Read Karang Mbete Fe laɓna Tempuki 12 Bible Online

Mbete Fe laɓna Tempuki 12 - Karang bible

Mbete Fe laɓna Tempuki 12

¹Ke sewu Barnabas ke Sɔl ƴo Antiyos, mí mbay Eroɗ Agripa ƴo zɔklɔ sa̧w nzuk Ŋgermbay a haniri ké Zurusalem, ke mgba niri laɓ niri koseh.

²Ke hi̧ ku i Zak yi̧n Za̧h ke mahwu̧y[82].

³Ke ko hul Zak ra rih law ziɓri bale, ke pih bolkusol ɓay kú si mgba Piyer pi. Kandɔkaw, ku mgba ni ke ɓil namri ké toŋndɔk seɗe kú-u laɓ ti̧hmbih-su̧ peŋ dan is (Pâque). Ke kehr sozeri ɓa gel niŋ ɓá kɔr ni. Gel kaɓna mbew le, sozeri niŋ niŋ. Eroɗ lek ɓay kuŋ salɓay tul Piyer ké pol daɓa nzukri fal ti̧hmbih-i guy buma ra.

⁵Piyer ƴo ɓil vul mgbal bale, sa̧w nzuk Ŋgermbayri ba, ƴo goŋ Ŋgerzah ɓay tul ye kpatara dan ɔkna.

⁶Eroɗ lek ɓay ten ni fal nam a ɔh tɔr ti̧hmbih ɓay kuŋ salɓay tul ye. Ke suŋu-aw gaŋ mí Piyer na-nam ké sakra sozeri seɗe. Ku ŋga̧h ni ke sal lari seɗe. Soze-kɔr mgbalri ƴo nzak vul ké Piyer na ri kȩk pi.

⁷Dale Ŋgerzah Gaŋ tul feri riw pih tem nzak pihna ye ti̧h por. Gel teh gberere ké ɓil vul ra. Tem nzak pihna ra vba̧ gari Piyer tom ni. Ke ɓahri : « Piyer, ur síɓa ɓa gah-u. » Bale sal lari ra ga̧y wɔsɔk ke ndɔk ye ku̧ siɓa.

⁸Tem nzak pihna el ɓah hi̧ ni ɓáy ɓahri : « Mú ŋga̧h si̧h wo. Mú ndoh sabɔk wo. Mú dih fal bi-ay. »

⁹Piyer dih fal ye ti̧h ke ɓil vul mgbal. Ku kal gel ƴona sozeri ké kɔr nzak vul mgbal Piyer, ku kal gel ƴona sozeri a ɓoru. Ku ka̧h nzakful ila a mboh-u ké sɔɓ ma fál ka̧w puh. Tuhru nzakfulu, ku laɓ ke lari, mí nzakfulu mgbur ke mun ye. Ku ti̧h. Ku ƴo si sina ké ful a hani. Piyer ko fe ké tem nzak pihna ƴo laɓu ɓa ketina ya. Ke ko ɓa lɔlɔ kaŋ. Mí tem nzak pihna ra zi rik rik poŋ ni.

¹¹Bale Piyer tu mun ye wara. Ke ɓahri : « Aŋay, mi tu ɓa teh-u da. Gaŋ tul feri riw pih tem nzak pihna ye gi ya̧ mi ke ɓil kosehri ké Eroɗ ke yi̧n bi ziɓri lek ɓay laɓ ziŋ mi. »

¹²Piyer tu fe ké kal da, ke tɔr ma puh Mari mah Za̧h ké riŋ ye a ɓoru ɓa Marki. Daɓa nzukri mbu̧h ké ri ƴo goŋ Ŋgerzah.

¹³Piyer vba̧ tuhru polkɔkɔ bale, Rode gun kaɓna a wu̧yu ti̧h si ɓay ko ɓa a ge le ?

¹⁴Ke lah kusol Piyer, mí law ye rih ni keɗ keɗ. Ke mgbur ful ya dih, ke el ke ɗukna si ɓil vul sɔk nzukri ɓahri, Piyer ƴo kala ké polkɔkɔ.

¹⁵Ku ɓah hi̧ ni ɓahri : « Mu ɓa kɔkɔ. » Ke ƴo tul ɓay ye ɓahri : « Ɓa a ye gaŋ. » Ku ɓahri : « Mí le, záh ye munu. »

¹⁶Mí a ye Piyer ba, ke toŋ vba̧ tuhru polkɔkɔ. Ku gi mgbur ful ra bale, ku ko ɓa a ye gaŋ, na niri ɓa fe saŋ.

¹⁷Ke ɔr ndɔk hi̧ niri ɓay kú kaɓ ɗeŋ. Ke ndazi ani mí Gaŋ tul feri riw ten ni ke vul mgbal. Ke el ɓahri : « Í si wuri sɔk ɓayay hi̧ Zak[83] ke tɔr yi̧n wah ɓil Ŋgermbayri. » Mí ke tɔr ma gel a ɓoru.

¹⁸Tipele teh bale, kerɓay mbaŋ law sozeri. Ku ɓahri : « A fe mí kal dara mí Piyer zi keni le ? »

¹⁹Eroɗ hi̧ ku nzah ni ya̧h ya̧h ké gelri riw. Ku ziŋ ni ya dih, mí ke fakla ɓayu ké ta̧w sozeri ké kɔr ni bale, ke kuŋ salɓay ɓa kpuh-u hi̧ sukna-u ɗer ku̧ tul woyri. Bol falu, Eroɗ tɔr ke Zude si kaɓ Sezareh nam mah fe.

²⁰Ke sewu-aw, law Eroɗ fa̧h tuh tuh ké tul nzuk Tir ke nzuk Sidoŋri. Bale a woyri-aw, ku mbu̧h nzak mbew lek ɓay gi ta̧w ye. Ku si ziŋ nzuk-lek gel nam mbay, riŋ ye Baltus, dara mí ku kal si ta̧w mbay. Ku si vbi law vohna ké ta̧w mbay ɓayu ké tusiɓa ye, mí ku ƴo yeh fe su̧na ké ri.

²¹Nam ké Eroɗ wah ra ka̧h. Ke ndoh mah gar mbay ye ké ndu̧y ver ver. Ke kaɓ fe kaɓna mbay, ke ɓah ɓay hi̧ niri ké pol nzukri.

²²Nzukri ba, ƴo ɓah ɓay gɔrɔm gɔrɔm ɓahri : « Kusol záh munu. Kusol nzuk pirmatul ta-a. »

²³Sa gelaw mí tem nzak pihna Gaŋ tul feri riw vba̧ ni. Kay ti ni, ke hu ɓayu ké-e sa tu riŋ ɗina Ŋgerzah ya, ke yih ɓay nzukri ɓá dim ni kandɔk Ŋgerzah.

²⁴Mí ɓay Ŋgerzah ba, seh ya̧ gel ma pol pol.

²⁵Barnabas ke Sɔl ba, ƴo Zurusalem. Ku ɔh pihna-so nzuk sehri ké Zurusalem. Mí ku el ma Antiyos. Ku maŋ Za̧h ké riŋ ye a ɓoru ɓa Marki si ziŋ niri pi.