Read Karang Mbete Fe laɓna Tempuki 24 Bible Online

Mbete Fe laɓna Tempuki 24 - Karang bible

Mbete Fe laɓna Tempuki 24

¹Bol falu laɓ nam ndiɓi bale, Ananiya ŋgernzuk fe puhna Ŋgerzah ke ŋgernzuk puh a haniri, ku ɗer si Sezareh ké gel-kuŋ salɓay Rɔmri. Ku maŋ nzuk-yih tul woyri a hani, riŋ ye ɓa Tertili. Ku si sek Pɔl ké ta̧w guvener.

²Ke ɗi Pɔl gi, mí Tertili mbi ɓay goh ni keni kandɔkay : « Guvener Filiksi nzuk a luki, ɓay tumbɔl riŋ ɗina woiri, mí nah kaɓ ɗeŋ ɓa suki, ɓay tumbɔl ru̧na woiri ba, mí i lek keni tusiɓa wah ziɓri ti̧h suk. A wah ké gel-lak mbay woiri gbam, nah ya̧ fe laɓna woiri ke law mbew. Nah pir wuri pir.

⁴Mí mi mah ŋgi̧ ɓay ké pol woiri ya. Ɓay tumbɔl lawsuki woiri ra, í lah mi ge.

⁵Gunwo̧ro-ay, ke su ya mbamba. Ke laŋ puh laŋ. Mí ke ƴo gbur ziɓri gbam ké tusiɓari ké Rɔmri lak mbay tul woyri, ke ɓa ŋgernzuk pihna nzukawri-aw ké dih fal nzuk Nasareɗ ra pi,

⁶dara mí ke yih ɓay ɓeɓ vul kani Ŋgerzah ke fe ra̧m pi[134], mí nah mgba ni.

⁸I vbi ni ɓa teh-u le, i tú ɓayu ke mun woiri gaŋ, ɓayri ké nah ɓah si tul ye ɓa ketina. »

⁹Mí ziɓri ku̧ fal Tertili ɓahri, ɓayawri gbam ƴo gelu.

¹⁰Guvener ndoh ndɔk hi̧ Pɔl hi̧ ni ful ɓah ɓay. Pɔl ɓah ɓay ye ɓahri : « Mi tu-tu, laɓ mbihmbam ŋgi̧-ŋgi̧ mí i ƴo kuŋ salɓay ké tul wah ziɓri. Sa̧wu mí-i ƴo ke law rihna ɓah ɓay bi ké pol woiri.

¹¹Laɓ nam boh falu seɗe guri-ay ké mi hil si Zurusalem ɓay dim Ŋgerzah ké vul kani. I fakla ɓayu le, i tú ɓa ketina.

¹²Ké ɓil vul kani, ɓil vul misoŋ wah ziɓri mini ɓil ka̧w puh kara nzuk a hani ké ko mi gel-fah ɓay ke nzuk mini gel-fa̧h nzukri ku̧ fal bi ta-a.

¹³Nzuk mbew ké sakra woyri-ay ké mah sɔk tehɓay gohna gbur nzukri-aw, ta-a.

¹⁴Ɓay nzukri ké ko Ŋgermbay Zezu ɓa mahful kú-u ɗi niri ɓa nzuk Nasareɗ ra, ɓayu ɓa ketina. Mi ƴo dim Ŋgerzah wah. Mi lah bolkusol ye ké na ɓil mbete vbehna Moyiz ke ɓil mbete vbehna gun nzak pihna ye a lewsa̧ri gbam.

¹⁵Mi ɓaŋ law geŋ nam ké Ŋgerzah ɓay ten nzukri ke puh záh[136]. A woyri, nzuk-goh miri gaŋ kara, ku ɓaŋ law geŋ namu kaŋ pi. Ke tén nzukri ké salɓay hul mgba tul woyri ke puh záh, ke tén nzukri ké ɓay mgba tul woyri ya ke puh záh pi.

¹⁶Ɓay law rihna geŋ nam Ŋgerzah ra, mí-i ta mun bi ɗik, ɓay rɔkɔ mí zɔr law Ŋgerzah mini law nzukri. Law bi teh ké pol Ŋgerzah, ké pol nzukri kara pi.

¹⁷Bol fal ha̧rma puh a kalari laɓ mbihmbam mah fe, mi el gi Zurusalem. Mi si ke fe hi̧na nzuk-dih fal Ŋgermbayri ké puh a kalari pih ɓay hi̧ nzuk bi ziɓri[137]. Mi si ke fe puhna[138] ɓay hi̧ Ŋgerzah pi.

¹⁸Mi lek mun ɓay rih gel ƴona ziɓri ké ɓil ila vul kani ra, ziɓ a haniri ké tusiɓa Azi gi ziŋ mi ké ɓil ila vul kani, daɓa nzukri mbu̧h ziŋ mi ya. Suhɓay kara ta-a pi. Mí sekna ƴo ra ri le, mah ɓay ziɓri ké tusiɓa Azi ra ɓá gi gel-kuŋ salɓayay, kú sek mi.

²⁰Ta-a le, a woyri ŋgernzuk-kuŋ salɓay ziɓri-ay ra, kú sɔk wuri bolkusol fe mí-i ɓeɓ ke seh kú-u mgba mí ƴo gel-kuŋ salɓay woyri-aw.

²¹Sa ɓa ɓay mbew ké mi ɓah ɓeleŋ ké pol woyri ɓahri, law bi te tul ti̧hna nzukri ke puh záh, mí-i i ƴo gel kuŋ salɓay guri-ay wa. »

²²Filiksi tu ɓay nzukri ké ko Ŋgermbay Zezu ɓa mahful tu-tu, mí ke sɔkrɔ ɓay woyri ma nam a ɓoru. Ke ɓahri : « Seh ké Lisiya ŋgernzuk kumandah gi le, mi kúŋ salɓay woiri ɓáy. »

²³Ke sɔk kumandah ɓá kɔr Pɔl ɓa suki, kú zɔklɔ ni ya, kú poŋ nzuk-dih fal Ŋgermbayri ɓá so ni pi.

²⁴Laɓ nam ndi̧ bale, Filiksi ke wu̧y ye Dursil ké ɓa ziɓ gi. Ke ɗi Pɔl, mí ku lah ɓay kanlaw tul Ŋgermbay Zezu ké ta̧w ye.

²⁵Pɔl ɓah ɓay ɓa teh-u hi̧ niri. Ke sɔk ɓay fe puhna ké Ŋgerzah puh hi̧ salɓay hul lu ké tul nzukri, ke sɔk ɓay mgbá mun, ke sɔk ɓay kúŋ salɓay a luki ké ƴo gina pi bale, hȩkme laɓ Filiksi. Ke ɓah hi̧ ni ɓahri : « Aŋay le, mah da. Mú si wara. Mi ziŋ sa̧wseh le, mi ɗí mu ɓáy. »

²⁶Ke ker ɓahri, ke zíŋ lari ké ta̧w Pɔl. Sa̧wu mí ke ɗi ni kpatara gi lu mberem ziŋ ni.

²⁷Mbihmbam seɗe kal bale, Poroki Fisti soh gel guvener Filiksi, mí Filiksi yih ɓay hi̧ law ziɓri ɓá rih tul ye ra bale, ke ŋga̧h Pɔl poŋ ni ɓil mgbal dara Fisti mbi pihna ɓáy.