Read Karang Mbete Fe laɓna Tempuki 2 Bible Online

Mbete Fe laɓna Tempuki 2 - Karang bible

Mbete Fe laɓna Tempuki 2

¹Nam ti̧hmbih pandekoɗ ka̧h[9], nzukri ké kan law sa tul Ŋgermbay mbu̧h hani gel mbew ké ɓil ila vul kani Ŋgerzah.

²Dale ku lah tiri fe mgbe ke nunmbam buvbuvbu eŋ baw kuna gi ya̧ gel kú-u mbu̧h ri ra.

³Mí ku ko fe eŋ rim hɔrɔ ti̧h nun woyri mí kehr ƴo tul woyri mbew mbew gbam.

⁴Bale Tempuki ya̧ mun woyri gbam wara, mí ku ɓah ɓay ke nzak ɓay ɓahna nzukri ɓoɗ ɓoɗ ɓa teh-u kandɔk ké Tempuki ɓaŋ ɓayu ndoh nzak woyri.

⁵Ké Zurusalem ra, ziɓri ké kaɓ ri ke ziɓri ké ur ke tusiɓa a ɓoruri riw gi mbu̧h hani ɓay ti̧hmbih-aw, ku ɓa nzuk law Ŋgerzah.

⁶Ku lah suhɓay nzuk-kan law sa tul Ŋgermbayri-aw gɔm bale, ŋgi̧na woyri gi mbu̧h hani hel. Kerɓay zɔklɔ niri ɓayu ké a ge ge kara lah ɓay ɓahna woyri ke nzak mbuŋna ye nzak mbuŋna ye.

⁷Ku kaɓ yer, fe-u na niri ɓa saŋ. Ku ɓahri : « Nzukri-ay ra wa, riw woyri ku ɓa ziɓri ké tusiɓa Galile, ya le wo ?

⁸Uwa, ani wara mí nah lah ɓay ɓahna woyri ke nzak tusiɓa wah nzek nzekay le ?

⁹Ƴona wah-ay, nzuk a haniri ur ke tusiɓa Parta, Meɗ, Elam ke tusiɓa Mezopotami pi. A haniri ur ke tusiɓa Zude, Kapados, Poŋ, Azi.

¹⁰Firizi, Pamfili, Eziɓte, Sireŋ ké tusiɓa Libi, nzuk a ɓoruri ké gi ti̧hmbih, puh woyri ɓa Rɔm.

¹¹Nzuk a ɓoruri ɓáy ur ke tusiɓa Kereɗ ke tusiɓa Arabi. Gbam wah nah ɓa ziɓ ke nzukri ké sɔɓ mun woyri ɓa ziɓ pi[10]. Nzukawri-aw ɓah ɓay ke nzak tusiɓa wah nzak tusiɓa wah hi̧ na, nah lah fe saŋ ké Ŋgerzah laɓ. »

¹²Riw woyri ku kaɓ yer. Fe-u ndukru niri ndu-ndukru, mí ku ɓah ɓay ké sakra woyri ɓahri, a fe mí kaŋ le ?

¹³Wara mí, nzuk a ɓoruri sak niri ɓahri, ku ta yim kaŋto.

¹⁴Dale ké sakra gun nzak pihnari ké boh falu seɗe, Piyer ɓah ɓay ɓa mgbe-u hi̧ nzukri ɓahri : « A woiri, yi̧n bi ziɓri ké i na Zurusalem ke ziɓri ké gi Zurusalemay pi, í te suk woiri í lah sa̧wɓayay.

¹⁵A wah, nah ta yim kandɔk ké i ɓah-aw ya. Sa̧wseh toŋndɔk mbew ɓa tipele ɓáy[11].

¹⁶Lewsa̧, Ŋgerzah ɓaŋ ɓay ndoh nzak Zuyel gun nzak pihna ye ɓahri, Sewu le, mi píh Tem bi ku̧ tul nzukri riw. Gun woiri a wo̧ro-uri ke a wu̧yuri, ku ɓáh ɓay ké a ye Tempuki ɓaŋ ndoh nzak woyri. Mí gun sekeri ku kó fe, ŋgernzukri ba, ku kó fe ke lɔlɔ pi.

¹⁷

¹⁸Mi ɓahri se, sewu ra, mi píh Tempuki bi ku̧ tul mgbal biri-aw gaŋ, a wo̧ro-uri ke a wu̧yuri. Ku ɓáh ɓay ké Tempuki ɓaŋ ndoh nzak woyri hi̧ nzukri ɓá lah.

¹⁹Mi láɓ fe saŋri ké nunmbam hi̧ nzukri ké tusiɓa ɓá ko. Sem ke hɔrɔ ke suh hɔrɔ ɓay ti̧h-u.

²⁰Seh ɓay sɔɓ ɓa piri-u ndiŋ ndiŋ. Few ɓay sɔɓ eŋ sem dara mí nam ye Gaŋ tul feri riw ké ɓa nam a luki ké-e gi sɔ́k ŋgerna ra ɓay ka̧h ɓáy.

²¹Kandɔkaw mí nzuk a suŋ suŋ ké ɗi Gaŋ tul feri riw[12] le, ke ɓay ya̧ ni[13]. Mí fe-u ƴo laɓ kandɔk ké Ŋgerzah ɓah. »

²²Piyer ɓah ma pol ra ɓáy : « Yi̧n biri, gun Izarayelri, í te suk woiri lah ɓay bi-ay. Zezu ké Nasareɗ ra Ŋgerzah sɔk ni ɓa Ŋgermbay hi̧ wuri ko. Ke laɓ fe saŋri ɓoɗ ɓoɗ ke ŋgerna Ŋgerzah ké sakra woiri kandɔk ké i tu.

²³Zezu-aw ra, Ŋgerzah poŋ ni hi̧ wuri, a woiri ké i tu bolkusol ye tu, i i ni. I poŋ ni ndoh ndɔk sa̧wnzuk a ɓoruri ké ta ke mbete bolkusol Ŋgerzah ya. Ku ɓar ni ké tul kpuh vbatay kandɔk ké Ŋgerzah lek ɓay hul ye lewsa̧ kaŋ.

²⁴A ye Ŋgerzah gaŋ mí ke ten ni ke puh záh hi̧ ni el kaɓ ke pa̧ymun a foyu. Ke i ŋgerna hul wu̧m ɓay fe le, hul mah mgba ni ya kandɔk ké ŋgermbay Daviɗ mbi ɓay ɓahna Ŋgermbay pol sa̧, mí ke ten siŋ ra ɓahri : Ŋgerzah, a wo Miƴori. Mi ko kona ma tul wo kpatara ɓay fe le, mu ƴo ndɔk lakna bi rɔkɔ mi lih ɓu siɓa.

²⁵

²⁶Sa̧wu mí law bi rih mi rih. Nzak bi ah ɗi siŋ riŋ ɗina. Mun hay bi gaŋ kara na ɗeŋ ké ndɔk Miƴori ɓay fe le, mu poŋ záh bi sa puh záhri ya. Mu hi̧ mi ké mi ɓa nzuku a wo puŋ mbuluk mbuluk ké ɓil lɔkɔ hul ya.

²⁷

²⁸Mu ƴo hi̧ bɔk bi tu siŋ sina ké si ke ɔkna. Law rihna a mbamba-u ba, ɓa ƴó ziŋ mu [14]. »

²⁹Piyer toŋ ɓah ra ɓáy : « Yi̧n biri, nah tu te-teh, zih wah ŋgermbay Daviɗ hu lewsa̧. Ku gɔr ni, mí tupal ye ƴo ri ka̧h guri-ay. Aŋay, mi ƴo ke ful lu lakna ɓayu hi̧ wuri.

³⁰Ké Tem Ŋgerzah ƴo ziŋ ŋgermbay Daviɗ, mí a ye, ke tu-tu, Ŋgerzah wahɓay mí hah fe ku̧ tul ye keni gbaɗ gbaɗ hi̧ ŋgermbay Daviɗ ɓahri, ke lu nzuk mbew ké haŋsekle gun zih yeri ɓay kaɓ ɓa mbay soh gel ye[15].

³¹Ŋgermbay Daviɗ ra tu ɓay ti̧hna Ŋgermbay ke puh záh pol sa̧ kaŋ, ke ɓahri se, Ŋgerzah poŋ ŋgermbay sa puh záhri ya. Mun hay ye gaŋ kara puŋ mbuluk mbuluk ya[16].

³²A ye Zezu ra mí Ŋgerzah hi̧ ni ti̧h ke puh záh ke pa̧ymun a foyu. A wah riw, nah ɓa nzuk-ɓah tehɓayu.

³³Ŋgerzah mbi ni ɓa ndɔk lakna ye ké nunmbam ba, Ŋgermbay ya̧ Tempuki ké ta̧w baah, mí Ŋgermbay pih Tempuki ké baah wahɓay pih-u ku̧ tul wah ra, nah ya̧-ya̧ kandɔk ké i ko ke nun woiri, i lah ke suk woiri-ay pi.

³⁴Ɓa ŋgermbay Daviɗ mí ɓa ndɔk lakna Ŋgerzah ké nunmbam ya. Mí ŋgermbay Daviɗ ɓahri : A ye Miƴori, ke ɓah hi̧ Ŋgermbay bi ɓahri, ké kaɓ ɓel ye Miƴori ɓa ndɔk lakna ye, ke ƴo ɔh ŋgerna nzukbaa yeri hi̧ kú ti̧h ɓa gel-ku̧ bɔk ye.

³⁵

³⁶Kaŋ dale gun Izarayelri gbam í tu ɓa teh-u, Zezu ké i ɓar ni ké tul kpuh vbatay, a ye gaŋ mí Ŋgerzah mbi ni ɓa Ŋgermbay. Ke ɓa Gaŋ tul feri riw. »

³⁷Ku lah ɓayaw kaŋ bale, su̧hru se niri ŋgu̧y ŋgu̧y, mí ku vbi Piyer ke tɔr gun nzak pihna Ŋgermbay a ɓoruri ɓahri : « Yi̧n wahri, a fe mí nah laɓu le ? »

³⁸Bale ke yih nzak woyri ɓahri : « Í mbi law woiri ké tul fe laɓna suya woiri-aw ma fal. Í ti̧h mbih batem ke riŋ Ŋgermbay Zezu kan tul woiri le, ke lú ɓay ké tul woiri. I yá̧ Tempuki ké-e wahɓay hi̧ wuri ra ɓáy.

³⁹A ye Tempuki ɓa fe wahɓay ké Ŋgerzah hi̧ wuri ke gun woiri ke nzuk a ɗih-uri gbam, Gaŋ wah Ŋgerzah ɗi wuri riw ma ta̧w ye. »

⁴⁰Piyer ɓah tehɓay a ɓoruri ɓa ŋgi̧-u hi̧ niri ku lah ɓa teh-u. Ke hew niri ɓahri : « Í kan law woiri tul Ŋgermbay hi̧ ni ké ya̧ wuri, ké ten wuri ké sakra nzuk tukalari, ku ɓa nzukri ya. »

⁴¹Bale nzuk a a̧yri ké ya̧ ɓay ye ra, ku ti̧h mbih batem. Ŋgi̧na woyri laɓ sɔɗ sɔɗ boh gel say (3.000) dɔɓ tul nzuk a polri.

⁴²Mí nzuk-kan law sa tul Ŋgermbayri ƴo tul ɓay Ŋgermbay ké gun nzak pihnari sɔk. Ku mbu̧h hani ɓa nzuk ké mbew. Ku kaɓ ke haniri gɔh peŋ su̧[17]. Ku goŋ Ŋgerzah ke haniri mbew pi. Ɓa fe laɓna woyri kpatara.

⁴³Fe laɓna Ŋgerzah na nzukri ɓa hȩkme. Ke hi̧ gun nzak pihnari laɓ fe saŋri ɓa ŋgi̧-u.

⁴⁴A woyri kú-u kan law sa tul Ŋgermbay ra, ku ƴo mbu̧h hani gel mbew kpatara. Riw woyri ku ko nun fe ké sakra woyri ya.

⁴⁵Ku yeh gel woyri mini fe woyri le, ku wal lari-u mah ke fe zɔklɔ ké ziŋ nzuku nzuku.

⁴⁶Nam ke nam, ku mbu̧h hani ké ɓil ila vul kani Ŋgerzah ke law mbew. Ku mbu̧h haniri ké ɓil kerpuh kerpuh, ku gɔh peŋ hi̧ haniri dara mí ku su̧ fe ke haniri ke mun rihna ke law mbew pi.

⁴⁷Ku ƴo pir Ŋgerzah kpatara, tɔr sa̧w nzuk woyri ba, law woyri rih niri ké tul woyri rih. Nam ke nam, Gaŋ wah ɓaŋ nzukri ké-e ya̧ niri dɔɓ tul woyri ma pol pol.