Read Karang Mbete Fe laɓna Tempuki 10 Bible Online

Mbete Fe laɓna Tempuki 10 - Karang bible

Mbete Fe laɓna Tempuki 10

¹Ké Sezareh, nzuk a hani-u mbew ƴo ri. Riŋ ye ɓa Kɔrne. Ke ɓa kumandah ké sakra nzuk ŋgermu Italiri.

²Law ye te sa tul Ŋgerzah, a ye ke nzuk kerpuh yeri gbam. Kpatara, ku ƴo hȩk Ŋgerzah[72], ke ƴo so ziɓ a a̧yri ké ƴo ɓil koseh, ke ƴo goŋ Ŋgerzah pi.

³Sa̧wseh-goŋ Ŋgerzah a bɔklew ka̧h[73], ke ƴo goŋ Ŋgerzah bale, tem nzak pihna Ŋgerzah ti̧h nun ye ɗi ni ɓahri : « Kɔrne. »

⁴Hȩkme mbah law ye, ke ko kona ka̧ah ma tul tem nzak pihna ra, mí ke ɓahri : « Mbay bi, mi ƴo lah mu. » Tem nzak pihna ra yih nzak ye ɓahri : « Ŋgerzah yȩkre mu ya. Ke lah goŋna wo lah, fe sukiri ké mu laɓ hi̧ nzuk sehri ra rih law ye rih.

⁵Aŋay, mú pih nzukri si Zope kú ɗi Simu ké riŋ ye a ɓoru ɓa Piyer ké gi.

⁶Ke na kerpuh gɔlɔ ye Simu nzuk-gbak ho̧ko. Puh Simu ra na ɓel mahmbih. »

⁷Tem nzak pihna tɔr bale, ke ɗi gun kaɓna yeri seɗe ke soze mbew ké haŋsekle sozeri ké ƴo kɔr ni. Soze ra ɓa nzuk-hȩk Ŋgerzah.

⁸Ke ndazi ɓay ké tem nzak pihna ɓah hi̧ ni ra riw, mí ke pih niri ɓay kú si Zope.

⁹Tipele-u, ku ƴo tul ful kɔɓ ɓáy. Ku toŋ ɗih ya ɓay ka̧h Zope. Seh ƴo tul puh, Piyer ba, hil si kaɓ huh tem kú-u roŋ na tul vul, ke ƴo goŋ Ŋgerzah ké ri.

¹⁰Ɗaka i ni. Ke yih su̧ fe. Ku ƴo kar fe su̧na hi̧ ni, mí Ŋgerzah hi̧ ni ke ko fe ɓa lɔlɔ.

¹¹Ke ko nunmbam mgbur, ke ko fe eŋ gar ɓa ah-u borol. Ku mgba ti̧w garu niŋ ɗer gi tusiɓa.

¹²Ké ɓilu-aw, ke ko nayri ke hay sa̧y kuhru ke selhaŋri ke gundoyri pi.

¹³Bale ke lah kusol nzuk ɓah hi̧ ni ɓahri : « Piyer, ur síɓa. Mú i, mú su̧. »

¹⁴Piyer ɓahri : « Mbay, kaŋ ya ! Bɔk mbew bi gel-su̧ hay ké mah nun Ŋgerzah ya, hay a kala ké bolkusol Ŋgerzah gboh su̧-u pi[74]. »

¹⁵Mí kusol ra el ɓah a bɔk seɗe-u hi̧ ni ɓahri se : « Fe ké Ŋgerzah ko mah nun ye ra, mú ko ɓa fe a kala ya. »

¹⁶Fe-u laɓ kaŋ bɔk say bale, gar ra ba, el ma nunmbam.

¹⁷Piyer ƴo fakla sa̧wɓay lɔlɔ-ay bale, gun nzak pihna Kɔrneri ké ku ƴah puh Simu ra ka̧h. Ku ƴo polkɔkɔ.

¹⁸Ku ɗi fe ɓa mgbe-u ɓay tu ɓahri, Simu kú-u ɗi ni ɓa Piyer na gelay gaŋ le ?

¹⁹Law Piyer ƴah ɓay ɓoɗ ɓoɗ ké tul lɔlɔ ra, mí Tempuki sɔk ni ɓahri : « Mú ko. Nzukri say ƴo ri-aw. Ku ƴo ƴah mu.

²⁰Ur síɓa, mú ɗer. Mú tɔr ziŋ niri. Kerɓay sa̧w wo ɓá zɔklɔ mu ya ɓay fe le, ɓa a bi mí-i pih niri munu. »

²¹Mí Piyer ɗer. Ke si ta̧w nzukri ra. Ke ɓah hi̧ niri ɓahri : « Mi ƴo-ay. Mi ɓa nzuk ké i ƴo ƴah-u. Sa̧wɓay ƴahna ké i ƴah mi ra ɓa fe le ? »

²²Ku yih nzak ye ɓahri : « Kumandah Kɔrne mí pih na. Ke ɓa nzuk ké ƴo hȩk Ŋgerzah. Ke ɓa nzuk a ketina. Ziɓri gbam ɓah lakna ɓay ye. Mí tem nzak pihna Ŋgerzah sɔk ni ɓahri, ké ɗi mu, mú si puh ye ɓay ké lah ɓay fe sɔkna wo. »

²³Bale Piyer ya̧ niri. Ku na ta̧w ye. Tipele-u, ke tɔr ziŋ niri. Yi̧n Piyer a haniri ɓil Ŋgermbay ké Zope ɓaŋ ni si Sezareh pi.

²⁴Kɔrne ba, ɗi nzuk in yeri ke ya̧h ye a a̧yri ké-e tu niri ɓa teh-u. Ku kaɓ geŋ gina Piyer. Pelah-u mí Piyer ke gun nzak pihna Kɔrneri ka̧h Sezareh.

²⁵Ka̧hna woyri, Kɔrne nzɔh nun Piyer. Ke guɓ siɓa dim ni.

²⁶Mí Piyer ɔr ni ɓahri : « Mú ur síɓa. A bi kara mi ɓa nzuk pirmatul pi. »

²⁷Ku lu mberem si rih keni ɓil vul dale, Piyer ndukru daɓa nzukri mgbim ké mbu̧h geŋ ni.

²⁸Mí ke ɓahri : « A woiri i tu te-teh, mahful ɓay hi̧ ziɓri ɓá mgba bɔh sina ziŋ sa̧wnzuk a ɓoruri ta-a, kaɓ ziŋ niri kara ta-a pi[75]. Mí a bi ba, Ŋgerzah ɓah hi̧ mi ɓahri, mí ko nzuk ɓoɗ mba, mi ta ɓahri, ke mah na ɓa nunu a Ŋgerzah ya. Le ke mah ti̧h ɓa sa̧wnzuk ye wara.

²⁹Kaŋ mí-i deh ɗina ya. Mi gi ɓa gah-u. Aŋay, mi yih tu sa̧wɓay fe ɗina woiri. »

³⁰Kɔrne yih nzak ye ɓahri : « Laɓ nam niŋ sa̧wseh kandɔkay mí-i ƴo goŋ Ŋgerzah ɓil vul bi ke sa̧wseh-goŋ Ŋgerzah a bɔklew, mí nzuk ké ndoh gar ké ndu̧y ver ver ti̧h nun bi.

³¹Mí ke ɗi mi ke riŋ bi ɓahri, Ŋgerzah lah goŋna bi lah. Fe sukiri ké mi laɓ hi̧ nzuk sehri rih law ye rih.

³²Ke sɔk mi ɓahri, mí pih nzuk si Zope ɓay ɗi mu Simu ké riŋ wo a ɓoru ɓa Piyer ɓá gi. Mu na kerpuh gɔlɔ wo Simu nzuk-gbak ho̧ko. Puh Simu ra na ɓel mahmbih.

³³Sa̧wu mí-i pih ɗi mu ɓa gah-u. Mí a wo ba, nzak pihna-ay rih law wo mú-u gi-ay. Aŋay le, nah kaɓ pol Ŋgerzah, a ye Gaŋ tul feri riw ɓay náh lah ɓayri ké-e hi̧ mu ɓay mú sɔk na. »

³⁴Mí Piyer titil ɓah ɓay ɓahri : « Aŋay, guh law bi da. Ké ta̧w Ŋgerzah, nzukri riw mah hani.

³⁵Ké ɓil sa̧wnzuk a ɓoruri gaŋ kara nzuk a suŋ suŋ ké hȩk Ŋgerzah, ké ƴo tul ketina le, Ŋgerzah ya̧ ni ndɔk seɗe ma law ye.

³⁶Nzak pihna ké-e pih hi̧ gun Izarayelri ɓah ɓay law rihna ɓahri, Ŋgermbay Zezu ɓa sa̧w ɗeŋ nzukri. Ke ɓa Gaŋ tul feri riw.

³⁷Ɓay ye ké ya̧ gelri gbam ɓil tusiɓa ziɓri, i la-lah. Ɓayu titilu ké Galile bol fal batem ké Za̧h ka-kah-u.

³⁸Zezu nzuk Nasareɗ, Ŋgerzah mbi ni kan ɓoɗ ke Tempuki ke ŋgerna pi. Ke ha̧rma ke gelri ɓoɗ ɓoɗ laɓ lawsuki, mí ke gah keni nzukri ké záh laɓ niri koseh. Ɓay fe le, Ŋgerzah ƴo ziŋ ni.

³⁹A wah, nah ɓa nzuk-ɓah tehɓayu ur ke fe laɓna ye gbam ké tusiɓa ziɓri ka̧h ɔh tɔr pihna ye ké ɓil puh Zurusalem. Ku ɓar ni ɓa hul nazi ké tul kpuh[76].

⁴⁰Ŋgerzah hi̧ ni ke ti̧h ke puh záh ke pa̧ymun a foyu ɓil nam a sayu. Ke hi̧ ni sɔk mun ye hi̧ na, nah ko.

⁴¹Ke sɔk mun ye hi̧ ziɓri gbam ya, sa ɓa a wah ké Ŋgerzah lu na lewsa̧ ɓa nzuk-ɓah tehɓay Ŋgermbay Zezu. Mí nah su̧ fe, nah nzo fe ziŋ ni.

⁴²Ke pih na ɓay náh ka-kah, náh ɓah tehɓay ye hi̧ sa̧w nzuk yeri ɓahri, a ye mí Ŋgerzah mbi ni ɓa nzuk-kuŋ salɓay ké tul nzukri gbam, nzuk a huluri ke nzuk a ƴo ke ɔknari pi.

⁴³Gun nzak pihna Ŋgerzah a lewsa̧ri riw sɔk tehɓay ye ɓahri, tumbɔl Ŋgermbay mí salɓay hul lu ké tul nzuk a suŋ suŋ ké kan law tul riŋ ye. »

⁴⁴Piyer ƴo ɓah ɓay kɔɓ ɓáy, mí Tempuki ɗer gi ku̧ tul nzukri riw ké mbu̧h hani ƴo lah ɓay ye.

⁴⁵Ziɓri ké kan law tul Ŋgermbay, ké ɓaŋ Piyer si puh Kɔrne ra, ku lah nzukri ké mbu̧h kaɓ puh Kɔrne ƴo ɓah ɓay ke nzak a ɓoruri ké Tempuki hi̧ niri, ku lah niri ƴo pir riŋ ɗina Ŋgerzah pi, mí ku kaɓ yer. Ku ɓahri se : « Sa̧wnzuk a ɓoruri ké kuŋ ndi̧w kandɔk bolkusol Ŋgerzah sɔk ra ya kara, Tempuki gi ku̧ tul woyri pi. »

⁴⁶

⁴⁷Wara mí Piyer ɓahri : « Bolkusol fe mí mah gboh soh nzukayri mbih batem le ? Ku ya̧ Tempuki kandɔk a wah. »

⁴⁸Mí ke ɓah hi̧ niri ke riŋ Ŋgermbay Zezu, kú ti̧h mbih batem. Bale ku goŋ ni hi̧ ni ke kaɓ ziŋ niri nam mah fe dara mí ku tɔr ɓáy.