Read Karang Mbete Fe laɓna Tempuki 15 Bible Online

Mbete Fe laɓna Tempuki 15 - Karang bible

Mbete Fe laɓna Tempuki 15

¹Ziɓ a haniri ké kan law tul Ŋgermbay, ku ur ke Zude ké ɓa tusiɓa sa̧w misoŋ gi Antiyos. Ku ƴo sɔk sa̧wnzuk a ɓoruri ké ɓa nzuk yi̧n ɓil Ŋgermbayri ɓahri : « I kuŋ ndi̧w kandɔk bolkusol ké Ŋgerzah hi̧ Moyiz vbeh ra ya le, i ta ƴo ke gun puh lakna Ŋgermbayri ya. »

²Dale fahɓay a bawu ur ké haŋsekle ziɓ a gi-uri ziŋ Pɔl ke Barnabas. Pɔl ke Barnabas ri̧h si̧w tul ɓay woyri, ziɓ a gi-uri ba, ri̧h si̧w tul ɓay woyri. Mí sa̧w nzuk Ŋgermbayri ké Antiyos ɓahri, kaŋ dale, Pɔl ke Barnabas ke sa̧w nzuk Ŋgermbay a ɓoruri ɓá si Zurusalem te-teh ɓayay ziŋ gun nzak pihna Ŋgermbayri ke ŋgernzuk vul misoŋri.

³Kaŋ mí ku so niri el pih niri. Ku mbi mahful, ku kal tusiɓa Fonizi ke tusiɓa Samari. Sina woyri-aw, ku ndazi ɓayri ke mahfulu mahfulu hi̧ nzuk yi̧n ɓil Ŋgermbayri ɓahri, sa̧wnzuk a ɓoruri mbi law woyri ké tul záh woyri ma fal el kan law tul Ŋgermbay. Ku lah ɓayaw le, law woyri rih niri keɗ keɗ.

⁴Pɔlri ka̧h Zurusalem, mí gun nzak pihna Ŋgermbayri ke ŋgernzuk vul misoŋri ke sa̧w nzuk Ŋgermbay a ɓoruri ya̧ niri ɓa suki. A woyri-aw, ku ndazi ɓay feri ké Ŋgerzah hi̧ niri ku laɓ, mí nzukri lah.

⁵Mí farizi a haniri ké kan law tul Ŋgermbay ba, ur ɓer ɓay ɓahri, sa̧wnzuk a ɓoruri ké kan law tul Ŋgermbay ɓá kuŋ ndi̧w, kú dih bolkusol a ɓoruri gbam ké Ŋgerzah hi̧ Moyiz vbeh ra pi.

⁶Wara mí gun nzak pihna Ŋgermbayri ke ŋgernzuk vul misoŋri ɗi maŋna ɓay fakla ɓayu.

⁷Ku fakla kpu̧ru kpu̧ru bale, Piyer ur, mí ke ɓahri : « Yi̧n biri ɓil Ŋgermbay, i tu wuri fe ké kal lewsa̧ ké haŋsekle wah tu-tu[98]. Ŋgerzah pih mi si sɔk ɓaysuki Ŋgermbay hi̧ Kɔrne ké sa̧w ye ɓoɗ lah bale, a ye ke nzuk yeri, ku kan law tulu.

⁸Ŋgerzah ké tu ɓil law nzuk tu ra, ke lu lakna ɓay woyri, ke pih Tempuki hi̧ niri kandɔk ké-e hi̧ na ra pi, sɔk ɓahri, ku ɓa nzuk yeri.

⁹Ké sakra wah, ke kehr ziɓri ke sa̧wnzuk a ɓoruri ya. Ku kan law tul Ŋgermbay, mí ke lu ɓay hul buma ké tul woyri keni pi.

¹⁰Kaŋaw wa, ɓay fe mí i ƴo fah Ŋgerzah le ? I yih ɓay ɓaŋ bolkusol a yih-u kan tul nzuk-dih fal Ŋgermbayri le wo ? Sukna ra, zih wahri mini a wah gaŋ kara nah mah suku ya.

¹¹Nzukri na ɓa gun puh lakna Ŋgermbay ɓay fe laɓna bolkusol Ŋgerzah ya. A wah kara Ŋgerzah ya̧ na ɓa nzuk yeri ɓay tul lawsuki Ŋgermbay Zezu ké nah kan law tulu kandɔk a woyri kaŋ pi. »

¹²Fal ɓay Piyer, nzukri gbam kaɓ silili. Barnabas ke Pɔl ba, ndazi ɓay fe saŋri ké Ŋgerzah hi̧ niri ku laɓ ké sakra sa̧wnzuk a ɓoruri.

¹³Ku ɔk nzak woyri, mí Zak ur, ke ɓahri se : « Yi̧n biri, í lah mi.

¹⁴Simu Piyer sɔk na ani mí Ŋgerzah ko kona tul sa̧wnzuk a ɓoruri ke titilu kaŋ, ɓay hi̧ nzuk a haniri ké sakra sa̧wnzuk a ɓoruri-aw ɓá na ɓa sa̧wnzuk ye.

¹⁵Ɓayay si mah hani ke ɓay ɓahna gun nzak pihna Ŋgerzah a lewsa̧ri. Ku vbeh ɓayu na ɓil mbete Ŋgerzah kandɔkay :

¹⁶Bol fal gbakra hani gun puh lakna ŋgermbay Daviɗri ra, Ŋgerzah ɓahri se, a ye, ke él gi. A ye, ke mbóh vul Daviɗ mbay a luki[99] ké haw wuruk wurukaw ɓay hí̧ puh lakna ye el, ke ƴó gel ƴona ye a pol ɓay hi̧ tɔr nzukri ké toŋ ɓá ƴah ni ye, ɓay hi̧ sa̧wnzuk a ɓoruri gbam ké-e ɗi niri ɓa nzuk yeri, kú ƴah ni ye. Miƴori ɓah kaŋ, a ye ke laɓu.

¹⁸Ke ten sa̧w fe a lewsa̧ri. »

¹⁹Dale Zak kuŋ salɓay ra ɓahri : « Sa̧wnzuk a ɓoruri ké el gi ta̧w Ŋgerzah ra, su-su le, náh zukru kerɓay woyri ya.

²⁰Su-su ɓay náh vbeh mbete hi̧ niri ɓay kú ɗih ke fe ké ɓay sih law nzuk ɗi-ɗih. Kú dim záh ya, kú laɓ nunpuki ya, hay a a̧y kú-u vbeh ya ra kú su̧ ya, kú su̧ sem ya pi[100].

²¹Ɓayu ké bolkusol Ŋgerzah ké Moyiz vbeh ra, ku sɔk ɓayuri ke puhri gbam lewsa̧ kaŋ. Ku ƴo ki̧-u ké ɓil vul misoŋ woyri ke nam ɔknari riw. »

²²Bale gun nzak pihna Ŋgermbayri, ŋgernzuk vul misoŋri ke sa̧w nzuk Ŋgermbay a ɓoruri gbam ku ko su-su ɓay lu nzukri ké sakra woyri ɓay pih niri si Antiyos ziŋ Pɔl ke Barnabas. Ku lu Silas ke Zuda ké riŋ ye a ɓoru ɓa Barsabaɗ. Seɗe mbɔk woyri, nzuk yi̧n ɓil Ŋgermbayri lu lakna ɓay woyri lu.

²³Ku vbeh mbete kandɔkay pih niri keni : A wah gun nzak pihnari ke ŋgernzuk vul misoŋri ké Zurusalem, nah vah wuri a woiri sa̧wnzuk a ɓoruri ké i ɓa yi̧n wah ɓil Ŋgermbay, ké i kaɓ Antiyos, tusiɓa Siri ke tusiɓa Silisi.

²⁴Nah lah ɓahri se, nzuk a haniri ké sakra wah-ay ur si zɔklɔ wuri. Ku zukru kerɓay woiri ke ɓay ɓahna woyri, mí ɓay hi̧ nzukri ké kan law tul Ŋgermbay ɓá kuŋ ndi̧w ra le, ɓayaw ur ké ta̧w wah ya.

²⁵Kaŋ mí nah mbu̧h nzak mbew, nah ko su-su mí nah lu Silas ke Zuda. Nah pih niri si ta̧w woiri, mí ku ɓaŋ maŋlaw wahri Barnabas ke Pɔl kú-u poŋ mun woyri lewsa̧ hi̧ hul ɓay tul Gaŋ wah Ŋgermbay Zezu.

²⁷Nah pih Zuda ke Silas. Ku ka̧h le, ku ndázi ɓayri ké nah vbeh-ay ra hi̧ wuri í lah.

²⁸Nah pih niri ɓayu ké ɓayri ké na ɓil mbete-ay rih law Tempuki, rih law wah pi. Nah pih ɓay hi̧ bolkusol-kuŋ ndi̧w ke bolkusol a ɓoruri ké Ŋgerzah hi̧ Moyiz vbeh ra ɓá na ɓa sukna a yih-u ké tul woiri ya. Wara le, ɓa ɓayri-ay mí nah pih hi̧ wuri :

²⁹Í ɗih wuri ɗih ke fe su̧na kú-u puh hi̧ záhri. Í su̧ sem ya. Hay a a̧y ké vbeh ya kara, í su̧ ya. Í laɓ nunpuki ya. I saŋ feri-ay le, ɓa fe suki mí i laɓaw. A wah yi̧n woiri ɓil Ŋgermbay, nah vah wuri.

³⁰Silasri ur ké Zurusalem tɔr. Ku si ka̧h Antiyos. Ku mbu̧h sa̧w nzuk Ŋgermbayri, mí ku ndar mbete ra ndoh ndɔk woyri.

³¹Ku ki̧ bale, law nzukri rih niri rih ɓay tul ɓay a suki ké na ɓil mbete-u voh law woyri.

³²Silas ke Zuda, ku ɓa gun nzak pihna Ŋgerzah mí Tempuki ɓaŋ ɓay ɓa ŋgi̧-u ndoh nzak woyri, ku ɓah hi̧ nzuk yi̧n ɓil Ŋgermbayri. Ku hew niri mí ku ƴo ke Ŋgermbay ɓa kpuh-u kpatara.

³³Ku kaɓ ri nam mah fe, mí nzuk yi̧n ɓil Ŋgermbayri vbar niri ke ɗeŋ hi̧ ku el si ta̧w nzukri ké pih niri.

³⁵Pɔl ke Barnabas kaɓ Antiyos. A woyri ke daɓa nzuk-dih fal Ŋgermbay a ɓoruri, ku sɔk ɓay lak mbay Ŋgermbay Gaŋ tul feri riw, ku ka-kah ɓayu hi̧ nzukri lah.

³⁶Laɓ nam mah fe dara mí Pɔl ɓah hi̧ Barnabas ɓahri : « Náh el si ko yi̧n wah ɓil Ŋgermbayri ké puhri gbam ké nah ka-kah ɓay lak mbay Gaŋ tul feri riw ké ri ɓay ko ani mí yi̧n wah ɓil Ŋgermbayri ƴo tul ɓay ké ku lah ra le. »

³⁷Barnabas yih ɓay maŋ Za̧h-Marki si ziŋ niri.

³⁸Mí Pɔl ko ni ke mah ɓay si ziŋ niri ya, a ye ke poŋ niri ké Pamfili, ke laɓ pihna ziŋ niri mba.

³⁹Fahɓay ur ké sakra woyri hi̧ ku kehr hani. Barnabas mbi Za̧h-Marki. Ku puh gel kaɓna ɓil kumbon tɔr si Siper.

⁴⁰Pɔl ba, lu Silas. Nzuk yi̧n ɓil Ŋgermbayri poŋ niri ku̧ ɓil ndɔk Gaŋ tul feri riw ke lawsuki ye dara mí ku tɔr ɓáy.

⁴¹Pɔl si tusiɓa Siri ke tusiɓa Silisi ƴo hi̧ sa̧w nzuk Ŋgermbayri ŋgerna kú ƴo ke Ŋgermbay ɓa kpuh-u.