Read Karang Mbete Fe laɓna Tempuki 21 Bible Online

Mbete Fe laɓna Tempuki 21 - Karang bible

Mbete Fe laɓna Tempuki 21

¹Bol fal ké nah vbar ŋgernzuk misoŋ Efezeri, kehr hani wah se law se-se, mí nah puh gel kaɓna ɓil kumbon si kparak ka̧h Kos. Tipele, nah si Rodeh, falu nah kal si Patara.

²Ké gelaw, nah ziŋ kumbon-si Fonizi[123], nah hil ɓilu, mí nah tɔr.

³Nah si si si, nah toŋ tɔɓ ke tusiɓa Siper, mí nah poŋ tusiɓa-aw ma fál ndɔk kperu wah. Nah si Tir ké tusiɓa Siri, nah dah, nah ŋga̧h kumbon ké ri. Ku ɗer suknari, mí ku laɓ nam toŋndɔk say. A wah ba, nah ƴah nzuk-dih fal Ŋgermbayri, mí nah ziŋ niri. Nah kaɓ ziŋ niri ɓil namri-aw. Tempuki ƴo sɔk niri koseh ké ɓay ziŋ Pɔl, mí ku ɓah hi̧ ni ké si Zurusalem ya.

⁵Nam toŋndɔk sayaw ɔh bale, nah ur tɔr. Wo̧rori, wu̧yri, gunri riw ɓaŋ na ti̧h ke ka̧w puh si ka̧h nzak mahmbih. Nah huk siɓa, nah goŋ Ŋgerzah.

⁶Nah vbar haniri, mí nah el hil ɓil kumbon ra. A woyri ba, ku el ma puh.

⁷Nah ur ké Tir si Tolome. Nah vah yi̧n wah ɓil Ŋgermbayri ké ri. Nah kaɓ ziŋ niri nam mbew.

⁸Tipele-u, nah tɔr si Sezareh. Nah ɗer ké puh Filiɓ nzuk ka-kah ɓay Ŋgermbay[124]. Pol sa̧, ke ƴo sakra nzukri toŋndɔk say[125] ké wal fe su̧na hi̧ wu̧y sehri ké Zurusalem ra pi. Nah na puh ye.

⁹Ke mbuŋ gun wu̧yri niŋ. Ku mbi mun woyri hi̧ Ŋgerzah. Ku ya̧ wo̧ro ya. Tempuki ƴo ɓaŋ ɓay ndoh nzak woyri hi̧ ku ɓah nzak pihna-u.

¹⁰Nah kaɓ ri nam mah fe bale, Agabus[126] gun nzak pihna Ŋgerzah ké Zude ɗer gi ta̧w wah. Ke sel sal-ŋga̧h si̧h Pɔl, ke ŋga̧h keni bɔk Pɔl ke ndɔk ye. Ke el ɓahri, Tempuki ɓahri, ziɓri ké Zurusalem ɓay ŋga̧h nzuk salay ra kaŋ pi. Ku póŋ ni ndoh ndɔk sa̧wnzuk a ɓoruri.

¹²Nah lah ɓayaw kaŋ bale, a wah ke yi̧n wah ɓil Ŋgermbayri ké puh-aw, nah laɓ kɔkrɔya hi̧ Pɔl ké hil si Zurusalem ya.

¹³Wara mí, ke yih nzak wah ɓahri : « Ɓay fe mí i vuh rew hi̧ law bi sa̧h ? A bi le, ta ɓa ŋga̧hna ké Zurusalem kaŋto ya. Ɓa ra hul kara, mi lek mun bi ɓay hu ɓay hi̧ riŋ Gaŋ wah Zezu ɓá mgbe ma pol pol. »

¹⁴Nah ta̧h vana sɔɓ kerɓay ye kpu̧y, mí nah el kaɓ ɗeŋ, mí nah ɓahri, Ŋgerzah ɓá laɓ kandɔk ké-e yih.

¹⁵Fal namri-aw, nah ŋga̧h sukna wah. Nah hil si Zurusalem.

¹⁶Nzuk-dih fal Ŋgermbayri ké Sezareh ɓaŋ na. Ku maŋ na si puh Nasoŋ ziɓ ké sa̧w puh ye ɓa Siper. Ke ƴo sakra nzuk a titiluri ké kan law tul Ŋgermbay. Nah si, mí ke mgba na gahru.

¹⁷Ka̧hna wah ké Zurusalem le, yi̧n wah ɓil Ŋgermbayri ya̧ na ke law rihna[127].

¹⁸Tipele, Pɔl maŋ na si ta̧w Zak. Ŋgernzuk vul misoŋri riw mbu̧h hani ké ri pi.

¹⁹Nah vah niri, mí Pɔl el ndazi ɓay feri ké Ŋgerzah hi̧ ni ke laɓ ké haŋsekle sa̧wnzuk a ɓoruri. Ke ɓah ɓay ke nzaku nzaku gbam hi̧ niri.

²⁰Ku lah ɓay ye bale, ku dim Ŋgerzah. Mí ku el lu mberem ziŋ ni ɓahri : « Yi̧n wah, mú ko daɓa yi̧n wah ziɓri ɓa ŋgi̧-u mí kan law tul Ŋgermbay, mí riw woyri ku ri̧h si̧w ké tul bolkusol ké Ŋgerzah hi̧ Moyiz vbeh.

²¹Ku lah ke nzak nzukri ɓahri se, mu ƴo sɔk ziɓri ké kaɓ sakra sa̧wnzuk a ɓoruri ɓá kuŋ ndi̧w ya, kú poŋ fe laɓna zih wahri, kú dih fal bolkusol Moyiz mba.

²²Ku láh ɓahri, mu gi-gi. Nah láɓ ani ɓáy le ?

²³Mú laɓ fe ké nah ɓay sɔk mu-ay : Nzukri niŋ ƴo ri-ay. Ku ziŋ law rihna ŋga̧h wahɓay-saŋ mun woyri hi̧ Ŋgerzah, mí nam-saŋ mun woyri ra ɔh da.

²⁴Mú fa̧h niri si pol nzuk fe puhna Ŋgerzahri. Í laɓ fe laɓna mah si vul kani Ŋgerzah dara mú-u si ke fe puhna ɓay tul woyri. Kaŋ le ku mah su̧h tul woyri[128]. Dale ziɓri gbam ɓay tu ɓahri, su̧hɓay kú-u lah ké tul wo ra ɓa kuŋɓay le, mu ƴo tul bolkusol Moyiz gaŋ.

²⁵Mí sa̧wnzuk a ɓoruri ké kan law tul Ŋgermbay ra, ku ziŋ mbete[129] ké nah vbeh lewsa̧ sɔk niri bolkusol wah : Kú ɗih ke fe su̧na kú-u puh hi̧ záhri ɗi-ɗih, kú su̧ sem ya, hay a a̧y kú-u vbeh ya ra kú lak ya, kú laɓ nunpuki ya pi. »

²⁶Tipele-u bale, Pɔl fa̧h nzukri ké niŋ ra. Ke si ziŋ niri laɓ fe laɓna-lek mun woyri ɓay rih gel ƴona ziɓri ké ɓil ila vul kani. Mí ku si ri. A ye, ke sɔk nzuk fe puhna nam ké-e ɓay gi ke fe puhna ɓay ɔh wahɓay ké nzukuri hah keni mun woyri.

²⁷Ɓil namri toŋndɔk say ké Pɔl wahɓay hi̧ fe puhna ɓá ɔh ra, ziɓri ké ur ke tusiɓa Azi si Zurusalem, ku ko ni ké gel ƴona ziɓri ké ɓil ila vul kani Ŋgerzah, mí ku zukru kerɓay ziɓ a ɓoruri gbam hi̧ law woyri fa̧h, mí ku mgba ni.

²⁸Ku vba̧ nzak ɓeleŋ ɓeleŋ ɓahri : « Nzuk Izarayelri wo, í gi so na. Gunwo̧ro-ay ha̧rma ke gelri gbam. Ke ƴo sɔk nzukri riw ɓahri, bolkusol Moyiz ke sa̧w wah Izarayelri ke vul kani-ay ɓa fe a garu dara mí ke fa̧h sa̧wnzuk a ɓoruri gi rih ɓil ila gel ƴona ziɓri-ay ɓeɓ keni vul Ŋgerzah-ay. »

²⁹Ku ɓah kaŋ ɓayu ké ku ko Torofin[130] nzuk Efeze ɓil ka̧w puh ke Pɔl, mí ku ker ɓahri, Pɔl hi̧ ni ke rih ɓil ila gel ƴona ziɓri ké vul kani Ŋgerzah ra pi.

³⁰Ɓayu ya̧ ka̧w puh riw. Nzukri ɗuk yir ke gelri ɓoɗ ɓoɗ gi mbu̧h hani mer mer. Ku mgba Pɔl kɔklɔ ni kpola kpola si keni kala ila vul kani Ŋgerzah. Ku tuh nzakful-si ɓil ila vul kani Ŋgerzah liɓ liɓ.

³¹Ku yih ɓay i Pɔl, mí kerɓay nzuk Zurusalemri ké zukru-aw ka̧h ta̧w ŋgernzuk kumandah soze Rɔmri.

³²Ke fa̧h kumandahri ke soze woyri ɓa gah-u ɗuk keni si ta̧w daɓa nzukri ké mbah tul hani mer mer ra. Ku ko ŋgernzuk sozeri ke soze woyri bale, ku poŋ vba̧ Pɔl.

³³Ŋgernzuk kumandah ra loh si ta̧w Pɔl, mí ke mgba ni. Ke hi̧ ku ŋga̧h ndɔk ye ke sal lari seɗe. Ke el vbi ɓahri, nzuku-ay ɓa ge le ? A fe mí ke laɓ le ?

³⁴Ké sakra daɓari-aw, a ge ge le, ɓah ɓay ye ɓoɗ ɓoɗ. Ku zukru ɓay maŋ. Ŋgernzuk kumandah ziŋ ful tu sa̧wɓayu ya ɓay tul suhɓay woyri ra, ke hi̧ ku si ke Pɔl ma gel kaɓna sozeri.

³⁵Daɓa nzukri dih fal woyri wuh wuh. Ku vba̧ nzak ɓahri, i ni i. Ku ka̧h polkɔkɔ gel kaɓna sozeri ɓay hil ma ma ri bale, sozeri mbi ni suk ɓay daɓa nzukri ké mgbɔr mbamba.

³⁷Sozeri toŋ ɗih ya ɓay rih ziŋ ni ma gel kaɓna woyri bale, ku ɗer ni hi̧ Pɔl ƴo síɓa, mí Pɔl vbi ŋgernzuk kumandah ɓahri : « Mi zíŋ ful ɓah ɓay le ? » Mí ke el vbi ni ɓahri : « Mu ɓah nzak gerek ɓah wa ?

³⁸Mí le mu ta ɓa nzuk Eziɓte a ye ké-e fa̧h nzukri sɔɗ sɔɗ boh gel niŋ (4.000) si ku̧ ɓil suy ke fe remri gbur keni puh ra ya. »

³⁹Pɔl yih nzak ye ɓahri : « A bi le, mi ɓa ziɓ. Ku mbuŋ mi ké Tarsi ké tusiɓa Silisi puh ké riŋu mgbe mbamba. Mi vbi wuri ful ɓay ɓah ɓay hi̧ nzuk biri. »

⁴⁰Ke hi̧ ni ful. Ke ɔr ndɔk hi̧ nzukri ɓay kú lah ni. Ku ɔk nzak woyri kelek, mí ke ɓah ɓay hi̧ niri ke nzak ebere ɓahri :