Read Karang Mbete Fe laɓna Tempuki 11 Bible Online

Mbete Fe laɓna Tempuki 11 - Karang bible

Mbete Fe laɓna Tempuki 11

¹Gun nzak pihna Ŋgermbayri ke nzuk yi̧n ɓil Ŋgermbay a ɓoruri ké tusiɓa Zude lah ɓahri[77], sa̧wnzuk a ɓoruri kara mgba ɓay Ŋgerzah ma law woyri.

²Gelke Piyer el si ka̧h Zurusalem le, ziɓri ké kan law tul Ŋgermbay ra lah ɓahri, Piyer kaɓ ziŋ sa̧w nzuk a ɓoru, mí ku laɓ ɓay ziŋ ni ɓahri : « Mu rih kerpuh nzuk a ɓoru ké kuŋ ndi̧w kandɔk ké Ŋgerzah sɔk na ra ya, mú-u su̧ fe ziŋ niri-aw. »

⁴Wara mí, Piyer ndazi ɓay feri ké kal ke bamu bamu hi̧ niri.

⁵Ke ɓahri : « Mi kaɓ Zope ƴo goŋ Ŋgerzah, mí Ŋgerzah hi̧ mi, mi ko fe ke lɔlɔ. Mi ko gar ɓa ah-u borol ké ku mgba ti̧w garu niŋ ɗer ke nunmbam gi ka̧h ta̧w bi.

⁶Mi ko gel ka̧ah, hekre ɓilu. Mí mi ko fe hɔlnari ke nay kpahri, hay sa̧y kuhru ke selhaŋri ke gundoyri pi.

⁷Bale mi lah kusol nzuk ɓah hi̧ mi ɓahri : “Piyer, ur síɓa. Mú i, mú su̧.”

⁸Mí-i ɓahri : “Mbay, kaŋ ya. Bɔk mbew bi gel-su̧ hay ké mah nun Ŋgerzah ya, hay a kala ké bolkusol Ŋgerzah gboh su̧-u pi.”

⁹Mí kusol ra el ɓah a bɔk seɗe-u hi̧ mi ɓahri : “Fe ké Ŋgerzah ko mah nun ye ra, mú ko ɓa fe a kala ya.”

¹⁰Fe-u laɓ kaŋ kaŋ bɔk say bale, ku kɔklɔ gar ra el keni ma nunmbam ba, nzukri say ka̧h kerpuh ké nah kaɓ ri. Nzuk Sezareh a hani mí pih niri ma ta̧w bi.

¹²Mí Tempuki sɔk mi ɓahri, kerɓay sa̧w bi ɓá zɔklɔ mi ya. Mí tɔr ziŋ niri. Nzuk yi̧n ɓil Ŋgermbayri ké tɔtɔklɔ-ay si ziŋ mi pi. Riw wah, nah mbu̧h hani ké kerpuh nzuk-ɗi mi.

¹³Nzuk puh-u sɔk na ani mí ke ko tem nzak pihna Ŋgerzah rih kerpuh ye sɔk ni ɓahri, ké pih nzukri si Zope ɓay ɗi mi Simu ké riŋ bi a ɓoru ɓa Piyer.

¹⁴Mi ka̧h le, mi sɔ́k niri ɓay ké ɓay ya̧ niri hi̧ kú ti̧h ɓa sa̧w nzuk Ŋgermbayri, a ye ke nzuk ɓil kerpuh yeri.

¹⁵Mi ka̧h bale, mi mbi ɓay ƴo ɓah-u, mí Tempuki ké ɗer ku̧ tul wah ke titilu da̧y ra, ɗer ku̧ tul woyri kaŋ pi.

¹⁶Bale mi ker ɓay si tul ɓay ɓahna Gaŋ tul feri riw ké-e ɓahri : “Za̧h soh nzukri batem a mbih, mí batem a Tempuki le, i ɓay ti̧h ɓilu.”

¹⁷Kaŋaw ba, Ŋgerzah hi̧ sa̧wnzuk a ɓoruri Tempuki kandɔk ké-e hi̧ na a wah ziɓri ké nah kan law tul Ŋgermbay Zezu Gaŋ tul feri riw ra wa, a bi ba, mi ɓa ge mí-i mah gboh Ŋgerzah le ? »

¹⁸Nzukri ké laɓ ɓay ziŋ Piyer ra lah ɓayaw kaŋ, mí law woyri voh. Ku ɓahri : « Mí le, sa̧wnzuk a ɓoruri kara Ŋgerzah hi̧ niri mahful gi ta̧w ye ɓay ziŋ ɔkna ye. » Bale ku dim Ŋgerzah ɓayu.

¹⁹Ur ke seh ké ziɓ a sa ɓay Ŋgermbay yari i Eten ra[78], ziɓri ké kan law tul Ŋgermbay gbakra hani kparki kparki ɓay koseh ké ziŋ niri. Ziɓ a haniri ɗuk si ka̧h tusiɓa Fonizi, ziɓ a ɓoruri si tusiɓa Siper, ziɓ a ɓoruri ɓáy si Antiyos. Ku si ta̧w sa̧wnzuk a ɓoruri ya, sa ɓa ziɓri kaŋto mí ku sɔk niri ɓay lak mbay Ŋgerzah ɓahri, Zezu ɓa Ŋgermbay.

²⁰Mí ziɓ a haniri ké kan law tul Ŋgermbay, tusiɓa woyri ɓa Siper ke Siren. Ku si ka̧h Antiyos, mí ku sɔk sa̧wnzuk a ɓoruri ɓaysuki lák mbay Zezu Gaŋ tul feri riw.

²¹Mí Gaŋ tul feri riw hi̧ pihna woyri ti̧h suk bale, daɓa nzuk a ɓoruri ɓa ŋgi̧-u poŋ sa̧w záh woyri el kan law tul Gaŋ tul feri riw.

²²Sa̧w nzuk Ŋgermbayri ké Zurusalem lah ɓayu bale, ku pih Barnabas si Antiyos[79].

²³Ke ka̧h, ke ko lawsuki Ŋgerzah ƴo ziŋ nzukri-aw. Barnabas ra ɓa nzuk a suki, sa̧w siŋ sina ye ɓa Tempuki, law ye na sa tul Gaŋ tul feri riw, mí ke hew niri ɓahri, kú ɓer gi̧w ɓa kpuh-u ké tul Ŋgermbay, kú el fal ya. Bale daɓa nzukri ɓa ŋgi̧-u poŋ mun woyri hi̧ Gaŋ tul feri riw.

²⁵Kaŋ mí Barnabas tɔr si Tarsi ɓay ƴah Sɔl.

²⁶Ke si ziŋ ni bale, ke maŋ ni, ku el gi Antiyos. Ku kaɓ ri mbihmbam mbew, ku ƴo mbu̧h ziŋ sa̧w nzuk Ŋgermbayri. Ku sɔk niri ɓay Ŋgermbay ma pol pol, mí kandɔk kú-u dih fal Ŋgermbay ra, nzukri titil ɗi sa̧w nzuk Ŋgermbayri ɓa keretiyȩ[80].

²⁷Ke sewu-aw, nzuk a haniri ur ke Zurusalem si Antiyos. Ku ɓa gun nzak pihna Ŋgerzah.

²⁸Nzuk mbew ké sakra woyri-aw, riŋ ye ɓa Agabus. Tempuki ɓaŋ ɓay ɗaka bahpihya ké ɓay lih tusiɓa hi̧ ni. Ke ur ƴo haŋsekle sa̧w nzuk Ŋgermbayri, mí ke sɔk niri. Fe-u laɓ ke sew ké sezar Koloɗ ɓa mbay.

²⁹Nzuk-dih fal Ŋgermbayri ké Antiyos wahɓay so yi̧n woyri ɓil Ŋgermbay ké kaɓ tusiɓa Zude. A ge ge le pih ke fe mah gel ŋgerna ye.

³⁰Ku laɓ fe-u gaŋ ba. Ku pih Barnabas ke Sɔl ke lari-u si hi̧ ŋgernzuk vul misoŋri ké tusiɓa Zude[81].