Read Karang Mbete Fe laɓna Tempuki 1 Bible Online

Mbete Fe laɓna Tempuki 1 - Karang bible

Mbete Fe laɓna Tempuki 1

¹Soko wo, Diyofil. Mbete a bɔk seɗe-u wara mí-i vbeh hi̧ mu-ay[1]. Mbete a pol ké mi vbeh hi̧ mu sɔk ɓay titil fe laɓna Zezu ke fe sɔkna ye kpu̧ru ka̧h nam ké-e hi̧ bolkusol ke ŋgerna Tempuki hi̧ gun nzak pihnari ké-e lu niri ku̧ ɓoɗ.

³Fal hul ye ra, ke ƴo sɔk mun ye hi̧ niri nam bon niŋ dara mí ke tɔr si nunmbam ɓáy. Ku ko ni ɓa teh-u hi̧ ku tu ɓahri, ke ƴo ri. Ke sɔk ɓay lak mbay Ŋgerzah hi̧ niri, kú lah.

⁴Seh-aw, Zezu ƴo su̧ fe ziŋ niri ra, ke sɔk niri ɓahri, kú kaɓ sa Zurusalem geŋ Tempuki ké baah Ŋgerzah wahɓay pih hi̧ niri kandɔk ké-e ɓah pol hi̧ niri lah.

⁵Ke ɓahri se : « Za̧h soh nzukri batem a mbih, mí nam toŋ ŋgi̧ mba i tí̧h ɓil batem a Tempuki wara. »

⁶Mí ku vbi ni ɓahri : « Gaŋ wah, mu hí̧ na gun Izarayelri náh el lak mbay aŋay ɓáy le[2] ? »

⁷Mí ke el ɓah hi̧ niri ɓahri : « Tu nam-lak mbay gun Izarayelri ɓa ɓay baah Ŋgerzah ke hȩk ye. Ta ɓa ɓay woiri ya.

⁸Wara le, nam ké Tempuki gi ɗer pɔr tul woiri dale, i yá̧ ŋgerna. I téh tehɓay bi ur ke Zurusalem ke tusiɓa Zude si ka̧h tusiɓa Samari kpu̧ru ka̧h gbu̧h tusiɓa. »

⁹Ke ɓah ɓay ziŋ niri ɔh bale, ke tɔr ma nunmbam. Tɔrna ye, ku ƴo ko kona ma fal ye kɔɓ ɓáy, mí ɗikmambam gi ɔr ni hi̧ ku ko ni mba.

¹⁰Ku ƴo ko kona ma fal ye yi̧m ba, nzukri seɗe ké gar woyri pu kpa̧h kpa̧h ƴo ta̧w woyri pi.

¹¹Mí ku ɓah hi̧ niri ɓahri : « A woiri nzuk Galileri, ɓay fe mí i ƴo wuri sa gelay ko kona yi̧m ma nunmbam le ? Zezu ké i ko ni tɔr ge-aw ra kaŋ pi mí ke ɓay el gi. »

¹²Bol falu gun nzak pihnari ɗer ké tul kasaw Oliveh el si Zurusalem. Kasaw Oliveh ra ɗih ya ke Zurusalem kaŋto. Ɗihna-u mah salful mbew[3].

¹³Ka̧hna woyri ké Zurusalem, ku kal si rih ɓil vul gahru woyri ké fál síɓa. Riŋ nzuk a haniri mí na-ay : Piyer, Za̧h, Zak, Andere, Filiɓ, Toma, Bartelemi, Matiye, Zak gun Alfe, Simu nzuk-ri̧h si̧w ɓay tul sa̧wnzuk woyri ke Zudas gun Zak.

¹⁴A woyri-aw riw, ku ƴo mbu̧h hani kpatara. Ku ƴo goŋ Ŋgerzah ke law mbew. Mari mah Zezu ke yi̧n Zezuri ke wu̧y a ɓoruri kara ƴo ri pi.

¹⁵Ké ɓil namri-aw, nzuk yi̧n ɓil Ŋgermbayri ƴo mbu̧h hani. Tul woyri mah sɔɗ ke bon seɗe bale, Piyer ur ƴo sakra woyri.

¹⁶Ke ɓah ɓay ɓahri : « Yi̧n biri, ɓay nzuk-te Ŋgermbay ké Tempuki ɓaŋ ɓayu ndoh nzak Daviɗ mbay a luki pol sa̧ ra laɓ da, ɓa a ye Zudas Isikariyoɗ ké nda pol nzuk-mgba Zezuri.

¹⁷Zudas ra, ku ki̧ ni ziŋ na. Ŋgermbay lu ni ɓa gun nzak pihna ziŋ na pi[4]. »

¹⁸(Zudasaw ke lari pihna a pipiri-u ye ra[5], ku fa̧h lari ye ra yeh keni waka, mí ke lih guɓ mgbuka. Ɓil ye sak ruɗ, ka̧hraɓil ye ti̧h wusuk ku̧ siɓa.

¹⁹Nzuk Zurusalemri gbam lah ɓayu lah. Sa̧wu mí ku tu riŋ waka-u ɓa Hakel-Dama. Riŋu sɔk ɓahri, waka sem.)

²⁰« Kandɔkaw, ku vbeh ɓay a ɓoru lewsa̧ si tul nzuku ké ɓil Mbete Siŋ (Psaumes) ɓahri, kú poŋ puh ye ɓa kaŋpele kivbiw. Nzuk a ɓoru kara ɓá ɗeh puh ké ri ya[6]. Ku vbeh ké gel a ɓoru ɓáy ɓahri, nzuk a ɓoru ɓá soh gel pihna ye[7].

²¹Kaŋ dale mah ɓay nzuk mbew ɓá soh bol Zudas. Nzuku ɓá na ɓa nzuk ké ƴo ziŋ na ke sew ké Gaŋ wah Zezu ha̧rma ziŋ na,

²²ké na ɓa nzuk ké ƴo ziŋ na ur ke sew ké Za̧h soh nzukri mbih batem kpu̧ru ka̧h nam ké Zezu ti̧h ke puh záh ke pa̧ymun a foyu, ke tɔr si nunmbam. Nzuku ɓay ƴo ziŋ na, ke ɓáh tehɓay Ŋgermbay Zezu ziŋ na hi̧ nzukri lah. »

²³Kandɔkaw mí ku ten nzukri seɗe. Nzuk a mbewu, riŋ ye ɓa Zezeɓ kú-u ɗi ni ɓa Barsabaɗ. Riŋ ye a ɓoru ɓa Zusteŋ. Nzuk a seɗe-u ba, ɓa Matiyas.

²⁴Bale ku goŋ Ŋgerzah ɓahri : « Gaŋ wah, a wo, mu ko law nzukri ko.

²⁵Mú sɔk na nzuk a suŋ mú-u lu ni ɓa gun nzak pihna wo ké sakra nzukri ké seɗe-ay ɓay ké laɓ pihna soh gel Zudas, a ye ké-e poŋ pihna-aw tɔr ma gel ké mah ke fe laɓna ye. »

²⁶Kandɔkaw, ku laɓ fe eŋ ɓele ɓay ko keni nzuk ké Ŋgerzah lu ké sakra nzukri ké seɗe-aw[8]. Mí ɓele ra mgba tul Matiyas. Kaŋ mí ku mbi ni rih sakra gun nzak pihnari ké toŋ boh falu mbew ra.