Read Karang Mbete Fe laɓna Tempuki 25 Bible Online

Mbete Fe laɓna Tempuki 25 - Karang bible

Mbete Fe laɓna Tempuki 25

¹[139] Bol fal ka̧hna guvener Fisti ké Sezareh laɓ nam say, ke ti̧h hil si Zurusalem ɓay ko nzuk yeri.

²Bale ŋgernzuk fe puhnari ke ŋgernzuk ziɓri si ta̧w ye, mí ku sek Pɔl. Ku goŋ ni ke kɔkrɔya ɓahri, ke el si puh le, ké pih Pɔl gi Zurusalem hi̧ kú kuŋ salɓay ku̧ tul ye. Mí ké haŋsekle woyri ba, ku lek ɓay mu̧h mahful ɓay i Pɔl dan ka̧h gel-kuŋ salɓay.

⁴Ke yih nzak woyri ɓahri, Pɔl ra, ku ƴo kɔr ni ké Sezareh. A ye kara, zah le, ke él ma ma ri.

⁵Ke ɓahri se : « Ŋgernzuk woiri a haniri ɓá ɗer ziŋ mi si Sezareh. Fe a suya-u ké-e laɓ ƴo ri le, í sek ni ké ri. »

⁶Fisti na nam toŋndɔk seɗe ya le, nam boh ziŋ niri ké Zurusalem. Elna ye ma Sezareh ra, ku ɓaŋ ni. Tipele-u mí ku si kaɓ gel kuŋ salɓay. Ke hi̧ ku ten Pɔl gi.

⁷Pɔl ka̧h, mí ziɓri ké ur ke Zurusalem gi ɗoŋ ni. Ku goh ni ke ɓayri ɓoɗ ɓoɗ ké ŋger mbamba. Mí ɓay woyri-aw ɓa kuŋɓay. Goso lu lakna ɓayu mba niri.

⁸Mí Pɔl lu lakna ɓay ye ɓahri : « Mi ɓeɓ bolkusol Ŋgerzah ké ziɓri ƴo tulu ya. Mi ɓeɓ vul kani Ŋgerzah ke fe ra̧m ya, mi ɓeɓ bolkusol tusiɓa Rɔmri kara ya pi. »

⁹Bale Fisti vbi Pɔl ɓahri : « Náh si Zurusalem, mí kuŋ salɓay gohna-ay ké ri le ? » Ke ɓah kaŋ ɓay hi̧ law ziɓri ɓá rih ké tul ye.

¹⁰Pɔl el ke ɓay ɓahri se : « Gel-kuŋ salɓay ŋgomna sezar mí-i ƴo ri-ay. Mah ɓay í kuŋ salɓay tul bi ké gelay. Ziɓri ra, mi laɓ suya mbew ziŋ niri ya. A woiri gaŋ kara, i tu te-teh.

¹¹Mi laɓ ra fe suya a hani ké mah hul le, mi yá̧m mun bi ya, mi póŋ mun bi hi̧ hul gaŋ. Mí kandɔk ké sekna woyri-ay ɓa kuŋɓay, nzuk mbew ké mah ɓay ɓaŋ mi ndoh ndɔk woyri ta-a. Ɓayay ɓá si ma ta̧w sezar. »

¹²Bale Fisti lek ɓay ke nzuk hew niri, mí ke yih nzak Pɔl ɓahri : « Mu yih ɓay si ta̧w sezar le, mu si-u gaŋ. »

¹³Bol falu, laɓ nam ndi̧ mí Agripa mbay ziɓri ke manah ye Bernik gi Sezareh vah Fisti.

¹⁴Ku kaɓ nam mah fe bale, guvener Fisti sɔk mbay Agripa ra ɓay Pɔl. Ke ɓahri : « Mgbal a hani ƴo ri ke sew lak mbay guvener Filiksi sa̧.

¹⁵Seh ké mi si Zurusalem ra, ŋgernzuk fe puhnari ke ŋgernzuk puhri sek ni. Ku yih ɓay mí kuŋ salɓay ɓa ŋgeru kan tul ye.

¹⁶Mi yih nzak woyri ɓahri, bolkusol Rɔmri sɔk ɓahri, nzuk ké ku goh ni, kú mbu̧h ke nzukri ké goh ni ɓay lah lakna ɓay woyri dara mí mahful-poŋ ni ndoh ndɔk sozeri ƴo ri ɓáy.

¹⁷Kandɔkaw, ku gi ziŋ mi. Nah ka̧h. Mi geŋ ya. Tipele-u gaŋ mí nah si gel-kuŋ salɓay. Mi hi̧ ku ten gunwo̧ro ra gi.

¹⁸Mi ker ɓahri, nzukri ké goh ni ɓay ten ɓay a ŋgeru, mí ku ɓah kaŋ ya.

¹⁹Sa ɓa fahɓay kaŋto mí ku fah ziŋ ni ké tul mahful-dim záh woyri, ké tul hul nzuk a hani ké riŋ ye ɓa Zezu kaŋ, mí Pɔl ɓahri se, ke kaɓ ke nun.

²⁰Ké mahful fakla ɓayu se-se, mí-i ɓah hi̧ Pɔl ɓahri se : “Náh si Zurusalem, mí kuŋ salɓay ye-ay ké ri le ?”

²¹Mí Pɔl yih ɓay hi̧ salɓay ye ɓá kuŋ ké ta̧w mbay Rɔm. Kaŋ mí-i hi̧ ku kɔr ni dɔh dɔh geŋ nam ké mi píh ni si hi̧ sezar. »

²²Agripa ɓah hi̧ Fisti ɓahri : « A bi kara, mi na ɗaka lah ɓay ɓahna nzukaw. » Fisti yih nzak ye ɓahri : « I láh ɓay ye pele. »

²³Tipele-u Agripa ke Bernik gi ke ŋgernzuk kumandahri, nzuk riŋ ɗinari ké puh-aw ke daɓa nzukri pi. Nzuk a haniri si pol, nzuk a ɓoruri si fal hi̧ gel loŋ ɗik ɗik. Ku rih baw vul yi̧hna, mí Fisti hi̧ ku ten Pɔl gi.

²⁴Bale Fisti mgbur ɓay ɓahri : « Mbay Agripa ke nzukri riw ké mbu̧h hani ké gelay ziŋ na, í ko nzukay. Daɓa ziɓri ɓa ŋgi̧-u gi ta̧w bi. Ur ke Zurusalem ka̧h gelay, ku ƴo vuh hi̧ mi kpatara ɓahri, nzukay mah kaɓ tukala ke nun mba.

²⁵Ké ta̧w bi le, mi ziŋ fe a hani ké mah i ni ya. Mí kandɔk ké-e ɓahri, ɓay ye ɓá si ma ta̧w sezar ra, mi lek ɓay pih ni hi̧ mbay Rɔm a luki.

²⁶Mí-i ziŋ ɓay a teh-u ɓay vbeh hi̧ gaŋ wah ya, sa̧wu mí-i gi ziŋ ni ké pol woiri-ay, wara le, ké pol woiri mbay Agripa ké i ɓa mbay ziɓri. Ko ya le, fal fakla ɓayay, mi zíŋ ɓay a ketina ké mi vbéh hi̧ mbay ra ɓáy.

²⁷Ɓay mí pih ke mgbal hi̧ sezar dan sɔk tehɓayri ké ku sek ni keni le, ɓa kɔk pihna. »