Read Karang Mbete Fe laɓna Tempuki 17 Bible Online

Mbete Fe laɓna Tempuki 17 - Karang bible

Mbete Fe laɓna Tempuki 17

¹Pɔl ke Silasri mbi mahful[110]. Ku si ka̧h Amfipoli ke Apoloni, mí ku kal si Tesaloni. Ké puh-aw, vul misoŋ ziɓri ƴo ri.

²Kandɔk ké ɓa fe laɓna ye, ke si vul misoŋ ziɓri ke bɔh sina yeri. Ɓil nam ɔknari ké dih fal hani sayaw, ke mbi ɓay Ŋgerzah ké ɓil mbete vbehna Moyiz ke mbete vbehna gun nzak pihna Ŋgerzah a lewsa̧ri, ku ɓah ɓayu ziŋ haniri.

³Ke mbi mbete ra sɔk niri ɓay Ŋgermbay ke fulu fulu, ke ɓah ɓa teh-u ɓahri se, Ŋgerzah lek hi̧ Ŋgermbay ko seh hul, ke sɔk ɓay ti̧hna ye ke puh záh. Dara mí ke el ɓahri : « Ŋgermbay ké mi sɔk wuri ɓay ye-ay ra gi, a ye mí ke ɓa Zezu. »

⁴Nzuk a haniri ké haŋsekle woyri ya̧ ɓayu. Ku mbu̧h ziŋ Pɔl ke bɔh sina yeri. Daɓa gerekri ké ƴo dim Ŋgerzah ziɓri ƴo ri. Wu̧y riŋ ɗinari mah fe ƴo sakra woyri pi.

⁵Bale sere rih law ziɓ a haniri, mí ku mbu̧h kɔk nzukri ké kaɓ gɔr gɔr ké ɓel mgboŋ. Ku fa̧h niri si keni wuh wuh, ku zukru kerɓay nzukri ɓil puh hi̧ puh laŋ. Ku si ka̧h kerpuh Zasoŋ[111]. Ku si ƴah Pɔl ke Silas ɓay ten niri ma sakra nzuk puhri.

⁶Mí ku ziŋ niri ya. Ku kɔklɔ Zasoŋ ke nzuk yi̧n ɓil Ŋgermbay a haniri, si keni pol ŋgernzuk puhri. Ku ɓah ɓay ke ŋgere ŋgere ɓahri : « Nzukawri-aw ƴo gbur tusiɓa gbam, mí aŋay, ku ka̧h puh wah-ay da.

⁷Zasoŋay ba, ya̧ niri na puh ye. Nzukawri-aw gbam ɓahri, mbay a ɓoru ƴo ri. Riŋ mbay woyri ɓa Zezu, mí ku to ɓay mbay sezar ma kpah. »

⁸Ɓayu-aw zukru kerɓay nzukri ke ŋgernzuk puhri gbam.

⁹Ku hi̧ Zasoŋ ke tɔr nzuk yi̧n ɓil Ŋgermbay a ɓoruri, ku puh lari dara mí ku poŋ niri tɔr ɓáy.

¹⁰Suŋ sih bale, nzuk yi̧n ɓil Ŋgermbayri pih Pɔl ke Silas seɗe mbɔk si Bere. Ku ka̧h, mí ku kal si vul misoŋ ziɓri.

¹¹Ziɓri ké Bere na kandɔk ziɓri ké Tesaloni ya. Ku ɓa nzuk ru̧nari. Ku ya̧ nzak pihna ké Pɔl gi keni ra ɓa suki. Namri gbam, ku ƴo fakla ɓil mbete vbehna Moyiz ke mbete vbehna gun nzak pihna Ŋgerzah a lewsa̧ri ɓay tu ɓahri, ɓay ké Pɔl ɓah-ay ra wa, ɓa ketina gaŋ le ?

¹²Mí daɓa ziɓri kan law tul Ŋgermbay. Ké haŋsekle gerekri kara, wu̧y riŋ ɗinari ke wo̧rori ɓa ŋgi̧-u kan law tul Ŋgermbay pi.

¹³Dale ziɓri ké Tesaloni lah ɓahri, Pɔl ƴo ka-kah ɓay puh lakna Ŋgerzah ké Bere bale, ku si ri. Ku zukru kerɓay nzukri hi̧ puh laŋ yik yik.

¹⁴Wara mí nzuk yi̧n ɓil Ŋgermbayri maŋ Pɔl ɗuk ɓa gah-u si ɓel mahmbih ɓay ké mbi kumbon. Silas ke Timote ba, ku kaɓ Bere.

¹⁵Nzuk yi̧n ɓil Ŋgermbayri puh kumbon, ku ɓaŋ Pɔl kpu̧ru ka̧h Aten dara mí ku el ɓáy. Pɔl pih niri ɓahri, kú si sɔk Silas ke Timote ɓá gi ziŋ ni ɓa gah-u.

¹⁶Pɔl ƴo geŋ niri ké Aten. Ke ha̧rma ɓil puh-aw. Ke ko sam fe záhri ɓoɗ ɓoɗ mbah ri, mí law ye se ni ɗɔk ɗɔk ɓayu.

¹⁷Kaŋ mí ke ƴo lu mberem ɓay Ŋgermbay Zezu nam ke nam ké ɓil vul misoŋ ziŋ ziɓri ke sa̧wnzuk a ɓoruri ké ƴo dim Ŋgerzah. Ké lumu kara, ke ƴo lu mberemu ziŋ nzuk a suŋ suŋ ké-e ziŋ ké ri pi.

¹⁸Bale nzuk-ten sa̧wɓayri kú-u ɗi niri ɓa Epikiri ke Esotikiri loh hehr gi ta̧w ye lu mberem ziŋ ni[112]. Nzuk a haniri ɓahri : « A fe mí gbahla-ay ƴo ɓah-u le ? » Nzuk a ɓoruri ɓáy ɓahri : « Ko ya le, ke ƴo ɓah ɓay záh a kalari hi̧ na munu. Ke sɔk ɓay záh a ɓoru ké riŋu ɓa Zezu ke ɓay ti̧hna záhri ke pa̧ymun a foyu. »

¹⁹Mí ku maŋ Pɔl si ndiseŋe ké riŋu ɓa Aropaz ké pol daɓa nzukri. Ku vbi ni ɓahri : « Mahful ƴo ri ɓay náh tu sa̧w fe sɔkna wo a foyu ké mu gi keni-ay ra le ?

²⁰Ɓay fe le, nah lah ɓay a foyuri, mí nah yih tu sa̧wu ɓa teh-u. »

²¹Nzuk Atenri ke sa̧wnzuk a ɓoruri ké ɗeh puh ké Aten gbam zi sa̧wseh woyri ɓay lu mberem ke lah ɓay a foyuri.

²²Wara mí Pɔl ur síɓa ké sakra nzukri ké ndiseŋe ra, mí ke yih nzak woyri ɓahri : « A woiri nzuk Atenri, mi ko ɓahri, ɓil fe laɓna woiri gbam, i ƴo dim záhri dim.

²³Mi ha̧rma ɓil puh woiri gbam, mi ko gel kaniri ɓoɗ ɓoɗ bale, mi ziŋ gel kani a hani kú-u vbeh fe kan ri kandɔkay : “Nzuku a záh ké nah tu ni ya.” Mí záh ké i dim ni dan tu ni ra mí-i gi sɔk wuri ɓay ye-ay.

²⁴Ŋgerzah, nzuk-laɓ nunmbam ke tusiɓa ke feri gbam ké na ɓilu, a ye, ke ɓa Gaŋ tul feri riw, mí ke ta kaɓ gel kani ké nzukri mboh ya.

²⁵A ye, ke ta ke ɗaka ɓay nzuk ɓá hi̧ ni fe ya. Nzuk-mgba sa̧w ye kara ta-a pi. A ye ma, mí ke laɓ nzuk, ke hi̧ kuna ku nzuk, ke hi̧ fe a ɓoruri gbam hi̧ nzuk pi.

²⁶Ke laɓ nzuk mbew, mí ke hi̧ sa̧wnzukri gbam ti̧h ke ɓil nzuku ku̧ tusiɓa. Ke kehr tusiɓa hi̧ sa̧wnzukri, ke hi̧ niri sew kaɓna woyri.

²⁷Ke laɓ sa̧wnzukri ɓay kú nzah ni. Ku ndar ndɔk ƴah ni le, ku zá ni. Mí ketina, ke ƴo ɗih ya ké ta̧w wah mbew mbew gbam ɓay fe le, sa̧w ɔkna wah, ha̧rma wah, káɓ tukala wah gbam na ta̧w ye kandɔk ké nzuk woiri a haniri ten siŋ ɓahri : A wah nah ɓa sa̧wkani ye.

²⁹Ké nah ɓa gun yeri, nah ta ker ɓahri, Ŋgerzah ɓa záh fal fe záhri ya. Ke ta ɓa záh lari lɔr mini lari a garu mini kasaw ké nzukri laɓ ke kerɓay woyri ya.

³⁰Lewsa̧, Ŋgerzah ik law ké tul nzukri ké ƴo dim záhri ɓayu ké ku ɓa ra̧w. Wara mí, ke ƴo ɓah hi̧ nzukri gbam ké gelri riw ɓá mbi law ké tul záh woyri ma fal, kú el kan law tul ye ɓayu ké-e lu nam-kuŋ salɓay nzuk tukalari gbam, mí ke mbi nzuk ké mah ɓay kuŋ salɓay ke gelu gelu kandɔk ké-e ti̧h ke puh záh ke pa̧ymun a foyu. »

³²Ku lah Pɔl ƴo ɓah ɓay záhri ké ɓay ziŋ pa̧ymun a foyu bale, nzuk a haniri sak ni sak. Nzuk a ɓoruri ba, ɓahri, ku yih lah ɓayaw ra ɓáy.

³³Kaŋ mí Pɔl ti̧h ké sakra woyri.

³⁴Nzuk a haniri mbu̧h ziŋ ni, ku kan law tul Ŋgermbay. Ké sakra nzuk-kan law tul Ŋgermbayri-aw, Denis ké ɓa ŋgernzuk ndiseŋe ke wu̧y a hani ké riŋ ye ɓa Damari dara mí ke nzuk a ɓoruri pi.