Read Karang Mbete Za̧h 9 Bible Online

Mbete Za̧h 9 - Karang bible

Mbete Za̧h 9

¹Zezu si sina dale, ke ko nzuk a hani mbew. Ku mbuŋ ni ɓa ra̧w.

²Mí nzuk-dih fal yeri vbi ni ɓahri : « Rabbi, ɓay suya ge mí ku mbuŋ nzukay ɓa ra̧w le ? Ɓay tul suya ye mini ɓay tul suya bah ye ke mah ye le ? »

³Zezu yih nzak woyri ɓahri : « Ɓay suya ye ya. Ɓay suya bah ye ke mah ye ya pi. Le ku mbuŋ ni ɓa ra̧w ɓay hi̧ pihna laɓna Ŋgerzah ɓá ten ké gel a teh-u.

⁴Nah láɓ pihna nzuk-pih mi ke se-seh. Suŋ sih dale, nzuk ta laɓ pihna mba.

⁵Ké mi ƴo sakra feri ké-e laɓ ké tusiɓa ke nunmbam ɓáyay le, mi ɓa gel tehna tusiɓa ke nunmbam. »

⁶Ke ɓah kaŋ ba, ke el rik mbihsam ku̧ siɓa, ke laɓ bɔɓe-u mí ke ri̧h keni nun ra̧w ra.

⁷Ke el ɓah hi̧ ni ɓahri : « Mú si wɔk nun wo ké mbih Siloyam. » (Riŋu sɔk ɓahri, mbih kú-u pih.) Kandɔkaw ra̧w si mí wɔk nun ye bale, nun ye ko gel.

⁸Bɔh puh yeri ke nzuk a ɓoruri ké tu ni gel-goŋ fe pol ra ƴo ɓahri : « Nzuk ké kaɓ ful ƴo rah ndɔk goŋ fe mí na-ay ya le ? »

⁹Nzuk a haniri ɓahri : « A ye munu. » Nzuk a ɓoruri ba, ɓahri : « A ye ta-a. Nzuku mí ba ni. » Mí ra̧w ba, ɓah : « A bi munu. »

¹⁰Bale ku ɓahri : « Ani mí nun wo teh hi̧ mu ko gel da-ay le ? »

¹¹Ra̧w yih nzak woyri ɓahri : « Nzuk a hani, riŋ ye ɓa Zezu laɓ bɔɓe ri̧h nun bi dale, ke ɓah hi̧ mi ɓahri, mí si wɔk ké mbih Siloyam. Mi si wɔk bale, mi ko gel ɓa teh-u. »

¹²Ku ɓahri : « Nzuku ƴo suŋ le ? » Ke ɓah, ke tu ya.

¹³Kandɔkaw mí ku maŋ ni ké nun ye ké teh ra si keni ta̧w fariziri.

¹⁴Nam ké Zezu laɓ bɔɓe mí mgbur nun ra̧w ra ɓa nam ɔkna.

¹⁵Kaŋ mí fariziri kara vbi ɓay fe ké kal hi̧ nun ye ko gel da-aw ra. Ra̧w ɓahri se, nzuku ri̧h nun ye ke bɔɓe. A ye ba, ke si wɔk, mí ke ko gel.

¹⁶Mí farizi a haniri ƴo ɓahri : « Nzuku, Ŋgerzah pih ni ya ɓay fe le, ke ƴo tul bolkusol nam ɔkna ya. » Farizi a ɓoruri ba, ƴo ɓahri : « Nzukaw ɓa ra nzuk a suya-u le, ke tá ke ŋgerna laɓ fe saŋaw ya. » Kandɔkaw mí kéhr hani ƴo sakra woyri.

¹⁷Mí fariziri el ɓah hi̧ ra̧w ra ɓahri : « A wo ba, mu ɓah ani ké tul nzuk ké mgbur nun wo mu ko gel ra le ? » Ke ɓahri se, ke ɓa gun nzak pihna Ŋgerzah.

¹⁸Ŋgernzuk ziɓri ra ma̧y ɓay ɓahri, ke ta ɓa ra̧w pol dara mí nun ye el teh-ay ya. Ku ma̧y ɓay kaŋ kaŋ, mí ku pih ɗi bah ye ke mah ye gi.

¹⁹Ku vbi niri ɓahri : « Gun woiri ké i mbuŋ ɓa ra̧w ra wa, ani mí nun ye el ko gel le ? »

²⁰Nzukri ké mbuŋ ra̧w ra yih nzak woyri ɓahri : « Nah tu-tu, gun wah ké nah mbuŋ mí na-ay. Ke ɓa ra̧w ke mbuŋna ye sa̧.

²¹Fe ké kal hi̧ nun ye teh-ay ra, nah tu ya. Nzuk ké mgbur nun ye kara nah tu ni ya pi. Í vbi gunu. Ke ru̧ da. Ke mah ɓah ɓay ke mun ye da pi. »

²²Nzukri ké mbuŋ ra̧w ra ɓah kaŋ ɓay hȩkme ŋgernzuk ziɓri. Ŋgernzukri-aw pih bolkusol lewsa̧ ɓahri, nzak nzuk ké ɓahri, Zezu ɓa Ŋgermbay le, ku ní̧h nzuku ke vul misoŋ woyri.

²³Sa̧wu mí bah ye ke mah ye ɓahri se, ŋgernzukri ɓá vbi ni. Ke ru̧ da.

²⁴Bale ŋgernzuk ziɓri el ɗi ra̧w ké nun ye teh ra ɓáy, mí ku ɓahri : « Mú ɓah ketina ké pol Ŋgerzah. A wah ba, nah tu-tu, gun wo̧ro-aw ɓa nzuk a suya-u. »

²⁵Mí ra̧w fer ɓay ɓahri : « Ke ɓa nzuk a suya-u, mi tu ya. Ke ɓa nzuk a suki kara mi tu ya. Fe ké mi tu mí na-ay : pol, mi ɓa ra̧w, guri-ay, nun bi mgbur mí-i ko gel. »

²⁶Ku vbi ni ra ɓáy ɓahri : « Ani mí ke laɓ, mí ke mgbur nun wo le ? »

²⁷Ke yih nzak woyri ɓahri : « Mi ki̧ falu hi̧ wuri da, mí i sa lah ya. Ɓay tul fe mí i yih lah ɓayu ɓáy le ? A woiri kara i yih ɓay na ɓa nzuk-dih fal yeri pi wa ? »

²⁸Mí ku tȩhre ni, ku ɓahri : « A wo ra mu ɓa nzuk-dih fal nzukaw. A wah le nah ɓa nzuk-dih fal Moyiz.

²⁹Nah tu ɓahri, Ŋgerzah ɓah ɓay ziŋ Moyiz. Gunwo̧ro-aw ba, nah tu gel urna ye ya. »

³⁰Nzuk ra fer ɓay, ke ɓahri : « Ɓay woiri-aw ra ɓa saŋ. Ɓay fe le i tu sa̧w ye ya, mí ke gi mgbur nun bi, mí-i ko gel.

³¹Nah tu ɓahri se, Ŋgerzah lah goŋna nzuk suyari ya. Mí nzukri ké hȩk ni, ku ƴo laɓ fe ké Ŋgerzah yih le, Ŋgerzah ƴo lah nzuku lah.

³²Ur ke lewsa̧ ka̧h aŋay ku mgbur nun nzuk kú-u mbuŋ ni ɓa ra̧w ya ɓáy.

³³Nzuku ur ké ta̧w Ŋgerzah ya le, ke mah laɓ fe a hani ya. »

³⁴Ku yih nzak ye ɓahri : « A wo kú-u mbuŋ mu ɓil ɓay a suya-u bilimaw wa, nzak fe mí mu mah firma na ɓay le ? » Kandɔkaw mí ku ni̧h ni ke vul misoŋ woyri.

³⁵Zezu lah ɓahri se, ku ni̧h ra̧w ra. Mí ke si ziŋ ni, ke ɓahri : « Law wo te tul gun nzuk pirmatul le ? »

³⁶Ra̧w ra yih nzak ye ɓahri : « Ŋgernzuk, gun nzuk pirmatul ra ɓa ge mí-i kan law sa tul ye le ? »

³⁷Mí Zezu ɓah hi̧ ni ɓahri : « Nzuk ké mu ko-ay, ké ƴo ɓah ɓay ziŋ mu-ay, a ye munu. »

³⁸Kandɔkaw mí ra̧w huk siɓa, mí ke dim ni ɓahri : « Ŋgermbay, law bi te sa tul wo. »

³⁹Zezu ba, ɓahri : « Ɓay kuŋ salɓay tul feri ké tusiɓa ke nunmbam mí-i gi ɓayu. Ra̧wri le ɓá ko gel, nzuk nunri ba, ɓá el kaɓ ɓa ra̧w. »

⁴⁰Farizi a haniri ké ƴo ziŋ Zezu lah ɓay ye kaŋ, mí ku ɓahri : « A wah nah ɓa ra̧w wara mini ani le ? »

⁴¹Mí Zezu ɓah hi̧ niri ɓahri : « I ɓa ra̧w le, salɓay suya ta tul woiri ya. Kandɔk ké i ɓahri se, nun woiri ƴo ri ra, salɓay suya na tul woiri ɓáy. »