Read Karang Mbete Fe laɓna Tempuki 16 Bible Online

Mbete Fe laɓna Tempuki 16 - Karang bible

Mbete Fe laɓna Tempuki 16

¹Pɔl ke Silas si ka̧h Derbe ke Listere[102]. Mí ku ziŋ nzuk-dih fal Ŋgermbay a hani. Riŋ ye ɓa Timote. Sa̧w ye ɓa ziɓ ké fál mah[103]. Mah ye kan law tul Ŋgermbay. Bah ye ɓa gerek.

²Nzuk yi̧n ɓil Ŋgermbayri ké Listere, ké Yikoniyam, ku lu lakna ɓay Timote ɓa suki.

³Pɔl yih ɓay hi̧ ni ké na ɓa bɔh sina woyri. Kandɔkaw, Pɔl hi̧ Timote kuŋ ndi̧w ɓayu ké ziɓri ké kaɓ tusiɓa-aw ko ni ɓa ziɓ, mí ku tu-tu ɓahri se, bah ye ɓa gerek.

⁴Puhri gbam kú-u kal ké ri le, ku ƴo sɔk sa̧w nzuk Ŋgermbayri salɓay ké gun nzak pihnari ke ŋgernzuk vul misoŋri ké Zurusalem kuŋ ra[104], kú ƴo tulu.

⁵Kaŋ mí sa̧w nzuk Ŋgermbayri ƴo ŋger ké ɓil kan law woyri kpatara. Namri gbam, ŋgi̧na woyri si ma pol pol.

⁶Bale ku si ké tusiɓa Firizi-Galaɗ ɓay fe le, Tempuki gboh niri sí tusiɓa Azi[105] ɓay sɔk ɓay Ŋgermbay ké ri.

⁷Ku ka̧h mahful sekle tusiɓa Misi. Ku yih ɓay rih tusiɓa Bitini, mí Tem Zezu hi̧ niri ful rih-u ya.

⁸Ku mbi ful tusiɓa Misi, mí ku ɗer si Torowa, puh a luki ké ɓel mahmbih Medeterani.

⁹Ke suŋaw, Pɔl lɔl. Ke ko nzuk Maseduwan a hani ƴo síɓa goŋ ni ɓahri : « Mú gi Maseduwan, mú so na. »

¹⁰Bol fal lɔlɔ Pɔl bale nah eɓ ful ɓay tɔr si Maseduwan[106]. Nah tu ɓahri, Ŋgerzah pih na ma ma ri ɓay náh si sɔk ɓaysuki lák mbay Ŋgermbay hi̧ nzukri.

¹¹Ké Torowa, nah puh gel kaɓna ɓil kumbon. Nah tɔr si Samutarasi. Tipele-u, nah puh gel kaɓna ɓil kumbon si Neyapol.

¹²Ké gelaw nah ur si Filipi, puh a luki ɓil distirik a hani ké Maseduwan. Puh-aw, gel pihna ŋgomna-u ɓa rɔmri. Nah kaɓ ri nam mah fe.

¹³Nam ɔkna ka̧h bale, nah ti̧h ke ɓil puh-aw si ɓel mbih[107]. Nah ker ɓahri, nah zíŋ gel-goŋ Ŋgerzah ziɓri[108]. Nah ka̧h. Mí nah ziŋ wu̧yri mí mbu̧h hani ké ri. Nah kaɓ ƴo lu mberem ziŋ niri.

¹⁴Wu̧y mbew ké sakra wu̧yri-aw, riŋ ye ɓa Ledi. Pihna ye ɓa ɗam yargar ké lari-u ɓa ŋgeru. Sa̧w puh ye ɓa Tiyatir. Ke ɓa ziɓ ya, mí ke ƴo dim Ŋgerzah ziɓri. Ke ƴo lah ɓay wah bale, Gaŋ tul feri riw mgbur law ye ŋgah hi̧ ni ke ya̧ ɓay mberem Pɔl ke law rihna.

¹⁵A ye ke nzuk kerpuh yeri, ku ti̧h mbih batem. Bol falu, ke goŋ na ɓay náh si puh ye. Ke ɓahri, nah ko ni, ke kan law tul Gaŋ tul feri riw ɓa ketina le, náh si kaɓ puh ye. Ke goŋ na ke kɔkrɔya ɓay náh ya̧ ɓay ye.

¹⁶Nam ké nah ti̧h ɓay si ma gel-goŋ Ŋgerzah ra dale, gun tikla a hani ɓa mgbal, nzɔh nun wah, mí ke el dih fal wah. A ye-aw, záh ƴo ziŋ ni hi̧ ni ke na ɓa nzuk fe kona. Pihna ye ƴo gi ke lari ɓa ŋgi̧-u hi̧ bahgaŋ yeri. Ke dih fal wah kparvbaw. Ke vba̧ nzak le, ke vba̧ ra ɓáy ɓahri : « Nzukri-ay ɓa gun-laɓ pihna Ŋgerzah ké deɓ ye ta-a. Ku ƴo sɔk wuri mahful kaɓ ke ɔkna ɓa ŋgɔh. »

¹⁸Ke laɓ kaŋ nam ke nam hi̧ law Pɔl fa̧h. Mí ke sɔɓ nun bale, ke ɓah hi̧ záh ra ɓahri : « Ke riŋ Ŋgermbay Zezu, mi sɔk mu, mú ti̧h ke tul gun wu̧yaw. » Mí záh ra ti̧h ke sa̧wseh-u gaŋ.

¹⁹Bahgaŋ yeri ko ɓahri, ŋgoro fe su̧na woyri vbar da, mí ku mgba Pɔl ke Silas. Ku kɔklɔ niri kpola kpola si gel-kuŋ salɓay.

²⁰Ku ka̧h ta̧w ŋgernzuk-kuŋ salɓay Rɔmri. Ku ɓahri : « Nzukayri-ay ɓa ziɓ. Ku ƴo gbur puh wah ke ɓay.

²¹Ku ƴo sɔk fe a a̧y ké a wah, nzuk tusiɓa Rɔmri, nah mah laɓu ya. Nah mah ya̧-u ya pi. »

²²Daɓa nzukri ur ku̧ tul Pɔl ke Silas. Ŋgernzukri gɔh gar Pɔl ke Silas ratata ratata, mí ku hi̧ gunbɔk pihnari vba̧ niri ke ka̧wkpuh vbir vbir.

²³Ku vba̧ niri ndɔk ŋgi̧ mbamba dara mí ku si ziŋ niri mbih vul mgbal. Ku ɓah hi̧ ŋgernzuk soze-kɔr mgbalri ɓá mbih niri liɓ liɓ ɓa suki.

²⁴Ke lah nzak pihna-aw bale, ke mbih niri vul mgbal gel a gbu̧h-u, mí ke ɓar bɔk woyri ke ɗah a yih-u[109].

²⁵Pɔl ke Silas ƴo goŋ Ŋgerzah ke siŋ dimna ke haŋgel. Tɔr mgbal a ɓoruri te suk ƴo lah-u.

²⁶Wara mí tusiɓa laŋ yik yik. Diŋ vul mgbal kara laŋ pi. Sa gelaw mí nzak vulri mgbur, sal lari kú-u ŋga̧h keni mgbalri sel riw.

²⁷Ŋgernzuk soze-kɔr mgbalri ra ba, tom yirkiɗ ke nam le, ke ko nzak vul mgbal na ŋgah ŋgah. Ke ker ɓahri, mgbalri ɗuk da. Bale ke lu mahwu̧y pevbȩɗ ɓay i keni tul ye.

²⁸Mí Pɔl ɓah ɓay ɓeleŋ hi̧ ni ɓahri : « Mú i tul wo ya. Nah ƴo ri-ay gbam wah. »

²⁹Ŋgernzuk soze-kɔr mgbalri ra vbi hɔrɔ. Ku hi̧ ni hɔrɔ. Ke ɗuk ɓa gah-u rih tul Pɔl ke Silas. Mun ye to kpak kpak, ke huk siɓa gburuk ké pol woyri.

³⁰Ke ten niri ke ɓil vul a gbu̧h-u ra, mí ke vbi niri ɓahri : « Ŋgernzukri, mi láɓ ani ɓay kaɓ ke ɔkna ɓa ŋgɔh ra le ? »

³¹Ku yih nzak ye ɓahri : « Mú kan law tul Ŋgermbay Zezu, Gaŋ tul feri riw le, ke yá̧ mu ɓa gun puh lakna ye, a wo ke nzuk kerpuh wori. »

³²Ku sɔk ni ɓay Gaŋ tul feri riw, a ye ke nzuk kerpuh yeri gbam, ku lah.

³³Suŋaw gaŋ mí ŋgernzuk soze-kɔr mgbalri ra maŋ niri si wɔk no̧ko woyri. Bol falu mí ke hi̧ niri, ku soh ni mbih batem, a ye ke nzuk yeri riw.

³⁴Ke maŋ Pɔl ke Silas si puh ye. Ke mgba niri ɓa suki, ke hi̧ niri fe su̧na. A ye ke nzuk yeri, ku ziŋ mun rihna ɓayu kú-u kan law tul Ŋgerzah.

³⁵Tipele teh mí ŋgernzuk-kuŋ salɓay Rɔmri pih soze woyri si sɔk ŋgernzuk soze-kɔr mgbalri ɓahri, ké poŋ nzukawri ɓá tɔr.

³⁶Ŋgernzuk soze-kɔr mgbalri ra el sɔk Pɔl ɓahri : « Ŋgernzuk-kuŋ salɓayri pih nzak pihna hi̧ mi ɓay mí poŋ wuri. Kaŋ dale í ti̧h, í si wuri ɓa suki wara. »

³⁷Mí Pɔl el ke ɓay hi̧ sozeri ké gi ra ɓahri : « Ku kuŋ salɓay ké tul wah ya, mí ku vba̧ na ké nun nzukri mgbum, a wah ké nah ɓa gun puh lakna Rɔmri dara mí ku mbih na ké vul mgbal. Mí aŋay le, ku yih ɓay náh ƴa-ƴahra, mí náh ti̧h. Ta laɓ kandɔkaw ya. Kú gi ten na ke mun woyri gaŋ. »

³⁸Sozeri ké gi ke nzak pihna ŋgernzuk-kuŋ salɓay Rɔmri ra el si ndazi ɓayu hi̧ niri. Ku lah ɓahri se, Pɔl ke Silas ɓa gun puh lakna Rɔmri bale, hȩkme laɓ niri.

³⁹Ŋgernzukri ra ur gi ta̧w woyri gɔl niri. Ku ten niri ké ɓil vul mgbal. Ku goŋ niri kú tɔr ké puh woyri.

⁴⁰Mí Pɔl ke Silas ti̧h, ku si puh Ledi. Ku ziŋ nzuk yi̧n ɓil Ŋgermbayri ké ri. Ku hew niri ke ɓay Ŋgermbay, mí ku tɔr.