Read Karang Mbete Fe laɓna Tempuki 26 Bible Online

Mbete Fe laɓna Tempuki 26 - Karang bible

Mbete Fe laɓna Tempuki 26

¹Mbay Agripa sɔk Pɔl ɓahri : « Mahful ƴo ri ɓay mu ɓah ɓay wo. »

²Mí Pɔl ɔr ndɔk vah niri, ke sɔk ɓay tul ye ɓahri : « Pol tehna ƴo ziŋ mi ɓay mi ƴo pol woiri guri-ay. Mbay Agripa, ɓay mí ɓah ɓay gohnari ké ziɓri goh mi, í lah.

³Ɓay fe le, a woiri i tu fe laɓna ziɓri ke sa̧w bolkusol woyri tu-tu. Kandɔkaw, mi goŋ wuri í te suk, í lah ɓay bi-ay ge.

⁴Ziɓri gbam tu sa̧w kaɓna bi ke lele bi sa̧ tu-tu. Ku tu siŋ sina bi ké sakra nzuk biri pi, ké Zurusalem kara pi.

⁵Ku tu mi lewsa̧ kaŋ. Mi mbi mun bi kan ɓil bolkusol Ŋgerzah ɓa kpuh-u kandɔk ké mi ɓa farizi gaŋ. Ku yih le, ku lú lakna ɓay bi-ay.

⁶Aŋay ɓay tul wahɓay ké Ŋgerzah wah ziŋ zih wahri, ké mi ɓaŋ law bi te tulu ziŋ niri, mí ku mgba mi si gel kuŋ salɓay.

⁷Sa̧w wah gun Izarayelri ké boh falu seɗe-aw, nah ƴo dim Ŋgerzah suŋ ke seh kpatara. Ku ƴo geŋ Ŋgerzah ɓá laɓ wahɓayu ɔh. Mbay, ɓay wahɓay ra ké mi ɓahri, Ŋgerzah laɓ ɔh da, mí ziɓri goh mi-ay wo.

⁸Ɓay fe mí a woiri nzukri i sa ko ɓahri, Ŋgerzah mah hi̧ záhri ti̧h ke pa̧ymun a foyu, ya le wo ?

⁹Lewsa̧ a bi mi ko ɓahri, laɓ ani ani gaŋ kara, mi ɓéɓ riŋ Zezu nzuk Nasareɗ ke mahfulri ɓoɗ ɓoɗ.

¹⁰Kaŋ mí-i laɓ ké Zurusalem. Mi mgba gun Ŋgerzahri ɓa ŋgi̧-u ku̧ vul mgbal ke bolkusol ké ŋgernzuk fe puhnari hi̧ mi. Ŋgernzuk fe puhnari kuŋ salɓay hul ku̧ tul woyri kara mi ƴo fal ŋgaŋ ŋgernzukri-aw pi.

¹¹Mi si ke vul misoŋ vul misoŋ. Mi vba̧ nzuk-dih fal Ŋgermbayri ke ŋgerna ŋgerna. Mi yih ɓay kú ma̧y ɓay tul riŋ Ŋgermbay woyri-aw. Law bi fa̧h mi tuh tuh. Mi dih fal woyri si ka̧h puh a ɓoruri pi.

¹²Kaŋ mí nam a hani mbew, mi ƴo si ma Damas ke bolkusol ké ŋgernzuk fe puhnari hi̧ mi ɓay mgba nzukri ké kan law tul Zezu ɓa Ŋgermbay woyri.

¹³Mbay, seh ƴo tul puh. Mi ƴo tul mahful ke bɔh gahru biri kɔɓ ɓáy, mí gel tehna ké kal gel tehna seh ka-kal ra, ur ke nunmbam teh gel gberere gi ɗoŋ na gbuk.

¹⁴A wah riw nah lih gba̧y ku̧ siɓa dale, mi lah kusol nzuk ɓah ɓay ke nzak mbuŋna bi ebere ɓahri : “Sɔl, Sɔl ma, ɓay fe mú-u faŋ bol bi ƴo laɓ mi koseh kari-ay le ? Mu kpuh tul kandɔk fe hɔlna ké laɓ tul kpuhna ke bahgaŋ ye.”

¹⁵Bale mi vbi ni ɓahri : “Mbay, i ɓa ge le ?” Gaŋ tul feri riw yih nzak bi ɓahri : “A bi mi ɓa Zezu ké mu faŋ bol bi ƴo laɓ mi koseh-ay.

¹⁶Wara le mú ur síɓa, mú ƴo tul bɔk wo ɓayu ké mi lu mu ɓa gun-laɓ pihna bi. Sa̧wu mí-i ti̧h nun wo. Mu ɓay sɔk nzukri ɓay kona ké mu ko mi guri-ay ke ɓay fe konari ké mi ɓay hi̧ mu, mu ko-u pi.

¹⁷Mi yá̧ mu ké ndɔk gun Izarayelri, mi yá̧ mu ké ndɔk sa̧wnzuk a ɓoruri pi. Mi ƴo pih mu ma ta̧w sa̧wnzuk a ɓoruri ɓay hi̧ nun woyri ɓá mgbur, ɓay kú ti̧h ke ɓil tirima gi rih ɓil gel tehna, ɓay kú ti̧h ke ndɔk mbay záh tukala el gi ta̧w Ŋgerzah. Salɓay hul ɓay lu ké tul nzukri ké ŋga̧h sal in ziŋ mi. Ku zíŋ gel kaɓna ké sakra nzukri ké Ŋgerzah lu niri ɓa sa̧w ye.”

¹⁹Kaŋ mí mbay Agripa, mi deh ɗina Ŋgermbay ya.

²⁰Mi ƴo tul bolkusol ye gaŋ. Mi ka-kah ɓay lak mbay Ŋgerzah ké tusiɓari gbam ké ziɓri kaɓ ri titilu ke Damas si ka̧h Zurusalem. Mi ka-kah hi̧ sa̧wnzuk a ɓoruri ɓahri, kú mbi law woyri ké tul záhri ma fal, kú el gi ta̧w Ŋgerzah. Fe laɓna woyri ɓá mah hani ke kan law woyri tul Ŋgermbay.

²¹Ɓay sere tul sa̧wnzuk a ɓoruri, mí ziɓri mgba mi ɓil ila vul kani Ŋgerzah. Ku yih i mi.

²²Ŋgerzah kɔr mi kpu̧ru ka̧h guri-ay hi̧ mi ƴo tul te-teh ɓay ye hi̧ ŋgereri pi, hi̧ gunri pi. Mi ɓah ɓay ke tul bi ya, sa ɓa ɓay ké Moyiz ke gun nzak pihna Ŋgerzah a lewsa̧ri sɔk ɓay gina Ŋgermbay mí-i ɓah.

²³Ku ɓah ɓay nazi hul ké ta Ŋgermbay ke ɓay ti̧hna ye pol ɗekrek ké puh záh ke pa̧ymun a foyu. Ke ká-kah ɓay gel tehna ké ƴo teh sa̧w wah ziɓri mah ke sa̧wnzuk a ɓoruri kara pi. »

²⁴Pɔl ƴo ɓah ɓay ye kaŋ ɓáy bale, Fisti ɓah ɓay ɓa mgbe-u ɓahri : « Pɔl, eh mí ɗuk mu. Fe tuna wo a ŋgi̧-u-aw sɔɓ mu ti̧h kɔkɔ da ! »

²⁵Pɔl yih nzak ye ɓahri : « Fisti nzuk a luki, mi ɓa kɔkɔ ya. Mi ƴo ɓah ɓay a ketina ké ƴo ke fulu.

²⁶Mbay Agripa tu sa̧wɓayri ké mi ƴo ɓah-ay te-teh. Mi tu ɓahri, fe mbew ké mu̧h ni mu̧h ta-a, ɓayu ké fe-u laɓ ké duh gel ya.

²⁷Mbay Agripa, i ya̧ ɓay gun nzak pihna Ŋgerzah a lewsa̧ri sɔk ra, kaŋ ya le ? Mi tu ɓahri, i ya̧-ya̧. »

²⁸Agripa yih nzak Pɔl ɓahri : « Zah le, mu ráh mi ti̧h ɓa keretiyȩ. »

²⁹Mí Pɔl ɓahri : « Zah mini doro-u ɓay ɗi-ɗih kara, mi goŋ Ŋgerzah ɓay ké sɔɓ wuri eŋ mi dan sal lari-ŋga̧h mgbalay, a woiri kaŋto ya, mí nzukri gbam ké ƴo lah mi guri-ay pi. »

³⁰Bale mbay Agripa ke guvener Fisti, Bernik ke nzukri ké kaɓ ziŋ niri, gbam ku ur tɔr.

³¹Ku si ɓa ɗih-u tɔɓ, mí ku ɓah ɓay ké haŋsekle woyri ɓahri, gun wo̧ro-ay laɓ fe a hani mbew ké mah i ni ya, mah mgba ni kan vul mgbal ya pi.

³²Kandɔkaw mí Agripa ɓah hi̧ Fisti ɓahri : « Nzukaw ɓá ɗi riŋ mbay Rɔm a luki ya le, nah mah ten ni. »