Read Karang Mbete Fe laɓna Tempuki 18 Bible Online

Mbete Fe laɓna Tempuki 18 - Karang bible

Mbete Fe laɓna Tempuki 18

¹Bol falu Pɔl ur ké Aten tɔr si Kɔrente.

²Ké gelaw, ke ziŋ ziɓ a hani ké riŋ ye ɓa Akila. A ye, ku mbuŋ ni ké tusiɓa Poŋ. Nam ro ya ɓáy, mí ke ur ke Rɔm ké tusiɓa Itali ke wu̧y ye Pirisil ka̧h Kɔrente ɓayu ké sezar Koloɗ mbay a luki ni̧h ziɓri ké ɓil puh kaɓna mbay ye. Mí Pɔl mbu̧h ziŋ niri.

³Ké goso pihna woyri mah hani, ke kaɓ ƴo laɓ pihna ziŋ niri. Pihna-u ɓa pihna-sa̧h ho̧ko ɓa vul a pɔru.

⁴Nam ɔknari gbam, Pɔl ƴo lu mberem lak mbay Ŋgermbay ké vul misoŋ ziɓri. Ziɓri ke gerekri ƴo ya̧ ɓayu.

⁵Silas ke Timote ur ke Maseduwan gi ka̧h bale, Pɔl poŋ pihna-sa̧h ho̧ko, ke mbi mun ye rih ɓil pihna-sɔk ɓay Ŋgermbay mbew yaŋ wara. Ke ƴo sɔk ziɓri ɓa teh-u ɓahri, Zezu mí ɓa Ŋgermbay.

⁶Mí ziɓ a haniri to ɓay ɓahna ye ma kpah. Ku ɓeɓ riŋ Ŋgermbay bale, Pɔl kpoh kasal gar ye[113]. Ke ɓahri : « Ɓeɓna woiri ɓa ɓay woiri, ɓayu ko mi mba. Aŋay, mi sí ma ta̧w sa̧wnzuk a ɓoruri wara[114]. »

⁷Ke ti̧h ke vul misoŋ ziɓri, mí ke si puh Titiyusi Zusteŋ. Ke ɓa nzuk-dim Ŋgerzah ziɓri. Puh ye na ɓel vul misoŋ ra.

⁸Kiripusi, mbay vul misoŋ ziɓri-aw kan law tul Ŋgermbay Gaŋ tul feri riw, a ye ke nzuk kerpuh yeri gbam. Daɓa nzuk Kɔrenteri kara, lah ɓay ɓahna Pɔl, mí ku kan law tul Ŋgermbay, ku ti̧h mbih batem pi.

⁹Suŋ a hani bale, Gaŋ tul feri riw rih tul Pɔl ke lɔlɔ ɓahri se : « Mú laɓ hȩkme ya. Mú poŋ nzak wo ya. Mú ɓah ɓay bi ma pol pol, mi ƴo ziŋ mu gaŋ. Nzuk mbew ké ɓay laɓ fe a se-u ziŋ mu ta-a ɓay fe le, nzukri ŋgi̧-ŋgi̧ mí ɓa mi̧hri biri ké ɓil puh-ay. »

¹¹Pɔl el kaɓ Kɔrente laɓ mbihmbam mbew ke few tɔtɔklɔ. Ke sɔk nzukri ɓay lak mbay Ŋgerzah.

¹²Sew ké Galyoŋ ɓa guvener a foyu ké tusiɓa Akay, mí ziɓri mbu̧h nzak mbew bale, ku mgba Pɔl si keni gel-kuŋ salɓay.

¹³Ku goh ni ɓahri : « Gunwo̧ro-ay ƴo rah nzukri ɓá dim Ŋgerzah ke mahful a a̧y ké si ke bolkusol wah ya. »

¹⁴Pɔl ah haw ye ɓay ɓah ɓay wara mí guvener mbi ɓay. Ke yih nzak ziɓri ɓahri : « Gelke ɓa bolkusol tusiɓa mí ke ɓeɓ mini mgbɔrɔ mí ke laɓ le, mi yá̧ sekna woiri ziɓri.

¹⁵Mí kandɔk ké ɓa fahɓay tul ɓay ɓahna, tul riŋ feri, tul bolkusol woiri le, a woiri mí í ko ɓayu. A bi le, mi sa kuŋ salɓay a kandɔkawri ya. »

¹⁶Ke ni̧h niri ké gel-kuŋ salɓay ye.

¹⁷Bale ku el mgba Sosten mbay vul misoŋ ziɓri. Ku vba̧ ni vbir vbir ké gel-kuŋ salɓayaw. Guvener Galyoŋ ba, fer niri ya pi.

¹⁸Pɔl kaɓ Kɔrente nam mah fe dara mí ke vbar nzuk yi̧n ɓil Ŋgermbayri, mí ke tɔr. Pirisil ke Akila si ziŋ ni. Ku ka̧h Senkere. Ku puh gel kaɓna ɓil kumbon. Pɔl yih si ma tusiɓa Siri, mí ke su̧h tul ké Senkere ɓay nam-saŋ mun ye ké-e wah ziŋ Ŋgerzah ɔh da.

¹⁹Ku dah ké Efeze. Pɔl poŋ bɔh sina yeri. Ke kal si vul misoŋ ziɓri, ke lu mberem Ŋgermbay ziŋ niri.

²⁰Ku goŋ ni ɓay ké kaɓ ziŋ niri nam ma pol ɓáy, mí ke sa-a.

²¹Ke vbar niri ɓahri : « Ŋgerzah yih le, mi él gi ta̧w woiri ɓáy. » Ke el si hil kumbon, mí ke tɔr.

²²Ke ka̧h Sezareh ké tusiɓa Siri, mí ke hil si Zurusalem. Ke vah sa̧w nzuk Ŋgermbayri dara mí ke ɗer si Antiyos ké tusiɓa Siri ɓáy.

²³Ke kaɓ ri nam mah fe dara mí ke tɔr. Ke ha̧rma ké tusiɓa Galaɗ ke tusiɓa Firizi ƴo hi̧ nzuk-dih fal Ŋgermbayri gbam ŋgerna ƴo ke Ŋgermbay ɓa kpuh-u.

²⁴Ziɓ a hani mbew ka̧h Efeze. Riŋ ye ɓa Apolo. Ku mbuŋ ni ké Aleksandere ké tusiɓa Eziɓte. Ke ɓa nzuk-tu mahful ɓah ɓay, ke ɓa nzuk goso-tu mbete vbehna Moyiz ke mbete vbehna gun nzak pihna Ŋgerzah a lewsa̧ri.

²⁵Ku firma ni mahful ké Gaŋ tul feri riw nda hi̧ nzuk yeri ɓa teh-u. Tempuki ƴo ziŋ ni, mí ke ɓer ɓay ke mun rihna. Ke ti̧h mbih batem nzuku a Za̧h[115] kaŋ ɓáy, mí ke toŋ ka-kah ɓay Zezu. Ke sɔk nzukri ɓayu ke gelu gelu.

²⁶Apolo ra ka̧h Efeze, mí ke titil sɔk ɓay Ŋgermbay ɓa teh-u ɓil vul misoŋ woyri ziɓri. Pirisil ke Akila lah ɓay ye, mí ku maŋ ni gi ta̧w woyri. Ku firma ni fulɓay Ŋgerzah ma pol ɓáy.

²⁷Apolo yih ɓay si ma Akay, mí nzuk yi̧n ɓil Ŋgermbayri ké Efeze so ni. Ku vbeh mbete hi̧ nzuk-dih fal Ŋgermbayri ké Akay ɓay kú ya̧ ni ɓa suki. Ka̧hna ye ti̧h suk hi̧ nzukri ké kan law tul Ŋgermbay ɓay tumbɔl lawsuki Ŋgerzah.

²⁸Ke mbi mbete vbehna Moyiz ke mbete vbehna gun nzak pihna Ŋgerzah a lewsa̧ri sɔk keni ɓa teh-u hi̧ ziɓri ké pol daɓa nzukri ɓahri, Zezu mí ɓa Ŋgermbay gaŋ, mí ku ta̧h ma̧y ɓayu kpu̧y.