Read Karang Mbete Za̧h 8 Bible Online

Mbete Za̧h 8 - Karang bible

Mbete Za̧h 8

²Tipele za̧y bale, ke el si ɓil ila vul kani Ŋgerzah ra. Gun Izarayelri gbam gi mbu̧h hani ké ta̧w ye. Mí ke kaɓ siɓa ƴo sɔk niri ɓay Ŋgerzah.

³Nzuk-sɔk mbete bolkusol Ŋgerzahri ke fariziri ba, ku kɔklɔ wu̧y a hani-u gi keni ké pol Zezu. Wu̧y ra nzukri ziŋ ni ké gel-mbi wo̧ro. Ku ɓaŋ ni ƴo haŋsekle gel daɓa nzukri,

⁴mí ku ɓah hi̧ Zezu ɓahri : « Metere, wu̧yay ku ziŋ ni ké gel-mbi wo̧ro.

⁵Fe vbehna bolkusol Ŋgerzah ké Moyiz vbeh sɔk ɓahri, sam wu̧y a kandɔkayri ra náh vbuk niri ke kasaw i niri i. A wo ba, mu ɓah ani le ? »

⁶Ku ɓah kaŋ ƴo ndoh law ye ke ɓay. Ku ziŋ ɓay a hani ɓoɗ le, ku láɓ ɓay hul kan tul ye. Mí Zezu ɗiŋ ƴo vbeh ɓayri ké tusiɓa ke gun ndɔk ye.

⁷Nzuk-sɔk mbete bolkusol Ŋgerzahri ke fariziri ƴo ke ɓayu woso woso ziŋ ni bale, ke ɔr tul ma síɓa, mí ke ɓahri : « Ké haŋsekle woiri-ay nzuk ké suya mgba tul ye ya le, ké vbu kasaw a titilu ké tul wu̧yay. »

⁸Mí ke el ɗiŋ tul ye ƴo vbeh ɓayri ké tusiɓa ra ɓáy.

⁹Ku lah ɓay Zezu kaŋ, mí ku lɔm mun woyri tɔr hɔy hɔy. Ŋgereri mí tɔr pol dara nzuk a ɓoruri toŋ niri ɓáy. Ku poŋ Zezu ke wu̧y ra mí ƴo pol ye.

¹⁰Zezu ɔr tul ye ma síɓa, mí ke ɓahri : « Wu̧y, ku ƴo fál suŋ le ? Nzuk mbew laɓ ɓay hul ɓu tul wo ya le ? »

¹¹Wu̧yu yih nzak ye ɓahri : « Ŋgernzuk, nzuk mbew ta-a. » Kandɔkaw mí Zezu ɓahri : « A bi le, mi láɓ ɓay hul ɓu tul wo ya. Mú si. Mú laɓ suya mba[23]. »

¹²Dale Zezu el ɓah hi̧ gun Izarayelri ra ɓahri : « A bi mí-i ɓa gel tehna tusiɓa ke nunmbam. Nzuk ké dih fal bi le, ta si sina ɓil tirima ya. Le gel tehna ra ɓa sa̧w ɔkna mí ƴo ziŋ nzuku. »

¹³Fariziri ba, ɓahri : « Mu lu lakna ɓay wo ke mun wo le, ketina ta ri ya. »

¹⁴Mí Zezu yih nzak woyri, ke ɓahri : « Mi lu lakna ɓay bi ke mun bi kara lakna ɓayaw ɓa ketina ɓay fe le, mi tu gel ké mi ur keni, mi tu gel ké mi él si ma mari pi.

¹⁵A woiri ba, i tu gel urna bi ya, i tu gel sina bi ya pi. I kuŋ salɓay ke kerɓay nzukri. A bi mi kuŋ salɓay kan tul nzuk ya.

¹⁶Mi kuŋ salɓay le, ɓa salɓay a ketina ɓay fe le, mi kuŋ salɓay ke tul bi ya. Wara le baah ké pih mi gi ra ƴo ziŋ mi.

¹⁷Fe vbehna ɓil mbete bolkusol Ŋgerzah vbeh lewsa̧ ɓahri, gelke nzukri seɗe te-teh ɓay mah hani le, ɓayu ɓa ketina[24].

¹⁸A bi mi lu lakna ɓay bi, baah ké pih mi ra kara te-teh ɓay bi pi. »

¹⁹Bale ku ɓahri : « Bah wo ƴo suŋ le ? » Zezu yih nzak woyri ɓahri : « I tu mi ya. Bah bi kara i tu ni ya pi. I tu ra mi le, i tu bah bi pi. »

²⁰Ɓayawri ké Zezu ƴo sɔk ké ɓil ila vul kani Ŋgerzah, ke ƴo sɔk ɓay Ŋgerzah ké gel-fa̧h fe hi̧na in. Nzuk mbew kara mgba ndɔk ye geɓ ya ɓay fe le, nam ye ka̧h ya ɓáy.

²¹Zezu el ɓah hi̧ niri ra ɓáy ɓahri se : « A bi le mi ɓay tɔru dale, i ɓay ƴah mi bale, salɓay hul ɓay ta tul woiri ɓa hul. Gel a a̧w ké mi él si ri ra i mah si ri ya. »

²²Mí ziɓri ƴo ɓahri : « Ke tásol lo ? A ké-e ɓahri se, gel ké-e él si ri ra nah mah si ri ya-aw ba. »

²³Mí Zezu el sɔk niri ɓahri : « A woiri ra i ɓa nzuk a sa̧w tusiɓa. A bi ba, mi ɓa nzuk a sa̧w nunmbam. A woiri sa̧w woiri ur ke feri ké Ŋgerzah laɓ. A bi le, sa̧w bi ur ke fe laɓnari ya.

²⁴Kaŋaw mí-i ɓahri se, salɓay hul woiri ɓay ta tul woiri ɓa hul. Ɓayu ké law woiri ké te tul bi ɓahri, a bi mi ƴo ri ya ra le, salɓay hul woiri ɓay ta tul woiri ɓa hul gaŋ. »

²⁵Mí ku ɓah : « A wo mu ɓa ge le ? » Mí Zezu ɓahri : « Sa̧wɓay fe mí-i ɓah hi̧ wuri ke titilu sa̧ ra le ?

²⁶Mi ƴo ke ɓayri ɓa ŋgi̧-u ké tul woiri ɓay ɓah-u pi, ɓay kuŋ salɓay keni pi. Nzuk ké pih mi ra ɓah ketina. Ɓayri ké ti̧h ke nzak ye mí-i ƴo ɓah ɓayuri ké nunmbam ke tusiɓa ke gelu gelu. »

²⁷Zezu ɓah ɓay si tul baah, mí ku tu ya.

²⁸Zezu el ɓah ra ɓáy ɓahri se : « Nam ké i ɓay ɔr gun nzuk pirmatul ma síɓa dale, i tú mi ɓahri, a bi mi ƴo ri. I tú ɓahri, feri ké mi laɓ mi laɓ ke tul bi ya. Wara le ɓa baah mí ndoh ɓayuri ké nzak bi.

²⁹Nzuk-pih mi ra ƴo ziŋ mi. Ke poŋ mi ke hȩk bi ya ɓay fe le, mi ƴo laɓ suki ké rih law ye kpatara. »

³⁰Zezu ƴo ɓah ɓay kaŋ, mí nzukri ɓa ŋgi̧-u kan law sa tul ye.

³¹Zezu ɓah hi̧ ziɓri ké kan law woyri sa tul ye ra ɓahri : « I ƴo tul ɓay bi le, i ɓa nzuk-dih fal biri gaŋ ɓa ketina.

³²I ɓay tu ketina dale, ketina-aw ɓay sel wuri ke ɓil mgbal. »

³³A woyri ba, ku ɓahri : « Sa̧w mi̧hri wah ɓa ziih Abaraham. Nah ɓa mgbal nzuk ya. Ani dara mú-u ɓahri, nah tí̧h ke ɓil mgbal le ? »

³⁴Zezu yih nzak woyri ɓahri : « Ɓa ketina, i ɓa mgbal gaŋ. Mi ƴo ɓah hi̧ wuri ɓahri se, nzukri gbam ké ƴo laɓ suya le, ɓa mgbal suya munu.

³⁵Mgbal ta kaɓ kerpuh nzuk kpatara ya. Gun puh-u mí ɓay ƴo ri kpatara.

³⁶Kaŋaw ba, gun puh-u sel wuri ke ɓil mgbal le, i ɓa gun puh-u gaŋ.

³⁷Mi tu-tu, sa̧w mi̧hri woiri ɓa Abaraham. Keni-aw kara i ƴah ful ɓay i mi ɓay fe le, ɓay bi kaɓ ziŋ wuri ya.

³⁸Nzak bi ɓah ɓayri ké bah bi sɔk mi. A woiri kara ɓay ké i lah ké ta̧w bah woiri mí i ƴo laɓu. »

³⁹Bale ku fer nzak ye ɓahri : « Bah wah ɓa Abaraham. » Zezu ba, el ɓah : « I ɓa ra gun Abaraham le, i láɓ fe laɓna Abaraham.

⁴⁰A woiri mí i ƴah ful ɓay i mi. Abaraham ba, laɓ fe a kaŋaw ya. A bi gun nzuk pirmatul mi ɓah ketina ké mi lah ké ta̧w Ŋgerzah mí law woiri si̧h tul bi.

⁴¹Fe laɓna bah woiri mí i ƴo laɓu-aw. » Ku ɓah hi̧ ni ɓahri : « A wah, nah ɓa gun ndi̧w mbana ya. Bah wah mbew yaŋ mí ɓa Ŋgerzah. »

⁴²Mí Zezu ɓahri : « Ŋgerzah ɓa ra bah woiri le, i ɓay sa mi ɓayu ké sa̧w bi ur ké ta̧w ye ké mi ƴo ri-ay. Mi gi ke tul bi ya. Wara le a ye mí ke pih mi gi.

⁴³Ɓay fe wara mí i sa lah ɓay bi ya le ? I lah ya ɓay fe le, ŋgerna-lah ɓay bi ra ta-a.

⁴⁴Bah woiri ɓa mbay záh tukala, mí law woiri yih mbi pihna law sena ye ɓay laɓu. A ye-aw ke ɓa nzuk-i hulri ke titilu da̧y. Ke ta tul ketina ya ɓay fe le ketina ta ta̧w ye ya. Ɓay ké nzak ye ɓah gbam ɓa kuŋɓay. Ke ɓah ɓay ke tul ye ɓay fe le, ke ɓa nzuk nzak rɔkna, ke ɓa bah nzak rɔknari.

⁴⁵A bi ba, i sa kan law woiri tul bi ya ɓay fe le, mi ɓah ketina.

⁴⁶A ge woiri mí ƴo ke ɓay a suya-u ɓay tuŋ mi keni le wo ? Mi ɓah ɓay a ketina ba, ani mí i kan law woiri tul ɓay bi ya le ?

⁴⁷Nzuk ké sa̧w ye ur ké ta̧w Ŋgerzah le, ƴo lah nzak Ŋgerzah. Sa̧wu mí a woiri i lah nzak Ŋgerzah ya ɓay fe le, sa̧w woiri ta ɓa Ŋgerzah ya. »

⁴⁸Bale ziɓri fer ɓay ɓahri : « Nah ɓahri se, mu ɓa gun mbay záh tukala[25], záh kara ƴo tul wo ri. A̧w ba, nah ɓah gelu, kaŋ ya le ? »

⁴⁹Zezu yih nzak woyri ɓahri : « Záh ta tul bi ya. Wara le mi hȩk bah bi. A woiri ba, i ko mi ŋgi̧w.

⁵⁰Mi taw ɓay riŋ ɗina ya. Nzuk mbew ƴo ri mí taw ɓay hi̧ riŋ ɗina bi ɓá mgbe. Nzuku mí ɓa nzuk-kuŋ salɓayu.

⁵¹Munu, ke taw ɓay hi̧ riŋ ɗina bi ɓá mgbe ɓa ketina. Mi ƴo sɔk wuri ɓayay, nzuk ƴo tul ɓay bi le, hul ta ɗi riŋ ye ya wu̧m. »

⁵²Mí ziɓri ɓah hi̧ ni ɓahri : « Aŋay nah tu-tu, záh ƴo tul wo gaŋ. Abaraham hu lewsa̧. Gun nzak pihna Ŋgerzahri kara hu lewsa̧ pi. A wo ba, mu ɓahri se, nzuk ƴo tul ɓay wo le, ta tu hul ya wu̧m.

⁵³Uwa, mu ɓa nzuk a luki kal tul zih wah Abaraham ké hu da ra ley ? Gun nzak pihna Ŋgerzahri kara hu da pi ra wa, mu laɓ mun wo ɓa nzuk ké na ani munu le ? »

⁵⁴Zezu yih nzak woyri ɓahri : « Mi sɔk mun bi ɓa nzuk ke mun le, riŋ ɗina-u ɓa fe ndikpo. Bah bi ké i ɓahri se, ɓa Ŋgerzah woiri ra, a ye, ke tu riŋ ɗina bi ké-e kan tul bi tu.

⁵⁵A woiri i tu wuri ni ya. A bi le, mi tu ni tu. Gelke mi ɓahri, mi tu ni ya le, mi tí̧h ɓa nzuk-kuŋ ɓay eŋ wuri kaŋ pi. Mi tu ni pi, mi ƴo tul ɓay ye pi.

⁵⁶Ziih Abaraham zay mun zakra zakra ɓay ko nam gina bi. Ke ko gina bi ba, mí law ye rih ni. »

⁵⁷Mí ziɓri ɓah hi̧ ni ɓahri : « A wo ké mbihmbam wo ka̧h bon ndiɓi ya ɓáyay, mí mu ko Abaraham ley ? »

⁵⁸Zezu ɓah hi̧ niri ɓahri : « Ɓa ketina, mi ko Abaraham ko. Mi ƴo sɔk wuri ɓahri, dara mí kú mbuŋ Abaraham le, mi ƴo ri. »

⁵⁹Kandɔkaw mí ziɓri fa̧h kasaw ɓay vbuk ni ɓay i ni bale[26], ke ƴahra ti̧h ke ɓil ila vul kani Ŋgerzah, mí ke tɔr.