ké mi ƴo ɓah hi̧ wuri-ay ta ɓa bolkusol bi ya, ɓa bolkusol nzuk-pih mi.

¹⁷Nzuk yih laɓ fe ké Ŋgerzah yih le, ke tú sa̧wɓay fe sɔkna biri. Ɓayuri ur ké ta̧w Ŋgerzah mini mi ɓah ke tul bi le ?

¹⁸Nzuk ɓah ɓay ke tul ye le, taw riŋ ɗina tul ye. Nzuk taw riŋ ɗina tul nzuk ké pih ni ye le, nzuku ɓah ketina, ke ƴo mbew ke nzuk-pih ni.

¹⁹Moyiz mí vbeh mbete bolkusol Ŋgerzah hi̧ wuri wa, ani mí nzuk mbew ké sakra woiri ƴo tul bolkusolu ya le ? Ɓay fe mí i ƴah ful ɓay i mi le ? »

²⁰Bale daɓa nzukri fer ɓay ɓahri : « Eh mí ɗuk mu. A ge mí ƴah ful ɓay i mu le ? »

²¹Mí Zezu yih nzak woyri ɓahri se : « Mi laɓ fe a hani mbew ke nam ɔkna mí na wuri yer.

²²Mí ɓay bolkusol-kuŋ ndi̧w ké Moyiz hi̧ ɓay í laɓ, mí i ƴo kuŋ ndi̧w gunri ke nam ɔkna. (Sa̧w bolkusol-kuŋ ndi̧w ur ké ta̧w Moyiz ya, sa̧wu ti ke tul zih ziɓri dara mí fe vbehna Moyiz ti̧h ɓáy.)

²³I ƴo kuŋ ndi̧w gunri ke nam ɔkna ɓay laɓ bolkusol Moyiz wa, ani mí law woiri si̧h ké tul bi ɓay fe le, mi gah mun nzuk sena kew kew ke nam ɔkna le ?

²⁴Í mbi kerɓay woiri kuŋ salɓay kan tul nzuk ya. Í kuŋ salɓay ké si ke bolkusol Ŋgerzah ma. »

²⁵Ziɓ Zurusalem a hani-uri ƴo ɓahri : « Nzukay da ɓa a ye-ay ku ƴah ful ɓay i ni mi na-ay wa, ani le ?

²⁶Í ko, ke ƴo ɓah ɓay ɓa teh-u hi̧ nzukri, mí nzuk-el ke ɓay hi̧ ni mbew ta-a. Ko ya le, ŋgernzukri tu ni, ke ɓa Ŋgermbay a ketina gaŋ wa, ani le ?

²⁷Seh gina Ŋgermbay le, nzuk ɓay tu sa̧w ye ya. A ye-ay ba, nah tu sa̧w ye tu. »

²⁸Zezu ba, ƴo sɔk niri ɓay Ŋgerzah ké ɓil ila vul kani Ŋgerzah, mí ke ɓah hi̧ niri ɓa mgbe-u ɓahri : « I tu mi, i tu sa̧w bi pi. Mi gi ke tul mun bi ya. Le nzuk ké pih mi gi ra ɓa nzuk a ketina, mí i tu ni ya.

²⁹A bi ba, mi tu ni tu ɓay fe le, mi ti̧h ké ta̧w ye a ye ké-e pih mi gi. »

³⁰Kandɔkaw mí ku ƴah ful ɓay mgba ni, mí ndɔk nzuk mbew za ni ya dih ɓay fe le, nam ye ka̧h ya ɓáy.

³¹Nzuk a haniri ɓa ŋgi̧-u ƴo kan law tul ye ɓahri : « Seh gina Ŋgermbay le ke láɓ fe saŋri ké ŋger kal tul fe saŋri ké nzukay laɓ ra ɓáy lo ? »

³²Fariziri lah ɓay ké daɓa nzukri ƴo ɓah yi̧m yi̧m si tul Zezu kaŋ, mí ŋgernzuk fe puhna Ŋgerzah ke fariziri pih sozeri ké kɔr gel vul kani Ŋgerzah ɓá si mgba ni.

³³Zezu ba, ɓahri : « Mi ƴó ziŋ wuri, zah dara mi él si ta̧w nzuk-pih mi ɓáy.

³⁴I ƴáh mi, mí i ta ziŋ mi mba. I mah si gel ké mi sí ri ra ya pi. »

³⁵Mí ŋgernzuk ziɓri ɓah ké sakra woyri ɓahri : « Ke tɔ́r ma suŋ mí nah ɓay ta ziŋ ni ya le ? Ke tɔ́r ma tusiɓa sa̧wnzuk a ɓoruri ɓay sɔk ɓay Ŋgerzah hi̧ ziɓri ké ƴo kala fál sa̧-aw le ?

³⁶Ɓay ké-e ɓahri se, nah ƴáh ni, mí nah ɓay ziŋ ni ya. Nah mah si gel ké-e sí ri ya ra wa, ɓayu yih ɓah ani munu le ? »

³⁷Nam a ɔh tɔru ɓil dimasi ti̧hmbih-pɔr vulri ra ɓa nam a luki. Nzuk fe puhnari ƴo aŋ mbih ké sɔk ɓay ɔkna ku̧ hoh fe ɓel gel fe puhna bale[21], Zezu ur ƴo síɓa ké haŋsekle daɓa nzukri, mí ke ɓah ɓay ɓeleŋ ɓahri : « Kɔkmbih i nzuk a suŋ suŋ le, nzuku ɓá gi ta̧w bi, ké nzo.

³⁸Nzuk kan law sa tul bi le, law nzuku ɓay ti̧h ɓa mbihlaw mí mbih ɔkna ɓay lu ké ri ɓuɗ ɓuɗ. »

³⁹Ɓayaw ké Zezu ɓah ra ɓah ɓay tul Tempuki ké nzuk-kan law tul ye ɓay ya̧-u. Tempuki ra gi ya ɓáy ɓay fe le, riŋ ɗina Zezu mgbe ya ɓáy.

⁴⁰Daɓa nzukri lah ɓay ké Zezu ɓah kaŋ bale, nzuk a haniri ƴo ɓahri : « Nzukay ɓa gun nzak pihna Ŋgerzah ké soh gel Moyiz ra ɓa ketina[22]. »

⁴¹Nzuk a ɓoruri ɓah : « Ke ɓa Ŋgermbay. » Nzuk a haniri ba, ɓahri : « Ŋgermbay ɓay ur ke tusiɓa Galile lo ?

⁴²Mbete Ŋgerzah sɔk ɓahri se, sa̧w mi̧hri Ŋgermbay ɓa Daviɗ mbay a luki, mí sa̧w puh ye ɓa Beɗlehem sa̧w puh kaɓna Daviɗ mbay a luki wa, ani le ? »

⁴³Kaŋ mí ziɓri kehr hani ɓay tul Zezu.

⁴⁴Nzuk a haniri yih ɓay mgba ni, mí ndɔk nzuk mbew za ni ya dih.

⁴⁵Soze-kɔr vul kaniri ra el si ta̧w ŋgernzuk fe puhna Ŋgerzah ke fariziri, mí ku vbi sozeri ɓahri : « Ɓay fe mí i mgba ni gi keni ya le ? »

⁴⁶Soze-kɔr vul kaniri ra yih nzak woyri ɓahri : « Nzuk ké ɓah ɓay mah ke nzukaw mbew ta-a. »

⁴⁷Fariziri ba, yih nzak woyri ɓahri : « A woiri kara i vbol mahful da pi le ?

⁴⁸Í sɔk na ŋgernzuk mini farizi a suŋ mí kan law tul ye lo ?

⁴⁹Daɓa nzuk a garuri-aw, ku tu mbete bolkusol Ŋgerzah ya, mí nazi-u ta tul woyri. »

⁵⁰Dale Nikodem a ye ké-e si ta̧w Zezu ke suŋ ra ke ƴo sakra ŋgernzuk ziɓri,

⁵¹mí ke ɓah : « Bolkusol Ŋgerzah sɔk ɓahri, náh lah ɓay nzuk, náh fakla ɓay fe laɓna ye dara mí náh kuŋ salɓay kan tul nzuku ɓáy wa, ani le ? »

⁵²Mí ku fer nzak ye kandɔkay : « A wo kara mu ɓa nzuk Galile pi lo ? Mú hekre ɓil mbete Ŋgerzah ɓa ɗih-u mú ko, gun nzak pihna Ŋgerzahri ur ke Galile ya. »

⁵³Nzukri gbakra hani. A ge ge le tɔr si puh ye puh ye.