Read Karang Mbete Fe laɓna Tempuki 22 Bible Online

Mbete Fe laɓna Tempuki 22 - Karang bible

Mbete Fe laɓna Tempuki 22

¹« Bah biri ke yi̧n biri, í te wuri suk lah ɓay bi ké mi ɓáh-ay. »

²Ku lah ɓay ɓahna ké-e ƴo ɓah hi̧ niri ke nzak mbuŋna woyri bale, ku kaɓ silili, mí Pɔl ɓah hi̧ niri ɓahri : « A bi ra, mi ɓa ziɓ gaŋ. Ku mbuŋ mi ké Tarsi tusiɓa Silisi. Mi hu̧h ké Zurusalemay. Gamalyel[131] mí firma mi bolkusol ké Ŋgerzah hi̧ zih wahri ke gelu gelu. Mi ri̧h si̧w tul ɓay Ŋgerzah ke huhrumun bi kandɔk a woiri guri-ay pi.

⁴Ziɓri ké ko Zezu ɓa mahful ra, mi faŋ bol woyri ɓay si ziŋ niri ma koseh hul. Mi mgba wo̧rori ke wu̧yri mbih vul mgbal.

⁵Ŋgernzuk fe puhna ke ŋgernzuk ziɓri mah lu lakna ɓay fe laɓna bi-aw. A woyri gaŋ mí ku vbeh mbete pih mi keni ɓay mi hi̧ yi̧n wah ziɓri ké kaɓ Damas. Mí-i si ri, ɓay gelke mi ziŋ ziɓri ké ƴo dih fal Zezu ké ri le, mí mgba niri gi keni Zurusalem ɓay kú kuŋ salɓay ku̧ tul woyri.

⁶Mi ƴo tul ful. Mi toŋ ɗih ya ɓay ka̧h Damas. Seh ƴo tul puh bale, gel tehna ti̧h ké nunmbam kandɔk sakna mbam teh gel gberere ɗoŋ mi gbuk.

⁷Mi lih ɓu siɓa, mi lah kusol nzuk ɗi mi ke riŋ mbuŋna bi ɓahri : “Sɔl, Sɔl ma. Ɓay fe mú-u faŋ bol bi ƴo laɓ mi koseh kari-ay le ?”

⁸Mí-i vbi ɓahri : “Mbay, i ɓa ge le ?” Ke yih nzak bi ɓahri : “A bi, Zezu nzuk Nasareɗ ké mu faŋ bol bi ƴo laɓ mi koseh ra munu.”

⁹Bɔh gahru biri ko gel tehna ko. Mí ɓay ké-e ƴo ɓah ziŋ mi ra, ku lah ya.

¹⁰Bale mi vbi ni ɓahri : “Gaŋ bi, a fe mí-i laɓu le ?” Ke yih nzak bi ɓahri : “Mú ur síɓa. Mú si Damas.” Ku ɓay sɔk mi feri gbam ké ƴo geŋ mi ɓay mí laɓ.

¹¹Gel tehna ra ra̧h nun bi, mí bɔh gahru biri ba, mgba ndɔk bi, ku maŋ mi si ka̧h Damas.

¹²Ziɓ a hani ƴo ri. Riŋ ye ɓa Ananiya. Ke ƴo dim Ŋgerzah, ke ƴo tul bolkusol Ŋgerzah ɓa suki. Ziɓri gbam ké kaɓ Damas lu lakna ɓay ye lu.

¹³Mí ke gi ƴo ɓel bi, ke ɓah hi̧ mi ɓahri : “Yi̧n bi Sɔl, nun wo ɓá mgbur.” Sa gelaw mí, nun bi mgbur. Mi ko gel.

¹⁴Ananiya el ɓah hi̧ mi ɓahri se, Ŋgerzah zih wahri lu mi, a bi Sɔl, lewsa̧ ɓay mí tu kerɓay ye, ɓay mí ko Ŋgermbay Nzuk Lawpuki ɓay mí lah nzak ye. Ɓay fe le mi ná ɓa nzuk-ɓah tehɓay feri ké mi ko ke ɓayri ké mi lah gbam ké pol nzukri riw.

¹⁶Ananiya el ɓah hi̧ mi ɓahri : “Mí aŋay ba, a fe mú-u geŋ ɓáy le ? Ur síɓa, mú ti̧h mbih batem ke riŋ Ŋgermbay ɓahri, Zezu ɓa Ŋgermbay wo. Mú hi̧ ni ké lu salɓay ké tul wo.”

¹⁷Falu, mi el gi Zurusalem. Mi ƴo goŋ Ŋgerzah ɓil ila vul kani, mí Tempuki rih tul bi hi̧ mi, mi ko fe saŋ.

¹⁸Mi ko Ŋgermbay. Ke ɓah ɓay hi̧ mi kandɔkay : “Sɔl, mú tɔr ɓa gah-u ké Zurusalemay, mú geŋ ya ɓay fe le, nzuk puh-uri ta ya̧ lakna ɓay bi ké mu lu ra ya.”

¹⁹Mi yih nzak ye ɓahri : “Gaŋ bi, nzuk puh-ayri tu te-teh. A bi ra, mi si vul misoŋ ziɓri ɓoɗ ɓoɗ. Mi vba̧ nzuk a a̧yri ké kan law sa tul wo, mi mgba niri kara si mbih vul mgbal pi.

²⁰Nam ké ku i Eten nzuk-ɓah tehɓay wo ra, mi ƴo gelu pi. Hul Eten rih law bi. Nzukri ké vbuk ni ke kasaw i ni, mi kɔr mah gar woyri.”

²¹Ŋgermbay el ɓah hi̧ mi ra ɓáy ɓahri se : “Mú si ɓay fe le, mi píh mu ɓa ɗih-u ma ta̧w sa̧wnzuk a ɓoruri.” »

²²Pɔl ɓah ɓay sa̧wnzuk a ɓoruri dale, ziɓri vba̧ nzak gbaw ɓahri : « Sam nzuk a kandɔkaw mah kaɓ tukala ya. Ɓá i ni i. »

²³Ŋgernzuk kumandah ko ku ƴo vba̧ nzak gbaw gbaw, ku vbuk mah gar woyri, ku ɔr kasal, mí ke hi̧ sozeri rih ziŋ Pɔl ma gel kaɓna woyri. Ke sɔk kú vba̧ ni ke ndehdɔŋ fakla sa̧wɓay vba̧ nzak nzukri ké tul ye-aw.

²⁵Ku ŋga̧h ni kparaŋ kparaŋ ɓay vba̧ ni, mí Pɔl ɓah hi̧ kumandah ké ƴo gelu-aw ɓahri : « Gun puh lakna Rɔm a a̧y kú-u kuŋ salɓay tul ye ya ɓáy ra wa, bolkusol Rɔmri hi̧ ful vba̧ ni mgbum le ? »

²⁶Ke lah ɓayaw kaŋ bale, ke si ta̧w ŋgernzuk woyri. Ke vbi ni ɓahri : « Ŋgernzuk, i tu fe ké i yih laɓu-ay gaŋ le ? Nzukaw ɓa gun puh lakna Rɔm. »

²⁷Ŋgernzuk kumandah ra lah ɓayu kaŋ bale, ke si ta̧w Pɔl. Ke vbi ni ɓahri se : « Mú sɔk mi, mu ɓa gun puh lakna Rɔm ley ? » Pɔl yih nzak ye ɓahri : « Ketina, mi ɓa gun Rɔm gaŋ. »

²⁸Bale ŋgernzuk ra sɔk ni ɓahri : « A bi ra, mi puh lari ɓa ŋgi̧-u dara mí-i ti̧h ɓa gun tusiɓa Rɔm. » Mí Pɔl yih nzak ye ɓahri : « A bi le, ku mbuŋ mi ɓa gun tusiɓa Rɔm gaŋ. »

²⁹Bale sozeri ké lek mun woyri ɓay vba̧ ni ra el ke mun ma fal fal ké ta̧w ye. Ŋgernzuk kumandah tu ɓahri, Pɔl ɓa gun tusiɓa Rɔm ké-e hi̧ ku ŋga̧h ni-aw bale, hȩkme laɓ ni.

³⁰Ŋgernzuk kumandah yih ɓay tu tehɓay gohna ké ziɓri goh Pɔl. Tipele, ke ɗi ŋgernzuk fe puhna ke nzuk-kuŋ salɓayri gbam gi mbu̧h hani. Ke hi̧ sozeri sel Pɔl maŋ ni ɗer gi ƴo pol woyri.