Read Karang Mbete Fe laɓna Tempuki 19 Bible Online

Mbete Fe laɓna Tempuki 19 - Karang bible

Mbete Fe laɓna Tempuki 19

¹Seh ké Apolo ƴo Kɔrente-aw, Pɔl ba, mbi mahful tul kasaw si ka̧h Efeze. Ke ziŋ nzuk-dih fal Ŋgerzah a haniri ké ri.

²Ke vbi niri ɓahri : « Seh ké i ya̧ ɓay Ŋgermbay ra wa, i tu ke mun woiri ɓahri, Tempuki ɓa záh woiri, tu-tu le ? » Ku yih nzak ye ɓahri : « Bɔk mbew wah gel lah ɓay Tempuki ya. »

³Mí Pɔl el vbi niri ɓahri : « A̧w ba, batem a suŋ mí i ti̧h wuri ɓilu le ? » Ku yih nzak ye ɓahri : « Nah ti̧h ɓil mbih batem nzuku a Za̧h. »

⁴Pɔl ɓah hi̧ niri ɓahri : « Za̧h soh ziɓri mbih batem nzuku a mbilaw ɓay kú mbi law woyri el kan law tul Ŋgermbay woyri ké-e ƴo gina. Í lah, Ŋgermbay ra gi da. Ke ɓa Zezu. »

⁵Ku lah ɓayu lah, mí ku ti̧h mbih batem Zezu, Gaŋ tul feri riw ɓa nzuk yeri.

⁶Pɔl ɓaŋ ndɔk kan tul woyri, mí Tempuki gi rih tul woyri hi̧ a ge ge le, ɓah ɓay ke nzakri ɓoɗ ɓoɗ kú-u tu ya. Ku ɓah ɓay ké Tempuki ɓaŋ ndoh nzak woyri.

⁷Ŋgi̧na nzukuri laɓ boh falu seɗe.

⁸Laɓ few say Pɔl ƴo si vul misoŋ ziɓri. Ke ƴo ɓah tehɓay lak mbay Ŋgerzah hi̧ guh law woyri, ke ƴo lu mberemu ziŋ niri kpatara.

⁹Mí nzuk a haniri ba, kpuh tul. Ku ƴo ɓeɓ ɓay mahful si ta̧w Ŋgerzah ké pol daɓa nzukri ɓahri, Zezu ta ɓa Ŋgermbay ya. Mí Pɔl lu mun ye ké haŋsekle woyri. Ke fa̧h nzuk-dih fal Ŋgermbayri si mbu̧h niri ké likol. Likolu ɓa likol nzuk a hani kú-u ɗi ni ɓa Tiranu. Pɔl ƴo lu mberem Ŋgermbay namri gbam ziŋ niri ké ri.

¹⁰Ke laɓ kaŋ kaŋ mbihmbam seɗe hi̧ ziɓri ke sa̧wnzuk a ɓoruri ké kaɓ tusiɓa Azi gbam lah ɓay Gaŋ tul feri riw.

¹¹Ké ɓil mbihmbamu-aw, Ŋgerzah hi̧ Pɔl laɓ fe saŋ a mba-mba-uri pi.

¹²Nzukri fa̧h nzak gar pihna ké Pɔl ndoh si za keni nzuk senari le, sena woyri gah poŋ niri, záhri kara ti̧h ké tul nzukri pi.

¹³Ziɓ a hani ké ɓa ŋgernzuk fe puhna, riŋ ye ɓa Seva. Ke ƴo ke gunri toŋndɔk say. Gun yeri ɓa nzuk sa̧wkpuhri. Ku ha̧rma ƴo ni̧h záhri ké tul nzukri, mí nam mbew, ku mbi riŋ Zezu, Gaŋ tul feri riw. Ku rih tul nzuk a hani ké záh ƴo tul ye, mí ku ɓahri : « Ke riŋ Zezu ké Pɔl ƴo sɔk ɓayu ra, nah ɓah hi̧ mu, mú ti̧h. »

¹⁵Záh ké ƴo tul nzuk ra yih nzak woyri ɓahri : « Zezu le, mi tu ni tu. Pɔl kara, mi ko ni ko pi. Mí a woiri ba, i ɓa geri le wo ? »

¹⁶Nzuk ké záh ƴo tul ye ra, ur ziŋ niri katal ke nzak. Ke mba niri ke ŋgerna. Ke vba̧ niri ku̧ mbeleŋ mbeleŋ, ku ɗuk ndiwri ndiwri.

¹⁷Ziɓri ke sa̧wnzuk a ɓoruri gbam ké kaɓ Efeze-aw ra lah ɓayu bale, hȩkme laɓ niri, mí ku pir riŋ Ŋgermbay Gaŋ tul feri riw pir.

¹⁸Mí daɓa nzukri ké kan law tul Ŋgermbay gi ten ɓay fe laɓna su̧hru woyri, ku sɔk ɓay sa̧wkpuh woyri ké pol nzukri pi.

¹⁹Ŋgi̧na nzukri mah fe mí fa̧h mbete záh kú-u laɓ keni sa̧wkpuh woyri-aw gi keni ku̧ tul hani. Ku nzuh kum kum ké pol nzukri. Ku ki̧ suy lari mbete-uri le, lari-u mah lari pihna nam sɔɗ sɔɗ boh gel bon ndiɓi (nam 50.000).

²⁰Kaŋ mí ɓay lak mbay Gaŋ tul feri riw ya̧ gel ma pol pol ke ŋgerna ye.

²¹Pihna Pɔl ɔh ké Efeze bale, Tempuki hi̧ kerɓay ziŋ Pɔl ɓay ké si Zurusalem. Ke kál ke tusiɓa Maseduwan ke tusiɓa Akay dara ke ká̧h Zurusalem ɓáy. Ke ɓahri se : « Mi ka̧h Zurusalem le, mah ɓay mí si ko Rɔm, puh kaɓna sezar. »

²²Ke pih nzukri seɗe ké sakra nzukri ké ƴo so ni, si Maseduwan, Timote ke Arasi. A ye ba, ke ɓay kaɓ tusiɓa Azi nam ndi̧ ɓáy.

²³Ke sewu-aw, baw ɓay ur ké Efeze goɗi goɗi ɓay mahful Ŋgermbay ké nzukri mbi.

²⁴Ŋgernzuk vul tiw a hani ƴo ri. Riŋ ye ɓa Demtere. A ye mí ke tur ɓayaw. Ke ƴo tuh lari ɓa vul a mah gelu ŋgoɓ. Lari-u ŋge-ŋger. Vulu eŋ vul kani záh Artemi[116]. Nzukri ké ƴo laɓ pihna ziŋ ni-aw ya̧ lari pihna woyri ɓa ŋgi̧-u.

²⁵Mí ke mbu̧h mbaŋ yeri, nzukri ké ƴo tuh vul kani záh Artemi pi. Ke ɓah hi̧ niri ɓahri se : « Ya̧h biri, i ko wuri ko, pihna wahri-ay mí nah ƴo ziŋ keni lari.

²⁶I lah wuri lah, i tu wuri tu pi, Pɔlaw ra ƴo rah daɓa nzukri ké Efeze ɓahri, fe temri ké nzukri laɓ ɓay záh, ku ɓa kɔk záhri. Mí ke rah nzukri ké Efeze-ay kaŋto ya, ke rah nzukri ké tusiɓa Azi gbam pi.

²⁷Ɓay Pɔlaw seh par par le, ta ɓa pihna wah kaŋto mí nzukri ɓay ko ɓa fe a kɔku ya. Wara le, nzukri ké Azi ke nzuk tusiɓa a ɓoruri gbam ɓay poŋ dim Artemi, záh a luki. Ku ɓay poŋ vul kani ye na ndikpo dale, riŋ ɗina ye kara ɓay gbu̧h pi. »

²⁸Nzukri lah ɓayaw bale, law woyri fa̧h niri tuh tuh, mí ku vba̧ nzak gɔrɔm gɔrɔm ɓahri : « Artemi záh Efeze ɓa záh a luki. »

²⁹Ɓayu ya̧ ka̧w puh ya̧h ya̧h zukru kerɓay nzukri gbam, mí ku ti̧h ke ɗukna wuh wuh ma gel-mbu̧h hani a luki. Ku mgba bɔh sina Pɔlri seɗe, Gayus ke Arisitar kú-u ɓa nzuk Masadewanri. Nzukri kɔklɔ niri kpola kpola ma gel-mbu̧h hani ra.

³⁰Pɔl ba, yih ɓay si ma ta̧w daɓa nzukri-aw, mí nzuk-dih fal Ŋgermbayri gboh ni.

³¹Ŋgernzuk pihna ŋgomna a haniri ké tusiɓa Azi, ku ɓa ya̧h ke Pɔl. A woyri kara, ku pih nzak pihna hi̧ ni ɓay ké si gel daɓa ra ya.

³²Pɔl ta-a, nzukri ba, zukru ɓay maŋ. A ge ge le ɓah ɓay ye si kpa̧ra kpa̧ra. Ŋgi̧na nzukri tu sa̧wɓay mbu̧hna ra ya.

³³Mí ziɓri yih ɓay lu mun woyri. Ku to Aleksander kȩh hi̧ ni ke si ƴo pol daɓa nzukri. Aleksander ɔr ndɔk ɓay hi̧ nzukri ɓá poŋ suhɓay. Ke yih ɓay sɔk nzukri ɓahri, a woyri ziɓri, ku ta ɓil ɓayu ya.

³⁴Nzukri tu ni ɓa ziɓ bale[117], ku titil vba̧ nzak gɔrɔm gɔrɔm ɓa foyu ɓáy ɓahri : « Artemi, záh Efeze ɓa záh a luki. Artemi, záh Efeze ɓa záh a luki. Artemi, záh Efeze ɓa záh a luki. »

³⁵Ku vba̧ nzak kaŋ mah sa̧wseh seɗe bale, nzuk fe vbehna ŋgomna ziŋ ful hi̧ nzukri ɔk nzak woyri, mí ke ɓah ɓay ɓahri : « A woiri nzuk Efezeri, ɓay fe mí i vba̧ nzak kaŋ le wo ? A ge ge le tu ɓahri, nzuk Efezeri ɓa nzuk-kɔr vul kani Artemi záh a luki ké kasaw ye toh ke nunmbam ɓu puh-ay, tu-tu.

³⁶Kandɔkaw, ma̧y ɓayu ta-a. Kaŋ dale í kaɓ ɗeŋ, í poŋ fe laɓna va̧h.

³⁷Nzukri ké i mgba gi keni-ay ra, ku ɓeɓ vul kani záh wah ya, ku far záh wah kara ya pi.

³⁸Demtere ke bɔh pihna yeri ƴo ke ɓay ziŋ nzuk le, gel-kuŋ salɓay ƴo puh-ay, nzuk-kuŋ salɓayri kara, ƴo ri pi. Kú si sek nzuku ma ma ri.

³⁹Mí gelke i ƴo ke ɓay a ɓoru ké ko daɓa nzukri le, nam-mbu̧h hani a luki ké ŋgernzuk puhri kan ƴo ri. Kú lek ɓayu ké ri.

⁴⁰Ŋgomna ɓay goh na ɓahri, nah ɓa nzuk-gbur puh ɓay tul fe ké nah laɓ guri-ay ɓay fe le, ɓay a hani mbew ké nah sɔ́k ɓay lu lakna ɓay mbu̧hna-ay, ta-a. » Bol ɓay ye-aw, ke hi̧ nzukri gbakra hani, mí ku tɔr.