Read Karang Mbete Fe laɓna Tempuki 23 Bible Online

Mbete Fe laɓna Tempuki 23 - Karang bible

Mbete Fe laɓna Tempuki 23

¹Pɔl ko gel ma nun ŋgernzuk-kuŋ salɓayri ra, ke ɓahri : « Bah biri ke yi̧n biri, mi hȩk Ŋgerzah dan reh ful kpu̧ru ka̧h guri-ay. Ɓay mbew lu law bi ya. »

²Ananiya ŋgernzuk fe puhna Ŋgerzah sɔk nzukri ké ƴo ɓel Pɔl, kú vba̧ nzak ye.

³Ku vba̧ ni dale, Pɔl ɓah hi̧ Ananiya ɓahri : « Nzuk foh. A wo mí Ŋgerzah ɓay vba̧ mu. Mu kaɓ gel kaɓna nzuk-kuŋ salɓay, mu mbi bolkusol mbete Ŋgerzah ɓay kuŋ salɓay tul bi wa, ani mú-u to bolkusolu ma fal, mu ɓahri, ku vba̧ mi ley ? »

⁴Nzukri ké ƴo ɓel ye ɓahri : « Ŋgernzuk fe puhna Ŋgerzah mí mu ko gel gbak gbak ma nun ye-aw le ? »

⁵Mí Pɔl yih nzak woyri ɓahri : « Yi̧n biri, mi tu ra ni ɓa ŋgernzuk fe puhna le, mi ta far ni ya. Ɓay fe le, mbete Ŋgerzah sɔk ɓahri, í mgba nazi ku̧ tul ŋgernzuk woiri ya[132]. »

⁶Pɔl tu ɓahri, ké sakra ŋgernzuk ziɓri-aw, nzuk a haniri ɓa sadusiri. A ɓoruri ba, ɓa fariziri, mí ke ɓah ɓay ɓa mgbe-u hi̧ niri ɓahri : « Yi̧n biri, a bi ra, mi ɓa farizi, mi ɓa gun fariziri gaŋ. Ɓayu ké mi ɓaŋ law bi te tul ti̧hna záhri ke pa̧ymun a foyu, mí ku mgba mi-ay. »

⁷Ke ɓah kaŋ bale, baw fahɓay ur gal gal ké sakra fariziri ke sadusiri, mí ku kehr hani gel seɗe.

⁸Sadusiri ra ƴo ɓahri, nzukri ta ti̧h ke pa̧ymun a foyu ya. Ku ɓahri, záhri ta-a, tem nzak pihnari kara ta-a pi. Mí fariziri ba, ɓahri, feri-aw gbam ƴo ri.

⁹Fahɓayu seh ma pol pol ke ŋgere ŋgere, mí nzuk-sɔk mbete bolkusol Ŋgerzah a haniri ké ɓa fariziri ur. Ku ɓah ɓay ke wo̧ro wo̧ro ɓahri : « Nah ko fe suya-u a hani mbew ké ta̧w gun wo̧ro-ay ya. Ko ya le, tem nzak pihna mini záh mí ɓah ɓay hi̧ ni-ay. »

¹⁰Fahɓayaw ŋger mbamba, nzukri ur ɗoŋ ni, mí hȩkme laɓ ŋgernzuk kumandah ɓay rɔkɔ ku gɔh Pɔl mbeɗek mbeɗek, mí ke sɔk sozeri rih sakra nzukri. Ku ten Pɔl ké ndɔk woyri, ku el ziŋ ni ma gel kaɓna sozeri.

¹¹Suŋaw, Ŋgermbay, Gaŋ tul feri riw ti̧h nun Pɔl. Ke sɔk ni ɓahri : « Pɔl, mú su̧h law. Tehɓay bi ké mu ɓah ké Zurusalemay, mah ɓay mú si ɓah ké Rɔm, puh kaɓna mbay kaŋ pi. »

¹²Ziɓ a haniri mbu̧h ke tipele-u, ku lek ɓay. Ku hah mun woyri gbaɗ gbaɗ ɓahri, ku ta su̧ fe ya, ku ta nzo fe ya kpu̧ru mah nam ké ku í Pɔl.

¹³Nzukri ké mbu̧h nzak mbew ɓay i ni-aw, tul woyri kal bon niŋ kal.

¹⁴Ku si ta̧w ŋgernzuk fe puhnari ke ŋgernzuk ziɓ a haniri. Ku sɔk niri ɓahri : « A wah, nah hah mun wah gbaɗ gbaɗ ɓahri, nzak wah ta za fe a hani ya kpu̧ru mah nam ké nah í Pɔl.

¹⁵Kaŋ dale í pih si ta̧w ŋgernzuk kumandah ke riŋ ŋgernzuk-kuŋ salɓayri ɓahri, kú ten Pɔl gi hi̧ wuri ɓay í fakla sa̧wɓay ye ɓáy. A wah, nah lek mun wah ɓay i ni dan ké ka̧h ta̧w woiri. »

¹⁶Gun nah Pɔl lah ɓay ndaw kú-u hɔl ɓay tul nah ye bale, ke si gel kaɓna sozeri, mí ke si sɔk Pɔl ɓay ra.

¹⁷Pɔl ɗi kumandah gi. Ke ɓah hi̧ ni ɓahri : « Kumandah, í maŋ wuri gun seke-ay si ta̧w ŋgernzuk woiri. Ke ƴo ke ɓay, ɓay sɔk ni. »

¹⁸Mí kumandah ra maŋ ni si ta̧w ŋgernzuk woyri. Ke ɓahri : « Mbay, Pɔl ké ɓa mgbal ra, ɗi mi. Ke sɔk mi, mí maŋ gunay gi keni ta̧w woiri. Ke ƴo ke ɓay, ɓay ɓah hi̧ wuri. »

¹⁹Ŋgernzuk kumandah mgba ndɔk gun ra, ku loh tɔɓ ké ta̧w nzukri, mí ke vbi ni ɓahri : « Ɓay fe mú-u yih sɔk mi le ? »

²⁰Ke yih nzak ye ɓahri se : « Bah bi ziɓri lek ɓay gi vbí wuri ɓay í ten Pɔl pele hi̧ ŋgernzuk-kuŋ salɓay woyri ɓahri, ku yih lah tehɓay ye ra ɓáy.

²¹Mí í ya̧ wuri ɓay woyri ya. Ku hɔl ndaw geŋ ni ɓay i ni. Ku kal bon niŋ kal. Ku hah mun woyri gbaɗ gbaɗ ɓahri, ku ta su̧ fe ya, ku ta nzo fe ya kpu̧ru mah nam ké ku í ni. Ku lek mun woyri da. Ku geŋ ɓay lah nzak woiri wara. »

²²Ŋgernzuk kumandah ra bak ni ɓahri, ko-ko ké sɔk nzuk a ɓoru ɓay ké-e ten sɔk ni-ay. Mí ke poŋ ni tɔr.

²³Dale ke ɗi kumandahri seɗe. Ke sɔk niri, « Í mbu̧h sozeri sɔɗ sɔɗ seɗe, soze-kaɓ tul ɗeŋeri ɓa bon toŋndɔk say, soze-mgba nzawri ɓa sɔɗ sɔɗ seɗe dɔɓ tul woyri pi. Kú ƴo tul bɔk woyri ɓay tɔr si Sezareh ke sa̧wseh toŋndɔk mbew suŋ dan sɔk ɓayu hi̧ ziɓri. »

²⁴Ke el sɔk niri, kú mgba ɗeŋe ɓay hi̧ Pɔl ɓá kaɓ ri. Kú si ziŋ ni ɓa suki hi̧ guvener Filiksi.

²⁵Mí ke vbeh mbete kandɔkay :

²⁶Soko guvener Filiksi, nzuk a luki. A bi Koloɗ Lisiya, mi vah wuri.

²⁷Gunwo̧ro-ay, mi pih ni hi̧ wuri. Ziɓri mgba ni. Ku yih ɓay i ni. Mi lah, ke ɓa nzuk Rɔm bale, mi si ke sozeri rih haŋsekle woyri, mí-i ya̧ ni ké ndɔk woyri.

²⁸Mi yih tu sa̧wɓay gohna kú-u goh ni, mí-i ɗer si ta̧w ŋgernzuk-kuŋ salɓay woyri ziŋ ni.

²⁹Ɓay a hani ké mah i ni mini mgba ni kara, ta-a. Mi ziŋ ɓa fahɓay tul bolkusol woyri kaŋto.

³⁰Mí-i el lah ɓahri, ziɓri lek ɓay i ni. Sa̧wu mí-i takra pih ni ma ta̧w woiri. Mi sɔk nzukri ké goh ni ra, kú si sek ni ma ta̧w woiri. Ɓay bi ɔh da.

³¹Kandɔkaw mí sozeri lah bolkusol ŋgernzuk woyri. Ku maŋ Pɔl ke suŋaw gaŋ si ka̧h Antipatiri[133].

³²Tipele-u, sozeri ké si ke bɔk el ma gel kaɓna woyri ké Zurusalem. Soze-si ke ɗeŋeri ba, si ziŋ ni ma pol.

³³Ku ka̧h Sezareh, ku hi̧ guvener mbete ra, mí ku poŋ Pɔl ndoh ndɔk ye.

³⁴Ke ki̧ mbete ra, ke el vbi Pɔl, sa̧w puh ye. Mí Pɔl sɔk ni, ke ɓa nzuk tusiɓa Silisi.

³⁵Bale ke ɓahri : « Nzuk-sek muri ɓá ka̧h dara, mí fakla ɓay wo ɓáy. » Ke el sɔk soze yeri ɓá kɔr Pɔl ké ɓil kerpuh ké Mbay Eroɗ a titilu mboh.